Klɛŋklɛŋ Wolo Ni Akɛmaje Korintobii Lɛ
3 No hewɔ lɛ, nyɛmimɛi, minyɛɛɛ mikɛ nyɛ awie tamɔ gbɔmɛi ni hãa Nyɔŋmɔ mumɔ lɛ tsɔɔ amɛ gbɛ,*+ shi moŋ tamɔ heloŋ gbɔmɛi,* tamɔ abifabii+ yɛ Kristo mli. 2 Fufɔ mihã nyɛ, jeee niyenii ni tsii, ejaakɛ no mli lɛ, nyɛhe waaa. Anɔkwa, amrɔ nɛɛ po lɛ nyɛhe waaa,+ 3 ejaakɛ heloŋ gbɔmɛi ji nyɛ lolo.+ Gbii abɔ ni awuŋayeli kɛ béi yɔɔ nyɛteŋ nɛɛ, ani jeee heloŋ gbɔmɛi ji nyɛ,+ ni ani jeee bɔ ni gbɔmɛi nyiɛɔ lɛ, nyɛnyiɛɔ lɛ? 4 Ejaakɛ kɛ́ mɔ ko kɛɛ, “Paulo nɔ ji mi,” shi mɔ kroko kɛɛ, “Apolo nɔ ji mi”+ lɛ, belɛ nyɛmiifee nyɛnii tamɔ gbɔmɛi kɛkɛ, aloo jeee nakai?
5 No hewɔ lɛ, namɔ ji Apolo? Hɛɛ, namɔ ji Paulo? Amɛji sɔɔlɔi+ ni nyɛtsɔ amɛnɔ nyɛhe Nuŋtsɔ lɛ nɔ nyɛye, tamɔ bɔ ni Nuŋtsɔ lɛ kɛhã mɔ fɛɛ mɔ lɛ. 6 Mi lɛ, midu,+ Apolo shwie nɔ nu,+ shi Nyɔŋmɔ ji mɔ ni hãa eyaa nɔ edaa, 7 no hewɔ lɛ, jeee mɔ ni du lɛ ni fee nɔ ko, ni jeee mɔ ni shwie nɔ nu lɛ hu, shi moŋ mɔ ni hãa edaa, ni ji Nyɔŋmɔ lɛ.+ 8 Agbɛnɛ, mɔ ni duɔ kɛ mɔ ni shwieɔ nɔ nu lɛ fɛɛ lɛ ekome ni,* shi mɔ fɛɛ mɔ baaná lɛ diɛŋtsɛ ejweremɔnɔ yɛ lɛ diɛŋtsɛ enitsumɔ naa.+ 9 Ejaakɛ Nyɔŋmɔ nanemɛi nitsulɔi ji wɔ. Nyɛ lɛ, Nyɔŋmɔ ŋmɔ ji nyɛ, Nyɔŋmɔ tsũ.+
10 Yɛ Nyɔŋmɔ dromɔ ni akɛhã mi lɛ naa lɛ, mitswa faneshi+ akɛ tsumalɔ ŋaalɔ ko,* shi mɔ kroko miima tsũ lɛ yɛ nɔ. Shi mɔ fɛɛ mɔ ahã ehiɛ ahi bɔ ni emaa tsũ lɛ yɛ faneshi lɛ nɔ lɛ nɔ. 11 Ejaakɛ mɔ ko nyɛŋ etswa faneshi kroko fe nɔ ni atswa lɛ, ni ji Yesu Kristo.+ 12 Agbɛnɛ, kɛ́ mɔ ko kɛ shika tsuru, loo jwiɛtɛi, loo tɛi ni jara wa, loo tsei, loo ntoo, loo jwɛi ma tsũ ema faneshi lɛ nɔ lɛ, 13 abaana bɔ ni mɔ fɛɛ mɔ nitsumɔ ji,* ejaakɛ gbi lɛ baajie lɛ kpo, ejaakɛ abaatsɔ la nɔ ajie lɛ kpo,+ ni la lɛ diɛŋtsɛ baatsɔɔ nɔ ni mɔ fɛɛ mɔ ema. 14 Kɛ́ la lɛ eshãaa nɔ ni mɔ ko ema kɛma faneshi lɛ nɔ lɛ, abaajwere lɛ; 15 kɛ́ la lɛ shã nɔ ni mɔ ko ema lɛ, nɔ ko baaŋmɛɛ lɛ, shi lɛ diɛŋtsɛ lɛ, abaahere eyiwala; shi ebaafee tamɔ etsɔ la mli.
16 Ani nyɛleee akɛ Nyɔŋmɔ sɔlemɔ shĩa ji nyɛ,+ ni akɛ, Nyɔŋmɔ mumɔ lɛ hiɔ nyɛmli?+ 17 Kɛ́ mɔ ko kpãtã Nyɔŋmɔ sɔlemɔ shĩa lɛ hiɛ lɛ, Nyɔŋmɔ baakpãtã ehiɛ; ejaakɛ Nyɔŋmɔ sɔlemɔ shĩa lɛ yɛ krɔŋkrɔŋ, ni nyɛji nakai sɔlemɔ shĩa lɛ.+
18 Mɔ ko akalaka lɛ diɛŋtsɛ ehe: Kɛ́ nyɛteŋ mɔ ko susuɔ akɛ ehiɛ kã shi yɛ je nɛɛ* mli lɛ, etsɔ kwashia, koni etsɔ hiɛshikalɔ. 19 Ejaakɛ je nɛɛ mli hiɛshikamɔ lɛ ji kwashiai asane yɛ Nyɔŋmɔ hiɛ, ejaakɛ aŋma akɛ: “Emɔɔ hiɛshikalɔi yɛ amɛŋaatsɔɔ lɛ mli.”+ 20 Ni agbɛnɛ hu: “Yehowa* le akɛ hiɛshikalɔi lɛ asusumɔi lɛ, sɛɛnamɔ ko bɛ he.”+ 21 No hewɔ lɛ, mɔ ko akashwã efɔ̃ gbɔmɛi anɔ; ejaakɛ nii fɛɛ lɛ, nyɛnɔ ni, 22 Paulo jio, Apolo jio, Kefa* jio,+ je lɛ jio, wala jio, gbele jio, nibii ni yɔɔ amrɔ nɛɛ jio, nibii ni baaba lɛ jio, nii fɛɛ lɛ, nyɛnɔ ni; 23 nyɛ hu, Kristo nii ji nyɛ;+ Kristo hu, Nyɔŋmɔ nii ji lɛ.