ARTIK POU ÉTIDYÉ 49
Ès Jéova ké réponn mo lapriyè ?
« Zòt ké aplé mo, zòt ké vini pou priyè mo, é mo ké kouté zòt » (JÉR. 29:12).
KANTIK 41 « Ô Dieu, entends ma prière »
KOUTWÉY ASOU SA NOU KÉ WÈa
1-2. Poukisa nou té ké pouvé gen lenprésyon ki Jéova pa ka réponn nou lapriyè ?
« PRAN tout to plézi annan Jéova, é i ké bay to sa to tchò anvi » (Ps. 37:4). Men roun bèl promès ! Mé, ès nou divèt krè ki Jéova ké bay nou tousa nou ka doumandé l’ lanmenm ? Poukisa nou ka pozé sa késyon-an ? Imajiné sa kalité sitiasyon-yan : Roun sò ki pa maryé ka priyè pou i fè Lékòl pou évanjélizatèr Rwayonm-an. Mé tan-an ka pasé é i pa ka rousouvwè pyès envitasyon pou fè sa lékòl-a. Roun jenn frè ka priyè Jéova pou i géri so maladi pou i pouvé fè plis annan asanblé-a. Mé i pa ka géri. Roun papa ké roun manman ka priyè pou yé timoun rété annan lavérité-a, mé timoun-an ka désidé arété adoré Jéova.
2 Pitèt to menm osi, to doumandé Jéova roun bagaj é i pa bay to l’. Ès to di an tchò ki Jéova ka réponn lapriyè ròt moun mé i pa ka réponn topa ? Ouben, ès to di ki i pa réponn to paské to fè roun bagaj ki pa té bon ? A sa roun sò yé k’aplé Janiceb pansé. Li ké so mari priyè Jéova pou di li ki yé té lé divini bétélit. I ka di : « Mo té sir ki yé té ké aplé nou pou vin travay annan Bétèl-a vitman. » Mé mwa pasé, lannen pasé é anyen pa fèt. Janice ka di : « Mo té tris é mo dé bra té kasé. Mo té ka doumandé mo kò kisa mo té fè pou fè Jéova lapenn. Pourtan, mo té ka byen di Jéova sa mo té lé. Poukisa i pa té ka réponn mo lapriyè ? »
3. Di kisa nou ké palé annan sa artik-a ?
3 Détan, nou pouvé doumandé nou kò si Jéova ka kouté nou lapriyè. A sa ki rivé sèrten annan so sèrvitèr tan-lontan ki té fidèl (Job 30:20 ; Ps. 22:2 ; Hab. 1:2). Kisa ki pouvé fè to sir ki Jéova ké réponn to lapriyè ? (Ps. 65:2). Pou nou réponn sa késyon-an, annou réponn sa trwa ròt késyon-yan : 1) Kisa nou savé Jéova ké fè ? 2) Kisa Jéova lé nou fè ? 3) Poukisa nou pitèt divèt chanjé sa nou ka doumandé ?
KISA NOU SAVÉ JÉOVA KÉ FÈ ?
4. Dapré Jérémie 29:12, kisa Jéova ka promèt nou fè ?
4 Jéova ka promèt nou kouté nou lapriyè (li Jérémie 29:12). Kou nou ka adoré l’ ké fidélité, nou Bondjé kontan nou é i pa ké janmen bouché so zorè pou nou (Ps. 10:17 ; 37:28). Mé, sa pa lé di ki i ké bay nou tousa nou ka doumandé l’. Pou roun ran bagaj, nou ké pitèt divèt antann monn nouvo-a.
5. Lò Jéova ka kouté sa nou ka doumandé l’, di kisa i ka tchenbé kont ?
5 Lò Jéova ka kouté sa nou ka doumandé l’, i ka tchenbé kont di so projè (Is. 55:8, 9). Parèkzanp, roun bagaj i lé, a ki latè-a plen ké mouché ké madanm ki ka pran plézi fè so volonté é ki ka asèpté l’ kou yé Chèf. Mé kou Satan di ki moun té ké pi byen si yé té ka dirijé yé kò tousèl, enben i ka lésé yé fè pou tout moun wè ki so lèlmi ka manti (Gen. 3:1-5). Kou a moun-yan ki ka dirijé, i gen roun patché problèm jòdla (Eccl. 8:9). Mé, nou ka konprann ki Jéova pa ké fè sa problèm-yan disparèt anvan moman-an i désidé rivé. Si i té ka fè sa, roun ran moun té ké pouvé di ki lò a moun ka dirijé, tout bagaj ka maché byen é ki yé pouvé débrouyé yé kò tousèl.
6. Poukisa nou divèt sir ki Jéova ké toujou aji ké jistis épi ké lanmou ?
6 Menm si dé moun ka priyè pou menm kalité bagaj-a, Jéova pouvé bay dé répons diféran. Parèkzanp, lò rwa Ézékyas té malad menm, i sipliyé Jéova géri l’. Jéova kouté l’ é i géri li (2 Rois 20:1-6). Parkont, lò apot Pòl doumandé Jéova tiré ‘pikan-an i té gen annan so lachè’, pitèt a té roun problèm santé, Jéova pa fè l’ (2 Cor. 12:7-9). Annou palé di apot Jak ké apot Pyèr osi. Rwa Éròd té lé tchwé yé toulédé. Frè ké sò-ya annan asanblé-a, priyè pou Pyèr épi pou Jak osi. Pourtan, yé tchwé Jak mé Bondjé fè roun mirak pou sové Pyèr (Actes 12:1-11). Pitèt nou ka doumandé nou kò : « Poukisa Jéova sové Pyèr épi i pa sové Jak ? » Labib-a pa ka di poukisac. Mé roun bagaj nou pouvé sir, a ki sa Jéova ka fè « pa janmen enjis » (Deut. 32:4). É nou savé ki Jéova té kontan ni Pyèr ni Jak (Rév. 21:14). Détan, Jéova pa ké réponn nou lapriyè kou nou té ka antann. Mé nou pa ka di anyen asou fason i ka réponn nou paské nou sir ki i ké toujou aji ké jistis épi ké lanmou ké nou (Job 33:13).
7. Kisa nou pa divèt fè, é poukisa ?
7 Annou pa konparé nou sitiasyon ké sa di nou frè ké sò-ya. Annou pran roun èkzanp : Nou ka doumandé Jéova idé nou pou roun bagaj ki prési, mé i pa ka fè l’. Pita, nou ka anprann ki roun moun doumandé menm kalité bagaj-a, é yé té ké di Jéova réponn so lapriyè. A sa ki rivé roun sò yé k’aplé Anna. I priyè pou Bondjé géri so mari, Matthew, ki té gen roun kansèr. An menm tan ké so mari, i té gen dé sò ki té ja gen yé ti laj ki té ka briga ké roun kansèr osi. Anna priyè ké tout so tchò pou so mari ké pou dé sò-ya. Sò-ya géri, mé so mari li menm mouri. O koumansman, Anna té ka doumandé so kò si sa sò-ya té géri paské Jéova té fè roun bagaj pou yé. É si a té sa, poukisa Jéova pa té kouté so lapriyè pou so mari ? Nou pa savé poukisa dé sò-ya géri. Mé sa nou savé, a ki, roun jou, Jéova ké fin ké tousa ki ka fè nou soufri é ki i présé résisité so zanmi ki mouri (Job 14:15).
8. a) Dapré Isaïe 43:2, kouman Jéova ka idé nou ? b) Kouman lapriyè pouvé idé nou lò nou gen éprèv ? (gadé vidéyo Lapriyè pouvé idé nou tchenbé rèd lò nou anba éprèv).
8 Jéova ké toujou soutni nou. Kou Jéova sa roun Papa ki plen ké lanmou, i pa kontan wè nou soufri (Is. 63:9). Mé, i pa ka anpéché tout éprèv-ya tonbé asou nou. Détan, sa éprèv-ya kou gro dlo ka charyé nou ouben difé ka boulé nou (li Isaïe 43:2). Mé, i ka promèt ki i ké idé nou « janbé » sa éprèv-ya. Kèlkéswa éprèv nou ka jwenn jòdla, i ké toujou fè sa ki fo pou idé nou fè nou lanmityé ké li rété fò. I ka bay nou osi so lèspri sen ki fò toubonnman pou nou pouvé tchenbé (Luc 11:13 ; Phil. 4:13). Donk, nou pouvé sir ki i ké toujou bay nou èkzaktéman sa nou bézwen pou nou tchenbé é pou nou rété fidèld.
KISA JÉOVA LÉ NOU FÈ ?
9. Kouman Jacques 1:6, 7 ka idé nou konprann poukisa nou divèt sir ki Jéova ké idé nou ?
9 Jéova lé nou fè li konfyans (Héb. 11:6). Détan, nou pouvé pansé ki nou pa ké janmen rivé tchenbé annan éprèv-ya. É pitèt nou pouvé koumansé pansé ki Jéova pa ké idé nou. Mé, Labib-a ka fè nou sir ki gras a pwisans i ka bay nou, nou ké pouvé « monté asou roun miray » (Ps. 18:29). Atò, pasé nou lésé zafè douté-a plen nou tèt, annou priyè ké lafwa é annou gen konfyans ki Jéova ké réponn nou lapriyè (li Jacques 1:6, 7).
10. Pran roun èkzanp pou èspliké kouman nou pouvé aji dapré nou lapriyè.
10 Jéova lé nou aji dapré nou lapriyè. Annou pran roun èkzanp : Roun frè ka doumandé Jéova fè li gen jou konjé pou i pouvé alé annan asanblé réjyonal-a. Kouman Jéova pouvé réponn so lapriyè ? I pouvé bay li kouraj i bézwen-an pou alé palé pou so patron. Mé, kanta frè-a li menm, i ké divèt fè sopa épi alé wè patron-an pou doumandé li bay li jou konjé. Pitèt i ké divèt alé wè l’ plizyèr fwa. I ké pouvé propozé so patron chanjé so jou travay ké rounòt kolèg ouben menm doumandé roun konjé san sòld.
11. Poukisa nou divèt priyè plizyèr fwa lò nou enkyèt ?
11 Lò nou enkyèt, Jéova lé nou priyè l’ plizyèr fwa pou di li sa ki ka fè nou enkyèt (1 Thess. 5:17). Jézi fè nou konprann ki a pa tout bagaj nou ka doumandé Jéova i ké bay nou lanmenm (Luc 11:9). Atò, pa lésé tonbé ! Priyè ké tout to tchò épi priyè toulong (Luc 18:1-7). Lò nou ka priyè pou roun bagaj plizyèr fwa, nou ka montré Jéova ki a pa roun ti bagaj konsa pou nou. Nou ka montré li osi ki nou sir ki i pouvé idé nou.
POUKISA NOU PITÈT DIVÈT CHANJÉ SA NOU KA DOUMANDÉ ?
12. a) Ki késyon nou pouvé pozé nou kò parapòrta sa nou ka doumandé Jéova, é poukisa ? b) Kouman nou pouvé fè atansyon pou nou priyè Jéova ké rèspè ? (gadé karé-a « Ès mo ka palé ké rèspè lò mo ka doumandé Jéova roun bagaj ? »).
12 Si Jéova pa ka bay nou sa nou doumandé l’, a pou nou pozé nou kò trwa késyon. Prémyé késyon-an, a : « Ès a pou sa bagaj-a mo divèt priyè ? » Souvan, nou ka pansé ki nou savé sa ki miyò pou nou. Mé, pitèt sa nou ka doumandé, a pa sa ki pi bon pou nou. Anplis di sa, kimoun ka di i pa gen roun pi bon solisyon pasé sa-la nou ka di annan nou lapriyè. É pitèt roun ran bagaj nou ka doumandé Jéova pa k’alé ké so volonté (1 Jean 5:14). Parèkzanp, sonjé paran-yan nou palé o koumansman sa artik-a. Yé té ka doumandé Jéova fè yé timoun rété annan lavérité-a. Yé té ké di a roun bon bagaj pou yé doumandé. Mé, Jéova pa ka fòrsé pyès moun fè so volonté. I lé nou chak, donk nou timoun osi, chwazi adoré l’ (Deut. 10:12, 13 ; 30:19, 20). Donk, paran-yan pouvé doumandé Jéova pito idé yé touché tchò yé timoun pou i vin kontan li épi divini so zanmi (Prov. 22:6 ; Éph. 6:4).
13. Dapré Hébreux 4:16, kitan Jéova ké fè roun bagaj pou nou ? Èspliké.
13 Dézyèm késyon-an, a : « Ès a aprézan Jéova prévwè bay mo sa mo ka doumandé l’ ? » Pitèt nou ka pansé ki nou bézwen Bondjé réponn nou lapriyè lanmenm. Mé, Jéova savé kitan ki miyò pou réponn nou lapriyè (li Hébreux 4:16). Lò nou pa ka rousouvwè sa nou ka doumandé lanmenm, nou pouvé pansé ki répons-a, a : « Non », alòr ki pitèt répons-a, a : « Pita ». Sonjé jenn frè-a ki té ka priyè pou i géri. Si Jéova té fè roun mirak pou li, Satan té ké pouvé di ki i ka kontinyé sèrvi so Bondjé sèlman paské i géri l’ (Job 1:9-11 ; 2:4). Anplis di sa, Jéova ja désidé ki jou i ké fè tout maladi disparèt (Is. 33:24 ; Rév. 21:3, 4). Anvan sa, nou pa pouvé èspéré ki Bondjé ké fè mirak pou géri nou. Donk, frè-a pouvé doumandé Jéova bay li fòrs ké lapè annan so tchò pou sipòrté so maladi épi pou i kontinyé adoré l’ ké fidélité (Ps. 29:11).
14. Kisa sa Janice ka di ka anprann to ?
14 Annou viré palé di Janice ki té ka priyè pou alé annan Bétèl-a. Apré senk lannen, i konprann kouman Jéova té réponn so lapriyè. I ka di : « Jéova sèrvi sa tan-an pou ansényé mo é pou fè mo divini roun pi bon krétyen. Mo té divèt fè li plis konfyans. Mo té divèt étidyé pi byen é mo té divèt anprann ki mo tchò té pouvé kontan kèlkéswa koté mo ka sèrvi Jéova. » Pita, yé doumandé Janice ké so mari travay annan sèrvis sirkonskripsyon-an. Lò i ka réfléchi asou sa ki pasé, men sa Janice ka di : « Menm si Jéova pa réponn mo lapriyè kou mo té ka antann, i byen réponn mo lapriyè. Mo pran tan pou mo wè kouman so répons té bèl, mé mo gen bokou rékonésans paské i aji ké lanmou ké mo épi ké bonté. »
Si to ka pansé ki Jéova pa bay to roun bagaj to doumandé l’, pitèt to divèt doumandé li rounòt bagaj (gadé paragraf 15)f.
15. Poukisa nou ké pitèt divèt mwen prési annan sa nou gen labitid doumandé Jéova ? (gadé zimaj-ya osi).
15 Trwazyèm késyon-an, a : « Ès mo divèt doumandé Jéova rounòt bagaj ? » Nou gen rézon di èkzaktéman sa nou lé lò nou ka priyè. Mé si nou lé konprann sa Jéova lé nou fè, pitèt nou ké divèt mwen prési annan sa nou ka doumandé-a. Sonjé sò-a ki pa maryé ki ka priyè pou i fè Lékòl pou évanjélizatèr Rwayonm-an. Si i lé fè sa lékòl-a, a paské i lé préché koté yé bézwen plis moun. Donk, toupannan i ka priyè pou i alé annan sa lékòl-a, i pouvé priyè Jéova pou i idé li wè kouman i pouvé préché plis (Actes 16:9, 10). É apré sa, i pouvé aji dapré so lapriyè si i ka doumandé so rèsponsab sirkonskripsyon si yé bézwen plis pyonyé annan rounòt asanblé. Rounòt bagaj i pouvé fè, a ékri Bétèl di so péyi ouben rounòt Bétèl pou i savé ki koté i pouvé alé idée.
16. Di kisa nou pouvé sir ?
16 Kou nou wè l’, nou pouvé sir ki Jéova ké réponn nou lapriyè é lò i ké fè l’, i ké fè l’ ké jistis é ké lanmou (Ps. 4:3 ; Is. 30:18). A pa tout tan i ké réponn nou kou nou ka antann. Mé Jéova pa ké janmen fè kousidiré nou pa doumandé li anyen. I kontan nou toubonnman. É i pa ké janmen lagé nou (Ps. 9:10). Alòr, kontinyé « toujou fè li konfyans », épi di li tousa to gen ofon to tchò (Ps. 62:8).
KANTIK 43 Prière de remerciements
a Sa artik-a ka èspliké nou poukisa nou pouvé sir ki Jéova ké toujou réponn nou lapriyè é ki i ké fè l’ ké jistis épi ké lanmou.
b Yé chanjé déztrwa non.
c Gadé artik « Ès to ka fè Jéova konfyans annan fason i ka fè bagaj-ya ? » annan Tourdégard févriyé 2022 (§ 3-6).
d Pou konnèt plis bagaj asou fason Jéova ka idé nou tchenbé annan éprèv ki rèd, gadé vidéyo Lapriyè pouvé idé nou tchenbé rèd lò nou anba éprèv, asou jw.org.
e To ké trouvé sa òrganizasyon-an ka di nou fè si nou lé alé préché annan roun péyi étranjé, annan liv Organisés pour faire la volonté de Jéhovah (chap. 10, § 6-9).
f MEN SA NOU KA WÈ ASOU ZIMAJ-YA : Dé sò ka priyè anvan yé ranpli roun démann pou fè Lékòl pou évanjélizatèr Rwayonm-an. Pita, roun ka rousouvwè roun envitasyon pou fè sa lékòl-a mé ròt-a pa ka rousouvwè anyen. Pasé so dé bra kasé paské i tris, sò-a ki pa rousouvwè pyès envitasyon pou fè lékòl-a ka doumandé Jéova idé l’ wè kouman i pouvé préché plis. Apré sa, i ka ékri roun lèt pou Bétèl-a pou di ki i disponib pou alé koté yé bézwen plis proklamatèr.