Help ander om die waarde van die Bybel te besef
1 Jesus het in sy dissipels se behoeftes voorsien. Lukas 24:45 sê: “Hy [het] hulle verstand ten volle geopen om die betekenis van die Skrif te begryp.” Hy het geweet dat dit noodsaaklik vir hulle was om God se Woord, die Bybel, te bestudeer en te verstaan as hulle sy Vader se goedkeuring wou wegdra (Ps. 1:1, 2). Dit is ook wat ons met ons predikingswerk wil bereik. Ons doel is om Bybelstudies te begin, waar ons mense ‘kan leer om alles te onderhou wat Jesus beveel het’ (Matt. 28:20). Met dit in gedagte volg hier ’n paar wenke oor wat nuttig kan wees wanneer jy herbesoeke doen.
2 As jy aanvanklik die boek “Die mensdom se soeke na God” bespreek het, kan jy jou bespreking so voortsit:
◼ “Hoe dink jy, as ’n godsdienstige persoon, behoort godsdiens ’n mens se gedrag te beïnvloed? [Laat die huisbewoner antwoord.] Wat Jesus Christus in Matteus 7:17-20 gesê het, gee ons die riglyne wat die ware godsdiens behoort te volg.” Lees die teks direk uit die laaste deel van paragraaf 19 op bladsy 12 in die boek Die mensdom se soeke na God. Vra die huisbewoner dan wat hy in die prent op bladsy13 sien. “Hoewel miljoene sê dat hulle in God glo, verloën baie hom deur hulle werke. [Lees die eerste twee sinne van paragraaf 20.] Hierdie gewelddadige optrede identifiseer godsdienste wat nie Christus se opdrag gehoorsaam dat ons mekaar en selfs ons vyande moet liefhê nie. Miskien kan ons met my volgende besoek bespreek wat ’n godsdiens moet doen as dit wel goeie vrugte voortbring.”
3 As jy met iemand gepraat het wat belangstelling in die Bybel getoon het, sal hierdie benadering dalk doeltreffend wees om ’n studie te begin:
◼ “Feitlik almal met wie jy praat, sal vir jou sê dat hulle graag in ’n vreedsame en veilige wêreld wil lewe. Waarom het ons ’n wêreld met soveel beroeringe en geweld as dit is wat almal wil hê? [Laat die huisbewoner antwoord.] Die Nuwe Wêreld-vertaling wys vir jou waar in die Bybel jy die antwoord op daardie vraag kan vind.” Blaai na bladsy 439 en verwys na “Bybelonderwerpe vir bespreking” nr. 18a, “Wie vir wêreldbenoudheid verantwoordelik is”. Lees 2 Korintiërs 4:4. Verduidelik hoe God die Duiwel gaan vernietig en ’n wêreld van blywende vrede en geluk tot stand gaan bring. Lees Openbaring 21:3, 4. Jy kan dan sê: “Wanneer ek jou weer besoek, sal ek jou graag ’n paar tekste wil wys wat verduidelik waarom jy na ’n wêreld sonder benoudheid kan uitsien.”
4 As jy die direkte benadering gebruik het om ’n studie te begin en daar ’n goeie reaksie was, kan jy die volgende sê wanneer jy teruggaan:
◼ “Toe ons voorheen gepraat het, het ons ’n paar redes bespreek waarom dit nuttig is om die Bybel te bestudeer. ’n Opregte poging om dit tot ’n groter mate te doen, kan ons help besef wat God vir ons in die vooruitsig stel. [Lees Johannes 17:3.] Ons het ’n Bybelstudieprogram ontwikkel wat duisende al gehelp het om meer te leer oor wat God belowe het en hoe ons hom kan behaag.” Wys vir die huisbewoner die Paradys op aarde-boek, hersien die hoofstuktitels en demonstreer hoe ons ’n Bybelstudie hou.
5 As jy opregte mense kan help om die voortreflike waarde van God se Woord te besef, het jy hulle op die beste manier moontlik gehelp. Die wysheid wat hulle kan leer deur ’n studie daarvan kan “’n lewensboom” wees, wat hulle baie geluk sal meebring.—Spr. 3:18.