Julay

Jezun jem kitem mhunnttlem ani kelem tantuntlean Jehova kitem chintʼta ani taka koxem bhogta, tem Jezun ekdom bore toren dakhoun dilem mhunn ami ugddas dovrunk zai. Tantunt tannem kelʼlim vizmitam pasun mellon asat. (Juanv 14:9) Tor tachea vizmitantlean ami kitem xikonk zata? Jehova ani Jezu amcho khub mog kortat. Hea prithumer astana, lokank aslole dukh-tras kaddun uddounk apli xokti uzar korun, Jezuk tancho kitlo mog asa tem tannem dakhoun dilem. Eka vellar, don kuddʼddeamnim bob marun Jezu lagim modot magli. (Mt. 20:30-34) Tea uprant kitem zalem tacher dhean diat. Jezuk tanche “churchure disle,” ani uprant tannem tankam bore kele. “Churchure disle” hea utrak uzar kelʼlea Grik utracho orth mhunnttlear, kallzantlean doia-maia disop. Jezuk dusreancho mog aslo dekhun taka osli doia-maia asli. Ani heach pasot, tannem bhukelʼleank jevonn dilem ani eka koddkarak pasun boro kelo. (Mt. 15:32; Mk. 1:41) Khorench, ‘doia-maia’ aslolo amcho Jehova Dev ani tacho Put amcho khub mog kortat. Toxench, amkam tras zatat tednam tankam dukh zata mhunn ami khatri dovrunk zata. (Luk. 1:78; 1 Ped. 5:7) Ani heach pasot munxakullache sogle tras kaddun uddounk te axeun ravleat! w23.04 3 ¶4-5

Sonvsarantlea lokank vaitt koxem disona, punn amchea monant vaitt chintnam bhorunk xokta, toslea monoronjona thaun pois ravonk amchean zata tem soglem ami korunk zai. Tem kitem? Ami Bible vachun ani tacho obheas korun amchem mon borea chintnamnim bhorunk zai. Toxench, ami mittingek hajir zatat ani porgottnnent bhag ghetat tednam, vaitt chintnam thaun amchi rakhonn zaunk xokta. Ani Jehova amkam bhas dita ki ami toxem kelear, amchean sosunk zata tachea-von khor tallnni to amcher ieunk diuncho na. (1 Kor. 10:12, 13) Hea bhirankull disamnim Jehovak visvaxi ravonk ami sogleamnim tache lagim anikui chodd magnnem korunk zai. Karonn ‘amche kallzache sogle uske ami taka sanglole’ Jehovak zai. (St. 62:8) Toxench, taka vakhannʼnni dium-ia, ani to amkam lagon jem korta tea soglea pasot tache upkar attoum-ia. Porgottnnechem kam korunk tache lagim dhir magom-ia. Amcher ietat tea khoinchea-i somosiancho fuddo korunk ani tallnneam thaun pois ravonk tache lagim vinoti korum-ia. Dor disa, Jehova lagim magnnem korunk ami konnakuch vo kiteakuch addkholl korunk diunchem nhoi. w23.05 7 ¶17-18

Ami mittingek kiteak hajir zatat? Mukhel karonn mhunnttlear, Jehovak vakhannʼnni diunk. (St. 26:12; 111:1) Toxench, hea kotthin vellar ami eka-mekak urba diunk pasun hajir zatat. (1Tes. 5:11) Ani mittingek zobab diun ami heo donui vostu korunk pavtat. Punn toxem korunk amkam oddchonneo ieunk xoktat. Tem mhunnttlear, amkam bhirant disonk xokta vo zobab diunk umed asa zalear pasun, amkam zai title pavtti sondhi mellona astoli. Tor amkam koxi modot zaunk xokta? Ami ‘eka-mekak urba diunk vavrunk zai,’ oxem Apostl Paulun mhunnttlem. Tor amchea sadea zobaba thaunui bhav-bhoinnank urba mellonk xokta mhunn ami ugddas dovortat tednam, ami hat ubarunk fattim sorchimnant. Toxench, amkam zai title pavtti zobab diunk sondhi mellona zalear pasun, dusreank sondhi mellʼlli mhunn ami khuxal astolim.​—1 Ped. 3:8. w23.04 20-21 ¶1-3

Razan ek formonn dhaddlolem. Sumar 70 vorsam poriant Babilonant koidi aslolim Izraelitkaram, atam porot tanchea ganv-ghora vochonk xoktalim. Ani hem Jehovakuch lagon zaunk pavlem. (Ezd. 1:2-4) Karonn Babilonitkar tanchea koideank kednanch soddinasle. (Iz. 14:4, 17) Punn atam Babilonachem nisonntton zalʼlem, ani thoinchea novea razan Judevank, Babilon soddun vochonk porvangi dilʼli. Punn dor eka Judevak, ani khas korun familichea vhoddilank, ek mhotvacho nirnnoi gheuncho aslo. To mhunnttlear, te Babilon soddun Izraelant voitole vo Babilonantuch ravtole. Ani ho nirnnoi ghevop titlem sompem naslem. Zaitim zannam khub zannttim zalʼlim. Ani Izraelant porot vochonk ho lamb provas korunk, tankam sompem naslem. Toxench, zaito Judev lok Babilonantuch zolmolʼlo. Tor Babilonuch tanchem ghor ani Izrael tanchea purvozancho des, oxem tankam distalem. Tea bhair, thoddo Judev lok Babilonant khub girest zalʼlo. Tor tanchem susegad jivit vo veapar-dhondo soddun eka porkea desant vochon ravop, tankam khub kotthin oxem distalem zait. w23.05 14 ¶1-2

Devachem Utor amkam sodanch thir ravonk, toxench doia-maia ani mog dakhoit ravonk urba dita. Zoxem, Lukas 21:19-ant sanglam: “Tumi thir ravlim zalear tumi tumcho jiv vachounk pavtolim.” Toxench, Koloskarank 3:12-nt mhunnttlam: ‘Doia-maia ho gunn apnnaiat.’ Ani 1 Tesalonikekarank 4:9, 10-nt boroilam: “Ekamekacho pritimog korunk Devan tumkam xikoilam. . . . Tori astana, to odik-odik vaddot vochum-di mhonn ami tumche lagim magtanv.” Him utram tea Kristanvank boroilolim, jim poilim thaunuch thir aslim ani dusreank doia-maia ani mog dakhoitalim. Tori astana, tannim he gunn vaddoit ravchi goroz asli. Tumi pasun oxench korunk zai. Tor oxem korunk, poilea xekddeantlea Kristanvamnim he gunn koxe dakhoile, tumi tanchi dekh koxi gheunk zata, ani oxe toren vhodd sonkoxtta pasot tumi toiar asat mhunn koxem dakhounk zata tem polloum-ia. Tumi atanch thir ravonk xiklim zalear, vhodd sonkoxttachea vellar pasun thir ravonk tumcho nichov ghott astolo. w23.07 3-4 ¶4, 8

Ami makhlolim asum vo ‘dusrim menddram’ modlim asum, ami sogleamnim hea ‘Povitr Vatten’ cholot ravonk zai. Karonn oxem kelolean, ami aiz toxench fuddarak hi prithum sobit bhag zatoli tednam, Jehovachi bhokti korit ravonk pavtolim. (Juanv 10:16) 1919 K.X.-a thaun, lakʼkhamnim dadle, bailo ani bhurgim, Vorixtt Babilon, mhunnche sonvsarache sogle khotte dhorm soddun, hea vatten cholonk lagleant. Babilon soddun Izraelant ieunk Judevank jeo addkholleo asleo teo Jehovan kaddun uddoileo. (Iz. 57:14) Amchea disamnim tannem hea ‘Povitr vattevoileo’ addkholleo koxeo kaddleat? 1919-achea xemboramnim vorsam poilim, lokank Vorixtt Babilona thaun bhair soronk modot korunk, Jehova, Dev-bhirantichea thoddea munxank uzar korunk laglo. (Izaias 40:3 sor korat.) Hi vatt toiar korunk tannim khub koxtti vavr kelo, jea vorvim, uprant khaltea kallzachea lokank khotto dhorm soddun Jehovachea lokam sangata khori bhokti korunk modot zali. w23.05 16 ¶8-9

Ami ap-khuxen ani khuxalkaien apli seva keloli Jehovak zai. (2 Kor. 9:7) Tor amkam itsa na zalear pasun, Jehovache sevent ami dovorlole dhei melloun gheunk ami vavr korit ravonk zai kai? Hea vixim amkam apostl Pauluchem ek borem udharonn asa. Tannem mhunnttlem: “Mhoji kudd donddvonnun, gulama vori tika hanv domavun dhortam.” (1 Kor. 9:25-27 , ftn.) Jehova aplea thaun kitem opekxa korta tem korunk Pauluk itsa nasli zalear pasun, tannem apnnakuch force korun tem kelem. Tor Paulun aplea pasot jem kitem kelʼlem, tantunt Jehova khuxal zalo kai? Hoi. Hantunt kainch dubhav na. Ani tachea vavra pasot Jehovan taka inam dilo. (2 Tim. 4:7, 8.) Heach bhaxen, Jehovache sevent dovorlole dhei melloun gheunk amkam itsa na zalear pasun, ami te melloun gheunk vavr kortat tednam, Jehova khuxal zata. Karonn ami tachea sevent jem kam kortat tem amkam avoddna zalear pasun, ami tachea moga pasot tem kortat mhunn to polloita. Ami oxem kelem zalear, tannem Pauluk besanvam dilim toxim, to amchea-i vavracher besanv ghaltolo. (St. 126:5) Ani Jehova amkam koxim besanvam dita tem ami polloitat tednam amchi itsa vaddonk xokta. w23.05 29 ¶9-10

Jehovachea disa thaun salvar zauchimnant tim nhidlolim asat oxem apostl Paulun mhunnttlem. Karonn nhidtat tankam, tanchea bhonvtonnim kitem ghoddtta, vo vell koso voita tem kainch khobor asona. Tea pasot, mhotvachem kitem-i ghoddtta tednam tankam tem kolloch na, ani tim panvl pasun gheunk xokonant. Aiz zaitim munxam eka orthan nhidlolim asat. (Rom. 11:8) Tanchea bhonvtonnim jem kitem ghoddtta tem polloilear pasun, ami “nimannea disamnim” jietat vo vhodd sonkoxtt ekdom lagim pavla mhunn tankam kollon iena. (2 Ped. 3:3, 4) Punn dor ek dis voita toso, Bible-antlo solʼlo apnnaun zagrut ravop anikui gorjechem mhunn ami vollkhon ghetat. (1 Tes. 5:6) Tor ami xant kiteak ravonk zai ani sarke toren kiteak chintunk zai? Karonn amkam hea sonvsarachea rajki vo somajik bangoddeamnim poddonk naka. Jehovacho dis lagim ieta toso, oslea vixoi-amnim bazu gheunk amcher ietat te dobhav vaddot voitole. Punn tea vellar ami kitem kortolim, tea vixim amkam uskeunchi goroz aschina. Karonn Devachi povitr xokti amkam xant ravonk, sarke ritin chintunk, ani bore nirnnoi gheunk modot kortoli.​—Luk. 12:11, 12. w23.06 10 ¶6-7

Samson hem nanv aikotana tumchea monant kitem ieta? To ekdom bollixtt aslo, hem ghoddie tumchea monant ailem astolem. Hem khorem ki to ekdom bollixtt aslo. Punn tannem ek chuk keli, zacho taka vaitt porinnam bhogcho poddlo. Tori astana, Samsonan visvaxi ravonk jivitbhor kitem kelʼlem tacher Jehovan dhean dilem, ani amkam faido zaunk Jehovan tache vixim Bible-ant boroun dovorlem. Aple vinchun kaddlole Izrael porjek modot korunk, Jehovan Samsona udexim zaitim ojapachim kamam kelim. Ani Samson moron xemboramnim vorsam uprant, Jehovan aplea visvaxi sevokanchea nanvam modem Samsonachem nanv borounk, apostl Pauluk prerit kelo. (Heb. 11:32-34) Samsonachea udharonna thaun aiz amkam urba melltta. Karonn, kotthin poristhitint pasun to Jehovacher patieun ravlo. Ami Samsona thaun kitem xikonk zata, ani tachem udharonn amkam koxi urba dita tem polloum-ia. w23.09 2 ¶1-2

Thir ravonk, ami sodanch kallzant thaun Jehovak amche sogle uske sangop gorjechem. (1 Tes. 5:17) Atam tumkam ghoddie vhoddle tras nasot. Punn tumi bejar astat vo kitem korchem tem tumkam somzona tednam tumi Jehova koddlean margdorxon magtat kai? Tumi zor atam, dor disak ietat tea lhan-lhan oddchonneam vixim Jehovak sodanch sangtat zalear, fuddarak vhoddleo oddchonneo ietoleo tednam tumi Jehova lagim modot magonk fattim sorchimnant. Ani tumkam kednam ani koxi modot korchi tem Jehovak khobor asa mhunn tumkam purnn khatri astoli. (St. 27:1, 3) Aiz amcher oddchonneo ietat tednam ami thir ravlim zalear, ami chodd korun vhodd sonkoxttachea vellar pasun thir ravonk pavtolim. (Rom. 5:3) Oxem ami kiteak mhunnonk zata? Zaitea bhav-bhoinnank, tim dor eke oddchonne vellar thir ravlim dekhun, tachea uprant ailolea oddchonne vellar pasun tim thir ravonk xoklim mhunn kollon ailem. Jehovachea modotin tannim oddchonneancho fuddo kelo tednam, Jehova tankam modot korunk toiar asa mhunn tancho bhavarth anik ghott zalo. Ani hea vorvim, tachea uprant ailolea oddchonneam vellar tim thir ravonk pavlim.​—Jak. 1:2-4. w23.07 3-4 ¶7-8

Jehova khaltikai ani doia-maia dakhoita dekhun to somjikaien vagta. Udharonnak, Jehova Sodom xaracho nas korcho aslo tednam, to Lota sangata khaltikaien vaglo. Tea xaracho nas korchea poilim tannem dutank dhaddun, Lotak ani tache familik dongrar pollon vochonk nirdexon dilem. Punn Lot thoim vochonk bhietalo. Tea pasot, tannem aple familik gheun thoim laginch aslolea Zoar xarant vochonk Jehova lagim vinoti keli. Khorem mhunnttlear, Jehova tem xar pasun nas korcho aslo. Tor tannem Lotak oxem sangonk zatalem, ‘Hanvem sanglam toxench tunvem korunk zai.’ Punn oxem korchea bodlek, Jehovan taka thoim vochonk dilo ani tea xaracho nas pasun korunk na. (Ut. 19:18-22) Xekddeamnim vorsam uprant, Jehovan Nineve xarantlea lokank doia-maia dakhoili. Apunn Nineve xar, toxench tantunt ravpi noxttea lokancho nas kortolo mhunn sangonk, Jehovan provadi Jonasak thoim dhaddlolo. Punn Ninevechea lokamnim khorench poschatap kelo tednam, Jehovak tanche churchure disle ani tannem tea xaracho nas korunk na.​—Jon. 3:1, 10; 4:10, 11. w23.07 21 ¶5

Tor Jehoashachea udharonna thaun ami kitem xiktat? Jehoash eka oslea zhadda sarko aslo, zachim pallam ghott naslim. Ani taka nitt ravonk adarachi goroz asli. Ho adar taka Jehoiada ditalo. Punn Jehoiada melea uprant, tem zhadd umtton gelem. Mhunnche, Jehovachi seva korinant tanchem aikon, Jehoash Jehovak ovisvaxi zalo. Hem udharonn amkam dakhoita ki ami Jehovachi seva fokot amchi famil ani sobhentlim bhav-bhoinnam kortat dekhunuch korchi nhoi. Jehova sangata amchi ixttagot ghott uronk, ami svota zaun tache pasot amcho mog ani resped vaddounk zai. Oxem korunk ami sodanch tachea Utracho obheas korunk zai, tacher niall korunk zai ani magnnem korunk zai (Jer. 17:7, 8; Kol. 2:6, 7) Jehova amchea koddlean chodd kaim opekxa korina. Ami kitem kelʼlem taka zai, tem Upodexok 12:13-nt sanglam. Thoim mhunnttlam: “Devachi bhirant dhor ani tache updes pall. Kiteak, tem zonn ekleachi zobabdari. Teach khatir, Devan monʼxak rochla.” Ami Jehovachi bhirant dovorlear, fuddarak kitem-i zalear pasun ami Jehovak visvaxi ravonk pavtolim. Toxench, Jehova ani amchea modem ami kitench vo konnakuch ieunk diunchimnant. w23.06 19 ¶17-19

Jehovan dilʼli gerentti hea utramnim suru zata: “Xinvasonar boslolo asa Tannem mhollem.” (Prok. 21:5a) Prokasovnni pustokant oslea tin ghoddnneam vixim sanglam, zoim dorxonant Jehova svota zaun uloita. Ani tantuntli ek ghoddnni hi zaun asa dekhun him utram khas asat. Tor hi gerentti ek xoktivont devdut vo jivont zalʼlo Jezu nhoi, punn svota Jehova dita. Dekhun hea gerenttint, mukhar dilʼlea versamnim jem boroilam tacher ami purnn khatri dovrunk zata. Karonn Jehova “kednanch fott ulounk xokona.” (Tit. 1:2) Khorench Prokasovnni 21:5, 6-ant boroilʼlim utram purnn zatolim mhunn kainch dubhav na! “Polleiat” hea utracher dhean dium-ia. “Polleiat” mhunn bhaxantor kelʼlem Grik utor, Prokasovnni pustokant zaite pavtti melltta. Tor Jehova fuddem kitem sangta? To mhunntta: “Soglleo vostu Hanv noveo kortam!” Khorem mhunnttlear, hi bhas fuddarak purnn zatoli. Punn apunn hem kortoloch mhunn Jehovak itli khatri asa ki to tem atanch korta tea toren uloita.​—Iz. 46:10. w23.11 3-4 ¶7-8

Apostl Pedrun zaiteo chuki keleo. Udharonnak, Bible-antlea bhasaunneam pormonnem, apleak kitle tras sosun moronk poddttolo hem Jezu sangtana, Pedrun taka tapoilo. (Mk. 8:31-33) Toxench porot-porot Pedru ani her apostl tanchea modem konn vhoddlo tea vixim vad-vivad kortale. (Mk. 9:33, 34) Tea bhair, Jezu morchea adlea ratik, Pedrun eka munxacho kanuch katrun uddoilo. (Juanv 18:10) Ani teach ratik Pedrun munxachea bhirantin, Jezu aplo ixtt nhoi mhunn sanglem ani taka tin pavtti nakarlo. (Mk. 14:66-72) Tea pasot to dukhamnim roddlo. Punn aplea niraxi zalʼlea apostlak Jezun soddun diunk na. Jivont zalea uprant Jezun Pedruk, to azunui aplo mog korta mhunn dakhounk taka sondhi dili. Tannem Pedruk khaltikaien aplea menddranchi gonvllea porim kallji korunk sanglem. (Juanv 21:15-17) Pedrun hi zobabdari manun ghetli. Ani tea pasot, Ponʼnasavea Disa Jeruzalemant ektthaim zalʼlea, sumar 120 lokank poile pavtti povitr xokten makhlim tednam, Pedru pasun thoim aslo. w23.09 22 ¶6-7

Apostl Pedrun, her vhoddilank oxem sanglolem: “Hinddacho gonvlleam bhaxen samball korat.” (1 Ped. 5:1-4)Tumi vhoddil asat zalear, tumkam bhav-bhoinnancho khub mog asa ani tumi tanchi kallji gheunk sodhtat mhunn dubhav na. Punn thodde pavtti tumi ghoddie itle thoklole astat, vo tumkam itlim kamam astat ki hi zobabdari purnn korunk tumkam kotthin zait. Tor tumi kitem korunk zata? Tumchea kallzant asa tem soglem Jehovak sangat. Pedrun mhunnttlolem: “Dev dita te ghottaien seva kor.” (1 Ped. 4:11) Bhav-bhoinnam oslea oddchonneancho fuddo kortat astolim, jeo hea sonvsarant purnn toren suttaveo zauncheo nant. Punn tumi jem korunk xoktat, tachea poros vorte ritin “Porom Gonvlli” Jezu Krist, tumkam modot korunk xokta mhunn ugddas dovrat. To atam ani novea sonvsarant pasun oxem korunk xokta. Toxem zalear, tumi vhoddilamnim kitem kelʼlem Jehovak zai? Tumi bhav-bhoinnancho mog kelʼlo, tanchi kallji ghetloli, ani ‘hinddache nomunne zalʼle’ Jehovak zai. w23.09 29-30 ¶13-14

Ami Sonvsarachea lokanchem chintop nakarunk zai. Jehovachea kaideanchi porva korinant toslea lokanchem chintop ami apnnailem zalear, ami pasun Jehovachea kaideanchi beporva kortolim. (1 Kor. 3:19) “Hea sonvsarachi zannvai” amkam chodd korun Jehovachea add vochonk urba dita. Oxench, Pergamum ani Thiatira sobhentlea Kristanvank ghoddlem. Tim ravtalim tea xarantle lok onoitik kamam ani murti puza kortalim. Tor tanchea chintpacho, hea Kristanvancher probhav poddlo dekhun, sobhent choltolea onoitik kamam vixim kainch korinastana tim vogi ravlim. Dekhun Jezun tankam khor solʼlo dilo. (Prok. 2:14, 20) Aiz amche bhonvtonnim aslolo lok pasun, chukinchem chintop apnnaunk amcher dobhav ghalunk xoktat. Amchea familintlim ani amkam vollkhotat tim, ami chodduch strict asat ani amkam zai toxem ami korunk zata oxem sangonk xoktat. Udharonnak, tim ghoddie oxem mhunnot: ‘Sonvsar atam khoim pavla. Ani tum to Bible kitem gheun bosla! Tuka zai toxem tunvem korunk zata!’ Jehova koddlean amkam jem nirdexon melltta tem titlem spoxtt na, oxem thodde pavtti amkam disonk xokta. Haka lagon, ‘boroilʼlem asa tachea bhair ami vochonk xoktat.”​—1 Kor. 4:6. w23.07 16 ¶10-11

Jezuchi avoi Mariek xoktechi goroz asli. Mariechem kazar zaunk naslem. Ti gorbest zatoli ani eka bhurgeak zolm ditoli. Bhurgeank koxem vaddounchem, tea vixim tika onubhov naslo. Itlench nhoi, tika oslea bhurgeachi kallji gheunk asli, zo fuddarak Mesias zauncho aslo. Toxench, khoincheach dadlea sangata kuddicho sombond nastana ti avoi zaunchi asli. Tor hem soglem ti Juzek koxi somzaitoli asli? (Luk. 1:26-33) Mariek koxi xokti mellʼlli? Tinnem dusrea thaun modot ghetli. Zoxem, tinnem devdut Gabrielak tea vixim anik mahiti vicharli. (Luk. 1:34) Ani thoddea disam uprant, tichi soiri Elizabetak mellonk, ti “dongri vattarant aslolea Juda xarant” geli. Elizabetan Mariechi tokhnnai keli, ani Jehovachea preronnan Mariek zolmotolea bhurgea vixim bhasaunni keli. (Luk. 1:39-45) Tednam Marien mhunnttlem ki Jehovan “aplea hatachem boll dakhoilem.” (Luk. 1:46-51) Khorench, Jehovan Gabriel ani Elizabeta udexim Mariek xokti dili. w23.10 14-15 ¶10-12

Kristachea xisam modem fokot umkeach zannank, mhunnche 1,44,000 zannank, Jehovan povitr xokten makhleant. Ani Jehova sangata tancho ek khas sombond asa. Tim Jezu borabor sorgar iadnik mhunn seva kortolim. (Prok. 14:1) Tim prithumer astana, Jehova tankam aplea povitr xokten makhta ani aple put mhunn manun gheta. Tor tombunt aslolo Povitr ho bhag Jehova sangata aslolea tanchea khas sombondak suchit korta. (Rom. 8:15-17) Toxench tombunt aslolo Bhov Povitr ho bhag, sorgak suchit korta, zoim Jehova asa. Ani hea donui bhagam modem aslolo “poddʼddo,” Jezuchea rogta-masache kuddik suchit korta. Hi kudd gheun to sorgar vochonk xokonaslo, toxench Jehovachea otmik Devmondiracho Porom Iadnik mhunn seva korunk xokonaslo. Tor tachi kudd munxakulla pasot bolidan korun, tannem soglea makhlolea Kristanvank sorgar voichi vatt ukti keli. Punn tancho sorgincho inam melloun gheunk, tannim pasun tanchi rogta-masachi kudd teag korunk zai.​—Heb. 10:19, 20; 1 Kor. 15:50. w23.10 28 ¶13

Efraimachea munxamnim Gideonacheo khoddeo kaddleo tednam ragar zaunchea bodlek tannem xantponnim zobab dilo. (Fudd. 8:1-3) Tannem khaltikaien aiklolean ani doiallaien zobab dilolean tancho rag xant zalo. Tor dusrim apleo khoddeo kaddttat tednam, vhoddilamnim Gideona bhaxen tanchem dhean diun aikonk zai, ani doiallaien zobab diunk zai. (Jak. 3:13) Oxem kelolean sobhent xanti urtoli. Gideonak, Midianitkarancher zoit mellʼllem tednam Izraelitkaramnim taka vakhannlo. Punn tannem sogli vakhannʼnni Jehovak dili. (Fudd. 8:22, 23) Tor vhoddilamnim Gideona thaun kitem xikonk zata? Te kortat tea kamam pasot dusrim tankam vakhannttat tednam, tannim ti vakhannʼnni Jehovak diunk zai. (1 Kor. 4:6, 7) Udharonnak, eka vhoddilak xikounchi bori kola asa mhunn bhav-bhoinnam taka vakhannttat zalear, ti xikounn Devachea Utra thaun asa vo Devache songottnne thaun mellʼllolea proxikxonna vorvim apunn hem korunk pavla, mhunn tannem sangonk zata. Tea bhair vhoddilamnim, te jea toren xikoitat, tea vorvim Jehovak mhoima melltta vo tankam svotak vakhannʼnni melltta, tea vixim chintunk zata. w23.06 4 ¶7-8

Amkam amchea magnneacho zobab mellona zalear, ami amkanch vicharunk zatat. ‘Hanv Jehova lagim jem magtam tem sarkem asa kai?’ Choddxe pavtti, amkam kitem borem tem amkam khobor asa, oxem ami chintʼtat. Punn tem amkam ghoddie fuddarak faideak poddchem na zait. Thodde pavtti, amchi oddchonn umkech toren suttavi kor mhunn ami Jehova lagim magtat astolim. Punn tachea lagim ti suttavi korunk anikui bori vatt asa zait. Toxench, thodde pavtti ami jem magtat tem Jehovachea khuxe pormonnem na astolem. (1 Juanv 5:14) Udharonnak, ami ek avoi-bapai vixim chintum-ia. Aplo bhurgo sotant urom mhunn tannim Jehova lagim magnnem kelʼlem. Ani hem magop sarkem oxem disonk xokta. Punn apli seva korunk Jehova konnacheruch dobhav ghalchona mhunn ami ugddas dovrunk zai. Ami sogleamnim, hoi amchea bhurgeamnim pasun tachi seva korunk vinchun kaddlolem taka zai. (D.S. 10:12, 13; 30:19, 20) Tor aplea bhurgeak ap-khuxen tuzo mog korunk, ani tuzo ixtt zaunk amkam tachea kallzant sot rigounk modot kor mhunn tea avoi-bapaimnim magonk zatalem.​—Mho. 22:6; Ef. 6:4. w23.11 21 ¶5; 23 ¶12

Bhuzvonn divop, mog dakhounchi ek mhotvachi vatt kiteak zaun asa? Eka pustokant Bible-achea hea versa vixim sanglam, ki Paulun uzar kelʼlem “bhuzvonn” hea utracho orth mhunnttlear, “ek munis kotthin poristhitint asta tednam tachea sangata ubo ravon taka urba divop.” Tor niraxi aslolea bhav-bhoinnank ami bhuzvonn ditat tednam, ami tankam visvaxiponnan Jehovachi seva korit ravonk modot kortat. Ani dor ek pavtt ami oxem kortat tednam, ami tancho khub mog kortat mhunn dakhoun ditat. (2 Kor. 7:6, 7, 13) Doia-maia disop ani bhuzvonn divop, hanchea modem lagxilʼlo sombond asa. Koso? Eka munxak, tras sostolea konnachi-i doia-maia dista tednam, to taka bhuzvonn diunk ani modot korunk fuddem sorta. Tor poilim taka doia-maia dista, ani uprant to bhuzvonn diunk panvl gheta. Jehovachi doia-maia taka dusreank bhuzvonn diunk koxi fuddem kaddtta, tea vixim Paulun bore toren somzailem. Tannem Jehovak “doien bhorlolo Bap ani sogle torechi bhuzvonn diupi Dev” oxem mhunnttlo.”​—2 Kor. 1:3. w23.11 9-10 ¶8-10

Soglea Kristanvank sonkoxtt sosunkuch poddttole. Apostl Pauluk pasun hea vixim khobor asli. Dekhun tannem Tesalonikentlea bhav-bhoinnank oxem mhunnttlem: “Ami tumchea sangata asle tednam amkam sonkoxttancho fuddo korchoch poddttolo mhunn ami tumkam sangtale, ani toxench zalem.” (1 Tes. 3:4) Toxench, Korintkarank tannem oxem boroilem: “Bhav-bhoinnimno . . . amcher kosle-kosle sonkoxtt ailole tea vixim tumi zannam zalʼlim amkam zai . . . Ami ghoddie jive urchenant oxem amkam dislem.” (2 Kor. 1:8; 11:23-27) Aiz amkam koslea-na-koslea sonkoxttacho fuddo korunk poddttolo mhunn ami opekxa korunk zata. (2 Tim. 3:12) Tumi Jezucher bhavarth dovortat ani tacho pattlav kortat mhunn ghoddie tumchea ixttamnim ani soireamnim tumchea sangata vaitt toren vagleant astolim. Vo tumi promannik asat dekhun, tumchea patranvan vo tumchea sangata kam kortoleamnim tumkam tras keleat zait. (Heb. 13:18) Vo tumi tumchea bhorvonxea vixim dusreank sangtat dekhun, sorkara thaun tumkam virodh sosunk poddla zait. Tor amkam koslea-i trasancho fuddo korunk poddom, ami khuxal asonk zai mhunn Paulun sanglem. w23.12 10-11 ¶9-10

Jakobak khub trasancho fuddo korunk poddlo. Jakobache don put, Simeonan ani Levin, Jakobachem nanv piddʼddear kelem, ani Jehovachea nanvak opman haddlo. Tea bhair, tachi mogall bail, Rakel, dusrea putak zolm ditana meli. Ani desant bhuk poddli tednam, Jakobak zanntte piraier Ejipt desant voichem poddlem. (Ut. 35:16-19; 37:28; 45:9-11, 28) Itle sogle tras sosunui, Jehovacher ani tannem jeo bhas dilʼleo, tancher tacho visvas halonk na. Ani Jakobak apli maniotai asa mhunn Jehovan dakhoun dilem. Udharonnak, Jehovan Jakobachi girestkai khub vaddoili. Ani itlo-i temp melo mhunn chintʼtalo to tacho put Juze, taka porot mellʼllo tednam, to Jehovak kitlo upkari zalo astolo nhoi! Jehova sangata Jakobachi ghott ixttagot asli dekhun to hea soglea oddchonneancho fuddo korunk pavlo. (Ut. 30:43; 32:9, 10; 46:28-30) Tor Jehova sangata amchi pasun ixttagot ghott asta tednam, koslea-i oddchonneancho fuddo korunk amkam modot zata. w23.04 15 ¶6-7

Stotr 23-ant, Jehova tacho mog korta ani tachi kallji gheta mhunn Davidan khatren sanglem. Toxench, Jehovachem ani tachem natem kitlem ghott aslem tem-ui tannem sanglem. Ani tannem taka aplo Gonvlli mhunnttlo. Jehovachem margdorxon pallun apunn surokxit asa oxem Davidak bhogtalem ani to Jehovacher purnn toren patietalo. Toxench, Jehova taka dor disak mog dakhoitolo mhunn Davidak khatri asli. Kiteak? Jehovan sodanch Davidacheo sogleo gorzo purnn keleo dekhun, to apleachi kallji gheta mhunn Davidak bhoglem. Toxench, Jehova aplo ixtt ani apunn taka manvola mhunn David zannam aslo. Tor fuddem kitem-i zalear pasun Jehova apleo sogleo gorzo purnn korit ravtolo mhunn Davidak kainch dubhav naslo. Tor Jehova aplo mog korta ani kallji gheta mhunn Davidak visvas aslo dekhun chodduch usko korina zaunk, toxench khuxal ani dhadoxi ravonk Davidak modot zali.​—St. 16:11. w24.01 29 ¶12-13

Dusrea Vixv Zhuza uprant thaun, Jehovachim Sakxi zaitea desamnim addkholl nastana porgottnni korunk xokleant. Toxench, aiz sonvsarbhor porgottnnechem kam zata ani anikui zaito lok bore khobrek kan ditat. Aiz Sonchalon Monddollantle bhav margdorxona pasot Jezu Kristacher patieun ravtat. Ani te bhavank jem margdorxon ditat, tem Jehova ani Jezuchea chintpa pormonnem aslolem tankam zai. Hench margdorxon, uprant sorkittachi dekhrekh korpi ani vhoddil soglea sobhank ditat. Makhlole vhoddil, toxench sobhentle her sogle vhoddil, Jezu Kristachea “uzvea hatant” asat. (Prok. 2:1) Punn te opurnn asat ani tanche lagim chuki zatat. Adlea kallar Moizes, Joshua ani apostlamnim pasun thodde pavtti chuki keleo. (Lok. 20:12; Josh. 9:14, 15; Rom. 3:23) Tori astana visvaxi chakrak, toxench soglea sobhentlea vhoddilank Jezu bore toren margdorxon dita, ani to tem di-it ravtolo. Tor hea bhavam koddlean melltta tem margdorxon sarkem asa mhunn ami purnn khatri dovrunk zata. w24.02 23-24 ¶13-14

Ami Jehovak kitlim upkari asat ani tacho kitlo mog kortat tem dison ieta tea toren ami dusream lagim ulounk zata. Porgottnni kortana, ami lokank Jehovak lagim soronk modot korunk sodhtat. (Jak. 4:8) Zoso Jehova amcho mogall Bap zaun asa, teach bhaxen tankam dislolem amkam zai. Tea pasot, Bible-antlean Jehovachea gunnam vixim, zoxem tacho mog, neai, zannvai ani xokte vixim sangonk amkam khub khuxalkai bhogta. Toxench ami Jehovachi dekh ghetat tednam pasun, ami tachi vakhannʼnni kortat ani taka khuxal kortat. (Ef. 5:1) Ani ami oxem kortat tednam sonvsarantlea noxttea lokam poros ami vegllim asat mhunn lokank dison ietolem ani tachem karonn tim zannam zaunk sodhtolim. (Mt. 5:14-16) Tor dispottʼttea jivitant ami tanchea lagim uloitana tachem karonn ami tankam somzaunk zata. Hea vorvim khalti kallzachim, Jehovak lagim sortolim. Tor hea vattamnim ami Jehovachi vakhannʼnni kortat tednam ami tachem kalliz khuxal kortat.​—1 Tim. 2:3, 4. w24.02 10 ¶7

Anikui boro Kristanv zaunk eka tornnattea bhavan faideak poddttat tosleo kola xikonk zai. Oxem kelʼlean, to sobhent zobabdareo samballunk pavtolo, svotachi vo tachea familichi kallji gheunk modot zata toslem ek kam korunk pavtolo, ani dusream sangata borem natem samballunk pavtolo. Udharonnak, bore toren vachunk ani borounk xikat. Zo munis dor disa Devachem Utor vachunk ani tacher niall korunk vell kaddtta, to khuxal asta ani taka tachea jivitant ies melltta mhunn Bible sangta. (St. 1:1-3) Tor tornnattea bhavamno, dispottʼttim Devachem Utor vachunk vell kaddat. Oxem kelʼlean, tumi Jehovachem chintop zannam zaunk pavtole. Hea vorvim tumi bore bhaxen chintunk ani tumchea jivitant Bible-antlim totvam apnnaunk pavtole. (Mho. 1:3, 4) Amchea bhav-bhoinnank oslea bhavanchi goroz asa, je Bible-antlean tankam xikounk xoktat ani bore solʼle diunk xoktat. Tor tumi bore toren vachunk ani borounk zannant zalear, bhav-bhoinnank faideak poddttat ani tancho bhavarth ghott kortat toslim bhaxonnam ani zobab tumi toiar korunk pavtole. Toxench tumkam faideak poddttat tosle mudʼde tumi boroun dovrunk pavtole. Ani te uzar korun, tumi tumcho bhavarth ghott korunk toxench dusreank urba diunk xoktole. w23.12 26-27 ¶9-11

Tor amkam bhirant dista tednam, Jehovan fuddara pasot amkam kitem bhasailam tea vixim ami niall korum-ia. Ami oslea vella vixim chintunk zata jednam Soitan aschona,. Tea vixim 2014-chea pradexik odhivexonak ek dekhavo dakhoilʼlo. Tantunt ek bapui aplea famili sangata, 2 Timotak 3:1-5-a vixim uloitalo. Ani tem vers Sobit Bage vixim aslem zalear tantuntlim utram koxim astolim aslim tem tannem sanglem. Tannem mhunnttlem: “Novea sonvsarant sogleam-von khuxalkaiecho vell astolo. Karonn lok dusreancho mog kortat tosle, sotacho mog kortat tosle, mannsugen vagtat tosle, khalti, Devak vakhannttat tosle, avoi-bapaichem aikotat tosle, upkari, visvaxi, aplea ghorcheancho mog kortat tosle, aikonk kobul zatat tosle, sodanch dusreanchem borem uloitat tosle, svotacher tabo dovortat tosle, movall, boreponnacho mog kortat tosle, visvas dovorpa sarke, dusreanchem aikotat tosle, lhanvik kallzache, moujecho mog korchea poros Devacho mog kortat tosle, khorea kallzan Devachi bhokti kortat tosle. Oslea lokank chittkon ravat.” Tor novo sonvsar koso astolo tea vixim tumi tumchea famili sangata vo bhav-bhoinnam sangata uloitat kai? w24.01 6 ¶13-14

Bible sangta: “Jehovak tacho lok khub manvota.” (St. 149:4, NW) Hem kitlem borem zaun asa nhoi! Punn thodde pavtti thoddim itlim niraxi zatat ki tim chintunk lagtat: ‘Hanv Jehovak manvotam kai?’ Adlea kalla voilim Jehovachim zaitim visvaxi sevokam pasun itlim niraxi zalʼlim ki tankam-i oxench bhoglem. (1 Sam. 1:6-10; Job 29:2, 4; St. 51:11) Bible spoxttponnim dakhoun dita ki opurnn munxam Jehovak manvololim zaunk xoktat. Koxim? Tannim Jezucher bhavarth dovrunk zai ani bautizm gheunk zai. (Juanv 3:16) Oxem korun, tannim poschatap kela ani Jehovachi khuxi kortolim mhunn taka bhas dilea, hem tim dusream hujir dakhoun ditat. (D.I. 2:38; 3:19) Ani Jehova lagim ixttagot zoddunk tim him panvlam ghetat tednam Jehova khub khuxal zata. Tor ami amchi somorponnachi bhas pallttat tea meren, amkam Jehovachi maniotai asta ani ami tachim lagxilʼlim ixttam zaun astat.​—St. 25:14. w24.03 26 ¶1-2

Aiz sorkari odhikari amkam porgottnni korinakat mhunn sangtat tednam, ami pasun Jezuchea apostlanchi dekh gheun porgottnni korit ravtat. Porgottnnechem kam korunk, Jehova amkam modot kortolo mhunn ami khatri dovrunk zata. Tor ami Jehova lagim dhir ani zannvai magonk zata. Amchea modlim zaitim zannam, duent asat vo koslea karonnank lagon dukhi vo niraxi asat zait. Vo amchea mogacheank ami mornnant sanddleant astolim. Vo familint kosli oddchonn asa zait vo dhumallo vo her koslea-i trasancho ami fuddo kortat astolim. Voilean pidda ani zhuzank lagon, amkam hea oddchonneancho fuddo korunk anikui kotthin zata astolem. Tor ami kitem korunk zai? Amchea kallzant asa tem soglem ami Jehovak sangonk zai. Eka lagxilʼlea ixtta lagim uloitat tea bhaxen amche poristhiti vixim ami Jehovak sangonk zai, ani Jehova ‘goroz tem kortolo’ mhunn khatri dovrunk zai. (St. 37:3, 5) Magnnem korit ravlolean ‘sonkoxttachea vellar thir ravonk’ amkam modot zata. Tem mhunnttlear, amcher ietat te tras ami sosunk pavtat. (Rom. 12:12) Aplea sevokanchea jivitant kitem ghoddtta tem soglem Jehova zannam, ani to “tanchi bob aikota.”​—St. 145:18, 19. w23.05 5-6 ¶12-15

Amkam mhotvache nirnnoi gheunk poddttat tednam “Somiak khoincheo vostu manvotat” tem ami zannam zaunk zai ani uprant tea pormonnem kam korunk zai. (Ef. 5 :17) Amchea poristhitik lagu zatat toslim totvam zannam zalʼlean, ami Devachem chintop zannam zaunk pavtat. Ani uprant ami him totvam apnnaitat tednam ami xanneponnan nirnnoi gheunk pavtat. Ani ho solʼlo amkam-i lagu zata. Karonn amcho dusman Soitan zaka ‘noxtto’ mhunnttla, to amkam hea sonvsarachea vostumnim guspaun dovrunk sodhta. (1 Juanv 5:19) Tor Jehovachi seva poilea zagear dovorchea bodlek, ami poixe, kam ani xikxonnacheruch sompeponnim dhean ditolim. Ani oxem kelear, Jehovachi seva korunk amkam velluch aschona ani ami sonvsarachea lokam bhaxen chintʼtat mhunn dakhoitolim. Heo vostu chukicheo nhoi tem khorem. Punn ami kednanch tankam amchea jivitant poilo zago diunk zaina. w24.03 24 ¶16-17