O se Nanuma Tiko?
O bau wilika vinaka na itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:
Na cava na bibliomancy, mera raica tale ga vakacava na lotu vaKarisito?
Qori na kena cegai ga e dua na tabana e rawa qai wiliki na imatai ni tikina e raici, ni vakabauti ena veidusimaki ena ka e vinakati me caka. Era sega ni dau qara na lotu vaKarisito na ivakatakilakila vuni. Era vulica ga na iVolatabu mera rawata kina na kilaka dina kei na veidusimaki vakalou.—15/12, tabana e 3.
“Na vuravura” cava ena takali yani?
“Na vuravura” ena takali yani e dusi ira na lewe i vuravura era sega ni cakava na loma ni Kalou. (1 Joni 2:17) Ena sega ni vakarusai na vuravura qele kei ira era yalodina.—1/1, tabana e 5-7.
E sa mate o Epeli, ia e rawa ni vosa vakacava vei keda? (Iper. 11:4)
E cakava qori ena vuku ni vakabauta. Eda rawa ni vuli mai vua da qai vakatotomuria na nona vakabauta. E se yaga tiko ga na nona ivakaraitaki.—1/1, tabana e 12.
Na cava eso na basoga ni noda bula e dodonu meda qarauna meda kua kina ni yawaka na Kalou?
Qo eso na ituvaki: noda cakacaka, na ka ni veivakamarautaki eda digia, noda veimaliwai kei dua na wekada e vakasivoi, noda dau vakayagataka na iyaya vovou, noda kauaitaka na noda bulabula vakayago, rai cala me baleta na ilavo, kei na noda kauaitaka vakasivia na noda rai se noda itutu.—15/1, tabana e 12-21.
Na cava eda rawa ni vulica ena yalomalumalumu i Mosese?
A sega ni dokadokataka o Mosese na nona itutu, a nuitaka ga na Kalou, sega ni nuitaki koya. Eda na sega ni vakalaiva na kaukaua, lewa se noda taledi meda lai dokadoka kina, ia eda na vinakata ga meda nuitaki Jiova. (Vkai. 3:5, 6)—1/2, tabana e 5.
Era na bula e vei na vakaturi?
E lewe lailai ga—144,000—era na bula e lomalagi. Ia e levu vei ira na vakaturi, era na bula tale e vuravura, era nuitaka mera bula tawamudu kina.—1/3, tabana e 6.
Na cava e kena ibalebale ni ‘sega ni cili na lomadra’ na Isireli? (Jere. 9:26)
Era dau talaidredre qai vinakati mera kauta laivi na ka e vakavuna tiko me dredre ni talairawarawa na lomadra, me vaka na nodra vakasama, ivakarau ni lomadra, se na nodra inaki e veisaqasaqa kei na Kalou. (Jere. 5:23, 24)—15/3, tabana e 9-10.
Na sala cava e vakainaki kina na bula i Jisu?
E inaki sara ga ni nona bula me cakava na loma ni Kalou. A lomana vakalevu na Tamana kei ira na tamata. E kila kina o Jisu ni lomani koya o Tamana, e vakadonui koya tale ga. Qori na veika ena vakainaki kina na noda bula.—1/4, tabana e 4-5.
Na cava e okati mera tiki ni isoqosoqo i Jiova e vuravura?
E okati kina na iLawalawa Dauvakatulewa, na komiti ni tabana, ivakatawa dauveilakoyaki, ilawalawa qase, ivavakoso, kei keda yadudua na iVakadinadina.—15/4, tabana e 29.
Na cava eda rawa ni kaya kina ni sega ni dau veivakalolomataki na Kalou ni tauca na nona lewa?
E sega ni dau taleitaka o Jiova mera mate na tamata ca. (Isik. 33:11) E laurai ena ka e dau cakava ena gauna makawa ni dau vakasalataki ira rawa na tamata ni bera ni tauca nona lewa. Qori eda rawa ni nuitaka kina meda bula ena gauna ena tauca kina na nona lewa ena veigauna se bera mai.—1/5, tabana e 5-6.
Vakacava era dau vakamatei na dau basulawa e Isireli ena nodra vakaliligi ena kau?
Sega. Qori era cakava na veimatanitu tale eso ena gauna makawa, ia sega ni o ira na Isireli. Ena gauna mada ga a volai kina na iVolatabu vakaIperiu, era vakamatei rawa na dau caka ca, me vaka na nodra vakaviriki ena vatu. (Vunau 20:2, 27) Oti e sa na qai vakaliligi na yagodra na sa mate ena kau mera vuli kina na kena vo.—15/5, tabana e 13.
Na cava e dredre kina na veisaututaki e vuravura?
E levu na ka eda sa rawata na kawatamata, ia e sega vei keda na kaukaua meda lewa kina vakavinaka na noda ilakolako. (Jere. 10:23) E lewa tu na vuravura o Setani, ena sega ni rawa kina meda veisaututaki na tamata. (1 Joni 5:19)—1/6, tabana e 16.