4 | Gwarchod Eich Gobaith

PAM MAE’N BWYSIG

Mae pryderu am helyntion y byd yn gallu effeithio ar bobl yn gorfforol ac yn emosiynol. Dydy llawer sydd wedi cael eu heffeithio gan y pethau hyn ddim yn gweld unrhyw obaith am y dyfodol. Sut maen nhw’n ymateb?

• Mae rhai’n gwrthod hyd yn oed meddwl am yr hyn sydd o’n blaenau ni.

• Mae eraill yn ceisio dianc rhag eu problemau gan ddefnyddio alcohol neu gyffuriau.

• Mae rhai pobl wedi dod i’r casgliad y byddai’n well ganddyn nhw farw na byw. Maen nhw’n gofyn, “Beth ydy’r pwynt?”

Beth Dylech Chi ei Wybod?

• Efallai bydd rhai o’ch problemau ond yn para dros dro a gall pethau wella’n annisgwyl.

• Hyd yn oed os nad ydy eich sefyllfa’n newid, mae ’na bethau y gallwch chi eu gwneud i’ch helpu i ddyfalbarhau.

• Mae’r Beibl yn rhoi gobaith go iawn—ateb parhaol i broblemau’r ddynoliaeth.

Beth Gallwch Chi ei Wneud Nawr?

Mae’r Beibl yn dweud: “Peidiwch byth â bod yn bryderus am yfory, oherwydd y bydd gan yfory ei bryderon ei hun. Mae gan bob diwrnod ddigon o’i drafferthion ei hun.”—Mathew 6:34.

Cymerwch un dydd ar y tro. Peidiwch â gadael i bryderon am yfory eich rhwystro chi rhag delio â’r pethau sydd angen eu gwneud heddiw.

Bydd poeni am bethau negyddol a allai ddigwydd ond yn ychwanegu at eich stres a gwanhau eich gobaith am ddyfodol gwell.

Mae’r Beibl yn Rhoi Gobaith Go Iawn

Dywedodd Salmydd wrth weddïo ar Dduw: “Mae dy eiriau di yn lamp i’m traed, ac yn goleuo fy llwybr.” (Salm 119:105) Ystyriwch sut mae’r Beibl—Gair Duw—yn gwneud hynny:

Ar noson dywyll, mae lamp yn ein helpu ni i weld ble i gamu nesaf. Mewn ffordd debyg, mae gan y Beibl ddoethineb ymarferol sy’n gallu ein harwain pan ydyn ni angen gwneud penderfyniad anodd.

Mae golau hefyd yn ein helpu ni i weld ymhellach i lawr y llwybr. Mewn ffordd debyg, mae’r Beibl yn dangos y gobaith hyfryd sydd o’n blaenau.