ბიბლიური შესწავლები, რომლებიც მოწაფეებს ამზადებს

¹ „რა მაბრკოლებს რომ მოვინათლო? — იკითხა ეთიოპიელმა საჭურისმა იმის შემდეგ, რაც ფილიპემ — ახარა იესოს შესახებ“ (საქ. 8:27–39). ამ შემთხვევაში საჭურისს უკვე ჰქონდა სიყვარული ღვთის მიერ შთაგონებული წერილებისადმი და ფილიპესგან სულიერი დახმარების მიღების შემდეგ უკვე მზად იყო, გამხდარიყო მოწაფე. მაგრამ ყველა ადამიანი არ არის მტკიცედ დარწმუნებული, რომ საჭიროებს საღვთო წერილის შესწავლას.

² ჩვენ დიდად მადლიერი ვართ, რადგან იეჰოვას ორგანიზაციამ შემოგვთავაზა ახალი ბროშურა „წიგნი ყველასათვის“, რომელიც აღძრავს ადამიანებს, შეისწავლონ ბიბლიური ცნობა დღეისთვის. ბროშურაში მოცემული ინფორმაცია მიმზიდველი უნდა იყოს გულწრფელი ადამიანებისთვის, რომლებიც, მიუხედავად იმისა, რომ შეიძლება განათლებულები იყვნენ, ცოტა თუ იციან ბიბლიის შესახებ. ეს შესანიშნავი ბროშურა განკუთვნილია იმისთვის, რომ აღძრას ადამიანები, მონდომებით გამოიკვლიონ ბიბლია.

³ ბიბლიის შესწავლის დაწყებისას დამხმარე იქნება საუკეთესო რჩევების განხილვა, რომლებიც მოცემული იყო 1996 წლის ივნისის „ჩვენი სამეფო მსახურების“ დანართში, თუ როგორ შეიძლება ბიბლიის ნაყოფიერი შესწავლის ჩატარება წიგნით „შემეცნება“. შესწავლის კურსის განმავლობაში გაითვალისწინე შემსწავლელის მიერ გაკეთებული პროგრესი, რათა განსაზღვრო, რომელ საკითხებშია საჭირო უფრო მეტი ყურადღების მიქცევა. გაამხნევე შემსწავლელი, წინასწარ მოემზადოს გაკვეთილებისთვის, მონახოს მუხლები. საკუთარი სიტყვებით გაკეთებული კომენტარები აირეკლავს მის გულითად მადლიერებას ჭეშმარიტებისადმი. სწრაფი პროგრესი ჩვეულებრივ მათ აქვთ, რომლებიც დამატებით კითხულობენ საზოგადოების პუბლიკაციებს და რეგულარულად ესწრებიან კრების შეხვედრებს. გაამხნევე, რომ არაფორმალურად ელაპარაკოს სხვებს შესწავლილის შესახებ. გულთბილად აჩვენე, რისი გაკეთება ესაჭიროება სულიერი პროგრესისთვის. შესწავლები განუწყვეტლივ არ უნდა ჩავატაროთ ისეთებთან, რომლებიც ყოყმანობენ. შემსწავლელებმა ინიციატივა თვითონ უნდა გამოავლინონ იმისადმი, რომ შეისწავლონ, მტკიცედ იდგნენ ჭეშმარიტების მხარეზე და ისწრაფოდნენ მიძღვნისა და მონათვლისკენ.

⁴ ზოგ ოჯახში ერთზე მეტი შესწავლა ტარდება, რადგან ოჯახის სხვადასხვა წევრები ცალ-ცალკე სწავლობენ. მაგრამ უმეტეს შემთხვევაში უკეთესია გაერთიანებული ოჯახური შესწავლა, რადგან ეს ხელს შეუწყობს ოჯახის სულიერად გაერთიანებას.

⁵ იესომ დაგვავალა, რომ წავიდეთ და მოვიმოწაფოთ ხალხი (მათ. 28:19). ამისთვის ჩვენ უნდა ჩავატაროთ ბიბლიის შესწავლები, რომლებიც დაეხმარება შემსწავლელებს, მიაღწიონ იმ მიზანს, რაზეც შეიძლება იკითხონ: „რა მაბრკოლებს რომ მოვინათლო?“