Nutoa Me Eƒe Ŋusẽkpɔkpɔ Ðe Wò Lãmesẽ Dzi
ÐƆKTA Walter Reed, si le Xexeame ƒe Dzɔdzɔmenunanawo Ŋuti Nusrɔ̃ƒe, gblɔ na Dukɔ Ƒoƒuawo ƒe Radiodɔwɔƒe nyitsɔ laa be, amegbetɔ ƒe asidede xexeame godoo ƒe nutome ɖoɖowo me ɖo afisi amegbetɔ le “nu gblẽm le ɖoɖo siawo ŋu le mɔ ɖedzesi aɖe nu.” Ðk. Reed gblɔ be nugbegblẽ le nutoa me ŋu alea hã na be míaƒe lãmesẽnyawo ɖo afɔku me le xexeame katã. Woŋlɔ nusiawo siwo ate ŋu ade amewo ƒe lãmesẽ afɔku me la dometɔ aɖewo ɖe magazine si nye Our Planet, si Dukɔ Ƒoƒuawo ta, me nyati aɖe si nɔ agbalẽ si nye World Resources 1998-99 me dzrom la me. Wo dometɔ aɖewoe nye si:
□ Wogblɔ be ɖiƒoƒo xɔme kple yame gbɔe akɔtadɔ siwo wua ɖevi siwo ade miliɔn ene lɔƒo ƒe sia ƒe la tso.
□ Tsi nyui kple dzadzɛnyenye ƒe anyimanɔmanɔ nana kpetadede siwo wua ɖevi miliɔn etɔ ƒe sia ƒe la kakana. Le kpɔɖeŋu me, mĩŋɔŋɔ kple xeɖeɖe si nu wotsi keŋkeŋ le Latin Amerika la gatrɔ gbɔ va teƒe ma hewu ame 11,000 le ƒe 1997 ɖeɖe dzaa me.
Woka nya ta be dɔléle siwo tso nutoa me ƒe nɔnɔme gbɔ wua ɖevi siwo wu 30,000 gbesiagbe le xexeame ƒe nuto siwo da ahe wu me. Wò ya bu ema ŋu kpɔ ko—ame 30,000 nanɔ kukum ŋkeke ɖesiaɖe le ƒea me, wosɔ gbɔ ate ŋu ayɔ yameʋugã 75 sɔŋ!
Gake menye dukɔ madeŋgɔwo me koe nutoa me te ŋu gblẽa nu le lãmesẽ ŋu le o. Our Planet gblɔ be “amesiwo wu miliɔn 100 le Europa kple Dziehe Amerika kpɔtɔ le ya si agblẽ nu le ame ŋu gbɔm,” si na be gbɔxi dzi ɖe edzi ŋutɔ. Le ɣeyiɣi ma ke me la, dukɔwo dome mɔzɔzɔ kple asitsatsa si le dzidzim ɖe edzi na dɔxɔleameŋu yeye 30 aɖewo va do ɖe dukɔ deŋgɔwo me. Tsɔ kpe ɖe eŋu la, magazinea ka nya ta be dɔléle aɖewo siwo nu woxe mɔ ɖo tsã “gatrɔ gbɔ hele nu gblẽm wu.”
Nublanuinya lae nye be woate ŋu ato mɔ̃ɖaŋununya siwo li dzi axe mɔ ɖe dɔléle siawo siwo tso nutoa me gbɔ la nu eye mabia ga home gã aɖeke o hafi. Le kpɔɖeŋu me, woate ŋu awɔ ŋgɔyiyi ɖedzesiwo le lãmesẽnyawo gome ne wona tsi nyui kple nusiwo ahe dzadzɛnyenye vɛ ɖo amesiame gbɔ. Ga home nenie ahiã be woaɖo taɖodzinu sia gbɔ? Dukɔ Ƒoƒuawo ƒe Radiodɔwɔƒea ka nya ta be Dukɔ Ƒoƒuawo ƒe Human Development Report 1998 gblɔ be, tsi nyui kple nusiwo ahe dzadzɛnyenye vɛ nana amesiame abia ga dɔlar biliɔn 11—esia mede ga home si Europatɔwo zãna ɖe ice cream ŋu le ƒe ɖeka me nu o!
[Nɔnɔmetata Tsoƒe si le axa 24]
Photo: Casas, Godo-Foto