Mɔ Siwo Dzi Míato Awɔ Míaƒe Fiaɖuƒegbeƒãɖeɖedɔa Wòanyo Wu
1 Míaƒe gbeƒãɖeɖedɔa hiã fifia wu tsã. Amewo anɔ agbe alo woaku o, anɔ te ɖe alesi wowɔa nu ɖe nyanyuia ŋui dzi. (Pet. I, 4:5, 6, 17; Nyaɖ. 14:6, 7) Esia ta ele be míadi mɔ siwo nu míana míaƒe Fiaɖuƒegbeƒãɖeɖedɔa nanyo ɖe edzi wu ɣesiaɣi. Mɔ kawo nue míate ŋu awɔ ŋgɔyiyi le?
2 Dzra Ðo Nyuie: Zã Míaƒe Fiaɖuƒe Subɔsubɔdɔ yeyea nàtia dzeɖonya si nèkpɔ be adzɔ dzi na wò anyigbamamãmetɔwo ƒe akpa gãtɔ. Ehiã be nàtrɔ wò nyawo ɖe mia gbɔ nɔnɔmewo ŋu. Alo àdi be ye ŋutɔ yeatrɔ asi le dzeɖonya aɖe ŋu ahazã nya kple Ŋɔŋlɔ siwo wò ŋutɔ nèkpɔ be wowɔa dɔ. Àhiã na ŋgɔdonya si nyɔ̃a ɖetsɔleme. (Kpɔ Reasoning-gbalẽa ƒe axa 9-15.) Ðewohĩ èɖoe be yeabia nya si na wobua tame alo yeabia aƒemenɔla ƒe susu le nyadzɔdzɔ aɖe si me nutoa me tɔwo tsɔ ɖe le ŋu. Ne èva nya dzeɖonya si nàzã la, wɔe kple wò ƒomea me tɔ aɖe alo gbeƒãɖela bubu si ate ŋu aɖo aɖaŋu na wò nàwɔ ŋgɔyiyi.
3 Ðo Dze Kple Amewo: Míaƒe taɖodzinue nye be míagblɔ gbedasi vevi aɖe na amewo. Míate ŋu awɔ esia ne míena míaƒe nyasela la kpɔ gome le dzeɖoɖo nyui me. Ne aƒemenɔla le nya aɖe biam alo le nya aɖe gblɔm la, ɖo toe nyuie nàse eƒe nyawo. Eƒe nyawo akpe ɖe ŋuwò be nàɖo nya ŋu nɛ tso Ŋɔŋlɔawo me atsɔ aɖe mɔkpɔkpɔ si le mewò la me. (Pet. I, 3:15) Ne eƒe nukpɔsusu mewɔ ɖeka kple Biblia tɔ o la, àte ŋu agblɔ aɖaŋutɔe be: “Nenemae ame geɖe susu. Gake mɔ bubu aɖee nye sia si nu míate ŋu abu nya la ŋu le.” Emegbe xlẽ mawunyakpukpui si sɔ eye nàna wòaƒo nu.
4 Wɔ Ðoɖowɔɖi si Sɔ Na Wò: Wò dzadzraɖo nyuie maɖe vi aɖeke ne mète ŋu ƒo nu na ame aɖeke o. Míekpɔnɛ ɣeaɖewoɣi be ame aɖewo menɔa aƒeme zi geɖe ne míeyi o. Ne nenemae wòle le wò anyigbamamã me la, ke dze agbagba nàtrɔ asi le wò ɖoɖowɔɖi ŋu ale be nàte ŋu awɔ dɔ tso aƒeme yi aƒeme esime ame geɖe le aƒeme. Àkpɔe be kwasiɖanuwuwuwoe nye ɣeyiɣi nyuitɔ si nàyi; àte ŋu ake ɖe ame aɖewo ŋu wu le kwasiɖaa me gake le fiẽsiwo me. Le teƒe aɖewo la, gbeƒãɖelawo kpɔe be enyo be yewoaɖe gbeƒã vevie le xexemetɔwo ƒe azãgbewo dzi elabena wotua ame geɖe le aƒeme. Amewo katã ɖea dzi ɖi eye woalɔ̃ be yewoaɖo dze le ɣeyiɣi sia me wu. Anyo be nàtrɔ wò ŋgɔdonya la ɖe wɔnaa ŋu eye nàtsiã wò nyawo ɖe nu kple Ŋɔŋlɔawo me nyati aɖe.
5 Dzro Wò Dzeɖonya ƒe Nyonyo Me Kpɔ: Ne èdzo le ʋɔtru ɖesiaɖe nu la, bia ɖokuiwò be: ‘Ðe meɖo aƒemenɔlaa ƒe dzi gbɔa? Ðe mena wòɖe eƒe susuwo gblɔ heɖo to nya si wògblɔa? Ðe meɖo nya ŋu le ayedzedze mea? Ðe nya si megblɔ la sɔ ɖe nɔnɔmeawo nu wua?’ Anyo be nàwɔ dɔ kple gbeƒãɖela bibi alo mɔɖela edziedzi ahaɖo to eƒe dzeɖonyawo kple susu be nàwɔ wò ŋutɔ wò subɔsubɔdɔ wòanyo wu.
6 Ne èbi ɖe wò dɔwɔwɔ me la, àte ŋu agblɔ Fiaɖuƒe ŋuti nyateƒe si ‘axɔ mia kple amesiwo ɖoa to wò siaa ɖe agbe’ la na amewo.—Tim. I, 4:16; Lod. 22:29.