Na Mɔfiafia si Hiã la Wo

ALEKE viwòwo awɔ anya alesi woakpɔ wo ɖokui ta tso xexeame ƒe agbegbegblẽnɔnɔ si le dzidzim ɖe edzi la si me? Menye le television si sɔhɛwo ƒe ƒuƒoƒo aɖe gblɔ be enye teƒe vevitɔ enelia si yewosea gbɔdɔdɔ ŋu nyawo le dzi ye o. Menye le sukuwo, afisi nusi nufialawo fiana la ɖea agbegbegblẽ ƒe xexe sia ƒe dzidzenu kple nudidi siwo trɔna fiana le o. Eye le nyateƒe me la, menye le ŋutinya siwo viwòwo ƒe sukuhatiwo gblɔna la me o.

Ne agbenyuinɔnɔ ŋuti nufiafia kple ƒomegbenɔnɔ adze edzi la, ele be wòadze egɔme tso aƒeme. Abe alesi suku kɔkɔ aɖe ƒe nufiala aɖe si tsi dzimaɖi la gblɔ ene la: “Ele be ame aɖe natsɔ dzideƒo agblɔ be: ‘Mikpɔ ɖa, ɖeviwo, lala magblẽ nu le mia ŋu o!’”

Èfia nu ma viwòwoa? Le gbɔdɔdɔ ƒe agbalẽ geɖe si ƒo xlã mí ta la, ɖe nèbiaa ɖokuiwò se ɣeaɖewoɣi be aleke gɔ̃ yeawɔ afia nu woe mahã?

Dɔ si Kpɔɖeŋu Wɔna ɖe Ame Dzi

Abe alesi tututu dziwòlawo ƒe agbenɔnɔ kpɔ ŋusẽ ɖe dziwò ene la, nenema ke kpɔɖeŋu si nèɖona la kpɔa ŋusẽ deto ɖe viwòwo ƒe agbenɔnɔ dzii. Eɖea alesi gbegbe nèlɔ̃ woe kple amesiwo ƒomevi nèdi be wòatsi azu la fiana le mɔ geɖe nu.

Ne ɖetugbi nɔaƒee nènye hafi ɖe srɔ̃ la, àte ŋu agblɔ alesi gbegbe ema dzɔ dzi na wòe la na viwòwo. Ðevi aɖe tɔgbui ɖo ŋku gbesigbe anɔ abe ƒe 60 kloe nye sia ene, si fofoa gblɔ alesi gbegbe wòkpɔ dzidzɔe be yeɖe srɔ̃ la nɛ dzi, le esi wònya be yemeƒo ye ɖokui ɖe agbegbegblẽnɔnɔ ƒomevi aɖeke me si ate ŋu ava gblẽ nu le yeƒe srɔ̃ɖeɖea ŋu o ta. Dzeɖoɖo ma kpɔ ŋusẽ ɖe alesi ɖevi sia tɔgbui nɔ agbee la dzi vevie, eye wòxɔe se be ye ŋutɔ yeƒe kpɔɖeŋu kpɔ ŋusẽ ɖe ye viwo ƒe agbenɔnɔ dzi ŋutɔ.

Gake ne viwòwo nya be alesi nenɔ agbee tsã menye kpɔɖeŋu nyui si yewoasrɔ̃ o la, ele be nana woanya nusitae netrɔ ɖo. Menye esi nezu ame tsitsi fifia ko tae o ke boŋ esi nekpɔ dzidzenu kɔkɔ siwo nu nànɔ agbe ɖo tae.

Toɖoɖo Nyuie

Zi geɖe la dzila siwo kpɔa dzidzedze ƒoa nu tso ɣeyiɣi geɖe si wozãna tsɔ ɖoa to wo viwo ƒe nyawoe la ŋu. Wonya nusi le edzi yim le wo viwo ƒe agbenɔnɔ me. Karen ɖoe be yeanɔ dɔ wɔm le dzodoƒe le ŋdɔ me. To esia dzi la, ne vianyɔnuviwo gbɔ va aƒeme la, wote ŋu gblɔa nusiwo dzɔ le ŋkekea me le suku la nɛ.

Erline lalaa vianyɔnuwo gbɔna vaa aƒeme le zã me eye wòɖoa to wogblɔa nusiwo katã wowɔ la nɛ. Egblɔ be: “Ne ɖɔɖɔɖo aɖe hiã Ia, mete ŋu kpɔa ema gbɔ emegbe. Gake ne ɖe nyemeɖoa to sea woƒe nyawo o la, anye ne nyemanya naneke tso eŋu o.” Ena dzeɖoɖomɔnu sia nɔ ʋuʋu ɖi le vianyɔnuwo ƒe sukudeɣi kple le ɣeyiɣi siwo me wonɔ wo dim be woaɖe. Ɣeyiɣi ma si nàzã ɖe viwòwo ŋu la ate ŋu axe mɔ na dzigbagbã geɖe emegbe.

Ke ne nu menya ƒona na viwòwo o ya ɖe? Ne nu menya ƒona na wo o la, àte ŋu abia ɖokuiwò be, ‘Ame kpooe wonye tso dzɔdzɔme koa, alo vɔvɔ̃m wole be woagblɔ woƒe nyawo nam le alesi mewɔ ɖe wo ŋu va yi taa? Ðe mate ŋu ana woagaka ɖe dzinye esi madze agbagba vevie azɔ be matsɔ ɖe le eme na woa? Ðe mate ŋu awɔe wòanɔ bɔbɔe wu na wo be woatsɔ nya suewo ava gbɔnyee fifia eye ɖewohĩ woatsɔ esiwo lolo wu la ava gbɔnyee emegbea?’

Nuxlɔ̃me Veviwo

Ele be nàxlɔ̃ nu viwòwo tso agbegbegblẽnɔnɔ me tsonuwo ŋu. Le kpɔɖeŋu me, ele be woanya be le nya siwo katã amewo gblɔna si to vovo na ema megbe gɔ̃ hã la, kakaɖedzi blibo mele mɔxexe ɖe fufɔfɔ nu ƒe mɔ aɖeke ŋu o. Ne wozã atike siwo wotsɔna xea mɔ ɖe fufɔfɔ nu gɔ̃ hã la, fufɔfɔ siwo womedi o kple nulɔdɔwo dona tsoa eme zi geɖe. Habɔbɔ si nye Vidzidzi si Ŋu Wowɔ Ðoɖo Ðo gblɔ be kɔndɔmwo mete ŋu xea mɔ ɖe fufɔfɔ 12 le alafa ɖesiaɖe me nu o, wodoa kpo nu le mɔ xexe ɖe AIDS-dɔlékuia xɔxɔ nu me kura wu.

Edze abe ɖe sɔhɛ geɖewo xɔe se be afɔku aɖeke madzɔ ɖe yewo dzi o ene. Gake amesiwo ŋu nulɔdɔwo si me AIDS hã le ƒe dzesiwo mele haɖe o eye womenya be yewole etsɔm na ame bubuwo o la ana ame bubuwo naxɔe. Dɔléle mawo dometɔ geɖe siwo le fu ɖem na sɔhɛwo egbea ate ŋu ahe kotsitsi, nuwɔametɔwo dzidzi, dɔdzẽ, kple ku kura gɔ̃ hã vɛ.

Le kpɔɖeŋu me, woxɔe se azɔ be dɔléle siawo dometɔ ɖeka ya teti si nye nulɔdɔ si nana vidzinu ŋu kple exa ɖoa loholoho (genital herpes) le Amerikatɔ miliɔn 40 ŋu eye womekpɔ atike aɖeke nɛ o. Vidzĩwo ate ŋu axɔe le wo dada si ŋu wòle la ŋu. Ðewohĩ nu ate ŋu ava gblẽ le ɖevi maɖifɔ siawo ƒe susu ƒe ɖaɖa ŋu, eye nu nagblẽ le woƒe ahɔhɔ̃ ŋu ɣeyiɣi didi, alo dɔmenuwo ƒe dɔléle sesẽwo nawu wo. Aleke ɣeyiɣi kpui aɖe ƒe vivisese si wonɔ mɔ kpɔm na hegblẽ nu le ame ŋu ŋɔdzitɔe nye si!

Gbɔdɔdɔ manɔsenu si nana woxɔa dɔléle sia mate ŋu anye esi me dzidzɔ le gɔ̃ hã o. Numekula aɖe si bia nya sɔhɛ geɖewo la gblɔ be “le nyɔnuwo gome la, ƒewuimegbɔdɔdɔ eve le etɔ̃ ɖesiaɖe me nye esi me dzidzɔ mele o.” Ehiã be dzilawo nate gbe ɖe edzi na wo viwo be mele be gbɔdɔdɔ​—si nye mɔ wɔnuku si mía Wɔla ɖo tame be amewo nate edzi ayɔ anyigba dzi​—nadze egɔme le srɔ̃ɖeɖea godo le adzame o.

Nufiame si Wohiã Vevie

Ehiã be viwòwo nanya be mɔ ɖeka kolia si ŋu kakaɖedzi le si dzi woato aƒo asa na gbɔdɔdɔ do ŋgɔ na srɔ̃ɖeɖe me kuxiwo lae nye be woawɔ ɖe gɔmeɖose siwo ɖea vi tso gbaɖegbe ke siwo Mawu ɖo anyi la dzi. Gɔmeɖose kawo? Be womadɔ kple ame aɖeke o vaseɖe esime woaɖe srɔ̃ hafi, emegbe woaɖi anukware ɣesiaɣi na lɔlɔ̃tɔ ma le ame ƒe agbemeŋkekewo katã me, amesi hã le nɔnɔme nyuitɔ me la medɔ kple ame bubu aɖeke kpɔ o.

Gake menye kuxi siwo agbegbegblẽnɔnɔ hena vɛ lae nye susu vevi si ta woasi le enu o, ke boŋ le esi mia Wɔla gblɔ be nu gbegblẽe tae. Biblia xlɔ̃ nu be: ‘Mitsri matrewɔwɔ.’ ‘Misi le matrewɔwɔ nu.’ Nukatae? Elabena amesiwo yia edzi wɔa nu mawo “manyi mawufiaɖuƒe la ƒe dome o.”​—Tesalonikatɔwo I, 4:3; Korintotɔwo I, 6:​9, 10, 18.

Mawu ƒe gɔmeɖosewo dzi wɔwɔ nana wokpɔa dzidzɔ kple dzidzeme geɖe le agbe me. Ekpɔa mia ta tso nulɔdɔwo, gbɔmeyafuwo, ƒome si me dzila ɖeka ko le ƒe kuxiwo, kple dzigbagbã si tsoa amesiwo dɔ mía gbɔ ɖe woƒe ɖokuitɔdidi ta ƒe mia gbegblẽ ɖi me la si me.

Nya siwo Mawu ƒe blemanyagblɔɖila gblɔ ƒe 2,500 enye sia la nye nyateƒe tututu be: “Nye Yehowa, wò Mawu, enye amesi [afia] nusi nyo na wò la wo, nyee akplɔ wo to mɔ, si dzi nato la. Ðe wònye ɖe nèɖo to nye seawo la, anye ne wo ŋutifafa anɔ abe tɔsisi ene, eye wò dzɔdzɔenyenye anɔ abe ƒutsotsoewo ene.”​—Yesaya 48:​17, 18.

Gake aleke agbenyuinɔnɔ ƒe gɔmeɖose siawo ate ŋu asɔ ɖe egbegbe gbeɖoɖoɖi si wowɔna la nui? Míedzro biabia ma me le nyati si gbɔna me.