Nɔ Ŋgɔyiyi Dzi—Madzudzɔmadzudzɔe

ZI GBÃTƆ si nèsrɔ̃ alesi nàtsɔ Biblia me gɔmeɖosewo awɔ dɔe la, alesi nèbua tame, wò nuƒo, kple nɔnɔme siwo nye numame na wò la nɔ tɔtrɔm vivivi. Èwɔ tɔtrɔ siawo ƒe akpa gã aɖe hafi va ŋlɔ ŋkɔ ɖe Teokrasi Subɔsubɔ Sukua me kura gɔ̃ hã. Ðewohĩ fifia èwɔ ŋgɔyiyi heɖe adzɔgbe na Yehowa. Ðe ema fia be àdzudzɔ ŋgɔyiyia? Kpao. Wò nyɔnyrɔxɔxɔ nye nuwo ƒe gɔmedzedze ko.

Nusrɔ̃la Timoteo nɔ subɔsubɔm xoxo abe Kristotɔ hamemegã ene esime Paulo xlɔ̃ nui be ‘nelé be na’ nuxlɔ̃ame si wonae kple subɔsubɔdɔ si wode esi la siaa—‘wòanɔ nusiawo dzi’—bene eƒe “ŋgɔgbedede nadze ƒã” na amewo katã. (Tim. I, 4:12-15) Fifi laa koe nèɖadze nyateƒemɔa dzi zɔzɔ o, nuteƒekpɔkpɔ geɖe ɖasu asiwò le Kristotɔ ƒe agbenɔnɔ me o, ele be nàtsɔ ɖe le ŋgɔgbedede me.

Sidzedze Kple Agbenɔnɔ Tɔtrɔ

Míexlẽ le Efesotɔwo 3:14-19 be apostolo Paulo do gbe ɖa be ye hati xɔsetɔwo nate ŋu “adze si nusi nye kekeme kple didime kple goglome kple kɔkɔme” na nyateƒea. Ema ta Yesu de nunanawo amewo me be woafia nu, aɖɔ ame ɖo ahatu ame ɖo le hamea me. Ŋugbledede ɖaa le Mawu ƒe Nya si tso gbɔgbɔ me kpakple mɔfiame si tso nufiala bibiwo gbɔ ŋuti ate ŋu akpe ɖe mía ŋu be “míatsi” le gbɔgbɔ me.—Ef. 4:11-15.

Nusi tsitsi ma lɔ ɖe eme hãe nye mía ɖokui wɔwɔ ‘yeyee le míaƒe tamesusu ƒe gbɔgbɔ la me.’ Esia fia asitɔtrɔ le míaƒe tamesusu ŋu wòasɔ bliboe ɖe Mawu kple Kristo tɔ dzi. Ebia be woƒe tamesusu naxɔ aƒe ɖe mía me ɣeawokatãɣi be míate ŋu ‘ado amenyenye yeyea.’ (Ef. 4:23, 24) Ne èsrɔ̃ Nyanyuigbalẽawo la, ɖe nèkpɔnɛ be wonye Kristo ƒe agbenɔnɔ ŋu nuŋlɔɖi siwo nye kpɔɖeŋu wòle be nàsrɔ̃a? Èdina ɣeawokatãɣi be yeade dzesi Yesu ƒe nɔnɔme vovovoawo eye èkua kutri be yeaɖe nɔnɔme siawo afia le ye ŋutɔ yeƒe agbe mea?—Pet. I, 2:21.

Afisi wò ŋgɔgbedede sia ɖo la aɖe dzesi le nusiwo ŋu nèɖoa dze le la me. Amesiwo do amenyenye yeye la meƒoa wo ɖokui ɖe nuƒo si dea anukwaremaɖimaɖi ƒe dzi ƒo me, alo gblɔa dzugbenyawo, nya ƒaƒãwo, alo nya siwo metua ame ɖo o. Ke boŋ woƒe nuƒo nye ‘nya siwo nyo na ŋgɔgbedede bene woana amenuveve amesiwo senɛ la.’ (Ef. 4:25, 26, 29, 31; 5:3, 4; Yuda 16) Woƒe numeɖeɖe kple nyagbɔgblɔ le adzame kple hamea ƒe kpekpewo me ɖenɛ fiana be nyateƒea le woƒe agbenɔnɔ trɔm vavã.

Ne mèganye amesi ‘nufiafia ƒe ya sia ya ƒona yina gaƒona gbɔna, eye wònyamana’ o la, esia hã aɖi ɖase le wò ŋgɔgbedede ŋu. (Ef. 4:14) Le kpɔɖeŋu me, nukae nèwɔna ne xexeame tsɔ susu yeye, nuwɔna, alo modzakaɖeɖe vovovowo le fu ɖem na wò susu? Edzroa wò vevie be ɣeyiɣi si nàtsɔ anɔ gbɔgbɔ me dɔdasiwo gbɔ kpɔmee la, nàtsɔe anɔ nusiawo boŋ yome timeea? Esia wɔwɔ ate ŋu axe mɔ na wò gbɔgbɔ me ŋgɔgbedede. Aleke gbegbe wòhenyo wue nye si be míaƒle ɣeyiɣi na gbɔgbɔmenuwo yomenɔnɔ!—Ef. 5:15, 16.

Alesi nèwɔa nu ɖe ame bubuwo ŋu hã ate ŋu afia afisi wò gbɔgbɔ me ŋgɔgbedede ɖo. Èsrɔ̃ alesi wò ‘dɔme natrɔ ɖe ame ŋu, eye nàtsɔ ake’ faa mahã?—Ef. 4:32.

Ele be ŋgɔyiyi si wɔm nèle le nuwo wɔwɔ me abe alesi Yehowa dii ene la nadze ƒã le hamea me kple aƒeme siaa. Ele be wòadze le suku, dutoƒo, kple wò dɔwɔƒe hã. (Ef. 5:21–6:9) Nenye be èle mawumenɔnɔmewo ɖem fia geɖe wu le go siawo katã me la, ekema wò ŋgɔgbedede le dzedzem ƒã.

Zã Wò Nunana La

Yehowa de ŋutete kple dzɔdzɔmenunanawo mía dometɔ ɖesiaɖe me. Ele mɔ kpɔm be míazã wo wòaɖe vi na ame bubuwo ale be eyama ate ŋu aɖe eƒe dɔmenyo si míedze na o la afia to mía dzi. Apostolo Petro ŋlɔ nu le esia ŋu be: “Misubɔ mia nɔewo le alesi amesiame xɔ amenuvevenunana la nu, abe Mawu ƒe amenuveve bubu ƒomevi geɖewo ƒe xɔnuvi nyuiwo ene.” (Pet. I, 4:10) Aleke nèle wò xɔnuvidɔa wɔmee?

Petro yi edzi be: “Ne ame aɖe le nya gblɔm la, negblɔe abe mawunya ene.” (Pet. I, 4:11) Mawunyakpukpui sia te gbe ɖe agbanɔamedzi sia dzi be ame naƒo nu wòanɔ ɖekawɔwɔ me bliboe kple Mawu ƒe Nya, bene wòanye ŋutikɔkɔe na Mawu. Ele be alesi wole nua ƒomee hã nanye ŋutikɔkɔe na Yehowa. Hehe si wonana le Teokrasi Subɔsubɔ Sukua me la ate ŋu akpe ɖe ŋuwò be nazã wò nunana le mɔ sia tututu nu—si nye ŋutikɔkɔe tsɔtsɔ na Mawu to alesi nèkpena ɖe amewo ŋu me. Le taɖodzinu ma ta, aleke nàwɔ anya nenye be èle ŋgɔ yim le sukua me loo alo mèle ŋgɔ yim o?

Be nànɔ afisi nèɖo le nuƒoɖaŋuɖogbalẽa dzi alo dɔdasi vovovo siwo tɔgbe nèxɔ va yi ko ŋu bum la, bu alesi gbegbe hehe si nèxɔ la na wò kafukafuvɔsa ganyo ɖe edzii ŋu vevie boŋ. Sukua trɔa asi le mía ŋu be míagawɔ dɔ nyuie wu le gbeadzisubɔsubɔdɔ me. Eyata bia ɖokuiwò se be: ‘Ðe medzrana ɖo nyuie ɖe nusi magblɔ le gbeadzi ŋua? Mesrɔ̃ alesi nye ŋutɔ matsɔ ɖe le eme na amesiwo meɖia ɖase na? Ðe meɖoa tɔtrɔyiwɔwɔ gɔme anyi to biabia si magblẽ ɖi be míaɖo dze tso eŋu ɣebubuɣi mea? Ne mele Biblia srɔ̃m kple ame aɖe la, ɖe medzea agbagba be magade ŋgɔ wu abe nufiala si ɖoa ame ƒe dzi gbɔ enea?’

Mègabu xaa bena subɔsubɔ ƒe gomekpɔkpɔ siwo su asiwò la koe nye ŋgɔyiyi o. Wò ŋgɔyiyi dzena, menye le dɔdasi me o, ke boŋ le nusi nèwɔna kple dɔdasia me. Ne wode dɔ si bia nufiafia ŋutete asi na wò la, bia ɖokuiwò se be: ‘Ðe mewɔ nufiafiaɖaŋu ŋudɔ tututua? Ðe meƒo nu ale gbegbe be wòte ŋu kpɔ ŋusẽ ɖe nyaselawo ƒe agbe dzi vavã?’

Nuxlɔ̃ame si nye be nàzã wò nunana fia be nàtsɔe aɖo ɖokuiwò dzi awɔ nu wòaɖe vi na amewo. Ðe nètsɔnɛ ɖoa ɖokuiwò dzi be yeawɔ dɔ kple ame bubuwo le gbeadzia? Èdia mɔnukpɔkpɔ vovovo be yeakpe ɖe ame yeyewo, ɖeviwo, alo dɔnɔwo ŋu le miaƒe hamea mea? Èlɔ̃na faa be yeadzra Fiaɖuƒe Akpata me ɖo alo ana kpekpeɖeŋu le mɔ vovovo nu le takpekpe gãwo kple sueawo mea? Àte ŋu awɔ kpekpeɖeŋu mɔɖeɖedɔa ɣeaɖewoɣia? Àte ŋu asubɔ abe gbesiagbe mɔɖela ene alo ana kpekpeɖeŋu le hame aɖe si me hiahiã geɖe le mea? Ne nɔviŋutsue nènye la, èle Ŋɔŋlɔawo me dzidzenu siwo wodi le subɔsubɔdɔwɔlawo kple hamemegãwo si minyam mahã? Ne èlɔ̃ faa be yeana kpekpeɖeŋu axɔ agbanɔamedzi alɔ evee la, esia nye ŋgɔgbedede ƒe dzesi.—Ps. 110:3.

Akpa si Nuteƒekpɔkpɔ Wɔna

Ne ewɔ na wò abe mèle ɖeke me o le Kristotɔ ƒe agbenɔnɔ ƒe nuteƒekpɔkpɔ boo si mesu asiwò o ta la, dzi megaɖe le ƒowò o. Mawu ƒe Nya la te ŋu ‘nana amesiwo mekpɔ nuteƒe o dzea nunya.’ (Ps. 19:8; 119:130; Lod. 1:1-4) Ne míetsɔ Biblia ƒe aɖaŋuɖoɖo wɔ dɔe la, enana Yehowa ƒe nunya deblibo la ɖea vi na mí, esi xɔ asi sasasã wu nunya ɖesiaɖe si ate ŋu asu mía si to nuteƒekpɔkpɔ ɖeɖe dzaa ko me. Ke hã ne míele ŋgɔ dem le Yehowa subɔsubɔ me la, nuteƒekpɔkpɔ xɔasi va sua mía si godoo. Aleke míazãe wòaɖe vi ŋutɔŋutɔe?

Esi wònye be míeto nɔnɔme vovovowo me le agbe me ta, ele bɔbɔe be ame aɖe nagblɔ le eɖokui me be: ‘Meto nɔnɔme sia me kpɔ. Menya nusi mawɔ.’ Ðe esia anye nusi me nunya lea? Lododowo 3:7 xlɔ̃ nu mí be: “Meganye nunyala le ɖokuiwò ŋku me o.” Le nyateƒe me la, ele be nuteƒekpɔkpɔ nana míaƒe susu me naʋu ɖe nusiwo míatsɔ ayi ŋugble mee le míaƒe agbe me nya vovovowo gbɔ kpɔkpɔ me ŋu. Gake ne míele ŋgɔ yim le gbɔgbɔ me la, ele be míaƒe nuteƒekpɔkpɔa nawɔ dɔ ɖe míaƒe susu kple dzi dzi vevie ne míakpɔe adze sii be míehiã Yehowa ƒe yayra be nu nadze edzi na mí. Eyata edze ƒã be míaƒe ŋgɔgbedede dzena, menye le alesi míekpea akɔ kple nɔnɔme vovovowo le kaka ɖe ame ɖokui dzi vivivo me o, ke boŋ le alesi míetrɔna ɖe Yehowa ŋu bla hena mɔfiame xɔxɔ le agbe me la mee. Edzena le kakaɖedzi si le mía me be naneke mate ŋu adzɔ o negbe ɖeko eya ŋutɔ ɖe mɔ le eŋu hafi me, eye wògadzena le mía kple mía Dziƒofofoa dome ƒomedodo si me ŋuɖoɖeŋu kple lɔlɔ̃ le me léle ɖe asi goŋgoŋ me.

Nɔ Ŋgɔyiyi Dzi

Togbɔ be apostolo Paulo nye Kristotɔ amesiamina si tsi le gbɔgbɔ me hã la, ekpɔe dze sii be ele be yeanɔ agbe ƒe taɖodzinu la ‘minyam’ madzudzɔmadzudzɔe. (Fil. 3:13-16) Nukpɔsusu ma le wò hã asiwòa?

Afikae nèɖo le ŋgɔyiyi me? Dzidze wò ŋgɔyiyi le alesi gbegbe nèdo amenyenye yeye lae, alesi gbegbe nèbɔbɔ ɖokuiwò ɖe Yehowa ƒe dziɖulanyenye te keŋkeŋ, kple alesi nèle wò nunanawo zãm veviedodotɔe hena bubu dede Yehowa ŋu me. Ne hehe si nam Teokrasi Subɔsubɔ Sukua le la le vi ɖem na wò la, ekema ele be nɔnɔme siwo dzi Mawu ƒe Nya la te gbe ɖo nanɔ dzedzem ŋgɔyiyitɔe le wò nuƒo kple wò nufiafia me. Wò ŋku nenɔ wò tsitsime ƒe akpa siawo dzi ɣeawokatãɣi. Ẽ, na woado dzidzɔ na wò, eye wò ŋgɔgbedede agaɖe dzesi ƒã.