‘Gaan maak dissipels!’—Doen jy dit?
1 Een van die grootste vreugdes wat jy as Koninkryksverkondiger kan smaak, is om iemand te help om tot ’n juiste kennis van die waarheid te kom. Jou hart sal met vreugde en dankbaarheid teenoor Jehovah gevul word namate die persoon se kennis van die waarheid en waardering daarvoor toeneem. Ons is terdeë daarvan bewus dat hoewel ons die saadjies van waarheid plant en natmaak, dit Jehovah is wat hulle laat groei. Maar hoe opwindend is dit tog om ’n regskape persoon te help om die weg na die lewe te vind!—1 Kor. 3:6-9.
2 Is jy ’n gesinshoof ? Indien wel, hou jy gereeld ’n Bybelstudie met jou gesin? Dit is ’n baie belangrike saak. Gesinshoofde is voor Jehovah verantwoordelik om hulle gesinslede die weg na die lewe te leer en hulle daarop te lei (Deut. 6:4-7; Ef. 5:25-29; 1 Tim. 5:8). Aanvaar gerus jou verantwoordelikheid om dissipels van hulle te maak.
3 Kan jy, benewens jou gesinsbybelstudie, ook ’n studie met iemand anders hou? Nog belangriker: Besef jy watter voorreg en verantwoordelikheid jy het om die waarheid aan iemand anders te leer en sodoende Jesus se bevel te gehoorsaam? (Matt.28:19). Dit wil voorkom of baie meer verkondigers ’n tuisbybelstudie kan hou. In party gebiede verg dit ware deursettingsvermoë om ’n studie te kry. Herhaalde herbesoeke is nodig. Miskien het jy al probeer, maar kon nog niemand vind wat gewillig is om te studeer nie. Wat kan jy doen?
REGTE GESINDHEID BELANGRIK
4 Jy kan begin deur jou af te vra: Wat is my gesindheid teenoor Bybelstudies? Wil ek regtig ’n studie hê? Beskou ek hierdie deel van die bediening as belangrik en lewensreddend, omdat ek besef dat die meeste mense in die wêreld ‘dood is deur hulle misdade’?—Ef. 2:1.
5 Verkondigers sowel as pioniers het al aan die Genootskap geskryf om te vertel hoe Jehovah hulle vurige gebede verhoor het toe hulle hom spesifiek gevra het om hulle te help om belangstellendes te vind met wie hulle Bybelstudies kan hou (Rom. 12:12; 1 Thess. 5:17). Het jy dit gedoen? Het jy jou hemelse Vader gesmeek vir die voorreg om iemand te vind wat opreg na die waarheid soek en dan met so ’n persoon te studeer?—Eseg. 9:4.
6 Gedurende die 1986-diensjaar is daar gemiddeld elke maand 40 531 Bybelstudies in Suid-Afrika, Botswana, Lesotho, St. Helena, Suidwes-Afrika en Swaziland gehou. Dit is inderdaad prysenswaardig. Gedurende daardie selfde tydperk is 994 967 Bybels, boeke en boekies sowel as bykans 4 miljoen tydskrifte versprei. Die Genootskap se publikasies is dus in talle huise waar daar nog nie studies gehou word nie. Dit is duidelik dat daar uitstekende potensiaal is om meer tuisbybelstudies te begin.
7 Kan dit wees dat ons meer ingestel moet wees op Bybelstudies en ’n groter poging moet aanwend om studies in die “Kyk”—brosjure te begin? Het jy ’n positiewe gesindheid in die bediening omdat jy besef dat die engele met die werk help deur Jehovah se volk na die deure te lei van die wat graag die “ewige evangelie” wil hoor? (Openb. 14:6). Die groot vreugde wat jy sal smaak wanneer jy die waarheid aan iemand anders leer, sal dubbel en dwars vergoed vir die inspanning wat dit van jou verg om ag te gee op Jesus se bevel om ‘dissipels te maak’ en hulle te leer.