მრავალბინიან სახლებში ქადაგებისას წამოჭრილ სირთულეებთან გამკლავება

სულ უფრო მეტ ქვეყანაში კრებებს ისეთი ტერიტორიები აქვთ, რომლებიც უმეტესწილად ან მთლიანობაში დიდი და პატარა კორპუსთა კომპლექსებისგან შედგება. ზოგიერთი ტერიტორია მოიცავს მრავალფეროვან საცხოვრებელ კორპუსებს, რომელთა შორისაც არის ადვილად მისადგომი და განსაკუთრებით მდიდრული ბინები. ამიტომ ამ დანართში მოცემული რჩევები ადგილობრივი პირობების მიხედვით უნდა იქნეს გამოყენებული. დარწმუნებული ვართ, რომ აქ მოცემული ინფორმაცია დამხმარე იქნება ყველასთვის.

¹ სირთულე აშკარაა. მითითებაც მოცემულია. შეგიძლია ‘საფუძვლიანად დაამოწმო ღვთის მადლის სახარება’? (საქ. 20:21, 24, აქ). ამის გაკეთება აუცილებელია. რატომ? რადგან სამეფოს შესახებ ქადაგებისა და მოწაფეების მომზადებისთვის გამოყოფილი დრო იწურება (მათ. 24:14; 28:19, 20; 1 კორ. 7:29). ამ სირთულეში შედის ისეთი მზარდი ტერიტორიაც, რომელიც მრავალბინიან და კოოპერატიულ სახლებს მოიცავს.

² მიწის ნაკვეთის ფასების ზრდასთან ერთად, სულ უფრო მეტი კორპუსი შენდება; ზოგიერთ დიდ ქალაქში კერძო სახლებს სწრაფად ცვლის მრავალბინიანი სახლები. ჩვენთვის სირთულეს ეს წარმოადგენს: თუ როგორ ‘დავუმოწმოთ’ მრავალ ადამიანს, რომლებიც იჯარით აღებულ ბინებში ცხოვრობენ.

საჭიროა დადებითი განწყობილება

³ თუ თავს მოვარიდებთ კორპუსებში ქადაგებას, მრავალი მათგანი შეიძლება საერთოდ დაუმუშავებელი დარჩეს. მეორე მხრივ, შეიძლება საგულდაგულოდ ან ეფექტურად არ დამუშავდეს. თუმცა უნდა ვაღიაროთ, რომ ამგვარი ქადაგება ყოველთვის ადვილი არ არის და, ხშირ შემთხვევაში, ძირითადი გადასალახავი დაბრკოლება ფსიქოლოგიური ხასიათისაა.

⁴ გახსოვდეს, რომ მრავალბიანიანი სახლების მობინადრენი, ჩვეულებრივ, საშუალო ფენის წარმომადგენელი მომუშავე ადამიანები არიან, რომლებიც მრავალმხრივ გვგვანან. ხშირად ისინი ახალდაქორწინებული წყვილები არიან, რომლებსაც საშუალება არა აქვთ, საკუთარი სახლი შეიძინონ და ამიტომ კორპუსში ცხოვრებას ირჩევენ. როგორიც უნდა იყოს სიტუაცია, ყველა მობინადრეს ისეთივე სულიერი და ემოციური მოთხოვნილებები აქვს, როგორიც სხვა ადამიანებს. მაუწყებლებისთვის, რომლებმაც გადალახეს უხალისობა და გამოცდილება შეიძინეს ასეთი ბინების დამუშავებაში, ეს ტერიტორია ნაყოფიერი აღმოჩნდა. სინამდვილეში, მრავალმა მაუწყებელმა დადებითი შედეგების გამო ნამდვილი სიხარული განიცადა მრავალბინიანი სახლების დამუშავებით.

რატომ არის რთული?

⁵ რატომ ხდება უფრო რთული მრავალბინიან სახლებში ქადაგება? აი რას აღნიშნავს სახლის მეთვალყურე, რომელსაც შვიდწლიანი გამოცდილება აქვს: „დამნაშავეობისა და ძალადობის ზრდის გამო მობინადრეთა მთავარ საზრუნავს უსაფრთხოება წარმოადგენს“.

⁶ ახლად აშენებული სახლები არა მარტო საკეტით იკეტება, არამედ მეკარეც ჰყავს და/ან მეთვალყურეობისთვის დაყენებული სატელევიზიო მონიტორებიც აქვს. ეს ასეა განსაკუთრებით იმ მრავალბინიან სახლებში, სადაც მობინადრეები არიან ბინის მესაკუთრენი. ასეთი ბინების ზოგიერთმა მაცხოვრებელმა შეიძლება ჩათვალოს, რომ ჩვენი შენობაში ყოფნა საფრთხეს უქმნის სახლის უსაფრთხოებას.

⁷ უნდა გვახსოვდეს, რომ ჩვენ კეთილშობილური მოტივები გვამოძრავებს, რაც დაგვეხმარება უხალისობის დაძლევაში, როცა საქმე მრავალბინიან სახლებში ქადაგებას ეხება. ჩვენ ადამიანებისთვის არა ზიანის მიყენება, არამედ მათი დახმარება გვსურს. ჩვენი მათთან სტუმრობა მოყვასისა და ღვთისადმი ნამდვილი და პრინციპებზე დაფუძნებული სიყვარულითაა განპირობებული. ჩვენი სურვილია, რომ მობინადრეებმა დააფასონ ეს ფაქტი და მიხვდნენ, რომ არა აქვთ იეჰოვას მოწმეების შიშის მიზეზი (2 კორ. 2:17; ეფეს. 6:15).

თუ იქაურობის დატოვებას გთხოვენ

⁸ როგორ მოვიქცეთ, თუ სახლის მეთვალყურე ან დაცვა შენობის დატოვებას გვთხოვს? ჩვეულებრივ, უმჯობესია მაშინვე დაემორჩილო. როცა შესაძლებელია, გვსურს თავიდან ავიცილოთ დაპირისპირება, რასაც შეიძლება კანონის ძალით ან პოლიციის გამოძახებით მუქარა მოჰყვეს. თუ არის ამის შესაძლებლობა, შეგიძლია ტაქტიანად და გულთბილად აუხსნა მისვლის მიზანი მას, ვინც გეკითხება. „დაეთანხმე, რომ მობინადრეთა მოთხოვნების დასაკმაყოფილებლად იძულებულია, უარი გითხრას. აუხსენი, რომ გესმის მისი პრობლემა, რომ მან უნდა შეინარჩუნოს სათანადო უსაფრთხოება“, — გვირჩევს ერთი პიონერი, რომელსაც მრავალბინიან სახლებში ქადაგების დიდი გამოცდილება აქვს. ამგვარად, შეიძლება შენობაში დარჩენის ნებართვა მიიღო. ასეც რომ არ მოხდეს, თავაზიანად დაემშვიდობე (კოლ. 4:6).

⁹ გახსოვდეს, რომ მეთვალყურე, მეკარე ან დაცვა მტრად არ აღიქვა. ეს მათი სამუშაოა და, ხშირ შემთხვევაში, მათ არა აქვთ წინასწარშექმნილი უარყოფითი აზრი იეჰოვას მოწმეებზე. „მეკარე გაფრთხილებულია მობინადრეებისგან, რომ არავინ შემოუშვას“, — განმარტავს 62- ბინიანი სახლის მეთვალყურე. „ზოგ მრავალბინიან სახლში ისეთი წესია, რომ არ შეუშვან უცნობები, თუ ისინი რომელიმე მობინადრეს არ მოუწვევია“.

¹⁰ ასე რომ, შეიძლება წავაწყდეთ ისეთ შემთხვევებს, როცა მრავალბინიანი სახლის მფლობელებს იჯარის პირობებით შეუძლიათ განსაზღვრონ, თუ ვინ შეიძლება შეუშვან მობინადრეებთან და ვინ — არა. თუ მობინადრეები თანახმა არიან, რომ სახლის მეპატრონემ მათ მაგივრად მიიღოს ასეთი მნიშვნელოვანი გადაწყვეტილებები, ამით ისინი ექვემდებარებიან „საზოგადოებრივ პასუხისმგებლობას“ და ამიტომ ჩვენ არ უნდა დავიჟინოთ მათთან დაკავშირება. მიუხედავად ამისა, ეს იმას არ ნიშნავს, რომ აღარ შევეცდებით გულმოდგინედ დამოწმებას ასეთ შემთხვევებში. როგორ შეგვიძლია ასეთ სირთულეებთან გამკლავება?

გაეცანი შენს ტერიტორიას

¹¹ ისევე როგორც სხვა ნებისმიერ ტერიტორიაზე ქადაგებისას, მნიშვნელოვანი დახმარება იქნება ის, თუ გაეცნობი თითოეულ შენობაში არსებულ ვითარებას. თითოეული საცხოვრებელი სახლის კომპლექსი უნიკალურ ტერიტორიად მიიჩნიე.

¹² იცი თუ არა როგორი ხალხი ცხოვრობს გარკვეულ მრავალბინიან სახლში? პენსიონერთა სახლია? წყვილები ცხოვრობენ თუ მარტოხელები? სხვადასხვა ოჯახი ცხოვრობს ერთად? ერთი და იგივე ეთნიკური წარმოშობისაა მაცხოვრებლების უმეტესობა? ღარიბი ოჯახები ცხოვრობენ იქ, თუ ეს უსაფრთხოების რთული სისტემით აღჭურვილი სახლია, რომელშიც მხოლოდ მდიდრები ცხოვრობენ? როგორც კარდაკარ მსახურებისას უნდა ვიყოთ მოქნილნი შეთავაზებების დროს, ასევე შემგუებლობა გვესაჭიროება სხვადასხვაგვარი მრავალბინიანი სახლების დამუშავებისას.

შესვლის უფლების მოპოვება

¹³ ვერაფერი შეედრება პიროვნებასთან პირისპირ საუბარს. ეს ჩვენი პირველი ამოცანა უნდა იყოს. მრავალბინიანი სახლის ტიპიდან გამომდინარე, ერთ ან ორ მაუწყებელს შეუძლია მასში შესვლა, თუ უბრალოდ მოიცდიან ვესტიბიულში, სანამ მობინადრე არ გამოვა ან შევა იქ. ასეთ შემთხვევებში, ხშირად მათ შეიძლება კარი დაგიტოვონ ღია, რომ შენც შეძლო შენობაში შესვლა. რა თქმა უნდა, ჩვეულებრივ, ეს ასე არ ხდება გაძლიერებული უსაფრთხოების მქონე ან კოოპერატიულ სახლებში, მაგრამ ხშირად ზოგიერთ შენობაში ამგვარად შეიძლება შესვლის ნებართვის მიღება.

¹⁴ ხშირ შემთხვევაში, მაუწყებელს შეუძლია ისარგებლოს შიდა სელექტორული კავშირით, სანამ არ იპოვის ვინმეს, ვინც დაეთანხმება მას შენობაში შეშვებასა და პირადად საუბარზე. კვლავ შენობის ტიპიდან და ადგილობრივი კანონებიდან გამომდინარე, მაუწყებელს შეუძლია შემდგომ გადაინაცვლოს სხვა ბინებისკენ მას შემდეგ, რაც შესვლის ნებართვას მიიღებს. ზოგან შეიძლება გონივრული იყოს დატოვო შენობა მას შემდეგ, რაც გაესაუბრები მას, ვინც შემოგიშვა და სხვებთან დასაკავშირებლად დაბრუნდე სელექტორულ კავშირთან. ამას შესალოა მეტი დრო დასჭირდეს, მაგრამ ზოგ შენობაში ამგვარად შეიძლება პრობლემების თავიდან არიდება.

¹⁵ მნიშვნელოვანია, მრავალბინიანი სახლების შესაფერის დროს დამუშავება. რადგან ბევრ მრავალბინიან სახლში მცხოვრებ ოჯახებში ცოლიც და ქმარიც მუშაობს, სამუშაო დღეებში ბევრი არ დაგვხვდება შინ. ზოგ მობინადრეს შაბათ-კვირაობით დილით გვიანობამდე სძინავს. მაშასადამე, საღამოს პირველი საათები მშვენიერი დროა ასეთ შენობებში მსახურებისთვის, ასევე შაბათ-კვირას ნაშუადღევს. თუ მაუწყებლები ამ სახლების დამუშავებას დასვენების დღეებში დილის საათებში ცდილობენ, მათ მოუწევთ ხალხის ლოგინიდან წამოყენება, რაც უკმაყოფილებასა და დაპირისპირებას გამოიწვევდა.

¹⁶ გამოცდილებამ ცხადყო, რომ, ხშირ შემთხვევაში, მრავალბინიან სახლებში უკეთესი გამოხმაურებაა, როცა მას ცოლ-ქმარი, მშობელი და შვილი ან ორი და ამუშავებს. ბევრი რამ ადგილობრივ სიტუაციაზეა დამოკიდებული. მხედველობაში მიიღე ეს, როცა ცდილობ ისეთი შენობების დამუშავებას, სადაც ხალხი არცთუ ისე დადებითად გეხმაურება.

¹⁷ მრავალბინიანი სახლის შესასვლელში ნუ დაყოვნდები. ნაცვლად ამისა, პირდაპირ გაემართე ლიფტისკენ და იმ სართულზე ადი, რომლის დამუშავებასაც აპირებ. ეს ეჭვებს გაუფანტავს მათ, ვინც შეიძლება დაგინახა.

გარეგნობა და თავდაჭერილობა

¹⁸ ხარ თუ არა აკურატულად და სუფთად ჩაცმული ისე, როგორც ეს კეთილი ცნობის მქადაგებელს შეშვენის? ეს განსაკუთრებით მნიშვნელოვანია მრავალბინიან სახლებში ქადაგებისას, რათა თავიდან ავიცილოთ ზედმეტი დაძაბულობა ან შეკითხვები. მობინადრეებთან ქადაგებისას პიონერმა დამ ჩაცმულობასთან დაკავშირებით შემდეგი რამ შენიშნა: „გასაოცარია, მაგრამ, თუ კარგად ჩაცმული ხარ, ადამიანები მოგისმენენ. ისინი გაჩერდებიან და დამატებით დროს დაგითმობენ“.

¹⁹ მაუწყებლები, რომლებსაც დიდი და თვალში საცემი პორტფელები აქვთ, ყურადღებას იპყრობენ. ერთ-ერთმა სახლის მეთვალყურემ აღნიშნა, რა შეიძლება იფიქრონ მობინადრეებმა, როდესაც ხედავენ უცნობებს დიდი პორტფელებით ხელში: „მათ, ალბათ, გასაქურდი ინსტრუმენტები უწყვიათ ჩანთაში“. ზოგმა მაუწყებელმა შენიშნა, რომ უმჯობესია თვალში ნაკლებად საცემი ზომის ჩანთის ტარება.

²⁰ როცა ცუდი ამინდია, შესვლამდე დარწმუნდი, რომ ფეხსაცმელი სუფთა გაქვს. ისინი, ვინც ზრუნავს ბინის სისუფთავეზე, დააფასებენ ამას და ამ მხრივ მიზეზი არ ექნებათ, რომ უარი გვითხრან შესვლაზე.

²¹ გახსოვდეს, რომ მრავალბინიან სახლებში ხმა ექოს გამოსცემს. ამიტომ ხმადაბლა ისაუბრე, ხმის იმ სიმაღლით, რომ მობინადრეს კარგად ესმოდეს შენი. ორმა მაუწყებელმა ხმადაბლა უნდა ისაუბროს, რადგან სხვა მობინადრეებმაც შეიძლება მოჰკრან ყური მათ საუბარს. ერთმანეთთან საუბრისას ისაუბრეთ მშვიდად, ზომიერი ტონით. ეს არ დააეჭვიანებს სხვებს.

კარზე დაკაკუნება

²² როგორ აკაკუნებ კარზე? თუ მაუწყებელი კარზე ძალიან ხმამაღლა და მბრძანებლურად აკაკუნებს, მობინადრე შეიძლება შეშინდეს. შენობის ტიპისდა მიხედვით ზოგიერთი მაუწყებელი ამჯობინებს, რომ დერეფანში ყველა კარებზე თანმიმდევრულად არ აკაკუნოს. უმჯობესია, დერეფნის ერთ ბოლოში რამდენიმე კარზე დაკაკუნება, შემდეგ კი მაუწყებლებს შეუძლიათ დერეფნის მეორე ბოლოსკენ გაემართონ და ასეთი გადაადგილებით დაამუშაონ მთელი სართული.

²³ სანამ ზარს გამოეპასუხებიან, მრავალი ადამიანი ჯერ კარის საჭვრეტში იხედება, რომ დაინახოს, თუ ვინ აკაკუნებს. თუ შეამჩნიე ეს, როგორ უნდა მოიქცე? და, რომელსაც მრავალბინიან სახლებში ქადაგების გამოცდილება აქვს, აღნიშნავს: „თვალი გაუსწორე კარის საჭვრეტს და მაშინვე მიესალმე“. ეს მობინადრეს მიახვედრებს, რომ შენ იცი, რომ ის კართან დგას. თუ მობინადრე კითხულობს „ვინ არის?“, უბრალოდ შეგიძლია უთხრა საკუთარი და შენი თანამშრომლის სახელი. თუ, ამის მიუხედავად, მობინადრე კარს არ აღებს, შეგიძლია თავი წარუდგინო, რომ იეჰოვას მოწმე ხარ.

²⁴ „იმის მაგივრად, რომ მობინადრის მხედველობის არედან მოშორებით დავდგე, ისე ვდგები, რომ ის კარგად მხედავდეს კარის საჭვრეტიდან“, — ამბობს ერთი მაუწყებელი. „ისე ვიღიმი, თითქოს გადასაღები კამერის წინ ვდგავარ. თუ ცოლთან ერთად ვქადაგებ, მე მას ისე ვაყენებ, რომ მთლიანად გამოჩნდეს საჭვრეტში, რაც ხშირ შემთხვევაში ამშვიდებს მობინადრეს, როცა კარზე მოულოდნელად ზარის ხმა ისმის“.

მოერიდე დაპირისპირებას

²⁵ თუ მობინადრის მხრიდან წინააღმდეგობას წააწყდი და მან შეიძლება სახლის მეთვალყურეს დაუძახოს, უმჯობესია დატოვო ეს სართული და სხვა დროს დაბრუნდე. შენ შეგიძლია ჩაიწერო იმ ბინის ნომერი, სადაც მოწინააღმდეგეს შეხვდი და ეს ინფორმაცია შეიტანო უბნის ბარათში, რომ მომავალში ეს ბინა სულ ბოლოს დამუშავდეს შენობის დატოვებამდე. სხვა შემთხვევებში, სახლის მეთვალყურესთან შესაძლო დაპირისპირების თავიდან ასაცილებლად უმჯობესია დატოვო შენობა. თუ შეგიძლია მშვიდობიანად, უფათერაკოდ ქადაგება, ამით მეტ წარმატებას მიაღწევ.

²⁶ ხშირად სახლის მეთვალყურის (და ზოგი მობინადრის) უკმაყოფილებას ბინის კარებთან დატოვებული ლიტერატურა იწვევს. „თითქმის ყველა შემთხვევაში, როცა ჩვენი ძმები და დები შენობაში შესვლის ნებართვას ითხოვდნენ, იმ პირობით იღებდნენ თანხმობას, თუ ლიტერატურას გარეთ არ დატოვებდნენ. მიზეზი უბრალოა, ეს სახლის მეთვალყურის შრომას ართულებს, რადგან მან ლიტერატურა უნდა აკრიფოს ყველა სართულზე“ — წერს ერთი ძმა. ამიტომ, თუ ტრაქტატებს ან მოსაწვევ ბარათს ტოვებ კართან, სადაც არავინ დაგხვდა, უნდა იზრუნო, რომ ლიტერატურა მთლიანად შეაცურო კარქვეშ, რომ საერთოდ არ ჩანდეს.

²⁷ მოკლედ რომ ვთქვათ, ბევრი მრავალბინიანი სახლის დამუშავება, ჩვეულებრივ, შესაძლებელია, თუ სათანადო დროს ირჩევ, წინდახედულად იქცევი და ტაქტიანი ხარ.

თუ შიგნით არ გიშვებენ

²⁸ დავუშვათ, სახლის მეთვალყურე შენობაში შესვლის ნებას არ გრთავს. რა შეიძლება მოიმოქმედო? სთხოვე მობინადრეთა საფოსტო სია. ეცადე ნებართვა მიიღო, რომ რეგულარულად დატოვო ლიტერატურა შემოსასვლელში ან სამრეცხაოში, ან ბიბლიური შესწავლების შესახებ ინფორმაცია გამოაკრა მათ საინფორმაციო დაფაზე, აგრეთვე — ინფორმაცია, თუ ვის დაუკავშირდნენ. ზოგიერთ მრავალბინიან სახლში ნებადართულია მეთვალყურეობისთვის განკუთვნილი სატელევიზიო მონიტორების გამოყენება, რომ განცხადება გააკეთო კრების შეხვედრებისა და ბიბლიის შესწავლის პროგრამის შესახებ.

²⁹ ზემოხსენებული რჩევები პრაქტიკულია. ყურადღება მიაქციე, თუ რა დაკვირვება მოახდინა ერთმა სარაიონო ზედამხედველმა: „დამცავი საშუალებებით აღჭურვილი სახლების დაახლოებით 80—85 პროცენტში, სადაც ადრე დაბრკოლებას ვაწყდებოდით, გარკვეულ დათმობებზე წავიდნენ სახლის მმართველთან დაკავშირების შემდეგ“.

³⁰ დამატებითი რჩევები, თუ როგორ გაუმკლავდე დამცავი საშუალებებით აღჭურვილ შენობებში ქადაგებისას წამოჭრილ სირთულეებს:

³¹ სელექტორული კავშირის გამოყენება. მრავალბინიანი სახლის რომელიმე მობინადრესთან დაკავშირება შეიძლება ვესტიბიულში არსებული სელექტორული კავშირით. გამოიყენე მოკლე შეთავაზება, რომელშიც მოიხსენიებ შენს სათხოვარს, რომ გსურს მობინადრესთან პირადად საუბარი. თუ ის არ გიწვევს თავის ბინაში, სთხოვე, თუ შეუძლია შენთან შეხვედრა ვესტიბიულში. სხვა მაუწყებლებთან ერთად წინასწარ გაივარჯიშეთ არა მარტო ის, თუ რას ეტყვით მობინადრეს, არამედ — როგორ და რა ტონით.

³² ქუჩაში ქადაგება. მრავალბინიანი სახლის წინ ან უშუალოდ მის მახლობლად ქუჩაში ქადაგება ეფექტურია, თუ სახლის მობინადრეები სამსახურში წასასვლელად და იქიდან დასაბრუნებლად საზოგადოებრივ ტრანსპორტს იყენებენ. ეცადე, რომ ქუჩაში იქადაგო დილით და ნაშუადღევს, როდესაც ხალხი, ჩვეულებრივ, სამსახურში მიდის ან იქიდან ბრუნდება.

³³ ტელეფონით ქადაგება. მრავალბინიანი სახლის მობინადრეთა გვარები შეიძლება გაიგო ვესტიბიულში ცნობარიდან. შემდეგ კი სატელეფონო ცნობარით გაიგო მათი ტელეფონის ნომრები. თუ ეს შეუძლებელია, ჩვეულებრივ, ადგილობრივ ბიბლიოთეკაში არის იმ რაიონის ყველა სახლისა და ბინის მაცხოვრებელთა გვარების სია. შეიძლება სახელების ამოწერა და შემდეგ სატელეფონო ცნობარით ტელეფონის ნომრების მოძებნა. მობინადრეთა სახელისა და ტელეფონის ნომრის გაგების შემდეგ, ისინი შეიძლება დაიყოს სატელეფონო უბნებად სამსახურებრივი ზედამხედველის მითითებით.

³⁴ როგორც ქადაგების სხვა ნებისმიერ სფეროში, მნიშვნელოვანია გავაკეთოთ სრული და ზუსტი ჩანაწერები. ტელეფონით დაკავშირებამდე შენ უკვე ჩაწერილი უნდა გქონდეს მისი სახელი, მისამართი და ტელეფონი. ადგილი დატოვე იმისათვის, რომ ჩაინიშნო, თუ რა აინტერესებს მობინადრეს და აგრეთვე სხვა მონაცემები, აგრეთვე პირველი და მომდევნო საუბრის დროს განხილული საკითხები.

³⁵ დარეკე სათანადო დროს. ნუ დაიწყებ განუწყვეტლივ რეკვას. რამდენიმე ზარი სრულიად საკმარისი უნდა იყოს, რადგან ასეთი ბინების უმეტესობაში მაცხოვრებლებს ტელეფონი შორს არ უდგათ.

³⁶ რადგან მობინადრე, რომელსაც ტელეფონით ვესაუბრებით, ვერ გვხედავს, საჭიროა, შეძლებისდაგვარად ბუნებრივად ვესაუბროთ. როგორ? პირველ რიგში, არა მარტო სახელით, არამედ გვარითაც გააცანი თავი. სრული სახელის გამოყენება მეტ დამაჯერებლობას შემატებს ჩვენს ცნობას. მეორე მხრივ, საუბრისას ხშირად მოიხსენიე მობინადრის სახელი. მესამე, დარწმუნდი, რომ სასიამოვნოდ და სიხარულით ესაუბრები, თუმცა — ყოველთვის ზომიერად. მეოთხე, ისაუბრე უფრო ნელა და მკაფიოდ, ვიდრე ჩვეულებრივი საუბრისას. მეხუთე, ისაუბრე მოკლედ და ბიბლია საუბრის დასაწყისშივე, თუნდაც პირველივე წინადადებებიდანვე, მოიხსენიე. თუ ისინი ფიქრობენ, რომ რამის ყიდვას სთავაზობ, მაშინვე განუმარტე შემდეგნაირად: „ჩვენ არც საზოგადოებრივ კამპანიას ვეწევით ახალი წევრების მოსაზიდად და არც ფულს ვაგროვებთ, არამედ ღვთისა და მოყვასის სიყვარულით ვართ აღძრული“.

³⁷ რადგან მობინადრის სახის გამომეტყველებისა და მისი რეაქციის დანახვა არ შეგიძლია, შეეცადე ეს მისი ხმის საშუალებით ამოიცნო, რათა განსაზღვრო, თუ როგორ წარმართო საუბარი.

³⁸ როდესაც საუბრის დასასრულს მიუახლოვდები, კარგი იქნება, თუ მობინადრეს დაუსვამ რაიმე კითხვას, რომ იფიქროს ამაზე ან ეტყვი რამეს, რაც საშუალებას მოგცემს, განმეორებით დაურეკო ან პირადად მიაკითხო მას. ადამიანთა უმეტესობა თავს არიდებს უცნობის სტუმრობას, ამიტომ ამის მსგავსი დასკვნა გამოსადეგი იქნება: „ძალიან სასიამოვნო იყო თქვენთან საუბარი. თქვენ ცხოვრებაზე საინტერესო შეხედულება გაქვთ და ბიბლიისადმი თქვენი გულწრფელი ინტერესი საქებარია. ჩვენ ვეწვევით ხოლმე თქვენს მეზობლებს და შეგვეძლო შემოგვევლო და პირადად გვესაუბრა თქვენთან“.

³⁹ პასუხიდან გამომდინარე, შეგვიძლია შევთავაზოთ ლიტერატურა და ვკითხოთ, როდის იქნება მისთვის მოსახერხებელი, რომ მოვინახულოთ ლიტერატურის მისატანად. ან შეგვიძლია დაველოდოთ იმ დროს, სანამ პირისპირ არ შევხვდებით მას.

⁴⁰ ინტერესის გამოვლენის შემთხვევაში, იმის ნაცვლად, რომ ვურეკოთ, უმჯობესი იქნება, მობინადრეს პირადად შევხვდეთ პირველი ან მეორე სატელეფონო საუბრის შემდეგ. მისვლისას შეგიძლია კარზე დარეკო ზარი და უთხრა, რომ გსურს, გააცნო თავი და მოიკითხო. რაც უფრო ცოტას ილაპარაკებ სელექტორით, მით უკეთესია.

⁴¹ ტელეფონით ქადაგებას შეიძლება კარგი შედეგები მოჰყვეს, როგორც ამას ეს შემთხვევაც ცხადყოფს:

მამაკაცი, რომელიც დამცავი საშუალებებით აღჭურვილ სახლში ცხოვრობს, შემდეგნაირად გამოეხმაურა პიონერის სატელეფონო ზარს: „შეიძლება გაგეღიმოთ, მაგრამ ახლახან სერიოზულ პრობლემებს წავაწყდი ცხოვრებაში და სანამ დამირეკავდით, ვფიქრობდი, არსებობდა თუ არა ღმერთი და საერთოდ თუ ზრუნავდა კაცობრიობაზე“. მასთან დაინიშნა შეხვედრა და ჩანდა, რომ ბიბლიის შესწავლა დაიწყებოდა.

წარმატებით გაუმკლავდი სირთულეებს

⁴² ჩვენ დავალებული გვაქვს, ‘საფუძვლიანად დავამოწმოთ ღვთის მადლის სახარება’, რომ ყველა ადამიანს მივაწვდინოთ კეთილი ცნობა სამეფოს შესახებ. ბევრგან კარგი შედეგები მიიღწევა, რაც იმის მაჩვენებელია, რომ მრავალი გულმართალი ადამიანი ცხოვრობს მრავალბინიან სახლებში. თუ თავს არ მოვარიდებთ მრავალბინიან სახლებში ქადაგებას ან ზედაპირულად არ ვიქადაგებთ ასეთ ადგილებში, მაშინ ჩვენ დავამოწმებთ გულდასმით ღვთის მადლის სახარებას და თავს დავიზღვევთ, რომ ‘უბრალო ვიყოთ ყველას სისხლისაგან’ (საქ. 20:24, 26).

⁴³ ამგვარად, რადგან მრავალბინიანი სახლების რაოდენობა იზრდება, შეგიძლია სირთულეებს ოპტიმისტურად შეხვდე და საჭიროების მიხედვით მოახდინო შესაბამისი ცვლილებები? ამგვარი მოქმედებით შენ მარცხს არ განიცდი ღვთისგან ბოძებული დავალების შესრულებისას, რათა იქადაგო კეთილი ცნობა და ხალხი მოწაფეებად აქციო შენს ტერიტორიაზე, მათ შორის მრავალბინიან სახლებში მაცხოვრებლები.

[ჩარჩო 5 გვერდზე]

მრავალბინიან სახლებში ქადაგება

● მშვიდად, მაგრამ გაბედულად დააკაკუნე.

● ზომიერი ხმის ტონით ისაუბრე.

● შეთავაზება მეგობრული ტონით გააკეთე, წარუდგინე თავი.

● მალევე გადაიტანე საუბარი სულიერ საკითხზე.

● შესთავაზე ლიტერატურა, მაგრამ არა დაჟინებით.

● საფუძველი ჩაუყარე შემდგომ შეხვედრას.

[ცხრილი 6 გვერდზე]

რა უნდა გააკეთო, როცა გონიერი მაუწყებელი ასე მოიქცევა

დაემშვიდობე.

დაკავშირებაში დაგეხმაროს.