Jy word genooi na die “Liefhebbers van Vryheid”-Streekbyeenkoms
DIE onderwerp van vrede het sedert November 1989 belangiker as ooit tevore geword. Veral die nasies van die Oos-Europese lande het meer politieke vryheid as wat hulle die afgelope 40 jaar en langer gehad het.
Maar daar is ’n vryheid wat baie belangriker is as enige politieke vryheid. Ons kan daarvan in God se Woord, die Bybel, lees. Jesus Christus het eenkeer gesê: “Julle sal die waarheid ken, en die waarheid sal julle vrymaak” (Johannes 8:32). Ja, toegewyde Christene is vrygemaak van mensevrees en van slawerny aan die sonde en die dood, soos ons in Romeine 6:18, 22 lees. Ons lees ook “waar die Gees van die Here is, daar is vryheid” (2 Korinthiërs 3:17). Trouens, God se Woord bied die wonderlike hoop “dat ook die skepping self vrygemaak sal word van die slawerny van die verganklikheid tot die vryheid van die heerlikheid van die kinders van God”.—Romeine 8:21.
As enigiemand nóú Christelike vryheid wil verkry, moet hy hom waarlik inspan. Hy kan beslis nie die maklikste uitweg volg nie. En om aan te hou om hierdie vryheid te geniet, verg bykomende inspanning vanweë die magte wat geneig is om ons van daardie vryheid te beroof: Satan die Duiwel, sy goddelose wêreld en ons oorgeërfde sondige neigings. Jehovah God het hulp voorsien deur sy geïnspireerde Woord, deur sy heilige gees en deur sy sigbare organisasie.—Lukas 11:13.
Om alle liefhebbers van vryheid te help om hulle greep op vryheid te verstewig, laat hierdie jaar se streekbyeenkomste van Jehovah se Getuies reg geskied aan die tema “Liefhebbers van Vryheid”. Hierdie byeenkomste wat drie dae sal duur, sal Vrydagoggend 9:30 begin en Sondag 4:00 nm. eindig. Almal wat hierdie byeenkomste bywoon, sal geestelik verfris en opgebou word deur besielende toesprake, interessante onderhoude, leersame demonstrasies en ’n treffende hedendaagse drama; ons moet ook nie die vreugde van hartverblydende omgang met ou en nuwe vriende, die genot om saam met duisende ander Koninkryksliedere te sing en ons deelname aan hartgrondige openbare gebede oor die hoof sien nie.
Mag alle toegewyde knegte van Jehovah sorg dat absoluut niks hulle verhinder om Vrydagoggend teenwoordig te wees wanneer hierdie byeenkomste begin nie. En maak seker dat jy nie net ’n Bybel en liedereboek saambring nie, maar ook ’n potlood en aantekeningboek om aantekeninge te maak. Jy moet ook met ’n ware bewustheid van jou geestelike behoefte as deel van ’n vrye nasie kom.—Mattheüs 5:3.