Jongmense vra . . .

Hoe kan ek ’n gepaste rolprent kies?

’NVETERAANROLPRENTSTER wat kort gelede nog opgetree het, is so aangehaal: “Mense . . . vra my waarom ek nooit meer na rolprente gaan kyk nie. Daar is so baie bedorwe rolprente.” Sy het besluit om rolprente as vermaaklikheidsvorm geheel en al uit te skakel.

’n Tienderjarige meisie, Denise, voel ook so, maar sy doen ’n ietwat minder drastiese oplossing aan die hand. “Daar is gewoonlik nie veel om na te kyk nie”, verduidelik sy, “omdat dit meestal gewelddadig is. Ek is dus baie kieskeurig oor waarna ek kyk.”

Jy geniet dit ongetwyfeld ook om van tyd tot tyd na ’n rolprent te kyk. Dit is dus verstaanbaar as jy rolprente nie geheel en al as vermaaklikheidsvorm wil uitskakel nie. Maar soos ons vorige nommer getoon het—en die vermaaklikheidsbladsye van enige koerant sal dit staaf—word daar vandag baie min rolprente vervaardig waarna ’n jong Christen kan kyk.a Dit is nie ’n saak wat lig opgeneem moet word nie, want die rolprente waarna jy kyk, weerspieël watter norme vir jou belangrik is. Dit vertel baie van die soort omgang wat jy geniet, die taal wat jy duld, die geslagsedes wat jy voorstaan.

Die Bybel spoor ons aan om ‘die kwaad te haat’ (Psalm 97:10). Kan jy dit werklik doen as jy gereelde dosisse sataniese bloedvergieting, verminking en geweld of eksplisiete tonele van geslagsonsedelikheid inneem? Allermins. Die jongmens wat waarlik goddelike beginsels hoogag, probeer die Bybel se raad in Filippense 4:8 volg: “Verder, broeders, alles wat waar is, alles wat eerbaar is, alles wat regverdig is, alles wat rein is, alles wat lieflik is, alles wat loflik is—watter deug en watter lof daar ook mag wees, bedink dit.” Dit beteken nie noodwendig dat jy van alle rolprente moet wegbly nie, maar dit beteken dat jy baie selektief moet wees oor waarna jy kyk. Hoe kan jy dit doen?

Ouderdomsbeperkings—’n Onfeilbare gids?

In die Verenigde State word rolprente geklassifiseer volgens die standaarde wat deur die Rolprentvereniging van Amerika bepaal word. ’n Lettersimbool dui aan of die rolprent as gepas beskou word vir die gewone publiek, of dit ouerlike toesig vereis en of dit tot volwassenes beperk moet word. Die wyse waarop seks en geweld, alkohol- en dwelmmisbruik, vuil taal, en dies meer in die rolprent uitgebeeld word, is gewoonlik die grondslag waarop dit beoordeel word.

Sulke klassifikasiestelsels het weliswaar tekortkominge en is dikwels inkonsekwent, maar hulle gee ’n voornemende kyker ten minste ’n idee waaroor die rolprent handel en of dit gepas sal wees om daarna te kyk of nie. As daar ’n soortgelyke stelsel in jou land is, sal jy dit ongetwyfeld nuttig vind. Jou ouers kan die ouderdomsbeperkings op soortgelyke wyse gebruik om te bepaal na watter rolprente jy mag kyk.

Maar ouderdomsbeperkings kan misleidend wees. Onthou: Diegene wat die ouderdomsbeperkings vasstel, onderskryf moontlik nie Bybelse waardes nie. En met die wêreld se verslegtende sedelike standaarde word baie rolprente wat net ’n paar jaar gelede skokkend sou wees, nou as aanvaarbaar vir gewone gehore beskou.

Jong DeMarlo het dit uitgevind toe hy na ’n rolprent gaan kyk het wat hy gedink het ’n aanvaarbare klassifikasie het. Maar dit was vol “vloekery en geweld”. Hoewel gepubliseerde ouderdomsbeperkings jou dus kan help, moet dit nie die enigste grondslag wees waarvolgens jy besluit waarna om te kyk nie. Die Bybel maan: “Die eenvoudige glo elke woord, maar die skrandere let op sy voetstappe.”—Spreuke 14:15.

Vind meer uit

Wat is ’n paar ander riglyne wat jy kan gebruik? Rolprentresensies en advertensies kan jou ook ’n idee gee waaroor die rolprent handel. Maar jy moet weer eens versigtig wees. ’n Rolprentresensie gee net iemand anders se opinie weer. En ’n advertensie kan dit doelbewus verswyg dat ’n rolprent walglike tonele bevat.

’n Tiener genaamd Connie sê: “Ek het gevind as jy weet wie die hoofrolspelers in die rolprent is dit jou dikwels ’n idee gee van wat moontlik in die rolprent uitgebeeld gaan word.” Christenportuurs wat dieselfde Bybelse norme as jy huldig, weet moontlik of ’n sekere rolprent aanvaarbaar is. En ’n teaterbestuurder of iemand by die kaartjieskantoor kan ook eerlike inligting gee. Maar mense is gewoonlik geneig om jou te vertel wat hulle werklik van ’n rolprent geniet het. Vra gerus wat sleg is omtrent die rolprent. Wees spesifiek. Vra of dit tonele van bloedige geweld, eksplisiete seks of besetenheid bevat.

Jou ouers kan ook ’n goeie bron van inligting wees. Jong Vanessa sê: “Ek raadpleeg my ouers. As hulle dink dis in die haak, sal ek daarna gaan kyk.”

Dieselfde geld wanneer jy videobande huur. Daarbenewens moet jy die houer of omslag noukeurig bestudeer. Is daar enigiets omtrent die illustrasies of woorde wat aandui dat die rolprent onaanvaarbaar is? Sit dit dan terug! Dit kan ook help om met ’n winkelklerk te praat wat reeds die rolprent gesien het. Spreuke 14:16 sê: “’n Wyse man is versigtig en wyk af van die kwaad, maar die dwaas is onverskillig en kom skielik tot ’n val.”—The New English Bible.

Stap uit, skakel dit af

Maar sê nou jy het reeds ’n videoband gehuur en jy sien dat die inhoud twyfelagtig is? Die oplossing is eenvoudig: Skakel dit af! Dit is dalk nie maklik nie. Jy vind dalk dat jy emosioneel betrokke is by die verhaal of die karakters. Jy is dalk baie nuuskierig om uit te vind hoe die rolprent eindig. Maar om af te wyk van die kwaad is ongetwyfeld die beste ding om te doen.—Vergelyk Mattheüs 5:29, 30.

Die situasie kan ’n bietjie moeiliker wees wanneer jy saam met vriende in ’n teater is en die rolprent raak onsmaaklik. ’n Tiener genaamd Joseph het hom in hierdie einste situasie bevind. Advertensies vir ’n onlangse rolprent het gesê dat dit nie misgeloop moet word nie. Maar Joseph sê: “Binne die eerste vyf minute was daar drie geweld- en naaktonele.” Joseph het hoflik vir sy vriende gesê wat hy van plan was om te doen en toe uitgestap. Het hy verleë gevoel? Joseph sê: “Glad nie. My eerste gedagte was aan Jehovah en om hom te behaag.”

Portuurdwang teen so ’n standpunt kan baie sterk wees. Druk kan selfs kom van jongmense wat deur Christenouers grootgemaak is, maar sulke jongmense se gewete het afgestomp geraak omdat hulle na te veel twyfelagtige rolprente kyk (1 Timotheüs 4:2). Hulle sal jou dalk daarvan beskuldig dat jy ongebalanseerd of alte regverdig is. Maar ‘behou ’n goeie gewete’ pleks van voor portuurdwang te swig (1 Petrus 3:16). Wat werklik tel, is nie wat jou vriende van jou dink nie maar wat Jehovah van jou dink! En as jou vriende met jou rusie maak omdat jy jou gewete volg, is dit tyd dat jy ’n paar nuwe vriende kry (Spreuke 13:20). Jy is die een wat uiteindelik jou oë, ore en figuurlike hart moet bewaak.—Vergelyk Job 12:11; 31:1; Spreuke 4:23.

Behou ’n goeie gewete

Jong Georgia het die gewoonte gehad om skelmpies na rolprente te gaan kyk wat kwansuis nie vir haar ouderdomsgroep bedoel was nie. Maar met verloop van tyd het dit haar begeerte geword om ’n goeie verhouding met God te hê. Sy het opgehou om na twyfelagtige rolprente te kyk en het ander lekker dinge gevind om saam met haar Christenvriende te doen. Georgia sê: “Daar is niks wat meer swaar op my gewete druk nie. En ek kan nou waarlik rustig slaap omdat ek innerlik werklik skoon voel.”

Wil jy rein wees in die oë van die Ondersoeker van harte, Jehovah God? (Spreuke 17:3, NW). Dan moet jy versigtig wees oor wat jy in jou hart inneem. Moenie jouself onnodig aan ongevraagde geweld, seksuele uitbuiting of vuil taal blootstel nie; dit sal net jou sin vir wat reg is, afstomp en jou hart verontreinig. Wees soos die psalmis wat gebid het: “Wend my oë af, dat hulle geen nietigheid sien nie.”—Psalm 119:37.

As jy versigtig en selektief is, sal jy jouself nie net teen skadelike invloede beskerm nie maar sal jy daardie ‘skoon gevoel’ kan geniet waarvan jong Georgia gepraat het. En geen kameratruuks van Hollywood kan daardie gevoel ewenaar nie!

[Voetnoot]

[Lokteks op bladsy 11]

Baie rolprente wat ’n paar jaar gelede skokkend was, word nou as aanvaarbaar beskou

[Prent op bladsy 10]

Jou ouers weet dalk of ’n geadverteerde rolprent afkeurenswaardig is