Mwezi gwa 8

Hala bintu bibiri by’akamaro bili mw’eyila zaburi: 1) Abanya-kunali banahurana ebibazo. 2) Yehova anarhuyokola omu bibazo byerhu. Nka gurhe Yehova anarhuyokola? Njira nguma kuli kurhurhabala rhugwarhe amawazo makwirire oku bilolere akalamo mu linola gulu libihire. Chiro akaba oku Yehova arhulaganyize akalamo k’omwishingo amango rhuli rhwamukolera, arhaderhere oku nta bibazo rhwakahurana zene. (Isa. 66:14) Arhuhebere omurhima rhuseze obwenge bwerhu oku mango mayinjire, amango nji rhwagwarha akalamo alonzeze rhusiimire esiku n’amango. (2 Ko. 4:16-18) Aliko oku amola mango manahika, arhurhabala rhugenderere kumukolera. (Omb. 3:22-24) Bichi rhwakayiga kugera emifano y’abantu bemana baliri baharamya Yehova b’omu mango ma mira n’ab’omu siku zerhu? Rhwakahurana ebibazo rhurhaliwazize. Aliko amango rhwamalangalira Yehova, arhakafa alekere kurhurhabala haba n’akatyu.​—Zb. 55:22. w23.04 buk. 14-15 chi. 3-4

Rhwakayiganya omufano gwa Yusufu na Mariya, baliri tayari kukenga oburhegesi bukulu chiro n’amango byalibakomerere kujirantyo. (Lu. 2:1-6) Amango Mariya aligwerhe obukule bwa myezi mwenda ntya, oburhegesi bwabahema yewe na Yusufu bajire chintu chilebe chalibakomerere bwenene. Omukulu w’Oburhegesi bwe Roma, Ogiste, ahebaho erhegeko liderhere oku abantu boshi b’omu burhegesi bwe Roma, baje kuchiyandikisa emunda baburhwaga. Yusufu na Mariya, balikwanene kukola olugenzi l’okuja e Betelehemu, ahantu bakalambagire bilometre 150, bali bashona emisozi n’okuyandagala orhubanda. Olola lugenzi lurhakabayorohere ahanene ku Mariya. Oyola mulume n’omukazi bakaba eyi baliyubahire oku bilolere obulanzi bwa Mariya n’omwana waliri omunda. Gurhe si byakabere nk’enda yamulumiraga omu njira eyi bachili omu lugenzi? Aligwerhe owakabere Masiya omu nda yage. K’echola chakarhumire barhakenga erhegeko ly’oburhegesi? Chiro akaba oku Yusufu na Mariya baligwerhe empanvu z’okuyubaha, balikengere elyola rhegeko. Yehova alichiyunvirhe asiimire bulala balikengere, anabashishikala. Mariya alihikire Ebetelehemu omu bulanzi anaburha omwana ogwerhe amagala menja n’echola chalirhumire obulebi bw’Ebiblia bwayenera!​—Mik. 5:2. w23.10 buk. 8 chi. 9; buk. 9 chi. 11-12

Gurhe wakajira akaba onayunva oyubahire kuhaana echishubizo oku mbuganano? Orheganye bwinja. (Mez. 21:5) Ok’onali wamenya bwinja omwazi mwaganirako, kuwanachiyunva bikuyorohere kuhaana ebishubizo. Kandi, ochihangane kuhaana ebishubizo biyufuhire. (Mez. 15:23; 17:27) Wachiyunva orhayubahire kuhaana echishubizo chiyufuhire, nk’oku wakachiyunvirhe nka wahaanaga echilehere. Amango wamahaana echishubizo chiyufuhire omu binwa byawe wenyine, wayerekana oku walichirheganyize bwinja, n’oku waliyunvirhe bwinja omwazi muli mwashambalako. Rhuderhe oku wamakolesa mahano malebe mw’amola, aliko ochili wayunva oyubahire kuhaana chishubizo chiguma changwa bibiri. Ochizere oku Yehova asimisizwe n’obushiru bwawe oli wayerekana y’ojira nk’oku wakanagala. (Lu. 21:1-4) Yehova arharhuhemere rhujire ebintu bichubukire obuhashe bwerhu. (Flp. 4:5) Orhegere bichi wakajira, ochihebereho omuhigo g’okuchikola, onasalire Yehova akuhe omurhima gurhulerere. Burhanzi wakachiheberaho omuhigo g’okuhaana echishubizo chiyufuhire. w23.04 buk. 21 chi. 6-8

Entumwa Paulo arhuhuzenye n’abasoda bali tayari banayambere emyambaro y’okuja oku vita. Abantu baba balangalire oku omusoda akwanene kuba tayari kulwa omu kasanzi koshi-koshi, amango evita lyamarhengerera. Intyo kubiri na kurhwewe. Rhunayorha rhuchirheganyize oku lusiku lwa Yehova omu kuyambala olugogorho l’okuchifuba l’obwemere, obuzigire n’esapo y’obulangalire. Olugogorho l’okuchifuba lwaliri lwalanga omurhima g’omusoda. Obwemere n’obuzigire binalanga omurhima gwerhu g’omufano. Ezola ngeso zarhurhabala rhugenderere kukolera Mungu n’okuyiganya Yesu. Obwemere bunarhuma rhwachizera oku Yehova nj’arhuhemba bulala rhwamulonzeze n’omurhima gwerhu goshi. (Ebr. 11:6) Echola charhushunika rhuyorhe bemana oku Chirongozi werhu, Yesu, chiro akaba birhuhemere rhulembere ebigeregezo. Rhwakakomeza obwemere bwerhu yirhugala kelembera ebibazo omu kuyiganya emifano y’abantu bamu zinola siku zerhu bagenderere kubera beshwekerezi chiro akaba yibahurana n’ebigeregezo changwa n’ebibazo by’okubula efuranga. Kandi rhwakachilanga oku buhanya bunalerhwa n’okubulwa kw’efuranga’ omu kuyiganya omufano gwa balala bachihanganire kuyorohya akalamo kabo omu kuheba enyungu z’Obwami oku nafasi y’oburhanzi. w23.06 buk. 10 chi. 8-9

Engeso y’okuchigala buli buhashe bunarhabala omuntu arhajiraga nk’okwanachiyunvirhe changwa buli choshi awazize. Birhuhemere rhugwarhe engeso y’okuchigala yirhujira echintu chinja, ahanene amango ebi rhuli rhwakola bikomere changwa amango rhurhagwerhe enyorha y’okubikola. Oyibuke oku, okuchigala chili chigabi ch’etunda ly’eroho, oheme Yehova eroho lyage lichesibwa likurhabale kukuza eyola ngeso y’akamaro. (Lu. 11:13; Gal. 5:22, 23) Omenye walinga mpu ehali zibe zinja bwenene. Mu linola gulu, nkabaga birhashokabana chiro, kugwarha ehali zikwirire bwenene. Nka rhulingirize ezola hali, rhurhakafa rhwahikire omuhigo gwerhu chiro. Rhwakabula enyorha bulala bikomere bwenene okuhikira omuhigo gwerhu. Akaba ntyo kubili emwawe, wakacha omuhigo gwawe bigabi-bigabi? Akaba omuhigo gwawe kuli kukuza ngeso ndebe nyinja, wakahwanza kuyiyerekana omu rhuntu rhugeke-geke? Akaba omuhigo gwawe kuli kusoma Ebiblia yoshi, wakahwanza omu kuyinja wasoma bigabi bigeke-geke? w23.05 buk. 29 chi. 11-13

Mu zinola siku z’obuzinda, Yehova ali akolesa olubaga lwage yi lugenderera kurhuhereza ebilyo by’ekiroho yibirhurhabala rhugenderere kulambagira omu “Njira y’Obuchesibwa.” (Isa. 35:8; 48:17; 60:17) Rhwakaderha oku, amango moshi-moshi omuntu amayemera efunzo lye Biblia, anagwarha orozo l’okulambagira omu “Njira y’Obuchesibwa.” Baguma banabalama mw’elyola barabara lizibu-zibu mu kasanzi kageke konyine n’okurhengamo. Abandi bahigirire kulambagira mw’elyola barabara mpaka bahike oku buzinda bwalyo. Ngahe liganire? Ku balala bagwerhe obulangalire b’okulama omu mbingu, “Enjira y’Obuchesibwa,” ebayerekeze omu “paradizo ya Mungu,” k’okuderha, embingu. (Ufu. 2:7) Ku balala bagwerhe obulangalire b’okulama oku gulu, elyola barabara liyerekeze oku buzinda b’Oburhegesi bwa Yesu bwa Myaka 1 000, aha buli yeshi nj’aba mushinganyanya. Akaba oli walambagira mw’elyola barabara lizibu-zibu, omenye wawaza oku bintu walekere enyuma byakakubuza kugenderera kulilambagiramo. Kandi omenye warhenga mw’elyola barabara haba n’akatyu, s’ahubwe ogenderere n’olugenzi lwawe kuhika omu gulu lihya-hya! w23.05 buk. 17 chi. 15; buk. 19 chi. 16-18

Amango wamawaza oku bintu byoshi Yehova akujirire, wagwarha eshukrani nene kuye n’okulonza kuhana akalamo kawe emwage. (Zb. 116:12-14.) Ebiblia ederhere oku buli mpano “nyinja bwenene na buli luhembo lushinganene” lunarhenga emwa Yehova. (Yak. 1:17) Empano nkulu mw’ezola mpano zoshi Yehova arhuhere, eli nterekero y’Omugala, Yesu. Ba nka wawaza kangana gurhe eyola mpano eli yakusomeza bwenene! Enchungu yarhumire byagalikana ogwarhe obwira bukomere haguma na Yehova. Kandi yarhumire wagwarha orozo l’okulama esiku n’amango. (1 Yo. 4:9, 10, 19) Okuchihana kwawe emwa Yehova eli njira nguma nyinja bwenene y’okuyerekana eshukrani kw’echola chijiro ch’obuzigire bunene chirhasaga kushuba kubaho, n’oku yindi migisho yoshi Yehova akuhere. w24.03 buk. 5 chi. 8

Amango rhwamabona amabi mali oku gulu zene, rhwanachiyunva kuguma n’oku omunya-kunali Loti naye aliri achiyuva. “Aligayisizwe bwenene n’olugenzi lubi lwa bantu babuzirashoni barhakenga amarhegeko,” bulala ali menyere oku Darha w’embingu arhasiima ebili ntyo. (2 Pe. 2:7, 8) Obuzigire n’obukenge Loti aligwere ku Mungu bwalimushunikire ashombe engeso z’obumaguza zibi bwenene z’abantu alilamire haguma nabo barhaliri bakenga amakanuni ma Yehova m’okuchigendesa. Nerhu zene rhulamire n’abantu barhakengere haban’akatyu amakanuni ma Yehova m’okuchigendesa. Chiro akaba ntyo, rhwakagenderera kugwarha olugenzi lwinja, nka rhugenderere kuzigira Mungu n’okumukenga bwenene. Yehova arhurhabere rhujire ntyo, kugerera ebinwa bihebere omurhima bili omu chitabu cha Mezali. Abakristu boshi, abalume n’abakazi, abasole n’abashaja, kweri bakayunguka omu kuganira oku mahano m’obwengehe mali mw’echola chitabu. Amango rhuyubahire Yehova, rhwaba merangwe yi rhurhalekerera engeso zibi. w23.06 buk. 20 chi. 1-2; buk. 21 chi. 5

Nkabaga nawe wakaba eyi wapatire obupinzani burhengere oku bantu b’omulala, changwa nkabaga wakaba eyi walekere kugwarha furanga zinene, changwa birugu binene, y’oheba enyungu z’Obwami oku nafasi y’oburhanzi omu kalamo kawe. (Mt. 6:33) Akaba ntyo kubili, Yehova amenyere byoshi wamukolere. (Ebr. 6:10) Byakashobokana oku wachibwenenere obukweri bw’ebila binwa bya Yesu: “Nta muntu walekere enju, bene-babo, bali-babo, nyina, eshe, abana changwa amashwa eju yani n’eju y’emyazi minja, orhakapata kukuba kali egana kurhenga zene mu chinola chihe​—enju, bene-babo, bali-babo, banyina, abana, amashwa, n’amalibuko—​n’omu gulu lyayinjire, akalamo k’esiku n’amango.” (Mk. 10:29, 30) Emigisho wapatire eli minene bwenene kulusha byoshi walekere.​—Zb. 37:4. w24.03 buk. 9 chi. 5

Amango echibaga ch’omu Antiyokiya y’omu Siriya chiyunva oku bilolere nzara ekalihire, “bahigirira buli muguma nk’oku akanagala, barhume oburhabale ku bene-berhu balamire omu Yudeya.” (Mdo. 11:27-30) Chiro akaba oku abola bene-berhu na bali-berhu baliri balibuka n’enzara balilamire hale, Abakristu b’omu Antiyokiya balihigirire kubarhabala. (1 Yo. 3:17, 18) Nerhu rhwakayerekana olukogo zene, amango rhwamarhegera oku aberhu Bakristu bahurene echinjira. Rhunajira juba-juba omu kuhaana oburhabale nkabaga omu kubaza abashamuka akaba rhwakakola kwakola kasi, omukuhaana enshololo oku kakasi k’omu gulu lyoshi, changwa okusalira eju ya balala bahurene n’echinjira. Bene-berhu na bali-berhu nabo bakakenera oburhabale bw’ebintu yibagala kugenderera kulama. Amango Omwami werhu Yesu Kristu nji ayinja kuchira abantu olubanja, rhulonzeze oku nji arhubugane eyi rhuli rhwayerekana olukogo yinji arhuhamagala “rhushokole Obwami.”​—Mt. 25:34-40. w23.07 buk. 4 chi. 9-10; buk. 6 chi. 12

Yesu aliyiganyize engeso ya Yehova y’olugero changwa okuyunva abandi. Arhumwaga oku gulu kuhubiri “entama zaherere z’eshanja ye Izraeli.” Aliko aliyerekene olugero amango aliri ahubiri abantu. Mango maguma, mukazi muguma orhaliri Muizraeli amulakirira mpu afumye omwali ‘waliri arhindibuzwa n’omuzimu.’ Yesu ayunvira oyola mukazi obonjo anafumya oyola munyere. (Mt. 15:21-28) Rhushambalage oku gwindi mufano. Oku murhondero gw’akasi kage k’amahubiri, Yesu aderha ntya: “Buli yeshi wampakana. . . , nani nji namuhakana.” (Mt. 10:33) Aliko si, alihakanire Petro, wamuhakanaga kasharhu koshi? Nanga. Yesu alimenyere oku Petro aliyunvirhe agayire bwenene oku bilolere eby’ajiraga analiri mulume mwimana. Amango Yesu afuuka, arhengerera Petro anamubwira oku amubabalire n’oku agenderere kumuzigira. (Lu. 24:33, 34) Rhwabwene oku Yehova Mungu na Yesu Kristu bali mufano gwinja g’okuyerekana olugero. Gurhe si oku birhulolere rhwabo? Yehova alonzeze rhube bantu banayerekana olugero. w23.07 buk. 21 chi. 6-7

Bichi rhwakabwira abandi yi bayemera oku kweri echilagane cha Mungu che Paradizo nji chayenera? Ech’oburhanzi Yehova yewe yenyine ahaanire echola chilagane. Echitabu cha Ufunuo chiderhere ntya: “Olala oyikere oku chirhi ch’obwami aderha: ‘Tala! Indi najira ebintu byoshi bibe bihyahya.’” Agwerhe obwengehe, emisi, n’enyorha y’okuyeneza echilagane chage. Echa kabiri, Yehova amenyere oku eby’aderhere kweri nji byayenera. Echola ch’echirhumire aderha ntya: “Ebila binwa bili byakuchizerwa binali by’okuli. . . . Byamalire kuyenera!” Echa kasharhu, ntachintu chakabuza Yehova kumaliriza chintu chilebe arhondere. Echola ch’echirhumire aderha ntya: “Nye Alfa nyenaOmega.” (Ufu. 21:6) Yehova nj’ayerekana oku Shetani ali mubeshi orhakamubuza kuyeneza omuhigo gwage. Bobola, amango omuntu amaderha ntya: “Ebila bishushire oku bili binja aliko birhali by’okuli.” Omusomere onamufasiriye Ufunuo 21:5, 6. Omuyereke nka gurhe Yehova arhuhere echemezo ch’echilagane chage omu kuchisinyeko n’esinyatire yage yewe yenyine.​—Isa. 65:16. w23.11 buk. 7 chi. 18-19

Yehova ahaga Abrahamu echola chilagane y’agwerhe myaka 75 buzira kugwarha omwana. Abrahamu alichibwenere si oku echola chilagane chayenera? Arhabonaga okw’echola chilagane choshi chayenera. Enyuma w’okumala kuyambuka Olwinji lwe Efrati n’okulindira mu myaka 25, Abrahamu alibwene okuburhwa k’omugala Isaka kugerera echisomerene, n’enyuma wayindi myaka 60, abona oku abanjukulu bage baburhwa, k’okuderha, Esau na Yakobo. (Ebr. 6:15) Aliko, Abrahamu arhabonaga gurhe oluburho lwage lwaba shanja lizibu-zibu yilushokola Echihugo Chilaganano. Aliko, oyola mulume mwimana aligwerhe obwira bukomere haguma n’Omulemi wage. (Yak. 2:23) Amango Abrahamu nja fuuka, nj’achiyunva asiimire bwenene okubona oku obwemere bwage n’okulindira kwage kwalerhere migisho minene oku mashanja moshi! (Mwa. 22:18) Bichi birhuyigirize? Nkabaga rhurhabona gurhe ebilagane byoshi bya Yehova byayenera ahoh’anaho. Aliko, nka rhuyerekene okulindira kuguma na Abrahamu, rhwakachizera oku Yehova arhugisha zene n’ahanene nj’ashuba kurhugisha bwenene omu gulu lihya-hya arhulaganyize.​—Mk. 10:29, 30. w23.08 buk. 24 chi. 14

Amango Mwami Uziya aliri musole, aliri mwirhohye. Aliyigire “kuyubaha Mungu w’okuli.” Yehova alimugishire hofi mw’eyola myaka yoshi 68. (2 Ny. 26:1-5) Uziya alihimire mashanja manene maliri banzi b’olubaga lwa Mungu, ajira n’okwage koshi omu kulanga bwinja evile ye Yerusalemu. (2 Ny. 26:6-15) Uziya ali gwerhe obusiime mu byoshi Mungu aliri amurhabala kujira. (Muh. 3:12, 13) Mwami Uziya alikoomere kubwira abandi bichi bakwanene kujira. Nkabaga echola chaliri charhuma achiyunva oku arhakwanene kukenga amarhegeko ma Yehova. Lusiku luguma, Uziya aja omu hekalu lya Yehova analonza kuchirhumiriza kuyosa obuvumba oku mazabahu. Abami barhalikwanene kukola akola kasi. (2 Ny. 26:16-18) Omudahwa Mukulu Azariya achihangana kumuhanula, aliko Uziya agwarha ebisirani binene bwenene. Ech’okugayisa Uziya arhayorhaga mwimana emwa Yehova, naho Yehova amushurha ebibenzi. (2 Ny. 26:19-21) Akalamo kage kakagenderere kukwira bwenene nk’ayorhaga mwirhohye! w23.09 buk. 10 chi. 9-10

Chiro n’amango entumwa Petro amala kuba Mukristu mushigwa, alikwanene kugenderera kuchihangana kulwisa obuzamba bwage. Omu mwaka gwa 36 N.K.Y., Mungu arhuma Petro emwa Kornelio orhaliri Muyahudi, eyola munda Mungu ashiga Kornelio amavurha kugerera eroho lichesibwa. Echola charhabala Petro abone oku “Mungu arhajira kabolo” n’abarhali Bayahudi bakayinjire omu chibaga ch’Echikristu. (Mdo. 10:34, 44, 45) Enyuma waho Petro ahwanza kulya n’abantu b’amandi mashanja, chaliri chintu arhaliza kujira kurhenga mira. Aliko, Bakristu baguma Babayahudi baliri bachiyunva oku, Abayahudi barhalikwanene kulya n’abantu b’amandi mashanja. Amango Bayahudi baguma bagwerhe amawazo mali nk’amola bahika e Antiokia, Petro aleka kulya na bene-babo barhaliri Bayahudi nkabaga eju y’okuyubaha kugoseza Abayahudi bahindamukaga Bakristu. Amango entumwa Paulo abona obulya-lya bwa Petro, amuhanula embere z’abantu boshi. (Gal. 2:13, 14) Chiro akaba obuzamba bwage, Petro aligenderere kubera mwimana. w23.09 buk. 22 chi. 8

Ochigerereze woyo wenyine ngahe okwanene kujira amaja-mbere, aliko orhavunikaga omurhima. “Waliha [Yesu] ali mwinja,” anakurhabala y’ogala kuhindamula chintu chilebe. (1 Pe. 2:3) Entumwa Petro arhurhabere rhuchizere ntya: “Mungu . . . yenyine abakoomeza kuhika oku buzinda. Abakomeza mumenye mwashaganywa, abaheba emisi, abarhabala yimurhadundwa.” Mango maguma Petro alichiyunvirhe nk’arhakwanene kuba eburhambi bwa Mugala wa Mungu. (Lu. 5:8) Aliko kugerera obuzigire n’oburhabale bwa Yehova na Yesu, Petro agenderera kukulikira Yesu oku bwimana. Bobola, Yehova amuyemerera “aje omu Bwami bw’esiku n’amango bwa Waliha na Muchunguzi Yesu Kristu.” (2 Pe. 1:11) Olola lwaliri luhembo lusimisize bwenene! Akaba ogenderere kubera mwimana kuguma na Petro, n’akaba olekere Yehova agenderere kukukoomeza, nawe nji wagwarha oluhembo lw’akalamo k’esiku n’amango. ‘Nji wahikira omuhigo g’obwemere bwawe, k’okuderha, obuchunguke bwawe.’​—1 Pe. 1:9. w23.09 buk. 31 chi. 16-17

Etabernakulo yaligwerhe chibuga chiguma, k’okuderha, haliri hantu hagalihire hazungulukirwe n’olugurhu, ah’abadahwa balikwanene kukolera engabane zabo. Amazabahu mazibu-zibu me cuivre m’okuhaanira kw’enterekero z’okusirezwa, maliri ahagarhi omu chibuga. Haliri n’ebeseni ye cuivre, abadahwa baliri bakalabiramo embere bakole engabane zabo zichesibwa. (Kut. 30:17-20; 40:6-8) Zene embere bahwanze kukola nka badahwa omu mbingu haguma na Yesu, abashigwa bayorhere oku gulu bali bakola oku bwimana omu chibuga cha ndani ch’ehekalu ly’ekiroho. Okubonekana kw’ebeseni nzibu-zibu y’amenji, chili chintu ch’akamaro ch’okubayibusa abashigwa, n’abandi Abakristu boshi oku bakwanene kuyorha bachere ekiroho n’omu lugenzi. Bobola si, ngahe “echigusho chinene” chili chashigikira bene-babo Kristu b’abashigwa oku bwimana chili chaharamiza Yehova? Entumwa Yohana alibabwene “bayumangire embere w’echirhi ch’Obwami,” hashushanyize echibuga ch’embuga hanola oku gulu, aha “bali bakolera [Mungu] akasi kachesibwa ezuba n’obudufu omu hekalu lyage.” (Ufu. 7:9, 13-15) Kweri, rhugwerhe shukrani nene emwa Yehova bulala arhuhere orozo lw’akachiro bwenene l’okumuharamya omu hekalu lyage lizibu-zibu ly’ekiroho! w23.10 buk. 28 chi. 15-16

Njira nguma Yehova anakolesa omu kurhuha emisi, kuli kugerera abashamuka b’echibaga. (Isa. 32:1, 2) Bobola amango ogwerhe omulago, obwire omushamuka w’echibaga okuntu oli wachiyunva. Amango bamakurhabala, omenye wafunda kuyemera obola burhabale. Kugerera abola bashamuka, Yehova akakubeba emisi. Ebilagane bye Biblia byakarhuha obulangalire n’emisi y’okugenderera kukolera Yehova. (Ro. 4:3, 18, 19) Bulala rhugwerhe obola bulangalire, rhugwerhe emisi y’okulembera ebigeregezo, okuhubiri emyazi minja, n’okukolera bene-berhu na bali-berhu omu chibaga. (1 Te. 1:3) Obulangalire buli nk’obola bwalikomeze Paulo. Paulo alikenere emisi. Aliri ‘asindagizwa,’ ‘aliri achiyunva ahwererwe,’ ‘alibuzwa,’ ‘n’okubandwa ahashi.’ Chiro n’akalamo kage kaliri kaba omu buhanya. (2 Ko. 4:8-10) Paulo alipatire emisi y’okulembera omu kuseza obwenge oku bulangalire bwage. (2 Ko. 4:16-18) Paulo aliri akengera bwenene kw’echola chilagane chage, n’echola charhuma ayinja achiyunva ‘ali muhyahya lusiku oku lwindi.’ w23.10 buk. 15-16 chi. 14-17

Amango oli wasalira ochibaze, ‘ka kali kasanzi ka Yehova ko kushubiza oku binamuhemere?’ Nkabaga rhwakawaza oku Yehova akashubiza oku masala merhu ahohan’aho. Kweri, chiro akaba ntyo, Yehova yewe amenyere akasanzi kenja bwenene k’okurhurhabala. (Ebr. 4:16) Amango rhurhapatire ebi rhwahemaga aho han’aho, nkabaga rhwakawaza oku Yehova ‘alahire kurhushubiza.’ Aliko byakaba eyi akasanzi k’okurhushubiza ‘karhaza kuhika.’ Omufano, rhurhange rhuwaze ku mwe-werhu ochili musole wasaliraga afume obulwala bwage. Aliko magala mage marhabaga bwinja. Nka Yehova amufumyaga omu bulyo bw’echisomerene, Shetani akaderhere oku oyola mwene-werhu ali agenderera kukolera Yehova bulala amufumize obulwala bwage. (Yob. 1:9-11; 2:4) Omu kuyongera, Yehova ahebere h’akasanzi nj’afumya buli mbero y’obulwala. (Isa. 33:24; Ufu. 21:3, 4) Oku akola kasanzi kanahika, rhurhalindira oku Yehova arhufumya omu njira y’echisomerene. Bobola, oyola mwene-werhu akahema Yehova emisi y’agwarha omurhula g’omu bwenge, y’agala kulembera obulwala bwage n’okugenderera kukolera Mungu oku bwimana. w23.11 buk. 24 chi. 13

Chiro akaba oku Samsoni alikolere egosa likomere, aligenderere kukolera Yehova. Alilonzeze obulyo b’okulwisa Abafilistini, n’echola chi Yehova alilonzeze. (Amu. 16:28-30) Samsoni alakirira Yehova ntya: “Oleke nchiholere oku Bafilistini.” Mungu w’okuli ashubiza esala lya Samsoni, n’okushuba kumuha emisi esomeze. Agola mango, Samsoni aliyirhire Abafilistini banene bwenene kulusha ababaga ayirhire amango moshi-moshi. Chiro akaba oku Samsoni alipatire engaruka zibabeze z’amagosa mage, arhalekaga kuchihangana kujira obulonza bwa Yehova. Chiro akaba rhwajirire amagosa n’okuheza engabane rhwaligwerhe, rhurhakwanene kuleka kugenderera kukolera Yehova. Rhuyibuke oku Yehova alitayari kurhubabalira. (Zb. 103:8, 9) Chiro akaba rhuli banyamagosa, Yehova akarhuhereza emisi y’okujira obulonza bwage, kuguma n’oku ajiriraga Samsoni. w23.09 buk. 6 chi. 15-16

Okulembera kwawe kwakarhuma Yehova akuyemeera. Echola chirhayerekene oku Yehova aba asiimire amango rhuli rhwahurana ebigeregezo changwa ebibazo. S’aliko asiimire bulala oli walembera ebigeregezo oku bwimana. Bihebere omurhima bwenene okumenya oku amango rhwamalembera rhwanasiimisa Yehova! (Zb. 5:12) Oyibuke oku Abrahamu alihurene ebigeregezo, n’amango abilembera oku bwimana Yehova asiimiswa naye. Yehova ali muyirikire mwira wage anamubona oku ali munya-kunali. (Mwa. 15:6; Ro. 4:13, 22) Nawe byakashobokana obonekane kuguma naye. Mungu anasiimiswa nawe arhali bulala oli wakola binene omu kasi kage changwa engabane oli wayeneza. Yehova anasiimiswa nerhu amango rhugenderere kuba bemana chiro akaba rhuli rhwahurana ebigeregezo. Chiro akaba emyaka yerhu, ehali yerhu, changwa obuhashe rhugwerhe, rhweshi rhwakalembera. Ka hali echigeregezo oli walembera zene, onagenderere kubera mwimana emwa Yehova? Akaba ntyo kubili, oyibuke oku oli wasiimisa Mungu. Amango rhwamarhegeera oku Mungu arhuyemerere, echola ch’akakomeza obulangalire bwerhu. w23.12 buk. 11 chi. 13-14

Omulume okulire ekiroho akwanene kuyiga kuganira bwinja. K’okuderha oku bimuhemere kuyunviriza n’okumenya amawazo m’abandi n’okuntu bali bachiyunva. (Mez. 20:5) Akayiga kurhegera eby’abandi bantu balonzeze kuderha kugerera omulenge gwago, okuntu bali bashaganya amalanga, changwa omubiri goshi. Orhakagala kuyiga ebyola buzira kugeza ebisanzi haguma n’abandi. Akaba onakolesa ebikoleso by’echieletronike buli mango omu kuganira, nk’okurhuma amaruba kugerera Enternete, okuyandika amamesaje, echola chakarhuma waheza obuhashe bwawe b’okuganira n’abantu masu oku masu. Bobola, ochihangane kulonza orozo l’okuyinja waganira n’abandi masu oku masu. (2 Yo. 12) Omulume w’Omukristu okulire ekiroho, akwanene kugwarha obuhashe b’okuchilonzeza yenyine ebyakenere n’omulala gwage. (1 Ti. 5:8) Kuli kwinja okuyiga obwindi bufundi bwakakurhabala kupata akasi. (Mdo. 18:2, 3; 20:34; Efe. 4:28) Okole bwenene onachizere oku wamalire ebi wahwanzaga, abandi bachibonera echola n’okusimiswa bwenene n’okuntu onakola. Okajira ntyo wagwarha orozo lunene l’okupata akasi n’okukakola bwinja. w23.12 buk. 27 chi. 12-13

Amango Ebiblia eli yaderhera oku “lusiku lwa Yehova,” enaba eyi eli yalonza kuderhera amango Yehova ayinja kulimbula abanzi bage, n’okuyokola abantu bage. Omu mango magerere, Yehova alihanire mashanja maguma. (Isa. 13:1, 6; Eze. 13:5; Sef. 1:8) Mu zinola siku zerhu, “olusiku lwa Yehova” nji lwahwanza amango abakulu b’epolitike nji balimbula Babiloni Mukulu, k’okuderha amadini moshi m’obubeshi, nabuzinda nji lwahwa n’evita lya Armagedoni. Yinjirhufuma olola “lusiku,” bihemere oku chirheganya kurhenga zene. Yesu aliderhere oku rhurhakwanene kuba tayari konyine oku “malibuko makulu,” aliko kandi rhukwanene “kugenderera kuchirheganya” kw’amola malibuko. (Mt. 24:21; Lu. 12:40) Omu maruba mage marhanzi mafuhererwe, entumwa Paulo ayandikiraga abantu be Tesalonike, aliderhere mu mifano minene y’okurhabala Abakristu bagenderere kuchirheganya oku lusiku lukulu lwa Yehova l’okucha olubanja. Paulo alimenyere oku olola lusiku lwa Yehova lurhakayinjire mw’akola kasanzi. (2 Te. 2:1-3) Aliko, alihebere bene-babo omurhima bachirheganye k’olola lusiku nka lwakayinja omusezi, nerhu rhwakakolesa elyola hano lyage. w23.06 buk. 8 chi. 1-2

Omu mwaka gwa 1978, enju ye etaje elehere bwenene, yaliyumbakirwe omu vile ye Tokyo, omu Japon. Abantu banachibaza nka gurhe enagala kulembera emisisi enazigana kugera mw’eyola vile. Bichi baenjenyere balijirire y’eyola nju elehere bwenene egala kulembera emisisi? Ba enjenyere bayiyumbakire omu bulyo bukomere aliko eyi enalembere bwenene y’egala kukomerera eyola misisi amango obudaka buli bwadirhimana. Abakristu bali nk’eyola nju elehere bwenene. Nka gurhe? Omukristu akwanene kugwarha olugero oku bilolere okuyorha asimikire n’okulemba changwa okuyanguha. Bimuhemere ayorhe aserere n’okushinga omugara n’okuhigirira buli mango kukenga esheriya n’amakanuni ma Yehova. Aba “tayari kukenga” arhanayemera ashumikwa avune amakanuni ma Yehova. Oku lwindi lunda, bimuhemere agwarhe “olugero” changwa ayanguhe amango bigalikene changwa amango bimuhemere okujirantyo. (Yak. 3:17) Omukristu ogwerhe engeso y’olugero eli nk’eyola, anachilanga y’arhabamuntu orhaharhulwa onashinga omugagala, changwa kuba muntu w’okulekerera ebintu ntyo hoshaho. w23.07 buk. 14 chi. 1-2

Amango Yesu akula n’okuba muntu mukulu, byali bimuhemere ahime amashumi ma Shetani Ibilisi waliri walonza ajire echaha n’oku mubwira wazi oku arhayorhaga mwimana emwa Mungu. (Mt. 4:1-11) Shetani alihigirire oku Yesu ajire echaha nabuzinda arhagalaga kulipa enchungu. Omu mango m’akasi kage oku gulu, Yesu ali lembere ebindi bigeregezo. Abanzi bage baliri bamulibuza n’okulonza kumuyirha. (Lu. 4:28, 29; 13:31) Byalimuhemere alembere okurhashinganana kw’abanafunzi bage. (Mk. 9:33, 34) Amango achibirwa olubanja omu kalamo kage hanola oku gulu, alilibwizwe oku murhi gw’amalibuko anabonererwa. Naho akolerwa nka munizi n’okulembera malumwa manene. (Ebr. 12:1-3) Byalimuhemere alembere amola malibuko mazinda buzira burhabale bwa Yehova. (Mt. 27:46) Bibonekene bwinja oku Yesu alilibukire bwenene yahaana enchungu. Amango rhwamawaza oku bintu bingana Yesu ali chiyimire yahaana akalamo kage eju yerhu, kw’akarhuma rhwashuba kumuzigira bwenene. w24.01 buk. 10-11 chi. 7-9

Engeso y’okulindira enarhurhabala rhulame bwinja haguma n’abandi. Enarhurhabala rhuyunvirize bwinja-bwinja amango abandi bali baganira. (Yak. 1:19) Kandi engeso y’okulembera enarhurhabala rhugwarhe omurhula haguma n’abandi. Echola chinarhulanga kushubiza juba-juba changwa kuderha ebinwa bibi amango rhugwerhe oburhe. Kandi akaba rhuli bantu b’okulembera, rhurhagaya juba-juba amango muntu mulebe arhugayisize. Ahali h’okumugalulira, rhwaka “genderera kulemberana n’oku babalirana buli muguma n’owindi oku bulonza.” (Kol. 3:12, 13) Okulindira kwakarhurhabala rhurhole esimikiro zinja. Ahali h’okuyigirizwa n’engaruka zebijiro byerhu, rhwarhola ebisanzi by’okulonza emyazi oku bilolere esimikiro rhukola kurhola, naho rhwanaja rhwachishoga echirhwajira. Omufano, akaba rhuli rhwalonza akasi, hali oku rhwakayemera akasi k’oburhanzi rhwabwene. Aliko, akaba rhuli bantu b’okulindira, rhwawaza saa zinga byalema byarhuhema yi rhuhika oku kasi, rhwalema rhwakola saa zinga, na gurhe akola kasi kakahuma oku mulala gwerhu n’okubwira bwerhu haguma na Yehova. Nka rhuli bantu b’okulindira, echola chakarhuma rhurharhola esimikiro zibi. w23.08 buk. 22 chi. 8-9

Akaba onachiyunva ovunikire omurhima bulala okwanene okulwisa enyifinjo zibi, ogenderera kuwaza eju y’echilagane wahaga Yehova amango ochihana emwage, kwakuhereza emisi y’ogenderera kulwisa amashumi. Omu bukweri amango wamahurana ebigeregezo, echilagane chawe wahere Yehova chakurhabala. Nka gurhe? Amango wamachihana emwa Yehova, onaba eyi wamachilahira woyo wenyine. Echola chilonzeze kuderha oku rhukwanene kukabulira enyifinjo changwa emihigo yerhu yakarhuma rhwagoseza Yehova. (Mt. 16:24) Bobola, amango wamageregezwa, changwa amango oli wahurana n’ehali zikomere orhakwanene kushiba wachibaza bichi okwanene kujira. Waba eyi mira wachishogere bichi okwanene kujira, k’okuderha kuyorha mwimana emwa Yehova. Wayorha eyohigirire kusimisa Yehova. Mw’eyola njira waba kuguma na Yobu. Chiro akaba oku alihurene n’ebigeregezo bikomere, alihigirire ntya: “Ntaleka obwishwekerezi bwani!”​—Yob. 27:5. w24.03 buk. 9 chi. 6-7

Yehova, “Mungu w’obuzigire,” ali haguma nerhu! (2 Ko. 13:11) Analaga ku buli muguma bwage-bwage. Rhuchizerere oku “rhuzungulukirwe n’obuzigire bwage bwimana.” (Zb. 32:10) Amango moshi rhwagenderera kukengera gurhe arhuyerekere obuzigire bwage, ku rhwanagenderera kubona oku ali w’okuli n’okuchiyunva rhuli hofi naye. Rhwaka chiyunva huru kumuyegera n’okumubwira kangana gurhe rhukenere obuzigire bwage. Rhwakamubwira byoshi birhulazize, eyi rhunachizerere oku abiyunva n’okwali tayari kurhurhabala. (Zb. 145:19) Kuguma n’okurhunasimiswa n’amenji madagarhire omu mango m’emboho, ku rhunasimiswa n’obuzigire bwa Yehova. Kandi obuzigire bw’akasisi bwa Yehova bugwerhe misi minene. Bobola, ogwarhe obusime bulala Yehova akuzigire. Naho, oyerekane oku ozigire Yehova omu kuderha ntya: “Nzigire Yehova”!​—Zb. 116:1. w24.01 buk. 31 chi. 19-20

Yesu alikolere binene kulusha okubwira abantu okw’ezino lya Mungu ye Yehova. Abayahudi Yesu aliri ayigiriza babaga bamenyere ezino lya Mungu. Aliko, Yesu alikolere n’obushiru “omu . . . kubafasiriya oku bimulolere.” (Yoh. 1:17, 18) Omufano, Amandiko m’Echiebraniya mayerekene oku Yehova ali Mungu w’akababaro n’obubabale bunene. (Kut. 34:5-7) Yesu alirhabere y’obola bukweri buyunvikana bwinja bwenene kulusha echindi chihe, amango aliri aganira oku mufano g’omwana w’echirara n’eshe. Amango rhwamasoma okuntu eshe alijirire amango abona omugala amahungama chiro “akaba okw’alichiri hale naye,” alibirha yibabuganana, amuhobera, anamubabalira n’omurhima goshi, rhwanabona bwinja bwinja gurhe akababaro n’obubabale bwa Yehova biba. (Lu. 15:11-32) Yesu alirhabere abandi babone Yehova aba muntu wanyabachi kweri kweri. w24.02 buk. 10 chi. 8-9

Yehova anarhuliriza n’okumala enyorha ya balala bali omu milago. Gurhe rhwakayiganya Yehova omu kugwarha akababaro oku bandi n’okubarhuliriza? Njira nguma rhwakajiramo ntyo, kuli kukuza engeso zakarhurhabala rhuyunve akababaro n’okurhuliriza abandi. Ngeso zihe ziguma mw’ezola zakarhurhabala? Bichi byakarhurhabala rhugenderere kuzigirana, “rhunagenderere kurhulirizana buli muguma n’owindi” buli lusiku? (1 Te. 4:18) Birhuhemere rhukuze engeso zili nk’ezila, okuchiyunva kuguma n’oku abandi bali bachiyunva, omu kuzigirana nk’abantu ba mulala muguma n’oku yerekana bwinja. (Kol. 3:12; 1 Pe. 3:8) Nka gurhe ezola ngeso zakarhurhabala? Amango rhwamayerekana oku rhugwerhe akababaro ku bene-berhu n’okubayereka oku rhubalagireko bwenene, rhwagwarha enyorha nene y’okubarhuliriza amango bali balibuka. Kuguma n’oku Yesu aderhaga, “obunu bunaderha ebiyunjwire oku murhima. Omuntu mwinja anahana oku bintu binja bili omu bubiko bwage.” (Mt. 12:34, 35) Okurhuliriza bene-berhu na bali-berhu bali omu bulagirire, kweri eli njira y’akamaro y’okuyerekana obuzigire bwerhu. w23.11 buk. 10 chi. 10-11

Rhwakahema oburhabale akaba rhulonzeze kumenya bwinja obulebi bw’Ebiblia. Rhuganire k’ogula mufano. Obe nka wawaza oli walambagira ahantu orhamenyere bwinja, aliko mwira wawe oli naye yewe amenyere eyola fasi bwinja-bwinja. Amenyere bwinja ngahe muli mwayerekeza, anamenyere buli barabara lyoshi ngahe liganire. Nta ngangane wayunva osiimire amango oyola mwira wawe amayemera mugende naye! Konakuguma, Yehova ali kuguma n’oyola mwira wawe oli akurhabala, amenyere bwinja amango merhu mayinjire. Yirhuyunva bwinja obulebi bw’Ebiblia, rhukwanene kuhema Yehova oburhabale oku bwirhohye. (Da. 2:28; 2 Pe. 1:19, 20) Kuguma n’omuzere mwinja, Yehova alonzeze abana bage bagwarhe amango mayinjire makwirire. (Yer. 29:11) Aliko bulala Yehova arhali kuguma n’abazere b’abantu, yewe anaderha ebyarhengerera omu mango mayinjire nk’oku binali, na buli mango anaderha okuli. Yehova ayandikisize amola malebi omu Chinwa chage yirhumenya oku bilolere ebintu by’akamaro embere bihike. w23.08 buk. 8 chi. 3-4