UT-OT, RIGAT
Pannakarikna iti pisikal a saem, mabalin a kalalainganna wenno nakaro; kasta met ti napalalo a mental ken emosional a pannakaparigat.
Napasaran dagiti tattao ti mental, pisikal, ken emosional nga ut-ot gapu iti makapaksuy a panagbannog iti panangsukay iti nailunod a daga (Ge 3:17-19; 5:29), makadangran a sasao (Pr 15:1), di panangikankano ti dadduma a tattao iti kinaimbag a maipakpakita kadakuada (Ro 9:2), sakit ken dadduma pay a pakarigatan (Job 2:13; 16:6). Dagiti makapaalinggaget wenno nakaal-aliaw a kasasaad, pudpudno man dagita wenno babaen iti sirmata, nangparnuayda met iti ut-ot.—Sal 55:3, 4; Isa 21:1-3; Jer 4:19, 20; Eze 30:4, 9; kitaenyo met ti PANAGPASIKAL.
‘Awanen ti Ut-ot.’ Nupay saan a makaay-ayo, ti pannakarikna ti bagi iti ut-ot ket adda makagunggona nga epektona ta pagalibtakenna ti maysa a tao maipapan iti peggad a madangranan ti bagina, iti kasta matignay a mangaramid kadagiti addang tapno maliklikanna ti nakaro a pannakadangran. Gapuna, ti kaitungpalan ti kari ti Dios nga “awanto metten ti . . . ut-ot” (Apo 21:4) saanna a kayat a sawen a dagiti tattao saandan a makarikna wenno makapadas iti ut-ot. Imbes ketdi, ti mental, emosional, ken pisikal nga ut-ot nga imbunga ti basol ken kinaimperpekto (Ro 8:21, 22) ‘awanton’ iti anag a maikkatton dagiti makagapu iti dayta (kas iti sakit ken ipapatay). Ti perpekto a tao a ni Jesus napasaranna ti pisikal ken emosional a rigat ken ut-ot mainaig iti ipapatayna, ken mainaig met iti kinaaleng-aleng dagidiay nagserbianna, ngarud paneknekan daytoy a ti kinaperpekto ti bagi saanna a kasapulan ti naan-anay a kinaawan ut-ot. (Mt 26:37; Lu 19:41) Naipadto pay ketdi a ni Jesus ket “tao a nairanta kadagiti ut-ot.” (Isa 53:3) Babaen ti panangagasna kadagidiay “naparigatan iti nadumaduma a sagubanit ken tuok” (Mt 4:24), inawitna dagiti ut-ot ti sabsabali.—Isa 53:4.
Piguratibo nga Usar. Ti Kasuratan masansan a tukoyenna ti rigat wenno ut-ot iti piguratibo a kaipapanan. Agpannuray iti konteksto, mabalin nga ipasimudaagna ti nadagsen a panagtrabaho (Pr 5:10) wenno ti umiso a panagbuteng ken napalalo a panagraem ken Jehova a Dios. (1Cr 16:30; Sal 96:9; 114:7) Nadeskribir nga agrigrigat ti dandanum, bambantay, ken ti daga no agkibur wenno agkintayegda. (Sal 77:16; 97:4; Jer 51:29; Hab 3:10) Imbilang ni Jehova ti di matalek a Juda kas addaan iti di maagasan nga ut-ot, a mabalin a pakaigapuan ti ipapatayda.—Jer 30:15.
Dagiti saem, wenno ut-ot, mabalin nga ipasimudaagda met ti nakaladladingit a kasasaad. Mainaig ken Jesu-Kristo, kinuna ni apostol Pedro: “Pinagungar ti Dios babaen ti panangwarwarna kadagiti ut-ot ni patay, agsipud ta di mabalin nga isu agtultuloy a tenglen a siiirut dayta.” (Ara 2:24) Nupay awan puot dagiti natay, ti ipapatay ket nasaem ken natuok a kasasaad, agpadpada iti ut-ot a masansan a mapasaran sakbay dayta ken iti pannakaawan ti isuamin nga aramid ken wayawaya nga ipagteng ti mangparalisado a panangpetpet dayta.—Idiligyo ti Sal 116:3.