’n Spesiale Koninkryksnuus vir almal
1 Vanaf 24 April het ons die spesiale Koninkryksnuus begin versprei wat oral die belangstelling van besorgde mense gewek het! Die boodskap daarin is nie net tydig nie, maar ook dringend. Verkondigers in elke gemeente het hulle heelhartige ondersteuning gegee en wil graag hierdie boodskap by duisende mense laat. Het jy ’n volle aandeel daaraan?
2 ’n Besending Koninkryksnuus is na elke gemeente gestuur wat elke verkondiger van omtrent 50 en elke pionier van 250 voorsien. Hoeveel het jy al versprei? Het jy, as jy nie soveel kon doen as wat jy graag sou wou doen nie, aan maniere gedink waarop jy meer kan doen voor die verspreiding op 14Mei eindig? Kan jy hulppionierdiens doen? Kan jy die ekstra velddiensvergaderinge gedurende die week benut, soos dié vir aandgetuieniswerk?
3 Die ouer manne sal sorgvuldig kyk of die gebied gedek word. As die toegewese gemeente sekere dele nie kan werk nie, moet die ouer manne naburige gemeentes vra om te help. Ons heelhartige pogings, tesame met goeie samewerking tussen gemeentes, behoort die werk gedoen te kry.
4 Jy het waarskynlik ekstra vreugde in hierdie werk gesmaak, aangesien so baie daaraan kon deelneem, met inbegrip van nuwe verkondigers en kinders. Hierdie gees van vreugde sal hopelik voortduur en almal aanspoor om terug te gaan na mense wat gunstig gereageer het. Ons is aangespoor om noukeurige huis-tot-huis-verslae te hou en aantekeninge te maak van diegene wat belangstelling getoon het. Die laaste deel van Mei sal ’n goeie tyd wees om ons toe te lê op herbesoeke met die doel om nuwe studies te begin.
5 Wat kan ons sê wanneer ons teruggaan? Jy sal dit dalk treffend vind om te sê: “Jy onthou dalk die gedrukte inligting wat ek onlangs by jou gelaat het; ek hoop jy het ’n kans gehad om dit te lees en daaroor na te dink. Die boodskap daarin het tot heelwat besprekings in ons gemeenskap gelei, aangesien dit lewensbelangrike kwessies aanroer waarvoor die hele mensdom te staan kom.” Verwys na van die gedagteprikkelende stellings op die tweede bladsy en vra dan: “Wat dink jy moet ons doen om seker te maak dat ons voorbereid is op wat die toekoms inhou?” Laat die huisbewoner antwoord. As hy belangstelling toon, kan jy ander punte op bladsye2-4 van die Koninkryksnuus bespreek en ’n Bybelstudie aanbied of, as dit nie moontlik is nie, die jongste tydskrifte.
6 As jy in ’n ander gemeente se gebied werk, moet jy die name ingee van enige belangstellendes wat jy gevind het sodat daardie gemeente se verkondigers die herbesoeke kan doen. As jy daarenteen herbesoeke gekry het om te doen, moet jy so spoedig moontlik teruggaan.
7 Die spesiale verspreiding van hierdie Koninkryksnuus het opgewondenheid gewek en ons almal beweeg om ons pogings in die Koninkrykspredikingswerk te verskerp. Ons kan daarvan verseker wees dat dit ’n reusesukses sal wees wat mense in alle wêrelddele meer bewus sal maak van Jehovah se groot naam en voorneme (Jes. 12:4,5). Hoe meer ons kan doen, hoe groter sal ons vreugde wees.—Ps. 126:3.