Malipayon nga Magbalik sa Pagbulig sa mga Interesado
1 Ang tagsatagsa nga nagapakigbahin sa pamalaybalay nga hilikuton maluyag sa pagbulig sa mga tawo nga interesado. Paagi sa paghatag sing amo sina nga bulig, maagom naton ang daku nga kalipay kag kaayawan. (Ipaanggid ang Salmo 126:5, 6.) Nagakinahanglan ini sang aton paghanda.
2 Ang paghanda nagasugod paagi sa paghupot sing detalyado nga impormasyon sa aton house-to-house record. Isulat ang tema nga ginhambalan sa unang pagduaw kag ang reaksion sang tagbalay. Ayhan luyag mo isulat kon paano mo luyag sugdan ang paghambalanay sa pagbalik mo.
3 Halimbawa, kon ginpatuhuyan mo ang Amay Namon nga pangamuyo sa primero kag nian napahamtang ang “Mabuhi sing Dayon” nga libro, ayhan malip-ot mo nga masiling ang kaangay sini:
◼ “Sadtong nagligad nga pagduaw ko, nahambalan naton kon paano ang kabubut-on sang Dios himuon sa duta kag nga ang paghidait matigayon sa tanan nga bahin sang kabuhi. Sa libro nga ginbilin ko, talupangda palihug ang ginasiling sini sa pahina 156 tubtob 158 nahanungod sa iban pa nga mga pagpakamaayo nga dalhon sang Ginharian sang Dios sa katawhan.”
4 Kon ang isa nahuyog nga dimagpati sa Dios, magsiling sing kaangay sini:
◼ “Sang nagduaw ako sang nagligad, ginhambalan naton ang punto nga ginhatag ni Pablo sa Hebreo 3:4, nga nagahatag sing makatarunganon nga mga rason sa paghinakop nga dapat gid nga may isa ka intelihente nga Manunuga sang tanan nga mga butang.” Basaha liwat ang kasulatan kag patuhuyi ang pahina 35, parapo 3 sang Mabuhi sing Dayon nga libro. Ipamangkot ang pakiana sa ubos kag dayon basaha ang parapo, nagapasabat sang pamangkot sa tagbalay. Agdaha sia nga kuhaon ang iya libro kag binagbinagon sing dungan ang masunod nga pila ka parapo.
5 Ini man nga pagpalapit mahimo magamit sa isa ka artikulo nga ayhan napaathag mo sa Ang Lalantawan kag sa Magmata! Patuhuyi ang artikulo nga ginpatalupangod sa imo una nga pagduaw kag dayon sambita ang makawiwili nga punto sa sina man nga artikulo ukon ang isa pa sa lain nga guwa nga dala mo. Kon mahimo, basaha sing dungan ang isa ka kasulatan kag pangayua ang komento sang tagbalay.
6 Hupti sa hunahuna ang imo tulumuron sa pagsugod sing pagtuon sa Biblia. Sa kinaandan nagakinahanglan sing pila ka pagduaw agod mapalambo ang interes tubtob sa sina nga kasangkaron. Ipakita ang imo personal nga pag-ulikid paagi sa pagbalik sa gilayon kon mahimo.
7 Ang maayong balita nga ginabantala naton nagadala sing daku nga kalipay. (Luc. 2:10) Kon ang mga interesado nagahulag sa aton mga panikasog, isa gid ini ka kabangdanan sang pagkasadya. (Filip. 4:1) Anihon naton ina nga kalipay paagi sa pagbalik sa pagbulig sa mga interesado nga nasapwan naton sa latagon.