Ndi Jehovah Ọyọbọrọ Akam Mi?

1-2. Nso ikeme ndinam ikere ke Jehovah ibọrọke akam nnyịn?

BIBLE ọdọhọ ete: “Nen̄ede dat esịt ke Jehovah, ndien enye ọyọnọ fi se esịt fo oyomde.” (Ps. 37:4) Kop utọ edinem n̄kpọ emi Abasi ọn̄wọn̄ọde do! Edi ndi akpana idori enyịn ke se ededi emi iben̄ede Jehovah, ke enye ọyọnọ nnyịn kpa ke ebe oro? Nso ikeme ndinam ibobụp utọ mbụme oro? Kere nsio nsio uwụtn̄kpọ emi ise. Sista kiet emi mîdọhọ ebe kan̄a ọbọn̄ akam ọdọhọ Abasi anam ẹkot imọ Ufọkn̄wed Mme Ọkwọrọ Obio Ubọn̄. Edi isua ifan̄ ebe owo ikotke enye. Brọda kiet emi edide akparawa ọdọn̄ọ idiọk udọn̄ọ onyụn̄ ọdọhọ Jehovah anam idem ọsọn̄ imọ man ikeme ndinen̄ede nsịn idem nnam n̄kpọ ke esop. Edi udọn̄ọ oro isụk ikụreke. Ete ye eka emi ẹdide Christian ẹbọn̄ akam ẹdọhọ Jehovah an̄wam eyen mmimọ ọsọn̄ọ esịne ke esop. Edi ẹtise, eyen oro ọkpọn̄ Jehovah.

² Anaedi enyene se afo n̄ko ọdọhọde Jehovah anam ọnọ fi, edi ukwe kan̄a n̄kpọ oro. Oro ekeme ndinam ekere ke Jehovah eti akam mbon en̄wen ọbọrọ, edi efre okwo. Mîdịghe, emekeme ndikere ke ekeme ndidi enyene se imọ inamde idue. Nte eketiede Sista Janiceb ekedi oro. Enye ye ebe esie ẹma ẹnen̄ede ẹyom ndikodu ke Bethel nnam n̄kpọ Abasi, ẹma ẹnyụn̄ ẹsịn n̄kpọ oro ke akam. Enye ọdọhọ ete: “Mma nnen̄ede nnịm ke ekpri ini ẹyekot nnyịn Bethel.” Edi mmọ ẹma ẹbet ediwak ọfiọn̄ ye isua, owo isụk ikotke mmọ. Janice ọdọhọ ete: “Esịt ikenemke mi, n̄konyụn̄ mmụmke ibuot aba. Mma n̄kere m̀mê enyene se n̄kanamde ndue Jehovah. Mma nnen̄ede ntịn̄ se n̄koyomde ke akam mi. Nso inam enye mîkọbọrọke akam mi?”

3. Idineme nso ke ibuotikọ emi?

³ Ndusụk ini imekeme ndikere m̀mê Jehovah esikam akpan̄ utọn̄ okop akam nnyịn. Ndusụk nti ikọt Abasi ke eset ẹma ẹsikere ntre n̄ko. (Job 30:20; Ps. 22:2; Hab. 1:2) Nso ikeme ndin̄wam fi enen̄ede enịm ke Jehovah idifreke akam fo? (Ps. 65:2) Ndibem iso mbọrọ mbụme ita emi ẹtienede mi ọmọn̄ an̄wam nnyịn ibọrọ mbụme oro: (1) Nso ke ikeme ndidori enyịn ke Jehovah ayanam? (2) Jehovah oyom inam nso? (3) Ntak emi ekemede ndiyom ikpụhọ ukot akam nnyịn?

NSO KE IKEME NDIDORI ENYỊN KE JEHOVAH AYANAM?

4. Nso ke Jehovah ọn̄wọn̄ọ ndinam ke Jeremiah 29:12?

⁴ Jehovah ọn̄wọn̄ọ ndikop akam nnyịn. (Kot Jeremiah 29:12.) Abasi nnyịn ama nti ikọt esie, ntre tutu amama enye ikemeke ndimen iso mfep mmọ ẹma ẹbọn̄ akam. (Ps. 10:17; 37:28) Edi oro iwọrọke ke se ededi emi iben̄ede, enye ọyọnọ nnyịn. Ndusụk se iben̄ede ẹkeme ndidi se idibetde tutu ko ke obufa ererimbot mbemiso ibọde.

5. Nso ke Jehovah esikere aban̄a nte enye osụk okopde akam nnyịn? Nam an̄wan̄a.

⁵ Jehovah esimen se iben̄ede enye ese m̀mê odụk ye uduak esie. (Isa. 55:8, 9) N̄kpọ kiet emi Jehovah aduakde edi yak mme owo emi ẹnemde-nem esịt ndiyak enye akara mmimọ ẹyọhọ isọn̄ emi. Edi Satan ọdọhọ ke mme owo ẹkpekara idemmọ, ke enye oro ọfọn ye mmọ akan. (Gen. 3:1-5) Jehovah ayak mme owo ẹkara idemmọ man enye owụt ke ikọ Devil oro edi nsu. Ukara owo edi ntak ediwak mfịna emi ẹsịmde nnyịn mfịn. (Eccl. 8:9) Imọdiọn̄ọ ke Jehovah iditreke kpukpru mfịna nnyịn idahaemi. Enye ekpetre, ndusụk owo ẹkeme ndikere ke ukara owo ọfọn onyụn̄ ekeme nditre mfịna mme owo.

6. Ntak emi anade inen̄ede inịm ke kpukpru se Jehovah anamde ọfọn onyụn̄ enen?

⁶ Ukem n̄kpọ ekeme nditịbe nnọ nsio nsio owo ndien mmọ ẹbọn̄ akam, edi Jehovah ekeme ndibọrọ ke nsio nsio usụn̄. Ke uwụtn̄kpọ, ini Edidem Hezekiah ọkọdọn̄ọde n̄kpa n̄kpa, enye ama ekpe Jehovah ubọk ete anam idem ọsọn̄ imọ. Jehovah ama onyụn̄ anam. (2 Ndi. 20:1-6) Edi ini apostle Paul ekpede Jehovah ubọk ete osio imọ “n̄kukịm ke obụkidem,” Jehovah ikosioho. Etie nte n̄kpọ oro ekedi udọn̄ọ. (2 Cor. 12:7-9) Kere ise eke apostle James ye Peter. Edidem Herod okoyom ndiwot mmọ mbiba. Nditọete ẹma ẹsịn Peter ke akam, imenịm ke mmọ ẹma ẹnyụn̄ ẹsịn James. Ẹma ẹwot James, edi Abasi ama anam utịben̄kpọ Peter ọbọhọ. (Utom 12:1-11) Imekeme ndikere ete, ‘Ntak emi Jehovah akanyan̄ade Peter edi inyan̄ake James?’ Bible itịn̄ke ntak.c Imenịm ke kpukpru se Jehovah anamde ẹnen. (Deut. 32:4) Imonyụn̄ idiọn̄ọ ke Jehovah ama ama Peter ye James. (Edi. 21:14) Ndusụk ini, ibọrọ akam nnyịn ekeme ndidi ke usụn̄ emi nnyịn mîkekereke. Edi imenịm ke usụn̄ ekededi emi Jehovah emekde ndibọrọ akam nnyịn enen onyụn̄ ọfọn. Ntre nnyịn isitọhọke ke usụn̄ ekededi emi enye emekde ndibọrọ.​—Job 33:13.

7. Isidomo nditre ndinam nso? Ntak-a?

⁷ Imesidomo nditre ndimen nte n̄kpọ etiede ye nnyịn ndomo ye nte etiede ye mbon en̄wen. Ke uwụtn̄kpọ, imekeme ndidọhọ Jehovah nte iyomde enye ọbọrọ akam nnyịn. Edi itise, enye ibọrọke ntre. Aka ko, nnyịn idikop ke owo en̄wen ama eben̄e Jehovah mbiet n̄kpọ oro, ndien enye etie nte ke Jehovah ama anam ọnọ enye. Se iketịbede inọ Sista Anna ekedi oro. Enye ama ọbọn̄ akam ọdọhọ Jehovah okûyak kansa owot Matthew ebe imọ. Sista iba en̄wen emi ẹkekponde owo ẹma ẹtiene ẹdọn̄ọ kansa kpa ke ukem ini oro. Anna ama ọbọn̄ akam etieti esịn Matthew ebe esie ye sista iba oro. Idem ama ọsọn̄ sista iba oro, edi Matthew ebe esie ama akpa. Nsonso oro, Anna ama ekere: ‘Ekpedi Jehovah akanam sista iba oro ẹbọhọ udọn̄ọ oro, ntak emi enye mîkokopke akam mi inam idem ọsọn̄ ebe mi?’ Nnyịn ikemeke nditịn̄ nte akasan̄ade yak sista iba oro ẹbọhọ kansa. Edi se idiọn̄ọde edi ke Jehovah ayanam kpukpru mfịna nnyịn ẹtre usen kiet, ke onyụn̄ ọdọn̄ enye ndinam mme ufan esie emi ẹma ẹkekpa, ẹset.​—Job 14:15.

8. (a) Isaiah 43:2 owụt ke didie ke Jehovah esin̄wam nnyịn? (b) Didie ke akam ekeme ndin̄wam nnyịn ini ikpọ mfịna ẹsịmde nnyịn? (Se vidio emi, Akam An̄wam Nnyịn.)

⁸ Jehovah iditreke ndin̄wam nnyịn. Jehovah edi Ete nnyịn, enye onyụn̄ ama nnyịn. Isinemke enye ndikụt nte ibọde ufen. (Isa. 63:9) Kpa ye oro, enye esiyak ndusụk mfịna ẹsịm nnyịn. Ndusụk mmọ ẹsitie nte akpammọn̄ m̀mê ikan̄. (Kot Isaiah 43:2.) Edi Jehovah ọn̄wọn̄ọ ke iyan̄wam nnyịn ‘isan̄a ibe’ mme mfịna oro. Jehovah idiyakke mfịna emi inyenede adian̄ade nnyịn ọkpọn̄ enye. N̄kpọ efen edi ke enye esinọ nnyịn okopodudu edisana spirit esie man ikeme ndiyọ. (Luke 11:13; Phil. 4:13) Ke ntak oro, imekeme ndinen̄ede nnịm ke enye iditreke ndinọ nnyịn se ededi emi edin̄wamde nnyịn iyọ mfịna nnyịn, inyụn̄ ika iso isọn̄ọ ida ye enye.d

JEHOVAH OYOM INAM NSO?

9. Didie ke James 1:6, 7 owụt ntak emi anade inịm ke Jehovah ayan̄wam nnyịn?

⁹ Jehovah oyom ibuọt idem ye enye. (Heb. 11:6) Ndusụk ini, ekeme nditie nnyịn nte ke mme mfịna nnyịn ẹkan nnyịn ubọk. Imakam ikeme nditọn̄ọ ndikere m̀mê Jehovah ayan̄wam nnyịn. Edi Bible anam ikụt ke Abasi ekeme ndinọ nnyịn odudu ‘idọk ibibene.’ (Ps. 18:29) Ntre utu ke nditie n̄kere m̀mê Abasi ayan̄wam nnyịn m̀mê idin̄wamke, ẹyak ibọn̄ akam ke ofụri esịt inyụn̄ inịm ke Jehovah ọyọbọrọ akam nnyịn.​—Kot James 1:6, 7.

10. Nọ uwụtn̄kpọ ndiwụt nte ikemede ndinam udeme nnyịn ima ibọn̄ akam ima.

¹⁰ Jehovah oyom yak edi ima ibọn̄ akam, nnyịn inam udeme nnyịn. Se uwụtn̄kpọ mi. Eyenete ekeme ndidọhọ Jehovah an̄wam imọ yak eteufọk imọ enyịme idụk akamba mbono. Didie ke Jehovah ekeme ndibọrọ akam oro? Jehovah ekeme ndinọ enye uko ekeneme n̄kpọ oro ye eteufọk esie. Edi brọda oro ke idemesie edidaha isan̄a ke ukot esie ika ibịne eteufọk esie. Ekeme ndidi ididịghe n̄kpọ ini kiet. Enye ekeme ndinyịme ndikpụhọ usen utom esie ye owo itieutom mmọ man enye ekeme ndidụk mbono oro. Okponyụn̄ edi se enye ọdọhọde ọfiọn̄ ama okụre yak ẹsio okụk utom mme usen emi imọ mîdidụhe do, enye ekeme ndidọhọ.

11. Ntak emi ikpọbọn̄de akam ediwak ini iban̄a se ifịnade nnyịn?

¹¹ Jehovah oyom ibọn̄ akam ediwak ini iban̄a se ifịnade nnyịn. (1 Thess. 5:17) Se Jesus eketịn̄de ama owụt ke idịghe kpukpru se iben̄ede ke Jehovah edinam inọ nnyịn ke ebe oro. (Luke 11:9) Ntre kûyak idem emem fi! Bọn̄ akam ke ofụri esịt, nyụn̄ bọn̄ ke ubọk ke ubọk. (Luke 18:1-7) Ima ibọn̄ akam ediwak ini iban̄a n̄kpọ, iwụt Jehovah ke imenen̄ede iyom n̄kpọ oro, ke imenịm ke enye ekeme ndin̄wam nnyịn.

NTAK EMI EKEMEDE NDIDI SE IKPỤHỌDE UKOT AKAM NNYỊN NDUSỤK INI?

12. (a) Ima iben̄e Abasi n̄kpọ, nso idi mbụme kiet emi ikemede ndibụp idem nnyịn? Ntak ikpobụpde? (b) Ikpanam nso man ikụt ite ke se iben̄ede Jehovah owụt ke imokpono enye? (Se ekebe emi “Ndi Se Mben̄ede Jehovah Owụt ke Mmokpono Enye?”)

¹² Abasi mînọhọ nnyịn se ikọbọn̄de akam iben̄e, enyene mbụme ita emi ikemede ndibụp idem nnyịn. Akpa edi, ‘Ndi se mben̄ede akam edi nnennen n̄kpọ?’ Ediwak ini, isikere ke imenen̄ede idiọn̄ọ se idifọnde ye nnyịn. Edi nte ini akade, se ikeben̄ede oro isinyeneke ufọn aba. Ikpenyene mfịna, imekeme ndidọhọ Jehovah se iyomde enye anam ọnọ nnyịn, edi ekeme ndidi enyene n̄kpọ efen emi Abasi akpanamde ọnọ nnyịn yak ọfọn akan oro. N̄ko ndusụk ini, ndusụk se isiben̄ede Jehovah ẹkeme ndinam idụkke ye uduak esie. (1 John 5:14) Se uwụtn̄kpọ mi. Ndi emeti ete ye eka emi iketịn̄de iban̄a ke ntọn̄ọ ntọn̄ọ? Mmọ ẹkedọhọ Jehovah an̄wam eyen mmọ ọsọn̄ọ esịne ke esop. Ekeme nditie nte ke eti n̄kpọ ke mmọ ẹben̄e oro. Edi Jehovah isinyịkke owo ekededi anam n̄kpọ ọnọ enye. Enye oyom kpukpru nnyịn, idem ye nditọ nnyịn nde, imek ke idem nnyịn ndituak ibuot nnọ imọ. (Deut. 10:12, 13; 30:19, 20) Ntre ete ye eka oro ẹkpekam ẹdọhọ Jehovah an̄wam mmimọ yak se mmimọ ikpepde eyen mmimọ odụk enye esịt, man enye ama Jehovah onyụn̄ edi ufan esie.​—N̄ke 22:6; Eph. 6:4.

13. Mme Hebrew 4:16 owụt ke ini ewe ke Jehovah edin̄wam nnyịn? Nam an̄wan̄a.

¹³ Ọyọhọ mbụme iba emi ikemede ndibụp idem nnyịn edi, ‘Ndi idahaemi ke Jehovah edibọrọ akam oro?’ Imekeme ndikere ke akam nnyịn edi se ẹbọrọde idaha idahaemi. Edi Jehovah akam enen̄ede ọdiọn̄ọ mfọnn̄kan ini emi enye ọkpọbọrọde akam nnyịn. (Kot Mme Hebrew 4:16.) Jehovah mîbọrọke akam nnyịn ke ebe oro, imekeme ndikere ke enye iyomke ndinam se iben̄ede. Akam ekeme ndidi Jehovah oyom ndibọrọ, edi edi ke ini ikemke kan̄a. Se uwụtn̄kpọ mi. N̄kọ ke eteti akparawa emi ọkọbọn̄de akam ọdọhọ Jehovah anam idem ọsọn̄ imọ? Ekpedi Jehovah ama anam utịben̄kpọ yak idem ọsọn̄ enye, Satan ekeme ndikpọkọdọhọ ke ekpedi Abasi ikanamke ntre, ke brọda oro ekpeketre ndinam n̄kpọ nnọ Jehovah. (Job 1:9-11; 2:4) N̄kpọ efen edi ke Jehovah enenịm ini emi enye edikọkde kpukpru orụk udọn̄ọ. (Isa. 33:24; Edi. 21:3, 4) Sia ini oro mîkemke kan̄a, nnyịn ikemeke ndidori enyịn ke Jehovah eyesinam utịben̄kpọ kpukpru ini yak udọn̄ọ nnyịn okụre. Se brọda oro akpakam anamde ekpedi ndiben̄e Jehovah ọsọn̄ọ enye idem onyụn̄ anam esịt ana enye sụn̄ man enye ekeme ndiyọ udọn̄ọ esie onyụn̄ aka iso ọsọn̄ọ ada ye Abasi.​—Ps. 29:11.

14. Se iketịbede inọ Janice ekpep fi nso?

¹⁴ Ndi emeti Janice emi ọkọbọn̄de akam oyom ndika Bethel? Isua ition ama ebe mbemiso an̄wan̄ade enye ke Jehovah ama ọbọrọ akam esie. Enye ọdọhọ ete: ‘Jehovah akada ini oro ekpep mi ediwak n̄kpọ onyụn̄ an̄wam mi ndi eti asan̄autom esie. Akana n̄kpep nditetịm mbuọt idem ye Abasi, n̄kpep ndisitịn̄ enyịn n̄kpep Ikọ Abasi, nnyụn̄ n̄kpep ndisikop idatesịt inamke n̄kpọ m̀mê nso itịbe inọ mi.’ Nte ini akakade, ẹma ẹmek ebe Janice esenyịn circuit, enye onyụn̄ etiene ebe esie anam utom circuit. Janice etie ekere nte n̄kpọ eketiede ini oro onyụn̄ ọdọhọ ete: “Jehovah ama ọbọrọ akam mi, edi ikedịghe nte n̄kekerede. Ama ada ini mbemiso n̄kemede ndikụt utọ ediye usụn̄ emi enye ọkọbọrọde akam oro. Edi mmọkọm enye etieti nte n̄kenyenede utọ ifet oro ndikụt nte enye amade mi onyụn̄ ọfọnde ido ye ami.”

15. Ntak emi ikemede ndidọhọ ke ndusụk ini, ọkpọfọn ikpọn̄ ndisiak akpan usụn̄ emi iyomde Abasi ọbọrọ akam nnyịn? (Se mme ndise n̄ko.)

¹⁵ Ọyọhọ mbụme ita emi ikemede ndibụp idem nnyịn edi, ‘Ndi akpana n̄kpụhọ ukot akam mi?’ Ọfọn isiak se iyomde Jehovah anam ọnọ nnyịn, edi ndusụk ini imekeme ndikpọn̄ nditịn̄ akpan usụn̄ emi iyomde enye ọbọrọ akam nnyịn man ikeme ndikụt se idide uduak esie. N̄kọ emeti sista emi ọkọbọn̄de akam yak ẹkot imọ Ufọkn̄wed Mme Ọkwọrọ Obio Ubọn̄? Enye oyom ndika ufọkn̄wed oro man ekeme ndikan̄wam ke itie emi ẹyomde-yom mme ọkwọrọikọ. Edi nte enye osụk ọbọn̄de akam yak ẹkot enye, enye ekeme ndidọhọ Jehovah an̄wam imọ ikụt mme usụn̄ en̄wen emi imọ ikemede ndisịn idem nnam ekese nnọ enye. (Utom 16:9, 10) Enye ama ọbọn̄ akam oro ama, enye ekeme ndibụp esenyịn circuit mmọ m̀mê enyene esop emi ekperede mmọ, emi ẹyomde ediwak mme asiakusụn̄. Mîdịghe enye ekeme ndiwet leta mbụp n̄kọk itieutom ekededi m̀mê enyene ebiet emi ẹyomde-yom mme ọkwọrọikọ ke efakutom mmọ.e

16. Nso ke ikpenen̄ede inịm?

¹⁶ Se ikpepde anam ikụt ke edi se inen̄erede inịm ke Jehovah ọyọbọrọ akam nnyịn ke ata nnennen usụn̄, ye ke usụn̄ emi edifọnde ye nnyịn. (Ps. 4:3; Isa. 30:18) Ndusụk ini, ibọrọ akam nnyịn ididịghe nte ikekerede. Edi tutu amama, ididịghe ima ibọn̄ akam Jehovah emen iso efep. Enye ama nnyịn etieti, idinyụn̄ ikpọn̄ke nnyịn tutu amama. (Ps. 9:10) Ntre, “[buọt] idem ye enye kpukpru ini” nyụn̄ bọn̄ akam tịn̄ ofụri se isịnede fi ke esịt nọ enye.​—Ps. 62:8.