Buligi Sila sa Paghangop
1 Madamo ang nagahunahuna nga ang tulun-an sang Bugna “mabudlay mahangpan.” (2 Pedro 3:16) Apang, ang kahulugan sini ginpaathag sa Revelation nga libro. Paano naton mabuligan ang mga interesado nga magamit ini sing labing maayo?
2 Kon ginhambalan ninyo ang Bugna 1:3 sa imo nahauna nga pagduaw, ini nga panghunahuna mahimo nga magapukaw liwat sang interes:
◼ “Ginhambalan naton sang nagligad kon paano makahatag sing kalipay ang paghangop sa tulun-an sang Bugna. Apang, agod maagom ini nga kalipay kinahanglan naton tun-an ang Biblia, kag dapat naton iaplikar kon ano ang aton natun-an.” Basaha kag komentuhi ang Santiago 1:25. Buksi ang parapo 9 sa pahina 8, kag ipakita kon paano ang paghangop sa tulun-an sang Bugna makabulig sa aton sa pagtigayon sing kalipay.
3 Kon ginhambalan ninyo ang Juan 17:3 sa imo nahauna nga pagduaw, mahimo nimo mapadaku ang kinahanglanon sa pagkuha sing dugang pa nga ihibalo sa Biblia paagi sa pagsiling:
◼ Sang nagligad nga pagduaw ko, ginbasa naton sa Juan 17:3 nga ang pagkuha sing ihibalo tuhoy sa Dios mahimo makadul-ong sa kabuhi nga walay katapusan. Apang luyag mo bala magkabuhi sing dayon sa kalibutan nga ginapuy-an naton karon? [Pasabta sia.] Ang kalabanan indi luyag. Bangod sini, mahimo kita magkasadya kon mabatian naton kon ano ang ginsaad sang Dios.” Buksi ang parapo 6 sa pahina 303, basaha kag komentuhi ang Bugna 21:4, kag nian magtanyag sa pagbalik liwat para sa dugang pa nga paghambalanay.
4 Kon gingamit mo ang ilustrasyon sa pahina 302 sa nahauna nga pagduaw, mahimo nimo liwat mabuksan ang libro sa sinang pahina kag makasiling:
◼ “Ginhambalan naton ang mga pagpakamaayo nga ginlaragway diri nga pagaagumon sang tawo sa idalom sang paggahom sang Ginharian sang Dios. Ano sa banta mo ang dapat naton himuon kon luyag naton magkabuhi sa idalom sina nga Ginharian? [Pasabta sia.] Ang iban nga mga tawo sadtong panahon sang Biblia nagpahamtang sing maayo nga huwaran para mailog naton.” Basaha ang Binuhatan 17:11, nagapadaku sang kinahanglanon nga ‘usisaon ang Kasulatan adlaw-adlaw.’ Magtanyag sing isa ka pagtuon sa Biblia sa puluy-an.
5 Kon nabilinan mo sing tract nga “Makalampuwas Bala Ining Kalibutan?” ang isa ka masako nga tagbalay, mahimo ka makasiling:
◼ “Sang nagduaw ako kasan-o lang, kasako gid sa imo, apang ginbilinan ko ikaw sing tract kag ginbasa naton ang Bugna 21:4, nga ginbalikwat diri sa sining libro, Revelation—Its Grand Climax At Hand! [Basaha ini gikan sa parapo 6 sa pahina 303.] Ginapakita sini nga ilustrasyon [sa pahina 302] kon ano ang mangin kaangay kon ‘pahiran sang Dios ang tanan nga luha sa ila mga mata.’ ” Itanyag ang libro.
6 Kon interesado sila, mapatuhoy mo sa ulihi ang igtalupangod sa libro nga Ang Ihibalo nga Nagadul-ong sa Kabuhi nga Walay Katapusan kag gamiton ini sa pagsugod sing isa ka pagtuon. Pat-od gid nga makasapo kamo sing daku nga kalipay sa pagbulig sa “mga indi eksperiensiado sa paghangop.”—Sal. 119:130.