Biblia Kaselɔi Ni Wɔɔtsɔɔ Amɛ Gbɛ Kɛba Yehowa Gbɛjianɔtoo Lɛ Mli
(KADIMƆ: Sane ni nyiɛ sɛɛ nɛɛ baasa wɔhe jogbaŋŋ kɛ wɔbɔi wɔ Maŋtsɛyeli Asai lɛ amli yaa ekoŋŋ lɛ. Amrɔ nɛɛ, naatsii lɛ hewɔ lɛ, esa akɛ wɔhiɛ ahi wɔhe nɔ jogbaŋŋ yɛ nɔ ni wɔkɛɔ mɔ fɛɛ mɔ yɛ hei ni wɔkpeɔ yɛ lɛ he. Taakɛ bɔ ni atsɔ hiɛ akɛɛ wɔ momo lɛ, dani wɔkɛ mɔ hee ko aaaba kuu lɛ mli lɛ, esa akɛ wɔkɛ onukpai lɛ asusu enɛ he klɛŋklɛŋ. Shi yɛ fɛɛ sɛɛ lɛ, amrɔ nɛɛ po, otii ni asusu he lɛ ahe baaba sɛɛnamɔ aha wɔ yɛ mɛi ni yɔɔ wiemɔ lɛ he miishɛɛ ni wɔɔtsɔɔ amɛ gbɛ kɛha Yehowa gbɛjianɔtoo lɛ mli lɛ mli.
1 Ehe miihia ni Biblia kaselɔi lɛ ale gbɛjianɔtoo ni ji “tooku kome” ni Yesu wie he yɛ Yohane 10:16 lɛ jogbaŋŋ. Esa akɛ amɛna amɛle akɛ le ni aaale amɛ akɛ amɛfata Yehowa gbɛjianɔtoo lɛ he lɛ he miihia kɛha amɛyiwalaheremɔ. (Kpoj. 7:9, 10, 15) No hewɔ lɛ, esa akɛ wɔje shishi wɔtsɔɔ wɔ Biblia kaselɔi lɛ agbɛ kɛba gbɛjianɔtoo loo asafo lɛ mli amrɔ nɔŋŋ ni wɔɔje nikasemɔ lɛ shishi.
2 Ye obua o-Biblia kaselɔi lɛ ni amɛle Yehowa gbɛjianɔtoo ni yɔɔ shikpɔŋ nɔ lɛ he nibii sɔrɔtoi lɛ fɛɛ. Akɛni amɛnyiɛ klɛŋklɛŋ afii oha lɛ mli nɔkwɛmɔ nɔ lɛ sɛɛ hewɔ lɛ. Yehowa webii fɛɛ yɛ asafoi ni yɔɔ onukpai, asafoŋ sɔɔlɔi, kɛ shiɛlɔi yɛ mli lɛ amli. Ŋmɛnɛ, asafoi lɛ amlibii lɛ naa kpeei enumɔ ni amɛyaa yɛ otsi mli lɛ fɛɛ ahe miishɛɛ. Atoɔ kpeei bibii kɛ kpeei wuji ahe gbɛjianɔ yɛ be kɛ bei amli yɛ afi lɛ mli, ni enɛɛmɛi kɛ gbɛtsɔɔmɔi krɛdɛɛ kɛ hegbɛi hu haa koni wɔnyɛ wɔkɛ wɔnanemɛi Odasefoi ni jɛ hei krokomɛi lɛ ana naanyobɔɔ. Agbɛnɛ hu, ayɛ gbɛgbalɔi, maŋsɛɛ sanekpakpa shiɛlɔi, kɛ nɔkwɛlɔi gbɛfalɔi, kɛ agbɛnɛ hu Nɔyeli Kuu ni kudɔɔ jeŋ muu fɛɛ nitsumɔ lɛ. Mɛɛ gbɛ nɔ oootsɔ oha o-Biblia kaselɔi lɛ ale Yehowa gbɛjianɔtoo lɛ he nibii sɔrɔtoi lɛ fɛɛ jogbaŋŋ? Mɛɛ gbɛ nɔ oootsɔ oye obua amɛ koni amɛna akɛ bɔ ni ato asafo lɛ he gbɛjianɔ aha lɛ damɔ Biblia lɛ nɔ?
Okɛ Nyɔŋmɔ Suɔmɔnaa Nii Wolo Bibioo Lɛ Atsu Nii
3 Atsɔɔ nibii ni kɔɔ Yehowa gbɛjianɔtoo lɛ he lɛ mli jogbaŋŋ yɛ Nyɔŋmɔ Suɔmɔnaa Nii wolo bibioo lɛ mli. Obaanyɛ okɛtsu nii ni okɛha Biblia kaselɔi lɛ ale asafo lɛ fiofio koni oye obua amɛ ni amɛle gbɛ nɔ ni etsɔɔ etsuɔ nii ehaa. Gbɛ ni hi ni oootsɔ nɔ oje shishi ji ni otsɔɔ lɛ nɔ ni afeɔ yɛ Maŋtsɛyeli Asa lɛ nɔ. Enɛ baawo nikaselɔ lɛ hewalɛ ni eba asafoŋ kpeei. Dani ooofɔ lɛ nine klɛŋklɛŋ kwraa ni ebabo maŋshiɛmɔ toi lɛ, esa akɛ nyɛti sane ni yɔɔ baafai 14 kɛ 16 lɛ mli. Gbalamɔ ejwɛŋmɔ kɛba emli mfonirii lɛ anɔ. Tsɔɔmɔ lɛ he ni Maŋtsɛyeli Asa lɛ yɔɔ kɛ bɔ ni etamɔ eha. Obaanyɛ okɛ Maŋtsɛyeli Asa he ni oyaa lɛ he mfoniri atsɔɔ lɛ.
4 Kɛ atswa kpokpaa nɔkwɛlɔ lɛ saramɔ he adafi aha asafo lɛ, okɛ o-Biblia kaselɔ lɛ asusu baafai 20 kɛ 21 he. Okɛ sanebimɔi ni yɔɔ baafa 21 naagbee lɛ atsu nii ni okɛha emli otii lɛ aje kpo jogbaŋŋ. Okɛ klɛŋklɛŋ kuku ni yɔɔ baafa 20 lɛ atsu nii ni okɛ lɛ asusu bɔ ni wɔ amrɔ nɛɛ gbɛjianɔtoo lɛ damɔ Ŋmalɛ nɔ lɛ he. Nɛkɛ sane nɛɛ baaha Maŋtsɛyeli Asa lɛ nɔ ni onikaselɔ lɛ aaaba lɛ afee nɔ ni shishinumɔ yɔɔ he.
5 Nakai nɔŋŋ hu, dani nyɛbaaya nyɛ kpokpaa wulu nɔ kpee, kpokpaa nɔ kpee, aloo kpee krɛdɛɛ gbi lɛ, esa akɛ nyɛsusu nɔ ni aŋma yɛ baafa 19 lɛ he. Gbalamɔ ejwɛŋmɔ kɛya nɔ ni afeɔ yɛ kpeei wuji ashishi lɛ nɔ, ni oma bɔ ni ekpeleɔ jeŋ fɛɛ taakɛ atsɔɔ yɛ mfoniri ni yɔɔ baafa 18 mli lɛ nɔ mi. Kɛ owie mfoniri ni miitsɔɔ wolo hee ko ni ajie lɛ kpo lɛ he ogbe naa lɛ, obaanyɛ oha esaa ehe kɛha nibii krokomɛi ni yɔɔ baafai 24 kɛ 25 lɛ ahesusumɔ. Kɛ oogbala gbɛgbamɔ sɔɔmɔ lɛ mli lɛ, nyɛsusua otii ni yɔɔ baafai 22 kɛ 23 lɛ he.
Tsakemɔ Ni Ekɛ Hiamɔ Lɛ Akpa Gbee
6 Taakɛ bɔ ni onaa lɛ, ehe ehiaaa ni oje shishi kɛjɛ Nyɔŋmɔ Suɔmɔnaa Nii wolo bibioo lɛ shishijee. Shi moŋ, nyɛbaanyɛ nyɛsusu otii ni baaye abua nikaselɔ lɛ ni ehiɛ asɔ Yehowa gbɛjianɔtoo lɛ ni ewo lɛ hewalɛ ni ekɛ ehe abɔ asafo lɛ he lɛ he kɛjɛ wolo bibioo lɛ mli, yɛ hegbɛ ni nyɛaana kɛ bɔ ni hiamɔ lɛ ji lɛ naa.
7 Wiemɔ ni ooowie kɛ nɔmimaa yɛ be mli ni nyɛsusuɔ saji nɛɛ ahe lɛ baana hewalɛ kpakpa yɛ onikaselɔ lɛ nɔ. Na ekaa yɛ mumɔ lɛ mli. (Bɔfoi 18:25) Agbɛnɛ hu, kwɛmɔ jogbaŋŋ koni bo, “ni otsɔɔ mɛi krokomɛi anii lɛ,” ofee nɔkwɛmɔ nɔ kpakpa yɛ hiɛsɔɔ ni ooojie kpo otsɔɔ yɛ Yehowa gbɛjiantoo lɛ he lɛ mli. (Rom. 2:21) Kɛ ofee nakai lɛ, obaaye obua mɛi krokomɛi ni amɛbafata tooku kome ni Yesu nyiɛ amɛhiɛ kɛmiiya naanɔ wala mli lɛ ahe.