1992 “La Hiɛlɔi” Yehowa Odasefoi Akokpaa Wulu nɔ Kpee
1 Kpeei wuji etee nɔ efee Yehowa jalɔi ashihilɛ mli nifeemɔi lɛ ateŋ ekome yɛ bei fɛɛ mli. Blema Israel buaa amɛhe naa, ohai kɛ akpei abɔ, yɛ bei pɔtɛɛ komɛi amli yɛ afi lɛ mli kɛha gbijuji sɔrɔtoi ayeli, aloo kɛha “kpee krɔŋkrɔŋ.” (3 Mose 23:1-36) Nɛkɛ henaabuamɔi ni kanyaa mɔ nɛɛ haa amɛnaa hegbɛ amɛkɛjaa Yehowa Nyɔŋmɔ, ni amɛkɛ ewebii krokomɛi babaoo hu kpeɔ, ni etsɔɔ amɛ nii. Kpeei ni wɔfeɔ ŋmɛnɛ lɛ hu haa wɔnaa hegbɛi ni tamɔ nakai nɔŋŋ, ni Nyɔŋmɔ webii akpekpei abɔ naa he miishɛɛ babaoo. Ŋwanejee ko bɛ he akɛ, nyɛteŋ mɛi pii fata mɛi 100,171 ni na jɔɔmɔ babaoo yɛ “Mɛi ni Sumɔɔ Nyɔŋmɔ Heyeli” Kpokpaa Wuji Anɔ kpeei ni sa kaimɔ jogbaŋŋ ni afee yɛ maŋ nɛɛ mli fɛɛ yɛ nyɛsɛɛ December kɛ January mii lɛ shishi lɛ ahe. Nyɛteŋ mɛi komɛi hu na miishɛɛ akɛ amɛfata mɛi 842 ni abaptisi amɛ lɛ ahe. Amrɔ nɛɛ be eshɛ ni wɔkɛbaabɔi wɔhe saamɔ kɛha gbii etɛ kpee kroko ni yɔɔ miishɛɛ waa ni wɔbaaya—1992 “La Hiɛlɔi” Kpokpaa Wulu nɔ kpee lɛ. Ani bo kɛ oweku lɛ fɛɛ baahi jɛmɛ?—5 Mose 31:12.
2 Aato kpee lɛ he gbɛjianɔ koni etsu Nyɔŋmɔ webii, ni gbɛɔ anɔkwale lɛ amɛshwaa akɛ la hiɛlɔi yɛ jeŋ fɛɛ lɛ ahiamɔ nii ahe nii. Ekaawoo kɛ kanyamɔ ni wɔɔna kɛji wɔtee kpee nɛɛ shishi koni wɔnine ashɛ mumɔŋ jɔɔmɔi babaoo ni asaa ato wɔ lɛ anɔ lɛ he miihia wɔ yɛ nɛkɛ nibii agbɛjianɔtoo nɛɛ naagbee gbii fɔ ji nɛɛ amli. Kwɛmɔ koni okɛ sɔlemɔ ato okpee lɛ yaa he gbɛjianɔ jogbaŋŋ bɔni afee ni onyɛ ohi jɛmɛ, ni ona gbii etɛ ni akɛto mumɔŋ nibii ahe gbɛjianɔ kpakpa aha wɔ nɛɛ fɛɛ mli gbɛfaŋnɔ, kɛjɛ lala ni akɛbaagbele kpee lɛ nɔ aahu kɛyashi naagbee sɔlemɔ ni akɛbaakpa lɛ nɔ. Jɛɛ suɔmɔ mli ni okɛ mɛi krokomɛi ni yelikɛbuamɔ he baahia amɛ, titri lɛ mɛi heei ni yɔɔ wiemɔ lɛ he miishɛɛ lɛ afata ogbɛjianɔtoo he, koni amɛ hu amɛnyɛ amɛya kpee lɛ yɛ gbii etɛ lɛ fɛɛ mli. (Gal. 6:10) Gbɛjianɔtoo lɛ jeɔ shishi Sohaa leebi 9:50 ni ebaa naagbee gbɛkɛ 5:00. Hɔɔ gbɛjianɔtoo lɛ jeɔ shishi leebi 9:00 ni ehaa naagbee kɛ lala kɛ sɔlemɔ gbɛkɛ 6:00. Hɔgbaa lɛ, gbɛjianɔtoo lɛ baaje shishi leebi 9:00 ni ebaaba naagbee aaatee shwane 4:30. Saji ni nyiɛ sɛɛ nɛɛ baaye abua bo yɛ ohesaamɔ mli.
3 He Ni Obaaya Yɛ: Ato gbɛjianɔ koni kɛji ebaahi lɛ, kpokpaa fɛɛ kpokpaa, aloo kɛ ehe miihia lɛ, efa ko aya kpokpaa wulu nɔ kpee lɛ mli nɔ ni bɛŋkɛ amɛ fe fɛɛ. Akɛ emli saji titrii lɛ eha yɛ nɔ ni aŋma ahɔ mli nɛɛ baafa 6. Ni wɔɔna sɛii ni fa bɔ ni sa, kɛ woji, niyenii, wɔɔhei ni wɔbaahi, kɛ nibii krokomɛi lɛ damɔ mɔdɛŋ ni wɔɔbɔ koni shiɛlɔi lɛ ateŋ mɛi babaoo aya kpeei lɛ yɛ hei ni atsɔɔ ni amɛ asafoi lɛ aya yɛ lɛ nɔ. No hewɔ lɛ, aawo asafoi fɛɛ hewalɛ ni amɛkɛ gbɛjianɔtoo ni atsɔɔ nɛɛ atsu nii kɛmɔ shi. Enɛ he miihia waa diɛŋtsɛ, titri lɛ yɛ asafoi ni yɔɔ maŋtiasei amli lɛ agbɛfaŋ.
4 Kɛji abaatee kpeei enyɔ yɛ wiemɔ kometoo lɛ nɔŋŋ mli yɛ maŋtiase lɛ mli yɛ otsii anaagbee enyɔ ni tsara nɔ mli lɛ, ekolɛ nyɛmimɛi komɛi baasusmɔ ni amɛya kpeei enyɔ lɛ fɛɛ. Eyɛ mli akɛ ekolɛ enɛ baaha amɛna hegbɛi babaoo kɛha amɛhe hewalɛwoo moŋ, shi kɛlɛ ekɛ naagbai komɛi baa yɛ nibii ni akɛtsuɔ nii akɛfeɔ kpee lɛ agbɛfaŋ, ni no hewɔ lɛ ehaaa yiŋtoo hewɔ ni wɔsumɔɔ ni wɔyi akafa tsɔ fe nine yɛ he kome, koni kpee shishi nitsumɔ lɛ hu akafa tsɔ lɛ aye omanye. Yɛ enɛ hewɔ lɛ, wɔmiibi ni nyɛmimɛi ni yɔɔ maŋtiasei amli lɛ aya kpee ni ato akɛ amɛya yɛ nakai maŋtiase lɛ mli lɛ pɛ. Kɛji ootao oya kpee ni ji enyɔ, shi jeee yɛ maŋtiase nɛɛ nɔŋŋ mli lɛ, no lɛ ejeee naagba ko kɛha wɔ. Akɛ kpee shishi nitsumɔi komɛi ni he hiaa woɔ nyɛmimɛi lɛ ekomɛi adɛŋ ni amɛtsuɔ he nii, ni no hewɔ lɛ, ehaa wiemɔi lɛ ekomɛi ŋmɛɛɔ amɛ. Yɛ amɛgbɛfaŋ lɛ, wɔmiijie amɛ yɛ mli, bɔni afee ni amɛnyɛ amɛya kpee ni ji enyɔ ni abaatee yɛ nakai maŋtiase lɛ nɔŋŋ mli lɛ. Kɛfata he lɛ, kɛji wiemɔ he naagba hewɔ lɛ, nyɛmimɛi komɛi baasumɔ ni amɛya kpee lɛ yɛ maŋtiase kroko mli, ni jeee he ni atsɔɔ ni amɛ asafo lɛ aya yɛ lɛ, no hu gbɛ yɛ akɛ amɛfeɔ nakai.
5 Yɛ asafoi ni yɔɔ shɔŋŋ lɛ agbɛfaŋ nɛkɛ lɛ, ekolɛ nibii tamɔ wiemɔ, tsɔne ni amɛkɛbaaya, kɛ gbɛ Iɛ jɛkɛmɔ baaha efee nɔ ni hi jogbaŋŋ kɛha amɛ akɛ amɛaaya kpee lɛ yɛ he kroko moŋ fe he ni ato ni amɛya yɛ lɛ. Akɛ nɔkwɛmɔ nɔ lɛ, ekolɛ Kasoa kɛ Nyanyanu Asafoi lɛ baasumɔ ni amɛya Accra “B” loo Accra “C” kpee lɛ moŋ fe ni amɛaaya Cape Coast. Nakai nɔŋŋ hu, eyɛ mli akɛ ato gbɛjianɔ ni asafoi ni yɔɔ kpokpai 3A kɛ 13 lɛ aya kpeei lɛ yɛ Accra moŋ, shi ekolɛ amɛteŋ mɛi komɛi baana akɛ Koforidua kpee lɛ moŋ yaa baafee mlɛo kɛha amɛ. Nakai asafoi lɛ yɛ hegbɛ ni amɛhalaa nɔ ni amɛbaaya. Kɛji asafo ko kpɛ eyiŋ akɛ ebaaya kpee kroko ni jeee no ato ni amɛya lɛ, no lɛ esa akɛ amɛtswa kpokpaa nɔkwɛlɔ lɛ adafi koni ekato amɛ saramɔ he gbɛjianɔ kɛha nakai otsi ni amɛkɛbaaya kpee lɛ.
6 TSU HE GBƐJIANƆTOO: Wɔkɛ Room Request loo tsubimɔ woji miimaje asafo fɛɛ asafo. Kɛji wɔɔhe he baahia bo kɛtsɔ kpee he gbɛjianɔtoo lɛ nɔ lɛ, no lɛ ofainɛ ŋmalamɔ Room Request wolo lɛ ekome ni okɛmaje kɛya kpee ni obaaya lɛ shishi. ESAAA ni Room Request woji nɛɛ kɛ kpee lɛ he woji krokomɛi lɛ majeɔ kɛbaa nitsumɔ he nine lɛ yɛ Accra.
7 TAMALE KPEE LƐ: Yɛ be kuku ni wɔna ni wɔkɛsaa wɔhe lɛ fɛɛ sɛɛ lɛ, nyɛmimɛi babaoo ni jɛ Wuoyigbɛ lɛ nyɛ amɛbɔ mɔdɛŋ bɔ ni sa yijiemɔ waa, ni amɛtee “Mɛi ni Sumɔɔ Nyɔŋmɔ Heyeli” Kpokpaa Wulu nɔ kpee lɛ yɛ Bolgatanga Mɛi komɛi kɛ Asafo lɛ bɔs he gbɛjianɔtoo krɛdɛɛ lɛ tee, ni mɛi krokomɛi hu to amɛ diɛŋtsɛ amɛtsɔnei ahe gbɛjianɔ. Akɛni sɛɛfimɔ ni aaajɛ Wuoyigbɛ nɛɛ he miihia hewɔ lɛ, Asafo lɛ baafee bɔs he gbɛjianɔtoo krɛdɛɛ ko kɛha Tamale kpee lɛ yaa, taakɛ afɔɔ feemɔ daa lɛ. Kɛ fee sɛɛ lɛ, abaaha asafoi lɛ anine ashɛ ehe saji titrii ni he hiaa lɛ anɔ. Shi amrɔ nɛɛ, wɔmiiwo mɛi fɛɛ ni yɔɔ he miishɛɛ lɛ hewalɛ ni amɛbɔi amɛhe saamɔ bianɛ.
8 HEI NI ABAAFEE KPEE LƐ YƐ LƐ SAAMƆ: Yɛ shweremɔ babaoo ni Yehowa haa wɔnaa kɛjɛ be mli ni ajie naatsii lɛ kɛbaa nɛɛ hewɔ lɛ, wɔmiikpa gbɛ akɛ mɛi babaoo baaya kpeei lɛ afi nɛɛ. Ni wɔyɛ hiɛnɔkamɔ akɛ nyɛbaajɛ nyɛtsuiaŋ tɔŋŋ nyɛfi kpee he nitsumɔ lɛ sɛɛ jogbaŋŋ. tamɔ bɔ ni wɔna faŋŋ beni wɔsaa wɔhe kɛhaa “Mɛi ni Sumɔɔ Nyɔŋmɔ Heyeli” Kpokpaa Wulu nɔ kpeei lɛ feemɔ lɛ. Wɔbaamamɔ agbai, ni wɔbaatao wɔɔhei, kɛ nibii krokomɛi hu tamɔ bɔ ni wɔfeɔ daa lɛ. No hewɔ lɛ wɔmiiwo mɔ fɛɛ mɔ hewalɛ ni wɔto gbɛjianɔ ni wɔkɛ wɔhe awo nitsumɔ lɛ mli, kɛ agbɛnɛ kpee shishi volunteer nitsumɔ hu mli yɛ kpee ni wɔbaaya lɛ shishi.
9 NIYENII HE GBƐJIANƆTOO: Yɛ gbɛjianɔtoo ni haa wɔfeɔ nibii yɛ gbɛ ni yɔɔ mlɛo nɔ lɛ kɛ nitsumɔ hewɔ lɛ, abaato niyenii ni hoomɔ waaa, shi ehi jogbaŋŋ hu he gbɛjianɔ aha wɔ. Asafo lɛ hiɛ esɔ bɔ ni nyɛfi gbɛjianɔtoo nɛɛ sɛɛ yɛ tsutsu kpeei ni wɔfee lɛ ashishi lɛ waa diɛŋtsɛ, no hewɔ lɛ aawo wɔ hewalɛ ni wɔyahe niyenii ni abaato he gbɛjianɔ aha wɔ yɛ niyeli he lɛ, yɛ kpeei ni wɔbaaya lɛ ashishi.
10 KPEE SHISHI TSITSINAATSƐƐ NII KƐ NƆ AKƐWOƆ MLI LƐ: Akɛ wolo krɛdɛɛ ko emaje asafo fɛɛ asafo koni ekɛshɛ nibii krɛdɛɛi komɛi kɛha 1993 sɔɔmɔ afi lɛ. Gbɛ ko yɛ wolo nɛɛ nɔ kɛha tsitsinaatsɛɛ woji bibii lɛ kɛ plastic ni akɛhɔɔ mli lɛ shɛɛ kɛha “La Hiɛlɔi” Kpokpaa Wulu nɔ kpee lɛ. Nyɛfainɛ nyɛkwɛa koni nyɛŋmalaa wolo lɛ nɔ koni nyɛkɛ klɛŋklɛŋ nɔ lɛ amajea Asafo lɛ oya, bɔni afee ni wɔnyɛ wɔtsu nibii ni he baahia nyɛ kɛha kpeei lɛ ahe nii yɛ be ni sa mli. Nyɛkaia akɛ akɛ tsitsinaatsɛɛ woji bibii nɛɛ kɛ nɔ ni akɛhɔɔ mli lɛ eko eyaŋ kpeei lɛ eko kwraa shishi.
11 HIAMƆ NII KRƐDƐƐ: Nɛkɛ gbɛjianɔtoo nɛɛ yɛ kɛha shiɛlɔi ni feɔ nɔkwɛmɔ nɔ kpakpa, kɛ amɛbii ni baa amɛjeŋ jogbaŋŋ, ni asafo lɛ mli sɔɔmɔ ajinafoi akuu lɛ baakpɛlɛ amɛnɔ lɛ pɛ. Esa akɛ asafoi ni nyɛmimɛi ni yɔɔ hiamɔ nii krɛdɛɛ lɛ kɛbɔɔ lɛ diɛŋtsɛ ato gbɛjianɔ ni amɛkɛye amɛbua amɛ. Onukpai kɛ nyɛmimɛi krokomɛi ni le mɔ aŋkro ko hiamɔ nii lɛ baanyɛ amɛjɛ suɔmɔ mli amɛyɛ amɛbua nakai mɔ lɛ. Bei pii lɛ, enɛ biɔ ni shiɛlɔi lɛ asusu mɛi ni yɔɔ be-fɛɛ sɔɔmɔ nitsumɔ lɛ mli, mɛi ni edara yɛ afii amli, mɛi ni bɛ gbɔmɔtsoŋ hewalɛ, mumuii, kɛ mɛi krokomɛi ni tamɔ nakai lɛ ahiamɔ nii ahe. Ni shiɛlɔi lɛ baanyɛ amɛye amɛbua kɛtsɔ ya ni amɛkɛ amɛ baaya aloo amɛhiamɔ nii ni amɛaatsu he nii yɛ gbɛi krokomɛi anɔ lɛ nɔ. (Yak. 2:15-17; 1 Yoh 3:17, 18) Kɛji ehe baahia ni nyɛmimɛi ni yɔɔ hiamɔ nii krɛdɛɛ nɛɛ ana wɔɔhei ni bɛŋkɛ he ni afeɔ kpee lɛ yɛ lɛ, no lɛ esa akɛ aha enɛ afee faŋŋ yɛ Room Request woji lɛ anɔ. Wɔhiɛ ka nɔ akɛ nyɛbaajɛ suɔmɔ mli nyɛsusu mɛi ni wɔyelikɛbuamɔ he hiaa amɛ lɛ fɛɛ ahe.—Yoh 13:36; Gal. 6:10.
12 LALA: Lalai ni ato gbɛjianɔ ni abaala yɛ kpee lɛ shishi lɛ nyiɛ sɛɛ nɛɛ, ni ato naa yɛ bɔ ni amɛbaatsara nɔ lɛ naa: 33, 91, 111, 38, 221, 217, 43, 128, 152, 177, 207, 201, 35, 89, 50, 168, 42, 45. Wɔmiiwo bo hewalɛ ni ofata he kɛla beni atswaa lala lɛ yɛ kpee lɛ shishi lɛ.
13 WIEMƆ AMƆƆMƆ ALOO VIDEO MFONIRI-SHAMƆ: Taakɛ wɔfeɔ tsutsu lɛ, Asafo lɛ etoŋ gbɛjianɔ ko kɛhaŋ wiemɔi loo drama lɛ mɔmɔ yɛ kpaa nɔ. Esa akɛ aŋkroaŋkroi ni baamɔmɔ wiemɔi lɛ yɛ kpaai anɔ kɛha amɛhe lɛ afee nakai yɛ gbɛ ni haoŋ mɛi ni eba kpee lɛ shishi aloo egbalaŋ amɛjwɛŋmɔ lɛ nɔ. Titri lɛ, esaaa ni amɛtaa srawa hewalɛ kpaa aloo wiemɔ adekai lɛ asɛɛ kpaai lɛ ahe. Wɔhiɛ baasɔ ekome ni nyɛkɛ wɔ baafee yɛ enɛ mli lɛ waa diɛŋtsɛ.
14 NAAGBEE: Anɔkwale la ni Yehowa ejie kpo etsɔɔ wɔ kɛtsɔ e-Bi, Kristo Yesu nɔ lɛ eha wɔna yiŋtoo yɛ wɔshihilɛ mli, koni klɛŋklɛŋ kwraa lɛ, wɔkɛtsu yiŋtoo hewɔ ni abɔ wɔ lɛ he nii, ni wɔkɛwo wɔ-Feelɔ, Yehowa Nyɔŋmɔ hiɛ nyam. Ni wɔfeɔ enɛ kɛtsɔɔ la hiɛlɔi ni wɔji lɛ nɔ. La hiɛlɔi ni wɔji lɛ ji woo kɛ hegbɛ kpele ni wɔna, shi eji gbɛnaa nii hu ni hiɛdɔɔ yɔɔ he waa diɛŋtsɛ. Kɛji wɔɔnyɛ wɔtsu nakai sɔ̃ ni ka wɔnɔ lɛ he nii jogbaŋŋ lɛ, no lɛ ehe miihia ni wɔkɛ yelikɛbuamɔ fɛɛ ni Yehowa kɛhaa lɛ atsu nii. Ni 1992 “La Hiɛlɔi” Kpokpaa Wulu nɔ kpee lɛ kɛ gbɛtsɔɔmɔ ni baa yɛ ebe naa pɛpɛɛpɛ baaha wɔ koni wɔkɛtsu wɔgbɛnaa nii akɛ la hiɛlɔi nɛɛ he nii. No hewɔ lɛ, ehe miihia ni wɔbɔi wɔgbɛjianɔtoo bianɛ, bɔni afee ni wɔnyɛ wɔhi shishi kɛha lala ni akɛbaagbele yɛ Sohaa lɛ, ni wɔhi jɛmɛ aahu kɛyashi naagbee sɔlemɔ ni akɛbaakpa yɛ Hɔgbaa shwane lɛ nɔ. Eba akɛ Yehowa aaaha gbɛjianɔ ni otoɔ lɛ aye omanye koni onyɛ oya nɛkɛ mumɔŋ okpɔlɔ ni aŋmɛ wɔ kɛ ha wɔ sɛɛyoomɔ namɔ nɛɛ shishi.—Mat. 24:45-47.
[Box on page 6]
1992 “La Hiɛlɔi” Kpokpaa Wulu nɔ Kpee
Gbii kɛ Hei ni Atsɔɔ ni Abaaya
GBI MAŊ WIEMƆ(I) KPOKPAI NI BAAYA
December 18-20 Accra “A” Ga 1, 3A, 25
Box 0190, Osu
Kumasi “A” Twi 7, 10, 31
Box 629
Cape Coast Twi/Fanti 11 fa (Fosoniiaŋ)
Box 258 18, 28, kɛ 31 fa (Twifu
Prasoniiaŋ)
Nkawkaw Twi 9, 12A, 12B, 30
Box 67
December 25-27 Accra “B” Twi kɛ Blɔfo 2A, 2B, 33
Kumasi “B” Twi 11, 20, 22, 27
Ho Ewe kɛ Twi 4, 5A, 5B, 26 fã bi
Box 77 (Akosomboniiaŋ) , 29
January 1-3,1993Accra “C” Twi kɛ Ewe 3B, 12B fã bi (Asafoi ni
wieɔ Ewe) , 13, 19, 26
Koforidua Twi 14, 15, 23
Box 192
Sunyani Twi 8, 21, 32
Box 75
Takoradi Twi/Fanti 16, 17A, 17B, 24
Box 0166
January 8-10 Tamale Twi 6A, 6B, kɛ mɛi krokomɛi fɛɛ ni baanyɛ
Box 128 amɛya.