Јеһованын кәламы ҹанлыдыр
«Зәбур» китабынын икинҹи һиссәсиндән диггәтәлајиг фикирләр
ЈЕҺОВАНЫН Шаһидләри чәтинликләр вә сынагларла гаршылашаҹагларыны билирләр. Һәвари Павел јазырды: «Аллаһ јолунда Мәсиһ Исаја бағлы олараг јашамаг истәјәнләрин һамысы да тә’гибә мә’руз галаҹагдыр» (2 Тимотејә 3:12). Сынаг вә тә’гибләрә таб ҝәтириб, Аллаһ гаршысында нөгсансызлығымызы горумагда бизә нә көмәк едә биләр?
Мәзмурларын беш топлусундан икинҹиси бизә бу саһәдә бөјүк көмәкдир. 42-дән 72-дәк мәзмурлардан ҝөрүрүк ки, сынагларын өһдәсиндән уғурла ҝәлмәк үчүн үмидимизи бүтөвлүклә Јеһова Аллаһа бағламалы, гуртулушу јалныз Ондан ҝөзләмәлијик. Неҹә дә мүһүм бир фикирдир! «Зәбур» китабынын икинҹи һиссәси, Аллаһын Кәламындакы диҝәр китаблар кими, һәтта бу ҝүн дә «ҹанлы вә тә’сирли»дир (Ибраниләрә 4:12).
ЈЕҺОВА АЛЛАҺ БИЗӘ ‘СЫҒЫНАҸАГ [ВӘ] ГҮВВӘТДИР’
Левили сүрҝүндәдир. Мә’бәддә ибадәт едә билмәдијиндән, о өзүнә тәсәлли верир: «Мәним гәлбим, нијә гырылмысан? Ахы нијә бу көксүмдә тәлашланырсан? Үмидини јенә Аллаһа бағла» (Мәзмур 42:5, 11; 43:5). Тәкрарланан бу ајәнин сајәсиндә 42 вә 43-ҹү мәзмурлардакы үч бәнд бир поеманы тәшкил едир. 44-ҹү мәзмур дара дүшмүш Јәһудадан өтрү Аллаһа јалварышдыр. Ола биләр, бу јалварыш, падшаһ Хизгијанын дөврүндә Јәһуданын ашшурлулар тәрәфиндән зәбт олунмаг тәһлүкәси јаранан замана аиддир.
Падшаһ тојуну тәсвир едән 45-ҹи мәзмур Хиласкар Падшаһ һаггында пејғәмбәрлик нәғмәсидир. Нөвбәти үч мәзмурда Јеһова Аллаһ ‘сығынаҹаг [вә] гүввәт’, «бүтүн јер үзүнүн бөјүк Падшаһы» вә «алынмаз гала» кими тәсвир едилир (Мәзмур 46:1; 47:2; 48:3). 49-ҹу мәзмур инсанын һеч вахт ‘өз өмрүнү сатын ала билмәјәҹәјини’ ҝөстәрир (Мәзмур 49:7). Икинҹи топлуја дахил олан илк сәккиз мәзмурун мүәллифи Гораһын оғуллары һесаб олунур. 50-ҹи мәзмур исә Асафын әсәридир.
Мүгәддәс Китаб суалларына ҹаваблар:
44:19 — «Чаггалларын дијары» һарадыр? Ола биләр, мәзмурчу ҹәсәдләрин чаггаллара јем олдуғу дава мејданына ишарә едир.
45:13, 14а — ‘Падшаһын јанына ҝәтирилән’ «шаһ гызы» кимдир? О, «милләтләрин Һөкмдары» Јеһова Аллаһын гызыдыр (Вәһј 15:3). Бу гыз 144 000 мәсһ олунмуш мәсиһчинин јығынҹағыны тәмсил едир. Јеһова онлары Өз руһу илә мәсһ едиб өвладлыға ҝөтүрүр (Ромалылара 8:16). Јеһованын «гызы», «әри үчүн һазырланмыш бәзәкли бир ҝәлин кими» нишанлысынын, Хиласкар Падшаһын јанына ҝәтирилир (Вәһј 21:2).
45:14б, 15 — ‘Рәфигәләр’ кимләри тәмсил едир? Рәфигәләр — јер үзүндә јашајан мәсһ едилмиш мәсиһчиләрә гошулуб, онлара көмәк едән ‘бөјүк издиһамдыр’. «Бөјүк мәшәггәтдән» сағ чыхдыглары үчүн Хиласкар Падшаһын ҝөјдә тоју битәндә онлар јер үзүндә олаҹаглар (Вәһј 7:9, 13, 14). Онда онлар «севинҹлә, шадлыгла» долаҹаглар.
45:16, (КМ) — Падшаһын аталарынын јеринә оғулларынын олмасы нә демәкдир? Иса Мәсиһ јер үзүндә доғуланда онун ‘аталары’ вә ја әҹдадлары оланлар, Миниллик Һакимијјәти дөврүндә һәјата гајтарылараг онун оғуллары олаҹаглар. Онлардан бә’зиләри јер үзүндә тә’јин едилмиш ‘рәисләрин’ сырасында олаҹаг.
50:2 — Јерусәлим нәјә ҝөрә «гүсурсуз, ҝөзәл» адланыр? Бу сөзләр онун заһири ҝөзәллијинә аид дејил. Јеһова Јерусәлими сечдији үчүн о ҝөзәл иди. Аллаһ Өз мә’бәдинин бу шәһәрдә тикилмәсинә әмр вермәклә ону иззәтләндирмиш, Јерусәлими мәсһ едилмиш падшаһларынын отурдуғу пајтахт етмишди.
Бизим үчүн ибрәт дәрсләри:
42:1-3. Гураглыгда суја һәсрәт галан марал кими, левили Јеһованын һәсрәтини чәкирди. Левили Јеһованын мә’бәдиндә хидмәт едә билмәдији үчүн о гәдәр гүссәли иди ки, ‘ҝөз јашлары ҝеҹә-ҝүндүз гидасы олмушду’, јә’ни иштаһасы күсмүшдү. Аллаһымыз Јеһоваја гардашларымызла бирликдә ибадәт етмәк имканыны гијмәтләндиририкми?
42:4, 5, 11; 43:3-5. Әҝәр биздән асылы олмајан һәр һансы бир сәбәбә ҝөрә мәсиһчи јығынҹағындан мүвәггәти олараг ајры дүшмүшүксә, ҝәлин кәдәрләнмәјәк. Баҹы-гардашларымызла үнсијјәтин хош хатирәләри бизә ҝүҹ верәҹәк. Ола биләр, илк вахтлар бу хатирәләр тәнһалыг һиссини даһа да шиддәтләндирсин, амма ејни заманда онлар бизә хатырладаҹаглар ки, Аллаһ сығынаҹағымыздыр вә вәзијјәтимизи јүнҝүлләшдирәнә гәдәр Ону ҝөзләмәлијик.
46:1-3. Башымыза ҝәлән һадисә вә ја бәлалардан асылы олмајараг, биз әмин олмалыјыг: јалныз «Аллаһ бизә сығынаҹагдыр, гүввәтдир»!
50:16-19. Јалан данышан вә ја шәр әмәл едән һеч бир инсанын Аллаһы тәмсил етмәјә һаггы јохдур.
50:20. Башгаларынын нөгсанларыны аләмә јајмагданса, онлара ҝөз јуммалыјыг (Колослулара 3:13).
«ЕЈ ГӘЛБИМ, СҮКУТЛА АЛЛАҺЫ ҜӨЗЛӘ»
Бу група дахил олан мәзмурлар Давудун Бат-Шева илә ҝүнаһындан сонра јаздығы үрәкдән ҝәлән дуа илә башлајыр. 52-дән 57-дәк мәзмурларда охујуруг ки, Јеһова, гајғы јүкләрини Она верәнләрә вә хиласы Ондан ҝөзләјәнләрә гуртулуш бәхш едир. 58-дән 64-дәк мәзмурларда сыхынтылы вахтларында Давудун Јеһованы өзүнә сығынаҹаг сечмәсиндән бәһс едилир. «Еј гәлбим, сүкутла Аллаһы ҝөзлә, чүнки үмидим Ондадыр» (Мәзмур 62:5).
Хиласкарымызла јахын достлуг мүнасибәтләри бизи Онун ‘шәрәфли исмини тәрәннүм етмәјә’ тәшвиг етмәлидир (Мәзмур 66:2). Она, 65-ҹи мәзмурда јер үзүнә сәхавәтлә бәрәкәт верән Аллаһ, 67 вә 68-ҹи мәзмурларда азад едән Аллаһ, 70 вә 71-ҹи мәзмурларда исә Хиласкар Аллаһ кими тәрәннүм едилир.
Мүгәддәс Китаб суалларына ҹаваблар:
53:1 — Аллаһын мөвҹудлуғуну данан адам һансы мә’нада ‘ахмагдыр’? Бурадакы ‘ахмаг’ сөзү әгли чатышмазлығы билдирмир. Аллаһын мөвҹудлуғуну данан адамын мә’нәви ҹәһәтдән ахмаг олмасы Мәзмур 53:1-4 ајәләриндән ҝөрүнүр.
58:3-5 — Пис адамлар һансы мә’нада илан кимидирләр? Писләрин башга адамлар һаггында јајдыглары јалан санки илан зәһәридир. Онлар өз гурбанларынын јахшы адыны јаланлары илә бәднам едирләр. «Гулагларыны тыхајан ҝүрзә»тәк онлар мәсләһәтә мәһәл гојмур, ислаһ олунмаг истәмирләр.
58:7 — Залымлар һансы мә’нада ‘су кими ахыб јох олурлар’? Давуд ола биләр, Вә’д едилмиш дијардакы чајлар һаггында дүшүнүрдү. Дашгындан сонра чајын сәвијјәси галхыр вә су чох ити ахыб ҝедир. Давуд да залымларын тез бир заманда бу ҹүр ахыб ҝетмәси вә ја јох олмасы барәсиндә дуа едирди.
68:13 — Ҝөјәрчинин ганадларынын ҝүмүш кими бәрг вурмасы, түкләринин гызыл кими парламасы нә демәкдир? Мави-боз ҝөјәрчинләрин бә’зи ләләкләри әлван рәнҝдә олур. Ҝүнәшин шүалары алтында гушларын түкләри метал парылтысы алыр. Ҝүман ки, Давуд дөјүшдән зәфәрлә гајыдан исраилли дөјүшчүләри ити ганадлы вә парлаг ҝөркәмли ҝөјәрчинә бәнзәдирди. Бә’зи алимләрин зәннинҹә, бу тәсвир даһа чох инҹәсәнәт әсәринә вә ја гәнимәт кими әлә кечирилмиш бир әшјаја ишарәдир. Һәр һалда, Давуд бу мәзмурда Јеһова Аллаһын Өз халгына вердији гәләбәләр барәсиндә охујурду.
68:18, (ЈД) — «Инсанлар тимсалында һәдијјәләр» ифадәси кимләрә аид иди? Инсанлар тимсалында һәдијјәләр — Вә’д едилмиш дијарын истиласы заманы ҝөтүрүлмүш бә’зи әсирләр иди. Онлар һәм дә левилиләрә ишләриндә көмәк едирдиләр (Езра 8:20).
68:30 — «Гамышлыгда јашајан һејванлары... тәнбеһ ет» хаһиши нә демәкдир? Јеһованын халгынын дүшмәнләрини вәһши һејванлара бәнзәдән Давуд, Аллаһдан хаһиш едирди ки, онлары тәнбеһ етсин, јә’ни онларын пислијә јөнәлән ҝүҹүнү идарә етсин.
69:23 — «Белләри онлары ләрзәјә салсын» ифадәси һансы мә’наны дашыјыр? Ағыр әшјалары галдырыб дашымаг кими физики иши јеринә јетирмәк үчүн бел наһијәсиндәки әзәләләр мөһкәм олмалыдыр. Зәиф бел ҝүҹүн итирилмәсинә ишарә едир. Давуд дуа едирди ки, Аллаһ дүшмәнләрини ҝүҹләриндән мәһрум етсин.
Бизим үчүн ибрәт дәрсләри:
51:1-4, 17. Ҝүнаһ етмәк о демәк дејил ки, биз мүтләг Јеһова Аллаһдан узаглашырыг. Әҝәр биз пешманчылыг чәкириксә, әмин ола биләрик ки, О бизимлә мәрһәмәтлә давранаҹаг.
51:5, 7-10. Ҝүнаһ ишләдәндә бағышланмаг үчүн Аллаһа мүраҹиәт едә биләрик. Јеһова Аллаһ ‘ана бәтниндән ҝүнаһлы’ доғулдуғумузу, јә’ни ҝүнаһы мирас алдығымызы нәзәрә алыр. Мүнасибәтләримизин бәрпа олунмасы, үрәјимизин ҝүнаһлы мејлләрдән тәмизләнмәси вә доғру, тәмиз фикирләрлә долмасы һагда дуа етмәлијик.
51:18. Давудун ҝүнаһлары бүтүн халгын әмин-аманлығыны тәһлүкә алтына атмышды. Давуд Аллаһын Сиона лүтф етмәси үчүн дуа едирди. Ишләтдијимиз ҹидди ҝүнаһ Аллаһын адыны вә јығынҹағы рүсвај едә биләр. Рүсвајчылығын нәтиҹәләрини арадан галдырмасы үчүн Јеһоваја дуа етмәлијик.
52:8. Биз дә ‘Аллаһын евиндәки јашыл зејтун ағаҹына бәнзәјә’, јә’ни Аллаһла јахын мүнасибәтдә вә хидмәтимиздә бәһрәли ола биләрик. Бунун үчүн Аллаһа табе олуб, өјүд-нәсиһәтләрини мәмнунијјәтлә гәбул етмәлијик (Ибраниләрә 12:5, 6).
55:4, 5, 12-14, 16-18. Доғма оғлу Авшаломун она гаршы һазырладығы суи-гәсд вә е’тибарлы мәсләһәтчиси Ахитофелин хәјанәти Давуд үчүн чох ҝүҹлү зәрбә иди. Буна бахмајараг, Давудун Јеһоваја олан әминлији сарсылмамышды. Биз дә јол вермәмәлијик ки, емосионал сарсынтылар үзүндән Аллаһа е’тибарымыз зәифләсин.
55:22. Гајғы јүкүмүзү Јеһоваја неҹә верә биләрик? 1) Чәтинлијимизи дуада Она ачмагла, 2) рәһбәрлик вә көмәк үчүн Кәламы вә тәшкилатына мүраҹиәт етмәклә, 3) вәзијјәти јүнҝүлләшдирмәк үчүн имканымыз даирәсиндә әлимиздән ҝәләни етмәклә (Сүлејманын мәсәлләри 3:5, 6; 11:14; 15:22; Филипилиләрә 4:6, 7).
56:8. Јеһова Аллаһын чәтинликләримиздән дә, онларын бизә ҝөстәрдији емосионал тә’сирдән дә хәбәри вар.
62:11. Аллаһ һеч бир хариҹи гүввәдән асылы дејил. О Өзү гүввә мәнбәјидир. «Гүдрәт Аллаһындыр».
63:3. Јеһованын ‘мәһәббәти бу һәјатдан ҝөзәлдир’. Онсуз һәјат мә’насыз вә бошдур. Она ҝөрә дә Јеһова Аллаһла достлуг мүнасибәтләрини даима мөһкәмләндирмәлијик.
63:6. Һеч кәсин манечилик төрәтмәдији сакит ҝеҹә — дүшүнмәк үчүн ә’ла, мүнасиб вахтдыр.
64:2-4. Гејбәтчиләр тәгсирсиз адамын адына гара јаха биләрләр. Биз гејбәтә нә гулаг асмалы, нә дә өзүмүз гејбәт гылмалыјыг.
69:4, (ЈД). Елә вахтлар олур ки, сүлһү горумаг үчүн мәзмурчу кими давранмаг лазым ҝәлир: «Оғурламадығым шеји гајтардым». Сәһв етмәдијимизә әмин олсаг да, үзр истәмәклә, демәк олар ки, ‘оғурламадығымыз шеји гајтарырыг’. Бу мүдрик аддымдыр.
70:1-5. Јеһова көмәк үчүн јалварышларымызы ешидир (1 Салониклиләрә 5:17; Јагуб 1:13; 2 Петер 2:9). Аллаһ мүәјјән бир сынагдан кечмәјимизә јол верә биләр. Лакин дүшдүјүмүз вәзијјәтин өһдәсиндән ҝәлмәк үчүн О бизә һикмәт, ҝүҹ вә дөзүм верәҹәк. О, ҝүҹүмүздән артыг сынанмағымыза јол вермәјәҹәк (1 Коринфлиләрә 10:13; Ибраниләрә 10:36; Јагуб 1:5-8).
71:5, 17. Ушаглыгдан бәри, һәлә филистимли Голјатла үзләшмәздән әввәл, Јеһоваја ҝүвәндији үчүн Давуд гочаг вә ҝүҹлү иди (1 Шамуел 17:34-37). Ушаглар да бүтүн ишләриндә Јеһова Аллаһа ҝүвәнмәлидирләр.
‘Гој бүтүн јер үзү Онун иззәтинә бүрүнсүн’
Икинҹи топлудакы сонунҹу мәзмур Сүлејманын падшаһлығына һәср едилиб. О, Мәсиһин һакимијјәти дөврүндә јер үзүндә һөкм сүрәҹәк шәраит һаггында пејғәмбәрлик нәғмәсидир. Орада ҝөзәл хејир-дуалардан данышылыр: сонсуз сүлһ, зоракылығын вә зүлмүн ахыры, јер үзүндә боллуг! Бәс биз, Падшаһлығын хејир-дуаларыны ҝөрәнләр арасында олаҹағыгмы? Бәли, бир шәртлә ки, Јеһованы ҝөзләјиб Ону ‘сығынаҹағымыз, гүввәмиз’ едәк.
Давудун дуалары бу сөзләрлә сона чатыр: «Алгыш олсун Рәбб Аллаһа, Исраилин Аллаһына, харигәләрин јеҝанә јараданына! Онун шәрәфли ад-санына әбәди алгыш олсун, бүтүн јер үзү Онун иззәтинә бүрүнсүн! Амин! Амин!» (Мәзмур 72:18-20). Ҝәлин биз дә Јеһоваја бүтүн үрәкдән алгыш охујараг Онун иззәтли адына һәмд едәк!
[31-ҹи сәһифәдәки шәкил]
‘Шаһ гызынын’ кими тәмсил етдијини билирсәнми?