DARASI NA 11

Ka Yi Magana da Kuzari

Romawa 12:11

ABIN DA ZA KA YI: Ka ƙarfafa masu sauraronka ta wurin yin magana da himma.

Ka fahimci batun da kyau. A lokacin da kake shiri, ka yi tunani sosai a kan muhimmancin saƙon. Ka san batun sosai domin ka iya bayyana shi daga zuciyarka.
Ka yi tunani a kan masu sauraronka. Ka yi tunani a kan yadda masu sauraro za su amfana daga abin da za ka karanta ko kuma koyar. Ka yi tunani a kan hanyoyin da za ka gabatar da saƙon da kyau don masu sauraronka su amfana.
Ka sa jawabin ya yi daɗi. Ka yi magana da himma. Motsin hannayenka, da yanayin fuskarka su nuna yadda kake ji game da batun da kake tattaunawa.

Kada ka riƙa motsa hannayenka a hanya ɗaya yayin da kake magana, don hakan zai ɗauke hankalin masu sauraronka. Ka motsa hannayenka yadda zai jitu da abin da kake faɗa. Yayin da kake koyar da muhimman darussa ko kana ƙarfafa masu sauraronka su ɗauki wani mataki, ka yi magana da himma. Idan ka fara jawabinka da babbar murya daga farko har ƙarshe, masu sauraro za su gaji da jawabin.