Ons beskou die wêreld
◼ “’n Span sterrekundiges wat die Subaru- en Keck-teleskope op Mauna Kea [Hawaii] gebruik, het reusagtige, driedimensionele filamente van sterrestelsels ontdek wat oor ’n afstand van meer as 200 miljoen ligjare strek.” Hierdie filamente vorm die grootste bekende struktuur wat nog ontdek is.—WEBWERF VAN DIE SUBARU-TELESKOOP, JAPAN.
◼ Die Verenigde Koninkryk se Kantoor vir Nasionale Statistiek sê dat “die aantal troues in 2006 [in Engeland en Wallis] die laagste in 110 jaar was. Al hoe meer paartjies verkies om saam te bly.”—THE GUARDIAN WEEKLY, BRITTANJE.
◼ Volgens die Pew Forum on Religion and Public Life het “44% van volwassenes van godsdiens verander, vir die eerste keer by ’n godsdiens aangesluit of alle verbintenisse met ’n spesifieke godsdienstradisie verbreek”.—VSA.
Universiteite en onverskillige seks
“Met die uitsondering van ’n paar evangeliese universiteite . . . is daar min verskil tussen openbare, private en Katolieke kolleges en universiteite wanneer dit kom by die kultuur van onverskillige seks wat op kampusse heers—’n kultuur waarin studente seksuele ondervindinge met ’n verskeidenheid maats wil hê.” Dit is wat die Katolieke teoloog en assistent- universiteitsprofessor Donna Freitas gesê het nadat sy navorsing oor seksuele gedrag en godsdiens in Amerikaanse universiteite gedoen het. Volgens die National Catholic Reporter het Freitas gesê dat godsdiens se gebrek aan invloed op geslagsedes nie net toon “hoe kragtig universiteite se kultuur van onverskillige seks” is nie, maar ook “hoe swak godsdienstradisies is wanneer dit daarvoor te staan kom”.
Ouers word betaal om dogters groot te maak
Die regering van Indië bied arm ouers ’n bedrag gelykstaande aan byna R23 000 om dogters groot te maak, berig BBC News. Gesinne sal ’n kontantbedrag ontvang by die geboorte van ’n dogter en op verskeie ander stadiums van haar lewe tot op die ouderdom van 18. Hoewel geslagseleksie en selektiewe aborsies in 1994 onwettig verklaar is, is dit steeds ’n algemene gebruik. Trouens, daar word geskat dat aborsies oor die afgelope 20 jaar die lewens van sowat 10 miljoen vroulike fetusse geëis het, wat in party gebiede ’n ernstige invloed het op die balans tussen die geslagte. Volgens ’n sensus wat in 2001 gedoen is, was daar landwyd 927 meisies vir elke 1 000 seuns onder die ouderdom van ses, en die gaping het al hoe groter geword. In een staat is 793 meisies vir elke 1 000 seuns gebore.
Voëls se reaksie op geraas
Party voëls probeer hard om bo stadsgeraas gehoor te word. Hoewel sulke geraas mense kan irriteer, kan dit vir voëls ’n kwessie van “lewe of dood” wees omdat mannetjies sing om “wyfies te lok en hulle gebied af te baken”, sê die tydskrif New Scientist. Aangesien stadsgeraas harder is teen laer frekwensies, maak party voëls hulle sang hoorbaarder deur saans te sing, harder te sing of hoër te sing. Wat meer is, hierdie aanpasbaarheid is nie net tot voëls in stede beperk nie, sê die tydskrif. Dié wat naby “watervalle en sterk rivierstrome woon, sing ook teen hoër frekwensies”.