’n Laaste toevlug vir bedreigde spesies
DEUR ONTWAAK!-MEDEWERKER IN SPANJE
REGOOR die wêreld word plante en diere al hoe meer bedreig. Volgens sommige wetenskaplikes se berekeninge is daar jaarliks duisende spesies wat uitsterf. Gelukkig bied bergreekse ’n lewensbelangrike veilige hawe vir plante en diere wat vroeër oor groter gebiede gefloreer het. Maar selfs in hierdie toevlugsoorde hou besoedeling en menslike indringing ’n gevaar in. Dit is moontlik nêrens so duidelik as in Europa nie, een van die mees digs bevolkte dele van die planeet.
In die Pireneë, ’n bergreeks tussen Frankryk en Spanje, is verskeie nasionale parke ’n veilige hawe vir die plaaslike flora en fauna. In hierdie beskermde gebiede kry besoekers ’n kans om te kom kyk na wat ’n laaste toevlug vir talle bedreigde spesies geword het. Kom ons kyk kortliks na wat hierdie parke bied.
Spesies wat veg om oorlewing
Blomme. Van die pragtigste veldblomme groei op hoogtes van meer as 1 500 meter bo seespieël. Sneeugentiane en stingellose gentiane (1), met hulle helderblou blomme, bedek die berghange ’n hele ent bo die boomgrens. Verder af teen die hange, knus tussen die beukebome, floreer daar nog vroueskoentjie-orgideë (2). Omdat honderde natuurliefhebbers elke jaar na hierdie blomme kom kyk, staan plaaslike boswagters 14 uur per dag wag om te verseker dat hierdie kosbare blomme nie beskadig of uit die grond gehaal word nie.
Skoenlappers. Ongerepte vlaktes in die Alpe wat oortrek is met veldblomme, voorsien ’n veilige hawe vir kleurvolle skoenlappers. Die groot Apollovlinder (3), met sy helderrooi vlerkkolle, fladder tussen die distels rond. Kleiner blomme word gedurig besoek deur bloutjies en kopervlerkies (4) van die Lycaenidae-familie. Die sondagsrokkie- en “klein vos”-skoenlappers vlieg vinnig heen en weer teen die hoër hange.
Diere. Baie van Europa se groter soogdiere het vroeër oor uitgestrekte dele van die vasteland voorgekom. Maar party is deur jagters tot op die randjie van uitwissing gedryf. Wolwe, bere, losse (5), bisons, gemse en steenbokke (6) kom nou in net ’n paar bergreekse of in die verre noorde voor. Die pragtige diere in hierdie Pirenese reservate bied ’n duidelike blik op die natuurlewe wat vroeër in hierdie berge gefloreer het. Sommige nadenkende besoekers wonder wat die toekoms inhou vir die paar wat oorbly.
Ons het rede om te vertrou dat die Skepper, Jehovah, die Een “aan wie die pieke van die berge behoort”, omgee vir die natuurlewe op die berge (Psalm 95:4). In een van die psalms sê God: “Aan my behoort al die wilde diere van die woud, die diere op ’n duisend berge. Ek ken al die voëls van die berge goed” (Psalm 50:10, 11). Jehovah se besorgdheid oor die aarde en die lewende wesens daarop gee ons alle rede om te glo dat hy nooit sal toelaat dat die diere van die berge verdwyn nie.
[Foto-erkenning op bladsy 17]
La Cuniacha