დანიელი

6 დარიოსმა საჭიროდ მიიჩნია, რომ მთელ სამეფოში 120 სატრაპი დაენიშნა.+ 2 მათ ზედამხედველებად სამი უმაღლესი მოხელე დააყენა, რომელთაგანაც ერთ-ერთი დანიელი იყო.+ სატრაპებს+ მათთვის ანგარიში უნდა ჩაებარებინათ, რათა მეფეს არ ეზარალა. 3 დანიელი უმაღლეს მოხელეთა და სატრაპთა შორის გამოირჩეოდა, რადგან საკვირველი სული იყო მასში.+ მეფეს მისი აღზევება ჰქონდა განზრახული; უნდოდა, მთელ სამეფოზე დაეყენებინა.

4 უმაღლესი მოხელეები და სატრაპები გამუდმებით ეძებდნენ საბაბს, რომ დანიელისთვის სამეფოს მართვის საქმეში წუნი მოეძებნათ და ბრალი დაედოთ, მაგრამ ვერც საბაბს პოულობდნენ და ვერც რაიმე დანაშაულს, რადგან იგი არც დაუდევარი იყო და არც რაიმე დანაშაული ჰქონდა ჩადენილი; დანიელი სანდო კაცი იყო. 5 ბოლოს ამ კაცებმა თქვეს: დანიელს ვერანაირ საბაბს ვერ მოვუძებნით, თუ მისი ღვთის კანონს მისივე საწინააღმდეგოდ არ გამოვიყენებთო.+

6 მივიდნენ უმაღლესი მოხელეები და სატრაპები მეფესთან და უთხრეს: „დღეგრძელი იყავ, მეფე დარიოს! 7 სამეფოს ყველა უმაღლესმა მოხელემ, გამგებლებმა, სატრაპებმა, სამეფო კარის უმაღლესმა მოხელეებმა და მმართველებმა საჭიროდ ჩათვალეს, რომ გამოიცეს სამეფო დადგენილება და გაიცეს ბრძანება, რომ ვინც 30 დღის განმავლობაში თხოვნით შენ კი არ მოგმართავს, მეფეო, არამედ რომელიმე ღმერთს ან კაცს, ლომების ხაროში ჩააგდონ.+ 8 ახლა, მეფეო, გამოეცი დადგენილება და ხელი მოაწერე,+ რათა არ შეიცვალოს ის, როგორც ეს სპარსელებისა და მიდიელების კანონისამებრ ხდება, რისი გაუქმებაც აკრძალულია“.+

9 მეფე დარიოსმაც მოაწერა ხელი აკრძალვის დადგენილებას.

10 როგორც კი დანიელმა ამ დადგენილების ხელმოწერის შესახებ შეიტყო, წავიდა თავის სახლში, რომლის ზედა ოთახის სარკმლებიც იერუსალიმს უყურებდა.+ იგი დღეში სამჯერ იყრიდა მუხლს, ლოცულობდა და ხოტბას ასხამდა თავის ღმერთს; ამას მანამდეც გამუდმებით აკეთებდა. 11 მაშინ ის კაცები შიგნით შეცვივდნენ და ნახეს, რომ დანიელი თავის ღმერთს ევედრებოდა და წყალობას სთხოვდა.

12 შემდეგ ისინი მეფესთან მივიდნენ და სამეფო დადგენილება შეახსენეს: „შენ არ მოაწერე ხელი ბრძანებას, რომ ვინც 30 დღის განმავლობაში თხოვნით შენ კი არ მოგმართავდა, მეფეო, არამედ რომელიმე ღმერთს ან კაცს, ლომების ხაროში ჩააგდებდნენ?!“ მეფემ მიუგო: „ეს საქმე მიდიელებისა და სპარსელების კანონითაა დამტკიცებული, რისი გაუქმებაც აკრძალულია“.+ 13 მათ მეფეს მყისვე უთხრეს: „დანიელი, იუდადან გადმოსახლებულთაგანი,+ არც შენ გცემს პატივს, მეფეო, და შენ მიერ ხელმოწერილ ბრძანებასაც არაფრად აგდებს; დღეში სამჯერ მიმართავს თავის ღმერთს“.+ 14 როგორც კი ეს მეფემ შეიტყო, დანაღვლიანდა და გამოსავლის ძებნა დაიწყო, რომ როგორმე ეხსნა დანიელი; მზის ჩასვლამდე ყოველი ღონე იხმარა მის დასახსნელად. 15 ბოლოს ის კაცები მეფესთან მივიდნენ და უთხრეს: „არ დაგავიწყდეს, მეფეო, რომ მიდიელებისა და სპარსელების კანონით მეფის დადგენილებისა და ბრძანების შეცვლა აკრძალულია“.+

16 მაშინ მეფის ბრძანებისამებრ მოიყვანეს დანიელი და ლომების ხაროში ჩააგდეს.+ მეფემ დანიელს უთხრა: „გიხსნის შენი ღმერთი, რომელსაც ერთგულად ემსახურები“. 17 მოიტანეს ლოდი, დააფარეს ხაროს და მეფემ ის თავისი და დიდგვაროვნების ბეჭდებით დაბეჭდა, რათა არაფერი შეცვლილიყო.

18 გაემართა მეფე თავისი სასახლისკენ. მთელი ღამე მარხვაში გაატარა. არც მოულხენია* და არც თვალი მოუხუჭავს. 19 როგორც კი ინათა, ადგა მეფე და ლომების ხაროსკენ გაეშურა. 20 მივიდა მეფე ხაროსთან და ნაღვლიანი ხმით ჩასძახა დანიელს: „დანიელ, ცოცხალი ღვთის მსახურო, შეძლო ლომებისგან შენი დახსნა შენმა ღმერთმა, რომელსაც ერთგულად ემსახურები?“ 21 დანიელმა მყისვე მიუგო მეფეს: „დღეგრძელი იყავ, მეფეო! 22 ჩემმა ღმერთმა ანგელოზი გამომიგზავნა, ლომებს პირი აუკრა+ და არაფერი დაუშავებიათ ჩემთვის;+ სუფთა აღმოვჩნდი მის წინაშე; არც შენ წინაშე მიმიძღვის ბრალი, მეფეო“.

23 მეფეს ძალიან გაუხარდა და ბრძანა, დანიელი ხაროდან ამოეყვანათ. ამოიყვანეს დანიელი ხაროდან. სრულიად უვნებელი იყო იგი, რადგან თავის ღმერთზე იყო მინდობილი.+

24 შემდეგ მეფემ ბრძანა, რომ მოეყვანათ ის კაცები, რომელთაც დანიელს ბრალი დასდეს; ისინი თავიანთ ცოლ-შვილთან ერთად ლომების ხაროში ჩაყარეს. ვიდრე ძირს დაეცემოდნენ, ეცნენ ლომები და ძვლები გადაუმტვრიეს.+

25 მეფე დარიოსმა დედამიწის ყველა ხალხს, ერსა და სხვადასხვა ენაზე მოსაუბრეთ მისწერა:+ „მშვიდობა თქვენდა! 26 ვბრძანებ: ჩემი სამეფოს ყველა მხარეში დანიელის ღვთისა გეშინოდეთ,+ რადგან ის არის ცოცხალი და მარად არსებული ღმერთი. მისი სამეფო არასოდეს დაიქცევა, მისი მეფობა* სამარადისოა.+ 27 ისაა მხსნელი,+ მშველელი, ის ახდენს ნიშნებსა და საკვირველებებს ცაში და დედამიწაზე;+ მან იხსნა დანიელი ლომების ტორებისგან“.

28 ხელი ემართებოდა დანიელს დარიოსისა+ და სპარსელი კიროსის+ მეფობის დროს.