Hnemhnak Taktak Kha Khuazei Ahdah Hmuh Khawh A Si?
“Kan Bawipa Jesuh Khrih i a Pa le a Pathian . . . Harnak kan innak kip ah a kan bawmh [“hnemh,” NW].”—2 KORIN 1:3, 4, NW.
1. Zeibantuk sining hna nih dah hnemhnak a herh ngaingai tiah mi hna kha a ruahter?
MIBEI a si termi zawtnak nih mizaw kha ka nuncan a rawk cang tiah a ruahter kho. Lihnihnak, thlihrannak le mangṭam hna nih mi si a fahter. Raldohnak ruangah chungkhar cheukhat an thi, inn ngeilo in an um, asilole inn lo ngeitu hna nih an ngeihmi thil hna kha an kal tak. Dinlonak ruangah hnangamnak a pemi hmun a um lo tiah mi hna kha a ruatter ko lai. Cubantuk lungretheihnak hna a tongmi hna cu hnemhnak an herh taktak ko. Mahkhakha khuazei ahdah hmuh khawh a si hnga?
2. Jehovah pekmi hnemnak cu zeiruangah a ṭhakhunmi a si?
2 Mi cheukhat le bu cheukhat nih hnemhnak pek an i zuam. Zangfahnak bia hna cu an lawmh. Chanhnak timhpiaknak hna nih a herhmi hna kha caantawite a tlinter. Sihmanhsehlaw a hmaanmi Pathian Jehovah lawng nih rawknak paoh kha a tei khawh i mah harnak hna kha a cang ṭhan lo nakhnga a bawmh khawh. Pathian he pehtlaiin Baibal nih hitin a ti: “Kan Bawipa Jesuh Khrih i a Pa le a Pathian, zangfahnak [“hnemhnak,” NW] in a khatmi kan Pa, zeizong vialte ah a kan bawmtu Pathian cu lawm u sih! Harnak kan innak kip ah a kan bawmh caah kannih zong nih harnak a phunphun in a ingmi kha kan bawmh khawh ve hna i kan bawmh hna nak ah cun Pathian sin in bawmhnak [“hnemhnak,” NW] kan hmuhmi kha kan hman.” (2 Korin 1:3, 4) Jehovah nih zeitindah a kan hnemh?
Harnak Hna Hramthawknak In Remhnak
3. Minung harnak hna i a hram he aa tlai in Pathian nih zeitindah hnemhnak a pek?
3 Adam i sualnak ruangah minung chungkhar dihlak cu tlinlonak ro an co caah relcawklomi harnak hna an ton i an thi. (Rom 5:12) “Hi vawlei uktu” Satan ruangah thil sining cu a har chinchin ko. (Johan 12:31; 1 Johan 5:19) Mi vialte nih an tonmi ngaihchiat awk tlakmi thil sining ruangah Jehovah kha a ngaihchiatter lengah pakhat lawngmi fapa kha thawinak man in khamh awkah a rak thlah. Fapa kha an zumh ahcun Adam sualnak in an luat lai tiah a ti. (Johan 3:16; 1 Johan 4:10) Vancung le vawlei cung ah nawlngeihnak vialte kha pek a simi Jesuh Khrih nih Satan le a vawlei sining vialte kha a hrawh cang lai tiin zong Pathian nih a chimchung.—Matthai 28:18; 1 Johan 3:8; Biathlam 6:2; 20:10.
4. (a) Hnangamnak he aa tlaimi biakamnak ah kan zumhnak fehter awkah Jehovah nih zeidan a kan timhpiak? (b) Hnemh kan si lai nak caan he aa tlai in Jehovah nih hngalhthiamnak zeitindah a kan pek?
4 Pathian biakamnak kan zumhnak fehter awkah, Pathian nih a chimchungmi vialte a tling timi langhternak tampi kha ṭial a si. (Joshua 23:14) Minung nih a ti kho lomi sining hna in a salle hna kha khamh awkah Pathian nih zeitindah a tuah tikha Baibal ah ṭial a si. (Exodas 14:4-31; 2 Siangpahrang 18:13–19:37) Cu lengah Jesuh Khrih hmangin Jehovah nih a langhtermi cu a timhnak ah “[a] zaw a fakmi kip” kha a damter lengah mithi hna hmanh thawhterṭhannak aa tel. (Matthai 9:35; 11:3-6) Hi vialte cu zeitikahdah a cang lai? A lehnak ah Pathian i van thar le vawlei thar hlan ah hi vawlei sining donghnak caan hna i Baibal langhternak aa tel. Jesuh i langhternak cu kan nuncan he aa tlak ngaingaimi a si.—Matthai 24:3-14; 2 Timote 3:1-5.
Harnak A Tongmi Hna Kha a Hnemh Hna
5. Hlanlio Israelmi hna kha a hnemh tikah Jehovah nih zei ah dah an lungthin a pekter hna?
5 Hlanlio Israelmi hna he Jehovah pehtlainak in harnak an ton caan ah zeitindah a hnemh tikha kan hngalh. Zeibantuk Pathian dah a si tikha a kan theihter. Mah nih cun Pathian biakamnak hna ah an zumhnak kha a fehter. Mah theng lawng si loin a biatu hna a bawmh khawh lomi milem hna bantuk si loin Jehovah cu a hmaan i a nungmi Pathian in aa thleidannak hna kha a profet hna sinah a rak langhter. (Isaiah 41:10; 46:1; Jeremiah 10:2-15) Isaiah sinah “Hnem tuah hna u, ka mi hna cu hnem tuah hna u” taih a chim tikah pakhat lawngmi a hmaanmi Pathian in Jehovah lianngannak kha langhter awkah Pathian sernak hna langhternak hna kha hman awkah Jehovah nih a profet kha a rak forh.—Isaiah 40:1-31.
6. Zei tik caan ah dah khamh an si lai tikha Jehovah nih zeitindah a langhter tawn?
6 A miphun hna kha Jehovah nih a khamh lai nak caan a nai maw, a hlat maw ti he pehtlaihin a caan kha chimnak thawngin a hnemh tik caan zong a um ve. Iziptram in khamh an si lai te ah hnek a simi Israelmi hna kha hitin a ti: “Faraoh le Iziptmi hna cungah hin dantatnak pakhat lawnglawng ka tlunter rih lai. Cu hnu ah cun an kalter ko hna lai.” (Exodas 11:1) Jehoshaphat siangpahrang caan ah ram-pathum komhmi ral nih Judah ram an tuk tikah Jehovah nih “thaizing” ah tuahpiak nan si lai tiah a chim. (2 Chanrelnak 20:1-4, 14-17) Khattalei in, Babilon in an luatnak kha Isaiah hmangin kum 200 dengmang chimchung a si i a dang a dikthlir kha khamh an si hlan kum zakhat dengmang Jeremiah hmangin langhter a si. Khamh caan a nai chinchin tikah Pathian salle hna caah profet chimchungbia hna cu thazang a pemi a si hrimhrim!—Isaiah 44:26–45:3; Jeremiah 25:11-14.
7. Khamhnak biakamnak ah zeidah aa tel tawn i, Israelram i zumhfekmi hna kha zeitindah a hnorsuan?
7 Pathianmi hna hnemhnak biakamnak hna ah Messiah kong aa tel caah chingchiah awk tlak a si. (Isaiah 53:1-12) Chan khat hnu chan khat zumhfekmi hna an tonmi harnak hna lakah mah nih ruahchannak a pek. Luka 2:25 ah hitin kan rel: “Jerusalem khua ah khan mipa pakhat, a min Simeon a simi a rak um. Amah cu miṭha le Pathian a ṭihmi kha a si i Israel khamhnak [asilole hnangamnak; angaitein Messiah a ratnak] ding a rak hngakmi kha a si. Thiang thlarau nih khan a umpi.” Baibal chung i Messiah kong ruahchannak kha Simeon nih a rak hngalh, mah a tlinlainak ruahchannak nih a nuncan kha a sersiam. Mah hna dihlak cu zeitindah a tling lai tikha a rak hngalh lo, chimchungmi khamhnak kha amah theng nih a rak hmu lo nain Pathian nih a rak timhmi “khamhnak” cu ahodah a si lai tikha a rak hngalh tikah aa lawm.—Luka 2:30.
Khrih Sinin Hnemhnak
8. Mi tampi nih a herh tiah an ruahmi le Jesuh bawmhnak kha tahchunh ah zeitin a si?
8 Jesuh Khrih nih vawlei ah phungchim rian a ṭuan lioah mi nih an herh tiah an ruahmi bawmhnak paoh kha a rak pek hna lo. Cheukhat nih an huatmi Rom hneknak in luatter laimi Messiah kha an rak hngak. Jesuh nihcun dohnak kha a rak duh lo; “Siangpahrang cu siangpahrang ta a simi thilkha va pe u” tiah a ti. (Matthai 22:21) Pathian timhnak ah nainganzi uknak pakhat i hneknak in luatnak nak in tamdeuh aa tel. Mi hna nih Jesuh kha Siangpahrang ah an ser duh, sihmanhsehlaw Jesuh nihcun “tlanhnak ca i ka nunnak pek awkah pei ka rat cu” tiah a ti. (Matthai 20:28; Johan 6:15) A bawinak caan a phak rih lo, cun nawlngeihnak a pek hngami cu mibu siloin Jehovah a si.
9. (a) Jesuh nih a thanhmi hnemhnak a pemi thawng cu zeidah a si? (b) Minung an ton liomi sining hna in khamhnak thawngpang kha Jesuh nih zeitindah a langhter? (c) Jesuh phungchim rianṭuannak nih zeibantuk kong dah a chiahtak?
9 Jesuh nih a pekmi hnemhnak cu ‘Pathian Pennak kong Thawng ṭha’ ah aa tel. Mah thawng kha kaakip ah Jesuh nih a rak thanh. (Luka 4:43) Messiah uktu in a tuah hngami thil hna kha langhternak thawngin mah thawng kha minung hna nifa harnak he aa pehtlai ti kha a langhter. Khua a hmuter i a holhternak (Matthai 12:22; Marka 10:51, 52), a zengmi a damternak (Marka 2:3-12), Israelmi hna lak i fih a nungmi zawtnak in damternak (Luka 5:12, 13), a har ngaimi zawtnak in damternak (Marka 5:25-29) thawngin harnak a ingmi hna kha nun awk kong ṭha a ngeihter hna. A thimi ngakchia hna thawhternak thawngin a ngaichiami innchungkhar hna kha a hnemh. (Luka 7:11-15; 8:49-56) Ṭih a nungmi thlichia hna zong a tei khawh, mibu nganpi kha a danghnak thawngin an lung a tlinter khawh ti kha a langhter. (Mark 4:37-41; 8:2-9) Cun, an ton liomi harnak hna kha hmual ngei ngaiin a tei khawh i Messiah i dinnak uknak a ruahchantermi ziaza hna kha a rak cawnpiak. Cucaah phungchim rianṭuannak kha Jesuh nih a ṭuan lioah zumhnak in a ngaimi hna kha a hnemh lengah a ra laimi kum thong tampi caah thazang a pemi kong pakhat zong a chiahtak.
10. Jesuh raithawinak thawngin zeidah a si khawh?
10 Jesuh nih a nunnak kha rai in a thawi i vancung ah a thawhṭhan hnu kum 60 a luan hnuah lamkaltu Johan cu hitin ṭial awk thawhchuahhnawh a si: “Ka fale hna, hi ca kan kuat hna cu sualnak kha nan tuah nakhnga lo caah a si; sihmanhsehlaw pakhatkhat nih sualnak nan tuah ahcun, a dingmi Jesuh Khrih, Pa sin i bia a kan chim piaktu, kha kan ngei ko. Cun kan sualnak ngaihthiam kan sinak zong cu Khrih thawng cun a si i kanmah sualnak lawng si lo in mi vialte zong an sualnak kha ngaihthiam an si lai.” (1 Johan 2:1, 2) Jesuh i a tlingmi nunnak raithawinak ruangah hnemhnak tampi kan hmu. Kan sualnak ngaihthiam a si nak, ṭha le chia hngalhnak thiangnak, Pathian mithmaiṭha hmumi pehtlainak le zungzal nun awk kan i ruah chan khawh.—Johan 14:6; Rom 6:23; Hebru 9:24-28; 1 Piter 3:21.
Hnemhtu Thiang Thlarau
11. A thih hlan ah Jesuh nih zeibantuk hnemhnak dang dah a timhpiak?
11 Thawinak in a thih hlan hmanungbik zan ah Jesuh nih hnemh awkah vancung Pa nih a timhmi timhpiaknak dang pakhat kong kha a chim. Jesuh nih hitin a ti: “Ka Pa kha ka hal lai i Bawmtu [hnemhtu; Greek, pa·raʹkle·tos] a dang, biatak Thlarau cu an pek hna lai i nan sinah a zungzal in a um lai.” Jesuh nih hitin a hnemh hna: “Mi Bawmtu, Thiang Thlarau nih cun zeizong vialte kha an cawnpiak hna lai i kan chimhmi vialte hna kha nan lung an pemter hna lai.” (Johan 14:16, 17, 26) Thiang thlarau nih cun zeitindah a hnemh hna?
12. Jesuh zultu hna an lung pem ṭhan awk a bawmtu Thiang thlarau nih mitampi kah zeitindah hnemhnak a pek?
12 Lamkaltu hna cu Jesuh sinin cawnpiaknak tampi an hmu. An hmuhtonnak kha zeitikhmanh an philh lai lo nain an chimmi bia hna kha an i cinken khawh lai maw? Mitling lo an si caah a biapimi lamhruainak hna kha an i cinken khawh hnga maw? Thiang thlarau nih ‘ka chimhmi vialte hna kha nan lung an pemter hna lai’ tiah Jesuh nih aamah a khan. Cucaah Jesuh a thi i kum riat a rauh hnu ah Matthai nih hmasabik thawngṭha cauk kha a rak ṭial khawh, cuka ah Jesuh i a ṭha ngaimi Tlangcung Phungchimnak, Pathian Pennak kong bianabia tampi le a phannak caan hngalhnak kha a dikthlir in a ṭial khawh. Kum 50 hlei a rauh hnuah lamkaltu Johan nih Jesuh i vawlei nuncan in hmanungbikni hna kong kha a dikthlir in a ṭial khawh. Hi thawchuahhnawhmi cauk cu kannih chan tiang thazang a pemi a si!
13. Hmasa Khrihfa hna sinah cawnpiaktu in Thiang thlarau nih zeitindah a ṭuan?
13 Zultu hna sinah Jesuh nih a chimmi hna kha Thiang thlarau nih an lung a pemterṭhan lawng si lo in a cawnpiak hna i Pathian timhpiaknak kha tlamtling in an theihthiamnak hnga lam a hruai piak hna. Zultu hna he Jesuh a rak um lioah fiangte in an rak hngalh lomi kong hna kha a rak chim. Asinain, Thiang thlarau forhnak thawngin Johan, Piter, Jeim, Judah le Paul te nih Pathian timhnak kong kha tlingte in an rak fianter. Cucaah Thiang thlarau cu cawnpiaktu in a ṭuannak thawngin zultu hna kha Pathian nih lam a hruai tikha an zumh khawh.
14. Thiang thlarau nih Jehovah miphun kha zeitindah a bawmh?
14 A ṭhakhunmi thiang thlarau laksawng hna nih Pathian cu Israel miphun kha mithmaiṭha a pek ti lo i Khrihfabu cungah mithmaiṭha a pek cang ti zong kha fiangte in a langhter. (Hebru 2:4) Mah thlarau theitlai tlainak thawngin zong Jesuh zultu taktak hna kha thleidantermi a biapimi kong pakhat a si. (Johan 13:35; Galati 5:22-24) Cu thlarau nih Khrihfa hna kha ralṭhatnak a ngeimi hngaltu hna ah a canter hna.—Lamkaltu 4:31.
Fakpi In Hneknak Caan Ah Bawmhnak
15. (a) Hlanlio le tuchan Khrihfa hna zeibantuk hneknak hna dah an ton? (b) A caancaan ah thazang a pek tawnmi hmanh nih zeiruangah thazang pek an herh lai?
15 Jehovah sinah pum aa pemi, zumhfekmi hna cu hremnak phunphun an ton. (2 Timote 3:12) Asinain, Khrihfa tampi nih a har ngaimi hneknak an in. Tuchan ah cheukhat cu mibu i tuknak an ton i hremnak thonginn hna, thazang chuah in rianṭuannak hmun hna ah zangfahnak ngeilomi hmunah an um cang. Cozah tampi nih thazang chuah in an hrem hna, asilole duhpaoh in hremnak nawl an pek cang. Cun, Khrihfa hna cu fakpi in an zaw, asilole innchungkhar ah lungretheihnak an ton. A har ngaimi sining hna tei awkah zumtu hawi hna thazang a pemi Khrihfa pakhat hmanh hneknak a ton kho. Cubantuk caan ah thazang a petu theng cu thazang pek a herh ve.
16. David cu hneknak nganpi a ton tikah zeitindah bawmh a si?
16 Saul siangpahrang nih David thah awk a kawl lioah David nih Pathian bawmhnak kha hitin a rak hal: “Maw Pathian, ka thlacamnak hi ka theih piak tuah” tiah a nawl. “Na thla tangah ka dorter ko.” (Salm 54:2, 4; 57:1) David cu bawmh a si maw? A si ko. Cu caan lioah Jehovah nih David kha lamhruai awkah profet Gad le tlangbawi Abiathar kha a rak hman, mino David kha thazang pek dingah Saul fapa Jonathan kha a rak hman. (1 Samuel 22:1, 5; 23:9-13, 16-18) Jehovah nih mah ram kha Filistin miphun tukternak thawngin David kha Saul ral in a luatter.—1 Samuel 23:27, 28.
17. A har ngaingaimi hneknak tangah Jesuh nih khuazei ahdah bawmhnak a kawl?
17 Jesuh Khrih theng nih vawlei nuncan a dongh dengmang lioah hneknak har ngai a rak in ve. A ziaza nih vancung a Pa min kha zeitindah a hnorsuang khawh i mi vialte i hmailei caah zei sullam dah a si khawh tikha ṭhate in a rak hngalh. Cucaah “lungthin fak ngaingai in fak chinchin in thla a cam.” Cutin harnak a ton tikah Jesuh a herhmi bawmhnak kha Pathian nih a rak pek.—Luka 22:41-44.
18. Hneksak fak ngai in a tongmi hmasa Khrihfa hna kha Pathian nih zei hnemhnak dah a pek hna?
18 Kum zabu pakhatnak Khrihfabu kha a dirh hnu ah Khrihfa hna an inmi hnesaknak cu a har ngaingai caah lamkaltu hna dah ti lo cu Jerusalem khua in an zam dih. Pa thlulo nu thlulo an innchung in hnuh an rak si. Cu caan ah Pathian nih zeitindah a rak hnemh hna? Annih cu vancung ah “laksawng tampi” kha Khrih he an coṭi lai tiah a hnemh hna. (Hebru 10:34; Efesa 1:18-20) Phung an chim peng tikah Pathian thiang thlarau laksawng an hmu tikha a lang i an hmuhtonnak hna nih lawmhnak a karhter.—Matthai 5:11, 12; Lamkaltu 8:1-40.
19. Paul nih a har ngaimi hremnak a rak ton ko nain Pathian pekmi hnemhnak kha zeitindah a rak ruah?
19 A caan a phak tikah, hremtu Saul (Paul) cu a donghnak ah Khrihfa pakhat ah a rak cang i amah tu cu hrem a rak si. Cypras tikulh ah khuachia a thiamminu pakhat cu lihchimnak thawngin Paul i phungchim rianṭuannak kha khamh awk a rak zuam. Galatiram ah Paul kha lung in an cheh i a thi cang ti ruah in an kaltak. (Lamkaltu 13:8-10; 14:19) Makedoniaram ah fung in tuk a si. (Lamkaltu 16:22, 23) Efesa khua ah mibu i zaang-ennak a ton hnu ah hitin a rak ṭial: “Kan cung i an kan khinhmi thil kha rak rit tuk, rak ngan tuk kaw, nun lai hmanh kan i ruah lo. Kannih cu thi ding in biakhiah kan si ko cang tiin kan i ruah.” (2 Korin 1:8, 9) Sihmanhsehlaw, mah ca ah Paul nih hi capar i catlangbu 2 i cherhchanmi hnemhnak bia hna kha a rak ṭial.—2 Korin 1:3, 4.
20. A changmi capar ah zeibantuk kong dah kan ruah lai?
20 Cubantuk hnemhnak peknak kha zeitindah naa lak khawh lai? Kannih chan ah mitampi harnak tonnak, asilole annih cung lawngah harnak tlunnak ruangah lungretheihmi tampi cu hnemh an herh. A changmi capar ah cubantuk sining ah zeitindah hnemh khawh a si tikha kan ruah hna lai.
Na Cinken Maw?
• Pathian pekmi hnemhnak cu zeiruangah aman a sungbik a si?
• Khrih sinin zeibantuk hnemhnak dah pek a si?
• Thiang thlarau cu hnemhtu a si ti kha zeitindah a langhter?
• Pathian salle hna nih a har ngaimi hneknak an ton tikah Pathian hnemhmi tahchunhnak hna kha chim.
[Cahmai 10nak i Hmanthlak]