Mwezi gwa 7
Lwakabiri, Lusiku 1 Mwezi gwa 7
Aliri agera omu chihugo choshi ey’ali ajira amenja n’okufumya.—Mdo. 10:38.
Byoshi Yesu aliri aderha n’okujira, kuhebamo n’ebisomerene aliri ajira, aliri ayiganya oku bushinganyanya amawazo m’Eshe n’okuntu aliri achiyunva. (Yoh. 14:9) Bichi ebisomerene bya Yesu byakarhuyigiriza? Yesu n’Eshe barhuzigiire bwenene. Amango Yesu aliri oku gulu aliyerekere abantu obuzigire bunene omu kujira ebisomerene y’arhabala abantu baliri balibuka. Mango maguma, balume babiri b’empumi baliri bamulakirira mpu abarhabale. (Mt. 20:30-34) Obwene oku Yesu “alibayunvire obonjo” naho abafumya. Nk’oku chikolesezwe hano, echinwa ch’Echigiriki chitafusiribwe “abayunvira obonjo,” chiderhere akababaro kanene omuntu anayunva omu murhima. Akababaro kanene kali nk’akola, kanayerekana oku omuntu agwerhe obuzigire, kalishubire shunika Yesu alise abali nzara n’okufumya ababenzi-benzi. (Mt. 15:32; Mk. 1:41) Rhwakachizera oku Yehova Mungu “w’akababaro kanene,” n’Omugala barhuzigiire bwenene kandi banachiyunva kubi amango rhuli rhwalibuka. (Lu. 1:78; 1 Pe. 5:7) Bakwanene kugwarha nyorha nene bwenene y’okumala ebibazo byoshi bili by’arhindibuza abantu! w23.04 buk. 3 chi. 4-5
Lwakasharhu, Siku 2 Mwezi gwa 7
Mwabo munazigira Yehova, mushombe amabi. Analanga akalamo k’abemana bage; anabayokola omu fune y’olala mubi.—Zb. 97:10.
Rhukwanene kujira okwerhu koshi omu kurhasoma changwa kuyunviriza amawazo mabi mashandere mu linola gulu lya Shetani. Rhwakayunjuza obwenge bwerhu amawazo makwirire omu kusoma n’okuyiga Ebiblia. Okugera oku mbuganano n’okukola akasi k’okuhubiri nabyo by’akarhurhabala kulanga obwenge bwerhu. Yehova alaganyize oku arhakarhuleka rhugeregezwe kulusha okuntu rhurhakagala kulembera. (1 Ko. 10:12, 13) Buli muguma werhu akwanene kusalira zene bwenene kulusha mira y’agenderera kuyorha mwimana emwa Yehova mu zinola siku zizinda zikomeere. Yehova alonzeze rhumufungulire omurhima gwerhu goshi omu sala. (Zb. 62:8) Okuuze Yehova n’oku mubwira koko ku byoshi anajira. Omuheme oburhabale y’ogwarha obushiru omu kasi k’amahubiri. Omuheme akurhabale y’olembera echibazo choshi-choshi oli wahurana, onahime amashumi moshi wakaba oli walwisa. Omenye waziga echintu choshi choshi changwa omuntu yeshi-yeshi akubuza kusalira Yehova oku kahunda. w23.05 buk. 7 chi. 17-18
Lwakane, Siku 3 Mwezi gwa 7
Rhulaganeko buli muguma n’owindi . . . , rhuhirane omurhima.—Ebr. 10:24, 25.
Bulagurhe rhunaja oku mbuganano z’echibaga? Ech’oburhanzi kuli kukuuza Yehova. (Zb. 26:12; 111:1) Kandi rhunajako yi rhuhebana omurhima buli muguma n’owindi mu binola bisanzi bikomeere. (1 Te. 5:11) Amango rhuli rhwahaana ebishubizo oku mbuganano, rhunaba eyi rhuli rhwajira ebyola bintu byombi. Aliko hali ebintu byakarhuma byarhukomerera kuhaana ebishubizo: Rhwakachiyunva rhuyubahire amango rhuli rhwalonza kushubiza, changwa rhwakasiima kweri kushubiza kanene, aliko mango maguma bene-berhu barharhubwira rhushubize amango rhwamaheba okuboko enyanya. Bichi byakarhurhabala kulwisa ebyola bibazo? Entumwa Paulo aderha oku rhukwanene kuseza obwenge bwerhu omu “kuhebana omurhima buli muguma n’owindi.” Amango rhwamarhegera oku rhwakahebana omurhima chiro na kugerera ebinwa bigeke biyerekene obwemere bwerhu, rhurhayubaha bwenene amango rhwamaheba okuboko enyanya yi rhushubiza. Na nka bene-berhu barhali barhubwira oku rhushubize buli mango, rhwakagwarha obusiime bulala abandi bapatire orozo l’okuhaana ebishubizo.—1 Pe. 3:8. w23.04 buk. 20 chi. 1-3
Lwakarhano, Siku 4 Mwezi gwa 7
Ashone aje e Yerusalemu, . . . n’okuyumbaka enju ya Yehova.—Ezra 1:3.
Mwami abaga aderhere etangazo lilebe! Abayahudi baliri buhungiro omu Babiloni hali hamagera myaka 70 ntya, balikala bakagaluka omu chihugo chabo ch’akaburhano, k’okuderha, omu Izraeli. (Ezr. 1:2-4) Yehova yenyine yewakajirire echola. Bulagurhe rhwakaderha ntyo? Bulala Abababiloni barhaliri bazigana kulikula abantu balihekere buhungiro. (Isa. 14:4, 17) Aliko omurhegesi wa mira we Babiloni abaga akulirwe oku chirhi ch’obwami, n’omurhegesi muhya-hya abwira Abayahudi oku bakala kurhenga mw’echola chihugo. Buli Muyahudi, ahanene amarhwe m’emilala, balikwanene barhole esimikiro: Ka barhenga omu Babiloni changwa baberamo? Okurhola eyola simikiro, kurhaliyorohere. Bulagurhe? Nkabaga banene babaga bakala bashajire bwenene barhakachigalire kurhola olola lugenzi. Na bulala banene omu Bayahudi baburhirhwaga omu Babiloni, eyola munda yonyine yibalimenyere oku y’emwababo. Bowe balimenyere oku, e Izraeli chaliri chihugo ch’abashokuliza babo. Nkabaga Bayahudi baguma babaga babere bantu balengerere omu Babiloni, bobola byakabakomerere kuleka enju zabo zikwirire bwenene, obuchuruzi bwabo, n’okuja kulama omu chihugo barhenji. w23.05 buk. 14 chi. 1-2
Lweboso, Siku 5 Mwezi gwa 7
Nenyu muyorhe muli tayari.—Mt. 24:44.
Echinwa cha Mungu chirhuhebere omurhima rhugenderere kuyerekana okulembera, olukogo, n’obuzigire. Olwandiko lwa Luka 21:19 luderhere ntya: “Kugerera okulembera kwenyu, mwayokola akalamo kenyu.” Wakolosai 3:12 haderhere ntya: “Muyambale . . . olukogo.” N’omu 1 Watesalonike 4:9, 10 haderhere ntya: “Mungu abayigirize kuzigirana buli muguma n’owindi. . . . S’aliko rhubahebere omurhima bene-berhu mushube kujira ntyo bwinja kulusha.” Ebila binwa byoshi byayandikirwaga abanafunzi babaga bayerekene okulembera, olukogo, n’obuzigire. Aliko, byalibahemere bagenderere kuyerekana ezola ngeso. Nerhu rhukwanene kujira ntyo. Y’obigala, owaze gurhe Abakristu ba burhanzi baliyerekene ezola ngeso. Naho wabona gurhe wakayiganya omufano gw’abola banafunzi n’okujira ntyo kwakurhabala oyerekane k’ochirheganyize oku malibuko makulu. Naho, hanola amalibuko makulu nji mahwanza, nji waba wamenyere gurhe wakalembera n’okuhigirira kugenderera kulembera. w23.07 buk. 3 chi. 4, 8
Lwamungu, Siku 6 Mwezi gwa 7
Nji haba ebarabara lizubu-zibu, . . . Enjira y’Obuchesibwa.—Isa. 35:8.
Rhube bashigwa changwa “ezindi ntama,” rhweshi birhuhemere rhugenderere kulambagira omu “Njira y’Obuchesibwa.” Erhurhabere kugenderera kukolera Yehova zene n’amango mayinjire, amango Obwami bwa Mungu nji bwalerha ehali zinja bwenene oku gulu. (Yoh. 10:16) Kurhenga omu mwaka gwa 1919, amamilioni m’abalume, abakazi, n’abana, barhengere omu Babiloni Mukulu, k’okuderha, amadini moshi m’obubeshi, n’okuhwanza kubalama omu barabara ly’omufano. Amango Bayahudi barhengaga e Babiloni, Yehova alijirire okwage koshi omu kuntu abakulire ebintu byoshi byakababuzize kubalama bwinja. (Isa. 57:14) Gurhe si oku bilolere “Enjira y’Obuchesibwa” zene? Omu magana m’emyaka embere y’omwaka gwa 1919, Yehova aliri akolesa abalume balimukengere bwenene barhabale abandi bagale kurhenga mu Babiloni Mukulu. (Huzanya na Isaya 40:3.) Balijirire kasi kanene omu kurheganya ebarabara, k’okuderha, ebarabara ly’ekiroho yinji bahirikira kurhabala abantu b’emirhima minja bagale kurhenga omu madini m’obubeshi, n’okuharamya Yehova haguma n’abantu bage. w23.05 buk. 15-16 chi. 8-9
Lwakwanza, Siku 7 Mwezi gwa 7
Mukolere Yehova n’omwishingo. Muyinje embere zage n’omwishingo gunene n’empundu.—Zb. 100:2.
Yehova alonzeze rhumukolere oku bulonza n’obusiime. (2 Ko. 9:7) Bobola rhukwanene si kugenderera kukola oku muhigo gwerhu gw’ekiroho chiro akaba oku rhurhagusimire? Waza oku mufano gw’entumwa Paulo. Aderha ntya: “Inampana omubiri gwani n’okuguyerekeza nka muja.” (1 Ko. 9:25-27, amahugulo m’eshishi.) Chiro n’amango Paulo arhaligwerhe enyorha y’okukola ebi Yehova amubwirire ajirage, aliri achihangana kujira okwage koshi y’abijira. Ka Yehova aliri asiima ebi Paulo aliri amukolera? Nechi! Na Yehova alimugishire eju y’obushiru bwage. (2 Ti. 4:7, 8) Konakuguma, Yehova anasiima amango ali arhubona rhuli rhwakola bwenene yirhuhikira omuhigo gwerhu chiro akaba nta nyorha rhugwerhe y’okujira ntyo. Bulala amenyere oku chiro akaba nkabaga rhurhasimire ebi rhuli rhwajira, rhwabijira bulala rhumuzigire. Nka kulala Yehova agishaga Paulo, nerhu arhugisha eju y’obushiru bwerhu. (Zb. 126:5) Okurhunali rhwachibonera emigisho ya Yehova, rhwakachiyunva rhugwerhe enyorha y’okuhikira emihigo yerhu. w23.05 buk. 29 chi. 9-10.
Lwakabiri, Siku 8 Mwezi gwa 7
Olusiku lwa Yehova lwayinjire.—1 Te. 5:2.
Entumwa Paulo ahuzenye abantu barhakafuma olusiku lwa Yehova na balala bali omu ro. Barhali barhegeera ebiri byagera eburhambi bwabo changwa ebisanzi bili byagera. Bobola, barhankamenya amango echintu ch’akamaro chamarhengerera na ntacho bakachikolako. Bantu banene zene bali ero ekiroho. (Ro. 11:8) Chiro barhanali bayemera ebintu biyerekene oku rhulamire omu “siku zizinda” n’oku amalibuko makulu mayinja hano hofi-hofi. (2 Pe. 3:3, 4) Aliko buli lusiku bili byabonekana bwinja-bwinja emwerhu oku bili by’akamaro bwenene rhuyorhe rhuzene. (1 Te. 5:6) Bobola rhukwanene kurhulera n’okuba tayari. Bulagurhe? Yirhurhachiheba omu politike ya linola gulu, n’omu kavulindi k’abantu. Akahidiko k’okuchiheba mw’ebyola bintu kagenderera kuchiyongera ok’olusiku lwa Yehova lunali lwayegera. Aliko, rhurhakwanene kulaga bwenene n’ensimikiro nji rhwarhola. Eroho lichesibwa lya Mungu lyakarhurhabala rhurhulere nabuzira kudundwa omu bwenge n’okurhola ensimikiro z’obwengehe.—Lu. 12:11, 12. w23.06 buk. 10 chi. 6-7
Lwakasharhu, Siku 9 Mwezi gwa 7
Namahanga Waliha Yehova, onyibuke, wekalama we, ompe n’emisi.”—Amu. 16:28.
Bichi binayinja omu bwenge bwawe amango wamayunva ezino Samsoni? Onaba eyi oli wawaza oku muntu ogwerhe misi minene bwenene. Obola buli bukweri. Aliko kandi, Samsoni alirholere esimikiro ebihire yalimulerhere engaruka zibi. Aliko, Yehova alichisezeze oku byoshi Samsoni aliri akola omu kalamo kage. Yehova aheba omufano g’obwimana gwa Samsoni omu Biblia yigurhulerhera enyungu. Yehova alikoleseze Samsoni omu kuyeneza ebintu bisomeze y’arhabala olubaga lwage alichishogere, k’okuderha Abaizraeli. Myaka minene enyuma y’olufu lwa Samsoni, Yehova aliyerekeze entumwa Paulo ayandike ezino lya Samsoni oku peru ly’abalume bagwerhe obwemere bukomeere. (Ebr. 11:32-34) Omufano gwa Samsoni, gwakarhuheba omurhima. Alilangalire Yehova, chiro n’amango aliri ahurana ebibazo bikomere. Rhwakayiga esomo linja kugerera omufano gwa Samsoni, gwakanarhuheba omurhima. w23.09 buk. 2 chi. 1-2
Lwakane, Siku 10 Mwezi gwa 7
Mumenyese Mungu ebimuhunire. —Flp. 4:6.
Rhwakakomeza okulembera kwerhu omu kusalira Yehova kanene n’okumubwira byoshi birhulazize. (1 Te. 5:17) Nkabaga orhali wahurana ebibazo bikomere mu zinola siku. Aliko si, onasalira Yehova amango ogwerhe emilago, ebintu byakuchubukire, changwa amango wabulire gurhe wakajira? Akaba onasalira Mungu oku kahunda wamubwira ebibazo bigeke-geke ogwerhe zene, nji orhagwarha engangane z’okumusalira omu mango wagwarha ebibazo bikomere bwenene omu mango mayinjire. Naho wachizera kweri oku amenyere bwinja-bwinja mangochi akwanene kukurhabala na bichi akwanene kujira. (Zb. 27:1, 3) Rhukayorha rhuli bemana ku Yehova amango rhuli rhwahurana ebigeregezo zene, nji rhwagala kulembera ebigeregezo bikomere amango m’amalibuko makulu. (Ro. 5:3) Bulagurhe rhwakaderha ntyo? Bene-berhu na bali-berhu banene baderhere oku amango moshi bamagala kulembera ehali zikomere, echola chinabarhabala kulembera ebindi bibazo byakulikiraho. Amango bamalembera ebibazo kugerera oburhabale bwa Yehova, banagwarha obwemere bukomere oku Yehova alonzeze kubarhabala. Nabulala bagwerhe obwemere mu Yehova bakagala kulembera ebibazo byakulikiraho.—Yak. 1:2-4. w23.07 buk. 3 chi. 7-8
Lwakarhano, Siku 11 Mwezi gwa 7
Nakuyereka oku nkulagireko.—Mwa. 19:21.
Engeso ya Yehova y’obwirhohye n’olukogo, zinarhuma ayerekana olugero. Omufano, Yehova aliyerekene oku ali mwirhohye amango aliri hofi kulimbula abantu babi be Sodoma. Kugerera bamalayika bage, Yehova abwira omunya-kunali Loti, alibirhire omu eneo y’emisozi. Loti aliyubahire kulibirhira eyola munda. Naho, alakirira Yehova oku aleke yewe n’omulala gwage, balibirhire omu Soari, vile ngeke Yehova alihigirire kulimbula nayo. Yehova akasezeze Loti oku akwanene kukulikira obwerekezi bwage buzira buhaka. Aliko Yehova ayemerera Loti oku alibirhire omu Soari, arhanachilimbulaga eyola vile. (Mwa. 19:18-22) Myaka minene enyuma w’aho, Yehova ayunvira obonjo abantu balilamire omu vile ye Ninawi. Alirhumire omulebi Yona abwire abantu babi be Ninawi oku bowe n’evile yabo balimbulwa. Aliko amango abantu be Ninawi bahungama, Yehova abayunvira obonjo arhanachibalimbulaga n’evile yabo.—Yon. 3:1, 10; 4:10, 11. w23.07 buk. 21 chi. 5
Lweboso, Siku 12 Mwezi gwa 7
Bayirha [Yehoashi] . . . , aliko barhamuhambaga aha baliri bahamba abami.—2 Ny. 24:25.
Bichi rhwakayiga kugerera omufano gwa Yehoashi? Aliri nka murhi gugwerhe emizi erhagerere hale omu budaka, gwalikenere oburhabale b’ogwindi murhi b’okugusigika. Buzinda amango omuntu waliri amurhabala amala kufa, k’okuderha Yehoyada, Yehoashi ahwanza kuyunviriza abarhwali barhaliri bakenga Yehava, arhanachigendereraga kubera mwimana emwa Yehova. Ogula mufano gurhuyerekere oku rhurhakwanene kukenga Mungu konyine bulala abantu b’omu mulala gwerhu n’abandi Bakristu b’omu chibaga barhuyerekere olwiganyo l’okujira ntyo. Yirhugenderera kukomera ekiroho rhukwanene kukomeza obwira bwerhu haguma na Yehova omu kugenderera kumuyubaha omu njira ekwanene, omu kusoma Echinwa chage buli lusiku, okuchikengerako, n’omukusalira. (Yer 17:7, 8; Kol. 2:6, 7) Kweri Yehova arharhuhemere rhujire bintu binene bwenene. Ebyarhuhemere rhujire bili omu chitabu cha Muhubiri 12:13, haderhere ntya: “Oyubahe Mungu w’okuli onakenge amarhegeko mage, bulala echola ch’omuntu akwanene kujira.” Amango rhwamayubaha Mungu, rhwagala kulwisa ebibazo by’amango mayinjire. Ntacho charhukula omu bwira bwerhu haguma na Yehova. w23.06 buk. 19 chi. 17-19
Lwamungu, Siku 13 Mwezi gwa 7
Tala! Indi najira ebintu byoshi bibe bihyahya.—Ufu. 21:5.
Mungu arhuyemezeze oku rhwakamulangalira: “Olala oyikere oku chirhi ch’obwami aderha.” (Ufu. 21:5a) Ebila binwa bili by’akamaro bwenene bulala biyerekene mango maguma mu mango masharhu aha Yehova yewe yenyine ali aderha. Bobola, echila chemezo chihanirwe na Yehova, si arhali malayika ogwerhe emisi, changwa Yesu wafulwaga, s’aliko Yehova yewe yenyine! Chiyerekene oku rhwakachizera bwinja bwinja ebindi binwa aderhere bikulikire. Bulagurhe rhwakaderha ntyo? Bulala Yehova “arhakabesha.” (Tit. 1:2) Bobola, ebinwa rhunasoma omu Ufunuo 21:5, 6 nji byayenera kweri kweri. Waza oku chinwa: “Tala!” Echinwa che Chigiriki chitafsiribwe “tala!” chikolesezwe kanene omu chitabu cha Ufunuo. Chitabu chiguma ch’amareferanse chiderhere oku, chili chimenyeso ch’okusomerwa “chikolesezwe omu kurhabala owasoma aseze obwenge oku bikulikireho.” Bichi Mungu ajire akulikizaho? Aderhere ntya: “Indi najira ebintu byoshi bibe bihyahya.” Kweri, Yehova ahindamula ebila bintu omu mango mayinjire. Aliko bulala achizerere bwenene oku nj’ayeneza echilagane chage, aderhere nk’owamalire kuhindamula ebyola bintu byoshi.—Isa. 46:10. w23.11 buk. 3-4 chi. 7-8
Lwakwanza, Siku 14 Mwezi gwa 7
Aj’embuga n’okulaka n’amugayo gunene.—Mt. 26:75.
Entumwa Petro aligenderere kulwisa obuzamba bwage. Rhuganire kw’eyila mifano. Amango Yesu aliri aderha gurhe alibuka na gurhe afa y’ayeneza obulebi bwe Biblia, Petro amukalihira. (Mk. 8:31-33) Mango manene, Petro n’ezindi ntumwa baliri baja buhaka oku bilolere inde waliri mukulu bwenene. (Mk. 9:33, 34) Ebudufu embere Yesu afe, Petro acha mulume muguma ogurhwi. (Yoh. 18:10) M’obola budufu bonobo, Petro ayubaha n’okuhakana kasharhu oku arhenji mwira wage Yesu. (Mk. 14:66-72) Echola chali rhumire Petro alira bwenene. Yesu arhalekereraga eyola ntumwa yage yavunikaga omurhima. Amango Yesu afuuka, ayereka Petro oku achigenderere kumuzigira. Yesu abwira Petro akole oku bwirhohye akasi k’okulagira entama zage. (Yoh. 21:15-17) Petro aliri tayari kujira ebi Yesu amubwiraga. Kandi, aliri omu barhanzi eroho lya Mungu lyashigaga amavurha oku Pentekose omu Yerusalemu. w23.09 buk. 22 chi. 6-7
Lwakabiri, Siku 15 Mwezi gwa 7
Olange entama zani zidorho.—Yoh. 21:16.
Entumwa Petro alihebere ababo bashamuka omurhima “balange echishumba cha Mungu.” (1 Pe. 5:1-4) Akaba oli mushamuka, rhumenyere oku ozigiire bene-benyu na bali-benyu, onalonzeze kubashishikala. Aliko mango maguma wakachiyunva nk’ogwerhe binene by’okukola changwa wakachiyunva oluhire n’okubona oku orhagala kuyeneza eyola ngabane. Gurhe wakajira? Obwire Yehova okuntu oli wachiyunva na kangana gurhe olonzeze kurhabala bene-benyu na bali-benyu. Petro ayandika ntya: “Akaba omuntu yeshi-yeshi ali akolera abandi, ajire ntyo nka muntu olangalire emisi Mungu anahaana.” (1 Pe. 4:11) Nkabaga bene-benyu na bali-benyu bakaba eyi bali bahurana ebibazo birhakahwa mu zinola siku z’obuzinda. Aliko muyibuke oku “omungeri mukulu,” Yesu Kristu, akabarhabala kulusha owindi muntu yeshi-yeshi. Ajira ebyola byoshi zene n’omu gulu lihya-hya. Yehova ahemere abashamuka bajire ntya: Bazigire bene-babo na bali-babo, babalange n’okuba “lwiganyo oku chishumba.” w23.09 buk. 29-30 chi. 13-14
Lwakasharhu, Siku 16 Mwezi gwa 7
Yehova ayinji okw’amawazo m’abengehe mali ma busha.—1 Ko. 3:20.
Rhukwanene kuyaka kukululwa n’enkengero z’abantu barhakenga esheriya za Yehova. Nka rhugenderere kugwarha enkengero zili kuguma n’ez’abantu barhakenga esheriya za Yehova, rhwakagerera aha rhwarhondera kusuzagura esheriya zage. (1 Ko. 3:19) Mango manene, “obwengehe bwalinola gulu” bunashumika abantu bamenye bakenga Mungu. Bakristu bageke omu bibaga bye Pergamamu ne bye Tiyatira, balishumikirwe n’abantu balibazungulukire yibajira eby’obumaguza n’okuharamya ebishushanyo. Yesu ahereza ehano likomere kw’ebyola bibaga byombi bulala byaliri byalekerera ebyola bijiro by’obubaraga. (Ufu. 2:14, 20) Zene, abantu barhuzungulike bakachihangana kurhushumika nerhu rhuyemere amawazo mabihire. Abantu b’omulala na bera berhu bakajira okwabo koshi yibarhuyemeza oku rhuli bantu barhaharhulwa oku bilolere okuvuna esheriya za Yehova. Omufano, bakaderha oku kurhali kw’akamaro bwenene okugenderera kugwarha olungezi luchere n’oku amakanuni m’okuchigendesa mali omu Biblia mali ma mira. Mango maguma, rhwakawaza oku obwerekezi Yehova ali arhuha burhavire bwayunvikana bwinja. Nachiro rhwakashumikwa “rhuchubuke ebiyandikirwe.”—1 Ko. 4:6. w23.07 buk. 16 chi. 10-11
Lwakane, Siku 17 Mwezi gwa 7
Omwira w’okuli anayerekana obuzigire omu mango moshi anali mwene-wabo omuntu waburhirwe omu mango m’ebibazo.—Mez. 17:17.
Maria nyina wa Yesu, alikenere emisi y’ajira obulonza bwa Yehova. Akahekere obukule chiro akaba abaga arhaza kushabwa. Arhalimenyere binene oku bilolere okuntu akalemba abage-bage bana. Aliko alikwanene kushishikala omurhabana wakabere Masiya. Abaga ey’arhasaga kujira echijiro ch’obuhya analikwanene kubwira Yusufu oku ali bukule. Ebyola byakamukomerere bwenene kubibwira Yusufu. (Lu. 1:26-33) Gurhe Mariya apataga emisi alikenere y’ayeneza engabane erhaliri kuguma n’ezindi chiro enakomere? Alilangalire oburhabale bw’abandi. Omufano, alibwirire Gabriyeli amuhe myazi minene oku bilolere eyola ngabane. (Lu. 1:34) Harhalegamaga, abalamira omu “chihugo ch’emisozi” che Yuda omu kulambagirira Elizabeti omuntu w’omu mulala gwage. Lwaliri lugenzi lwinja bwenene. Elizabeti abwira Mariya koko, n’eroho lya Yehova lyamuyerekeza aganire oku bulebi bulolere mugala wa Mariya waburhwa. (Lu. 1:39-45) Mariya aderha oku Yehova “akolere n’emisi y’okuboko kwage.” (Lu. 1:46-51) Kugerera Gabriyeli na Elizabeti, Yehova akomeza Mariya. w23.10 buk. 14-15 chi. 10-12
Lwakarhano, Siku 18 Mwezi gwa 7
Arhujirire rhube bwami, badahwa emwa Mungu wage na Darha.—Ufu. 1:6.
Oluganjo lugeke lw’abanafunzi ba Kristu bashigirwe amavurha n’eroho lichesibwa. Kandi bali basimira obwira bwago-bwago haguma na Yehova. Abola 144 000 bakwanene kukola nka badahwa omu mbingu haguma na Yesu. (Ufu. 1:6; 14:1) Ahachesibwa h’etabernakulo haliyerekene oku bayemererwe nka bagala ba Mungu b’ekiroho amango bachili hanola oku gulu. (Ro. 8:15-17) Ahachesibwa Bwenene h’omu tabernakulo hashushanyize embingu, aha Yehova alamire. “Erido” lyaligabire Ahachesibwa n’Ahachesibwa Bwenene, lishushanyize omubiri gwa Yesu gw’enyama gurhakamuyemerere aje embingu nka Mudahwa Mukulu bwenene w’ehekalu ly’ekiroho. Omu kuhaana omubiri gwage g’omuntu nka nterekero oku bantu boshi, Yesu afungulira Abakristu bashigwa boshi enjira y’okulama embingu. Bakwanene kuleka omubiri gwabo gw’enyama yibahaabwa oluhembo lwabo embingu.—Ebr. 10:19, 20; 1 Ko. 15:50. w23.10 buk. 28 chi. 13
Lweboso, Siku 19 Mwezi gwa 7
Nakabula ebisanzi nka namahwanza kuderha oku bilolere Gideoni.—Ebr. 11:32.
Gideoni aligenderere kurhulera amango abanya Efraimu bamuderha-derha kubi. (Amu. 8:1-3) Gideoni arhashubizaga n’oburhe. Ayerekana oku ali mwirhohye omu kuyunviriza ebibaliri baderha, anabashubiza okubwinja n’echola charhuma barhulera. Abashamuka bayengehere banayiganya Gideoni omu kuyunviriza bwinja-bwinja n’okushubiza oku bwinja amango bamabaderha derha kubi. (Yak. 3:13) Amango bamajira ntyo banarhabala omu kulerha omurhula omu chibaga. Amango abantu bahereza Gideoni erenge bulala ahimire Abamidiani, alisezeze obwenge ku Yehova. (Amu. 8:22, 23) Gurhe abalume bashimikirwe bakayiganya omufano gwa Gideoni? Bakwanene kuhereza Yehova obukuuze ku byoshi bali bayeneza. (1 Ko. 4:6, 7) Omufano, akaba bali basingiza omushamuka oku bilolere obuhashe agwerhe b’okuyigiriza, akwanene kuderha oku enyigirizo rhunahabwa zirhengere omu chinwa cha Mungu, kandi rhweshi rhunayigirizwa kugerera olubaga lwa Yehova. Abashamuka bakwanene kuchibaza akaba bali bayigiriza omu njira ehereze Yehova obukuuze, changwa akaba bali balonza abantu babasingize. w23.06 buk. 4 chi. 7-8
Lwamungu, Siku 20 Mwezi gwa 7
Amawazo mani marhali kuguma n’amenyu.—Isa. 55:8.
Akaba rhurhabwene ebi rhwahemaga omu sala, rhwakachibaza, ‘Nansalira oku bilolere ebintu bikwanene si?’ Kanene, rhunawaza oku rhumenyere ebyakarhubera binja bwenene. Aliko, nkabaga kweri ebintu rhunahema birhakarhulerhera enyungu zinja bwenene. Akaba rhuli rhwasalira oku bilolere echibazo, nkabaga hakaba echishubizo chinja bwenene kulusha echi rhwaliwazize. Nkabaga kandi ebintu bilebe rhwahemere birhafarhene n’obulonza bwa Yehova. (1 Yo. 5:14) Rhuganire oku mufano gw’abazere balihemere Yehova arhabale omwana wabo ayorhe omu kuli. Elyola lili nka sala lyago lyago. Aliko ntaye Yehova aheberemo akamba mpu amukolere. Yehova alonzeze oku buli muguma werhu, kuhebamo n’abana berhu, rhuchishoge kumukolera. (Kum. 10:12, 13; 30:19, 20) Bobola, abazere bakasalira bahema Yehova abarhabale bahume oku mirhima y’abana babo, echola chabashunika bazigire Yehova banabe bera bage.—Mez. 22:6; Efe. 6:4. w23.11 buk. 21 chi. 5; buk. 23 chi. 12
Lwakwanza, Siku 21 Mwezi gwa 7
Mugenderere kurhulirizana buli muguma n’owindi.—1 Te. 4:18.
Bulagurhe okurhuliriza abandi eli njira nguma y’okubayereka oku rhubazigiire? Kuguma n’oku chitabu chiguma chifasiriye eby’Ebiblia chiderhere, echinwa “kurhuliriza” Paulo akolesaga, chifasiribwe oku “kuli kuba haguma n’omuntu n’okumuheba omurhima amango ali ahurana echibazo chikomere.” Bobola, amango rhwamarhuliriza mwene-werhu oli walibuka, rhwanaba eyi rhwamurhabere agenderere kukolera Yehova oku bwimana. Na buli mango rhwamarhuliriza mwene-werhu changwa mwali-werhu, rhwanaba eyi rhwamamuyereka oku rhumuzigire. (2 Ko. 7:6, 7, 13) Okuyunva akababaro n’okurhuliriza, bili bintu bibuganene. Mu njira ehe bibuganene? Amango omuntu amayunva akababaro eju ya muntu mulebe oli walibuka, anaba eyi alonzeze kumurhuliriza n’okujira chintu chilebe yamurhabala. Bobola, okuyunva akababaro kunarhurhabala rhurhulirize abandi. Paulo afasiriye oku engeso ya Yehova y’akababaro oku bantu, y’enamushunika abarhulirize. Paulo aderhere oku Yehova ali “Darha w’obonjo bw’akasisi na Mungu w’echirhulirizo choshi.”—2 Ko. 1:3. w23.11 buk. 9-10 chi. 8-10
Lwakabiri, Siku 22 Mwezi gwa 7
Muchishinge omu malibuko.—Ro. 5:3.
Abanafunzi ba Yesu boshi nji bahurana amalibuko. Rhuganire oku mufano gw’entumwa Paulo. Alibwirire Abakristu balilamire omu Tesalonike ntya: “Amango rhwaliri haguma nenyu, rhwaliri rhwababwira embere w’ebisanzi oku rhwakapatire amalibuko, n’antyo ku byanabere.” (1 Te. 3:4) Anayandikira abaliri e Korinto ntya: “Bene-berhu rhurhalonzeze kubabisha oku bilolere amalibuko rhwahurene . . . Rhwaheza obulangalire n’okuwaza oku hoshaho rhukala kufa.” (2 Ko. 1:8; 11:23-27) Chiro na zene, Abakristu bakapata amalibuko mu njira nguma changwa eyindi. (2 Ti. 3:12) Gurhe si woyo? Wachigerere kulibuzwa bulala ogwerhe obwemere mu Yesu wanarhondera kumukulikira? Nkabaga abera n’abantu b’omulala gwawe bali bakushekera. Nkabaga abandi balihikire kuba bashombanyi bawe. Nkabaga eju y’okuba munihirwa, wapatire ebibazo n’omukulu wawe w’akasi changwa n’abenyu onakola nabo. (Ebr. 13:18) Wapatire amalibuko marhengerere oku barhegesi bulala oli wahubiri abandi oku bilolere obulangalire bwawe si? Chiro akaba malibuko manyabachi rhuli rhwahurana, Paulo arhubwirire oku rhukwanene kugwarha obusiime. w23.12 buk. 10-11 chi. 9-10
Lwakasharhu, Siku 23 Mwezi gwa 7
Mwanderhere buhanya bunene.—Mwa. 34:30.
Yakobo alilembeere bibazo. Bagala babiri ba Yakobo, Simeoni na Lawi, bakoza eshonyi omulala gwabo n’okuzingisa ezino lya Yehova. Oku bwindi, omukazi muzigirwa wa Yakobo y’ekala Raheli, afa amango aliri aburha omwana wabo wa kabiri. N’amango enzara ekalihire yarhengereraga omu chihugo chabo, byahema Yakobo ahamire omu chihugo che Misri ey’anakola mushaja. (Mwa. 35:16-19; 37:28; 45:9-11, 28) Chiro akaba Yakobo alihurene ebyola bibazo byoshi, arhahezaga obwemere bwage mu Yehova n’omu bilagane byage. Na Yehova naye ayerekana oku amuyemerere. Omufano Yehova ahereza Yakobo bikulo binene. Na Yakobo akwanene kuba ey’aligwerhe shukurani nene ku Yehova amango ashuba kubona omugala Yosefu ey’aliwazize oku afaga mira! Obwira bukomere Yakobo aligwerhe haguma na Yehova bwalimurhabere ahime ebibazo byage. (Mwa. 30:43; 32:9, 10; 46:28-30) Amango nerhu rhugenderere kugwarha obwira bukomere haguma na Yehova, ahola rhwanagala kuhima ebibazo rhurhaliwazize oku byakarhuhikira. w23.04 buk. 15 chi. 6-7
Lwakane, Siku 24 Mwezi gwa 7
Yehova ali Mungeri wani. Ntacho nabula.—Zb. 23:1.
Omu Zaburi ya 23, Daudi aliyerekene obwizere bwage oku Yehova ali muzigire n’okumushishikala. Afasiriye obwira bukomere aligwerhe haguma na Yehova ey’aliri ahamagala Mungeri wage. Daudi ali chuyunvirhe ali omu bulanzi amango ayemera oku Yehova amuyerekeze, anagenderera kumulangalira. Na Yehova akamuyerekere obuzigire bwage esiku zoshi omu kalamo kage. Bichi byarhumaga agwarha obola bwizere? Daudi alichuyunvirhe azigirwe bulala Yehova aliri amuhereza buli mango byoshi akenere. Daudi alimenyere oku Yehova ali mwira wage n’oku amuyemerere. Echola chalirhumire Daudi achizera oku, choshi choshi chakamuhikire, Yehova akangenderere kumushishikala n’okumuhereza byoshi akenere. Bulala Daudi alichizerere oku Yehova ali muzigire n’oku akagenderere kumushishikala, echola chalimurhabere amenye ayubaha, aliko agwarhe obusime n’okutosheka.—Zb. 16:11. w24.01 buk. 29 chi. 12-13
Lwakarhano, Siku 25 Mwezi gwa 7
Ndi haguma nenyu esiku zoshi kugera oku buzinda bw’egulu.—Mt. 28:20.
Kurhenga omu mango m’Evita Lyakabiri ly’Egulu Lyoshi, abantu ba Yehova bahubirire buzira chibazo mu bihugo binene. Oku byajire byaba, bantu banene bahikire kumenya Yehova, n’abakozi bage bali bahubiri hoshi oku gulu. Zene, bene-berhu be Baraza Lirhambwire bagenderere kukulikira obwerekezi bwa Kristu. Baba balonzeze bene-babo babone okw’obwerekezi bahabirwe bupatene n’obulonza bwa Mungu. Kandi, banakolesa abemangizi b’emizunguluko n’abashamuka yibahana obwerekezi omu bibaga. Abashamuka bashigwa, n’ahanene abashamuka boshi be bibaga bali omu “fune y’okulyo” ya Kristu. (Ufu. 2:1) Nechi, rhumenyere okw’abola bashamuka boshi barhali bashinganyanya, banajira n’amagosa. Hali amango Musa na Yoshua balijirire amagosa kuguma n’entumwa. (Hes. 20:12; Yos. 9:14, 15; Ro. 3:23) Aliko, rhwakabona bwinja bwinja oku Yesu y’eli ayerekeza omuja mwimana onakengukire n’abashamuka, anagenderera kujirantyo. Rhugwerhe empanvu nyinja y’okulangalira obwerekezi ali arhuha kugerera abashimikire yibarhuyerekeza. w24.02 buk. 23-24 chi. 13-14
Lweboso, Siku 26 Mwezi gwa 7
Mube bantu banayiganya Mungu, nka bana bazigirwa.—Efe. 5:1.
Zene, rhwakasimisa Yehova omu kuderha oku bimulorere omu njira eyerekene eshukrani, na kangana gurhe rhumuzigire. Amango rhuli omu kasi k’amahubiri, rhubarhubikire omu bwenge ok’omuhigo gwerhu gukulu kuli kurhabala abandi bayegere Yehova, n’okubarhabala babone Darha muzigirwa kuguma n’oku rhunamubona. (Yak. 4:8) Rhugwerhe busime bunene bwenene b’okuyereka abantu ebye Biblia ederhere oku bilolere Yehova, obuzigire bwage, ehaki, obwengehe, emisi n’ezindi ngeso zage zinja. Kandi rhunasingiza Yehova n’okumusimisa omu kujira okwerhu koshi yirhumuyiganya. Amango rhwamajira ntyo, abandi bakabona oku rhurhali kuguma n’abantu ba mu linola gulu libi. (Mt. 5:14-16) Amango rhuli rhwaganira nabo, rhwakabayereka bulagurhe rhurhaba kuguma n’abo. Omu njira eli nk’eyola, rhwanaba eyi rhuli rhwasingiza ezino lya Yehova. Echola chinarhuma abantu b’emirhima minja bayegera Mungu werhu. Amango rhwamasingiza Yehova omu njira eli nk’eyola, rhwanasimisa omurhima gwage.—1 Ti. 2:3, 4. w24.02 buk. 10 chi. 7
Lwamungu, Siku 27 Mwezi gwa 7
Ogwarhe obuhashe b’okuheba abantu omurhima . . . n’okukalihira.—Tit. 1:9.
Y’oba Mukristu okulire ekiroho, wakenera kugwarha obufundi bw’akamaro bwakakurhabala omu kalamo kawe. Obola bufundi bwakurhabala oyemere engabane omu chibaga, opate akasi n’okukakola bwinja, kwakurhabala opate ebyokenere, changwa eby’omulala gwawe gukenere, kandi wagwarha obwira bukomeere haguma n’abandi..Omufano okuyiga bwinja kusoma n’okuyandika. Ebiblia ederhere oku omuntu ogwerhe obusiime ali olala onayisoma buli lusiku n’okuyikengerako bwenene. (Zb. 1:1-3) Omuntu onasoma Ebiblia buli lusiku, ahikira kumenya okuntu Yehova anawaza, n’okuyiga gurhe akakolesa bwinja Amandiko omu kalamo kage. (Mez. 1:3, 4) Bene-berhu na bali-berhu bakenere oburhabale bw’abalume bagwerhe obuhashe b’okuyigiriza n’okuhaana amahano marhengere omu Biblia. Akaba wakagala kusoma n’okuyandika bwinja, wagala kurheganya amajambo n’ebishubizo byalerhera abandi enyungu n’okukomeza obwemere bwabo. Kandi wagala kuyandika ebinwa bigwerhe akamaro amango oli wachiyigiriza woyo wenyine, amango oli wakulikira amajambo oku mbuganano z’echibaga, n’oku mbuganano zikulu. Ebyola wayandikaga byakurhabala okomeze obwemere bwawe n’okuheba abandi omurhima. w23.12 buk. 26-27 chi. 9-11
Lwakwanza, Siku 28 Mwezi gwa 7
Oli omu buguma n’enyu ali mukulu bwenene kulusha oli omu buguma n’egulu.—1 Yo. 4:4.
Amango oyunvirhe ogwerhe obuba, okengere oku bi Yehova akujirira omu mango Shetani nj’aba arhachiliho. Echerekane chageraga oku mbuganano y’eneo ya 2014 chaliyerekene gurhe rhwakagenderera kukengera oku bulangalire bwerhu. Mulume muguma aganira n’omulala gwage okuntu olwandiko lwa 2 Timoteo 3:1-5 lwakaderhere nka lwabaga yilwaganirira oku bilolere e Paradizo. Lwakaderhere ntya: “Omu gulu lihyahya nji mwaba ebihe bisimisize bwenene bulala abantu nji baba eyi bazigirene, bazigire ebintu by’ekiroho, bagwerhe olugero, berhohye, banakuuza Mungu, banakenga abazere, bagwerhe eshukrani, bali bemana, bagwerhe obuzigire bw’akasisi oku bantu b’emilala yabo, banayunvikana n’abandi, banaderha abandi bwinja esiku zoshi, banachigala, berhonzi, banasiima amenja, bakanihirwa, banayemera amawazo m’abandi, banachicha bufi, bazigire Mungu ahali h’okusima oluyenge, bachishwekere ku Mungu, oyegere abantu bali nkabo.” K’onaganira n’abantu b’omulala gwawe changwa bene-benyu na bali-benyu oku bilolere okuntu akalamo nji kaba omu gulu lihyahya? w24.01 buk. 6 chi. 13-14
Lwakabiri, Siku 29 Mwezi gwa 7
Nakuyemerere.—Lu. 3:22.
Bisimisize okubona Yehova anasimiswa n’abantu bage bowe nka chigusho! Ebiblia ederhere ntya: “Yehova anasimiswa n’abantu bage.” (Zb. 149:4) Aliko, baguma bakavunika omurhima, omu kuchibaza akaba Yehova anabayemera bwago bwago. Banene omu bantu baganirirwe omu Biblia balikolere Yehova oku bwimana, hali amango baliri bachibaza akaba Yehova anabayemera. (1 Sa. 1:6-10; Yob. 29:2, 4; Zb. 51:11) Ebiblia eyerekene bwinja bwinja okw’abantu barhali bashinganyanya bakayemerwa na Yehova. Nka gurhe? Rhukwanene kugwarhwa obwemere mu Yesu Kristu n’okubatizwa. (Yoh. 3:16) Omu kujira ntyo, rhwanayereka abandi oku rhwahungamire ebyaha byerhu n’oku rhwalaganyize Mungu oku rhwajira obulonza bwage. (Mdo. 2:38; 3:19) Yehova anasimiswa nerhu bwenene amango rhwamajira ebyola bintu yirhugwarha obwira bukomere haguma naye. Nka rhujirire okwerhu koshi rhugalire yirhugenderera kuyeneza echilagane cherhu ch’okumukolera, Yehova arhuyemera, n’okugenderera kurhubona nka bera bage ba hofi.—Zb. 25:14. w24.03 buk. 26 chi. 1-2
Lwakasharhu, Siku 30 Mwezi gwa 7
Rhurhakaleka kuderha oku bilolere ebirhwabwene n’okuyunva.—Mdo. 4:20.
Rhwakayiganya abanafunzi amango rhwamagenderera kuhubiri chiro n’amango abarhegesi bamarhulahiza. Rhwakachizera oku Yehova arhurhabala kuyeneza akasi kerhu. Bobola oheme Yehova obushiru n’obwengehe n’oburhabale y’ogala kulembera ebibazo. Banene murhwabo yibalwisa ebibazo by’amagala, eby’omu bwenge, nk’okuheza omuzigirwa, okulwisa ebibazo by’omu mulala, amalibuko, changwa ebindi-bindi bibazo. N’ebindi bintu: nk’amalwala m’okuyahukira, amavita, byarhumire binene mw’ebyola bibazo byashuba kukomera bwenene orhakalola. Obwire Yehova bwinja-bwinja okuntu oli wachiyunva. Omubwire eju y’ehali yawe nk’oku wakanabwira mwira wawe w’okumurhima. Onachizere oku Yehova “akujirira chintu chilebe.” (Zb. 37:3, 5) Amango rhuli rhwasalira buzira kuleka, echola charhurhabala “kulembera ebigeregezo.” (Ro. 12:12) Yehova ayinji ebibazo abakozi bage bali bahurana nabyo, “anayunva amalira mabo m’okuhema oburhabale.”—Zb. 145:18, 19. w23.05 buk. 5-6 chi. 12-15
Lwakane, Siku 31 Mwezi gwa 7
Mugenderere kulola bwinja ebiyemererwe na Waliha.—Efe. 5:10.
Amango rhuli rhwalonza kurhola esimikiro z’akamaro birhuhemere rhumenye “obulonza bwa Yehova buli buhe” n’okuja rhwakola kuguma nabo. (Efe. 5:17) Amango rhwamarhegera amakanuni me Biblia maderhere oku hali yerhu, rhunalonza amawazo ma Mungu maderhere kw’echola. Amango rhwamakolesa amakanuni mage, rhwagala kurhola esimikiro zinja. “Omubi,” k’okuderha omwanzi werhu Shetani, akasima rhugwarhe binene by’okukola omu kukulikiranya ebintu bya linola gulu, nantyo rhubule ebisanzi by’okukola akasi ka Mungu. (1 Yo. 5:19) Omukristu akahwanza kuchiseza bwenene omu kulonza efranga, amasomo changwa akasi, ahali h’okulonza enjira zinene akakoleramo Yehova. Nk’ajirire ntyo anaba eyi amayerekana okw’arhondere kuwaza kuguma n’abantu barhakolera Yehova. Kweri, okujira ntyo kurhali kubi, s’aliko ebyola byoshi birhakwanene kurhola enafasi y’oburhanzi omu kalamo kerhu. w24.03 buk. 24 chi. 16-17