Nyaɖeɖefia

1 Yesu Kristo ƒe nyaɖeɖefia si Mawu tsɔ nae+ be wòaɖe nu siwo ava dzɔ kpuie la afia eƒe kluviwo.+ Edɔ eƒe mawudɔla ɖa wòva ɖe wo fia eƒe kluvi Yohanes to dzesiwo me,+ 2 Yohanes ɖi ɖase le Mawu ƒe nya kple ɖase si Yesu Kristo ɖi la ŋu, ɛ̃, le nu siwo katã wòkpɔ la ŋu. 3 Dzidzɔtɔe nye ame si xlẽa nyagblɔɖi sia me nyawo sesĩe kple ame siwo sea wo, eye woléa nu siwo woŋlɔ ɖe eme la me ɖe asi,+ elabena ɣeyiɣi ɖoɖi la tu aƒe.

4 Yohanes le esia ŋlɔm ɖo ɖe hame adre+ siwo le Asia nuto me:

Amenuveve kple ŋutifafa si tso “Ame si li, eye wònɔ anyi, eye wògbɔna”+ la gbɔ kple esi tso gbɔgbɔ adre+ siwo le eƒe fiazikpuia ŋgɔ la gbɔ, 5 kpakple esi tso Yesu Kristo, “Ðasefo Nuteƒewɔla la,”+ “ame kukuwo dome ŋgɔgbevi la,”+ kple “anyigbadzifiawo ƒe Dziɖula la” gbɔ+ la, nanɔ anyi kpli mi.

Ame si lɔ̃a mí,+ eye wòna ablɔɖe mí tso míaƒe nu vɔ̃wo me to eya ŋutɔ ƒe ʋu me+— 6 eye wòwɔ mí míenye fiaɖuƒe+ kple nunɔlawo+ na eƒe Mawu kple Fofoa—ɛ̃, eya tɔ nanye ŋutikɔkɔe kple ŋusẽ yi mavɔmavɔ me. Amen.

7 Kpɔ ɖa! Egbɔna kple alilikpowo,+ eye ŋku sia ŋku akpɔe, ame siwo ƒo nu ɖee hã akpɔe; eye anyigbadziƒomewo katã afa konyi vevie le eŋuti.+ Ɛ̃, Amen.

8 “Nyee nye Alfa kple Omega,”*+ Yehowa* Mawu, “Ame si li, eye wònɔ anyi, eye wògbɔna, Ŋusẽkatãtɔ la,”+ ye gblɔe.

9 Nye, Yohanes, mia nɔvi, si kpɔ gome kpli mi le xaxa+ kple fiaɖuƒe+ kpakple dzidodo+ me le Yesu ta la,+ menɔ ƒukpo si woyɔna be Patmo la dzi le nuƒoƒo tso Mawu ŋu kple ɖaseɖiɖi le Yesu ŋu ta. 10 Gbɔgbɔ la kplɔm yi Aƒetɔ la ƒe ŋkeke la me, eye mese gbe sesẽ aɖe le megbenye abe kpẽ ƒe ɖiɖi ene, 11 gblɔ be: “Nu si nèkpɔ la, ŋlɔe ɖe agbalẽ me, eye nàɖoe ɖe hame adre, siwo le Efeso,+ Smirna,+ Pergamo,+ Tiatira,+ Sardes,+ Filadelfia+ kple Laodikea.”+

12 Metrɔ be makpɔ ame si le nu ƒom kplim la, eye esi metrɔ la, mekpɔ sikakaɖiti adre,+ 13 eye ame aɖe le akaɖitiawo titina si le abe amegbetɔvi ene,+ edo awu ʋlaya legbe, si ɖo afɔgɔme nɛ, eye wòtsɔ sikanudziblanu bla akɔta. 14 Gawu la, eƒe ta kple taɖa fu tititi abe alẽfu ɣi alo sno ene, eye eƒe ŋkuwo le abe dzoƒaɖe ene,+ 15 eye eƒe afɔwo le abe akɔbli nyui+ si wode kpo me wòbiã hẽe ene, eye eƒe gbe le abe tsi geɖewo ƒe gbeɖiɖi ene. 16 Elé ɣletivi adre+ ɖe nuɖusi, eye yi ɖaɖɛ nuevee+ legbe aɖe le dodom tso eƒe nu me, eye eƒe mo le abe ɣe si le keklẽm sesĩe ene.+ 17 Esi mekpɔe la, medze anyi ɖe eƒe afɔnu abe ame kuku ene.

Eye wòda eƒe nuɖusi ɖe dzinye gblɔ be: “Mègavɔ̃ o. Nyee nye Gbãtɔ+ la kple Mlɔetɔ+ la, 18 kple ame si le agbe,+ eye meku kpɔ,+ ke kpɔ ɖa, mele agbe tegbetegbe,+ eye ku kple Tsiẽƒe*+ ƒe safuiwo le asinye. 19 Eya ta ŋlɔ nu siwo nèkpɔ kple nu siwo le dzɔdzɔm fifia kpakple nu siwo gbɔna dzɔdzɔ ge le nu siawo megbe la ɖi. 20 Ke nya ɣaɣla kɔkɔe si le ɣletivi adre siwo nèkpɔ le nye nuɖusi me kple sikakaɖiti adreawo ŋu lae nye esi: Ɣletivi adreawo le tsitre ɖi na hame adreawo ƒe dɔlawo, eye akaɖiti adreawo le tsitre ɖi na hame adreawo.+