Mga Pamatan-on nga May Malig-on nga Palaabuton

“Makahaladlok gid kag makangilil-ad subong sang iban nga sahi sang [kaso sang paglugos]”​—⁠amo sina ang paglaragway sang nagadumala nga hukom sa krimen sa isa ka kasaba sining karon lang. Ginlambatan sang isa ka gang sang walo ka tin-edyer, nga nagaedad sing 14 tubtob sa 18, ang isa ka turista nga babayi sa nasulod nga duog sang siudad sa London, ginlugos sia sing sulitsulit, kag dayon ginhaboy sia sa malapit nga kanal bisan pa nagsiling sia nga indi sia makahibalo maglangoy. Natural lamang nga ang iloy sang isa sang mga tin-edyer nagsiling nga naglain ang iya pamatyag sang makit-an niya sa balita sa telebisyon ang ginhimo sang iya anak nga lalaki.

Sing makapasubo, ginapakita sini nga hitabo kon ano ang nagakatabo karon sa katilingban. Ang kapintas nangin kinaandan, sa mga krimen, sa kinagamo sa puluy-an, ukon sa etniko nga mga binangig sa Balkans, sentral kag nakatundan nga Aprika, kag sa bisan diin. Ang mga pamatan-on nagadaku sa tunga sini nga mga kahimtangan, ukon masami sila makabati tuhoy sini. Busa, indi katingalahan, nga nagtig-a ang balatyagon sang madamo, wala sing “kinaugali nga pagpalangga,” kag “wala sing pagpugong sa kaugalingon.”​—⁠2 Timoteo 3:⁠3.

“Mabangis”

Sang ginsulat sang Cristianong si apostol Pablo ang iya ikaduha nga sulat sa iya masigkagulang nga si Timoteo, ang Roma amo ang pinakamabaskog nga kagamhanan sa kalibutan. Ang kabangis kag pagkasapatsapaton lapnag sa Romanong mga arena. Apang, nagpaandam si Pablo nga sa palaabuton, ang tion mangin “mabudlay pakigbagayan.” (2 Timoteo 3:1) Sing talalupangdon, ang Griegong tinaga nga nagalaragway sa sining mga tion subong “mabudlay pakigbagayan” nagalakip sa ideya sang ila ‘kabangis.’ Ginapakita sang isa ka hitabo sa tion sang ministeryo ni Jesus sa duta kapin sa 30 ka tuig na ang nagligad ang kabangdanan sang pila sang kabangis sang iya tion.

Bag-o lang mag-abot si Jesus sakay sa isa ka sakayan sa nasidlangan nga baybayon sang Dagat sang Galilea. Sang pagtakas gid niya sa baybayon, ginpalapitan sia sang duha ka lalaki. Ang ila mabangis nga dagway kag pagsinggitan nagapakita nga may diperensia gid sila. ‘Tuman sa ila kabangis,’ sa katunayan, ginsudlan sila sang demonyo.⁠a Ang ila ginsinggit naghalin sa malauton nga mga espiritu nga amo ang nagakontrol sang ila masingki nga mga buhat. “Ano bala ang labot mo sa amon, Anak sang Dios?” singgit sang mga lalaki. “Nagkari ka bala sa pagpaantos sa amon sa wala pa ang gintalana nga tion?” Nahibaluan gid sang malauton nga mga espiritu nga nagsulod sa duha ka lalaki nga may gintalana nga tion ang Dios agod hukman ang mga demonyo. Magakahulugan ini sang ila dayon nga kalaglagan. Apang samtang wala pa ini ginagamit nila ang ila labaw sa tawo nga mga ikasarang sa pagpaluntad sing mabangis nga kasingki. Ang milagruso nga buhat lamang ni Jesus sa pagpalayas sa sadtong mga demonyo ang nakahatag sing kaumpawan sa duha ka lalaki.​—⁠Mateo 8:​28-32; Judas 6.

Kon ang mga tawo karon, lakip ang mga pamatan-on, nagahulag sing binuang, maayo nga dumdumon naton yadto nga hitabo. Ngaa? Bangod sa sining ika-20 nga siglo, nagaatubang kita sing kaanggid nga katalagman, subong sang ginapaathag sang katapusan nga tulun-an sang Biblia, ang Bugna: “Kailo para sa duta kag para sa dagat, kay ang Yawa nagpanaug sa inyo nga nagabalingaso sa kaakig, kay nahibaluan niya nga diutay na lang ang iya tion nga nabilin.” (Bugna 12:⁠12) Talupangda, palihug, nga ining pagpakanubo kay Satanas ginaupdan sing “nagabalingaso nga kaakig” bangod nahibaluan niya nga malip-ot na lamang ang iya tion.

Sa Idalom Sang Pagsalakay

Subong sang pirme ginasambit sa mga pahina sini nga balasahon, ang tuig 1914 amo ang tion sang pagpalingkod kay Cristo Jesus subong Hari sang Ginharian sang Dios sa langit. Gilayon nga naghulag si Jesus batok sa pangunang kaaway sang Dios, si Satanas. Sa amo, ang Yawa kag ang iya mga demonyo ginpalayas sa langit, kag ginasentro nila karon ang ila igtalupangod sa duta. (Bugna 12:​7-9) Bangod limitado gid ang iya impluwensia, si Satanas “nagaluyong kaangay sang nagangurob nga leon, nga nagapangita sang iya tulukbon.” (1 Pedro 5:8) Sin-o ang madali niya nga mabiktima? Indi bala natural lamang nga amo yadtong wala sing eksperiensia sa kabuhi kag sa tawhanon nga mga kaangtanan? Sa amo ang mga pamatan-on karon amo ang nangin puntariya sang Yawa. Paagi sa ila ginapili nga musika kag kalingawan, madali sila nga nagakahulog sa mga kamot sining dikitaon malimbungon nga manugpatalang.​—⁠Efeso 6:​11, 12.

Bisan pa kon nagamadinalag-on ang mga pamatan-on, nasapwan nila nga may nagaupang sa ila. Kutob sang pagkatapos sang Inaway Kalibutanon II, ang mga tawo sa madamo nga pungsod nga nagailinaway sadto nagtinguha nga makabawi paagi sa paghatag sa ila mga pamilya sing maluho nga estilo sang kabuhi. Ang materyal nga mga pagkabutang, wala sing limitasyon nga pagpangalipay, kag kalingawan nangin ang panguna nga mga tulumuron. Subong resulta, madamo ang nag-antos. “Ang mga determinado nga magmanggaranon,” paandam ni Pablo kay Timoteo, “nagakahulog sa pagsulay kag siod kag sa madamong binuang kag makahalalit nga kailigbon . . . Kay ang gugma sa kuwarta amo ang gamot sang tanan makahalalit nga mga butang, kag paagi sa paghingamo sini nga gugma ang iban . . . nagsuntok sang ila mga kaugalingon sing madamong kasakitan.” (1 Timoteo 6:​9, 10) Sa kabilugan, makit-an naton ang mga tawo sa sining materyalistiko nga katilingban nga ginasuntok sang mga kasakit sa ekonomiya, pinansial, kag sa emosyon. Lakip sa ila amo ang madamo nga pamatan-on, nga nabiktima sining padugi sang pangunang kaaway sang Dios.

Apang, sing makalilipay, may maayong balita. Kag para ini sa mga pamatan-on, yadtong may malig-on nga palaabuton. Paano ini matabo?

Pangitaa kag Imo Masapwan

Madamo nga pamatan-on ang may mataas nga mga talaksan. Ginasikway nila ang malaw-ay nga mga talaksan nga kinaandan sa tunga sang mga adulto. Ginalikawan nila ang inhustisya kag matig-a nga panimuot sang gutom sa gahom nga mga politiko kag mga negosyante. Kon isa ikaw ka pamatan-on, mahimo nga amo sini ang imo ginabatyag.

Binagbinaga si Cedric, isa ka pamatan-on nga lalaki nga nagahingapos na sa pagkatin-edyer, nga may kinaandan nga eksperiensia.⁠b Subong isa ka bata, madamo sia sing ginakahadlukan, lakip ang kahadlok nga mapatay. Ginpaligban niya kon ano ang katuyuan sang kabuhi. Bangod wala masapwan ang mga sabat sa iya mga pamangkot sang 15 anyos na sia, gin-untatan niya ang pagpalibog tuhoy sa kahulugan sang kabuhi upod sa iban idealistiko nga mga pamatan-on. “Nagsigarilyo kami sing dope kag nagapinungko sa palibot nga nagainistoryahanay sa sulod sang madamo nga inoras,” hinumdom niya. “Mabatyagan mo nga ang tanan may pareho nga hunahuna sa imo, apang wala sing isa nga nakasapo sa mga sabat.”

Si Cedric, kaangay sa madamo nga pamatan-on, nagapangita sing kakunyag. Wala sia makontento sa paggamit lamang sing mga droga. Sang ulihi nadalahig sia sa pagpangawat kag pagbaligya sing mga droga. Sa gihapon nangita sia sing iban pa nga mga hangkat. Nagsugod sia sa pagpangawat sing espisipiko nga mga butang nga gin-order sang iban. “Nanamian ako sini,” pagbaton niya. “Apang wala ko ginakawatan ang ordinaryo nga mga tawo. Kon ginakawat ko ang isa ka awto, wala ko ini ginaguba. Kon nagapangawat ako sa isa ka negosyo, ginahimo ko ini sa sadtong nahibaluan ko nga may pasiguro. Nakabulig ini sa akon nga mapakamatarong ang akon ginahimo.” Subong sang inyo ginapaabot, nabilanggo si Cedric.

Si Cedric nagahinumdom: “Ginsugilanon ako ni Mark, nga isa ka kaupod nga bilanggo. Natalupangdan ang akon daku nga krus nga pika sa ibabaw sang akon butkon, ginpamangkot niya ako kon ngaa nagpapika ako sini. Naghunahuna sia nga may relihioso ini nga importansia sa akon.” Pila ka semana sang ulihi, ginhatagan ni Mark si Cedric sing isa ka kopya sang libro nga Mahimu Ka Mabuhi sing Dayon sa Paraiso sa Duta.⁠c “ ‘Mahimo Ka Mabuhi sing Dayon’​—⁠gilayon ako nga nagdayaw sa sadtong mga pinamulong. Amo sina anay ang pirme namon ginahambalan, apang wala gid namon masapwan ang kamatuoran sini.” Pagkatapos sang madamo nga paghinun-anon upod sa isa sang mga Saksi ni Jehova nga nagaduaw sa bilangguan, narealisar ni Cedric nga ang iya anay ginahandum mahimo gali matigayon​—⁠apang sa paagi lamang sang Dios.

“Kutob sang mag-untat ako sa pagpakig-upod sa akon anay mga abyan, madasig ako nga nag-uswag,” siling ni Cedric. Ang iya pag-uswag sa paghangop kag sa kalipay indi nangin mahapos. “Padayon ako nga nagatinguha nga mag-uswag,” siling niya. “Dapat ako maghalong sa akon ginahunahuna.” Huo, nahangpan na ni Cedric nga ang pagkaidealistiko nagdul-ong sa iya sa siod sang Yawa, nagahunahuna nga ang iya mga tulumuron sarang lamang malab-ot paagi sa paghimo sing mga hilikuton nga nasentro sa kakunyag.

Sing makalilipay, madugay na nga nakaguwa sa bilangguan si Cedric, kag regular sia nga nagapakig-angot sa iban nga nakasapo sing ila ginapangita. Isa na sia karon sang mga Saksi ni Jehova kag nagapaambit sang ila paglaum nga mabuhi sa Paraiso diri sa duta. Ginapaabot man niya ang katapusan sang impluwensia ni Satanas kag sang tanan niya nga mga padugi.

Sa pagkamatuod, indi lamang mga pamatan-on kaangay ni Cedric ang may malig-on nga palaabuton; ang iban ginpadaku sang diosnon nga mga ginikanan, nga nagpatudok sa ila kabataan sing gugma sa kamatuoran sang Biblia.

Ang Diosnon nga Paghanas May Maayo nga mga Resulta

“Hanasa ang bata nga lalaki suno sa dalanon nga para sa iya; bisan kon magtigulang na sia indi sia magtalikod sa sini,” sulat sang maalam nga si Hari Solomon. (Hulubaton 22:⁠6) Nangin matuod ini sa madamo sang determinado nga pamatan-on nga nagdesisyon sa pagsunod sa talaksan sang Biblia.

Amo sini ang ginhimo nanday Shiela, Gordon, kag Sarah. Suno sa ila, ginpadaku sang ila mga ginikanan ang pagtuman sa sugo ni Cristo nga ‘maglakat kag maghimo sing mga disipulo’ paagi sa pagbantala sing maayong balita sang Ginharian. (Mateo 24:14; 28:​19, 20) “Sa bisan ano nga desisyon nga dapat himuon, pirme namon ginabinagbinag ni Nanay, ‘Ano ang mangin epekto sini sa pagbantala nga hilikuton?’ ” hinumdom ni Shiela. “Madamo kami sang ginpaiway nga mga hilikuton subong resulta sini nga pangatarungan,” pagbaton niya, nga nagadugang, “apang madamo kami sing natigayon nga pagpakamaayo!” Bisan pagkatapos sang malawig nga mga adlaw nga ginahinguyang sa pagduaw sa mga puluy-an sang mga tawo dala ang maayong balita, si Shiela kag ang iya iloy nagapauli nga nagakanta. “Bug-os ang akon kalipay,” siling niya. “Mabatyagan ko pa ini.”

Nadumduman ni Gordon ang madamong makalilipay nga gab-i sang Sabado. “Gin-agda ako sa mga puluy-an sang mga gulang sa kongregasyon, diin naghampang kami sing mapuslanon nga mga papakot kag nagaistoryahanay. Napalig-on kami sa pagsaulo sing mga bersikulo sa Biblia, nagahambal sing hilway tuhoy sa Makasulatanhon nga mga topiko, nagasugid sing isa ka eksperiensia sa pagbantala, kag nagatuon kon paano nagauswag ang hilikuton sang Ginharian,” hinumdom ni Gordon. “Ini tanan nakabulig sa akon nga makatukod sing maayo nga sadsaran kag makapalambo sing gugma kay Jehova nga Dios.”

Si Sarah may makalilipay nga mga handumanan sang mga gab-i nga ginhinguyang upod sa bisita nga mga Saksi. “Nagapanyapon kami sing dungan. Nian agod makompleto ang pagbisita, nagatokar kami sing piano, ginaakumpanyaran ang mga nagakanta sing mga ambahanon tuhoy sa Ginharian sang Dios. Daku gid ang nabulig sa amon sang musika, ilabi na sadtong nagaeskwela pa kami, bangod nakabulig ini nga mahimo namon ang mga butang sing tingob subong pamilya.”

Sa pagkamatuod, indi tanan nga pamatan-on nga luyag magpahamuot kay Jehova may maayo nga mga kahimtangan sa pamilya. Apang, ang malapit nga kaangtanan sa iban nga Saksi nga mga pamilya sa kongregasyon nagahatag sa ila sing kalig-unan kag balatyagon nga may bahin sila.

Pakabahandia ang Malig-on nga Sadsaran Para sa Palaabuton

Ang mga pamatan-on karon may mapilian. Mahimo sila makapadayon sa sining malauton nga kalibutan samtang nagapadulong ini sa kalaglagan sa palaabuton nga “dakung kapipit-an” nga gintagna ni Jesus. Ukon mahimo nila “ipahamtang ang ila pagsalig mismo sa Dios . . . kag sundon ang iya mga kasuguan,” subong sang gin-amba sang inspirado nga salmista nga si Asap. Ang pagtuman sa Dios magapugong sa ila nga mangin bahin sang “kaliwatan nga batinggilan kag mabinatuon, kaliwatan nga wala maghanda sang ila tagipusuon kag nga ang ila espiritu indi masaligan sang Dios.”​—⁠Mateo 24:​21; Salmo 78:​6-8.

Sa kapin sa 80,000 ka kongregasyon sang mga Saksi ni Jehova sa bug-os nga kalibutan, madamo ikaw sing masapwan nga makadalayaw nga pamatan-on. Ginpamatian nila ang laygay ni Pablo sa pamatan-on nga si Timoteo “nga maghimo sing maayo, mangin manggaranon sa maayong mga buhat, magmaalwan, mahinatagon, nga nagatigana para sa ila kaugalingon sing maayong sadsaran para sa palaabuton.” Subong resulta, sila karon “nagapanguyapot sing hugot sa matuod nga kabuhi.” (1 Timoteo 6:⁠18, 19) Usisaa sing dugang pa ang tuhoy sa sining matuod nga mga Cristiano paagi sa pagtambong sa ila mga miting. Nian matigayon mo man ang isa ka malig-on nga palaabuton.

[Mga footnote]

[Kapsion sa pahina 7]

Ang malauton nga mga espiritu amo ang sa likod sang “tuman kabangis” nga mga lalaki nga gin-ayo ni Jesus

[Kapsion sa pahina 8]

Nagatukod sing “isa ka maayo nga sadsaran para sa palaabuton”