მადლიერებით გაიხსენე იესოს მიერ გაღებული გამოსასყიდი
1, 2. რატომ უნდა ვიხსენებდეთ მადლიერებით იესოს მიერ გადახდილ გამოსასყიდს?
1 იესოს მითითების თანახმად ქრისტიანები მთელ მსოფლიოში შეიკრიბებიან იესო ქრისტეს სიკვდილის გახსენების საღამოს აღსანიშნავად, რომელიც 2008 წლის 22 მარტს, შაბათს, მზის ჩასვლის შემდეგ აღინიშნება (ლუკ. 22:19; 1 კორ. 11:23—26). ამ შეხვედრაზე დასწრებისკენ ჩვენ აღგვძრავს ღრმა მადლიერების გრძნობა იმისადმი, რაც 1975 წლის წინ იეჰოვამ და იესომ ჩვენთვის გააკეთეს. იესო საშინელი ტანჯვით მოკვდა წამების ძელზე. ამ დროს მან ბოლომდე შეინარჩუნა ერთგულება და განწმინდა თავისი მამის სახელი, რითაც პასუხი გასცა სატანის გესლიან ბრალდებებს (იობ. 1:11; იგავ. 27:11).
2 იესოს დაღვრილი სისხლის საფუძველზე ძალაში შევიდა ახალი შეთანხმება, რამაც არასრულყოფილ ადამიანებს ღვთის შვილებად გახდომის შესაძლებლობა და ქრისტესთან ერთად ზეციერ სამეფოში მმართველობის იმედი მისცა (იერ. 31:31—34; მარ. 14:24). გარდა ამისა, კაცობრიობისადმი ღვთის დიდი სიყვარული აშკარად გამოვლინდა მაშინ, როცა ღმერთმა თავისი საყვარელი ძე მსხვერპლად გაიღო, რაც თავად იესომაც აღნიშნა ნიკოდემესთან საუბრის დროს (იოან. 3:16).
3. რა მხრივ იქნება მოწვეულთათვის სასარგებლო გახსენების საღამოზე დასწრება?
3 მოიწვიე სხვები: იანვრის „ჩვენი სამეფო მსახურების“ დანართში მოცემულია რჩევა იმასთან დაკავშირებით, რომ შევადგინოთ მათი სია, ვის მოწვევასაც ვაპირებთ გახსენების საღამოზე, და თითოეული მათგანი პირადად დავპატიჟოთ. დაიწყე უკვე მათი დაპატიჟება, ვინც სიაში გყავს შეყვანილი? გეგმავ, სრული მონაწილეობა მიიღო კამპანიაში, რომელიც დაიწყება 1 მარტს, რათა რაც შეიძლება მეტი ადამიანი მოიწვიო იესოს სიკვდილის გახსენების საღამოზე? დამსწრეები მოისმენენ ბიბლიაზე დაფუძნებულ მოხსენებას, რომელმაც მათში შეიძლება იესოს გამოსასყიდისადმი რწმენა განავითაროს, რაც თავის მხრივ, მარადიული სიცოცხლის მომტანია (რომ. 10:17).
4. რატომ უნდა მივიდეთ ადრე გახსენების საღამოზე?
4 ყველამ, ვისაც ამის შესაძლებლობა აქვს, შეხვედრის ადგილზე ადრე მისვლა უნდა დაგეგმოს, რათა მოწვეულ სტუმრებს გულთბილად შეხვდნენ. რამდენადაც გახსენების საღამოს ბევრი ადამიანი ესწრება, ძალიან მნიშვნელოვანია, რომ განსაკუთრებული ყურადღება მივაქციოთ ახლებს და მათ, ვინც შეხვედრებს დროდადრო ესწრება.
5. როგორ შეგიძლია განაწყო გული გახსენების საღამოსთვის?
5 განაწყვე გული: ბროშურაში „წმინდა წერილების ყოველდღიური განხილვა — 2008“ და 2008 წლის კალენდარში შესულია ბიბლიის კითხვის გეგმა გახსენების საღამოსთვის. ამ გეგმის მიხედვით ბიბლიური მონაკვეთების კითხვას 17 მარტიდან დავიწყებთ. იესოს მიწიერი ცხოვრების უკანასკნელ დღეებში განვითარებულ მნიშვნელოვან მოვლენებზე ფიქრი დაგეხმარება, განაწყო გული გახსენების საღამოსთვის (ეზრ. 7:10). ამ ბიბლიურ მონაკვეთებზე ლოცვით დაფიქრება გაგიღრმავებს მადლიერებას იეჰოვასა და მისი ძისადმი, რომლებმაც სიყვარულით გაიღეს ეს უდიდესი გამოსასყიდი (ფსალმ. 143:5).
6. რა მხრივ იქნება ჩვენთვის სასარგებლო, თუ დავაფასებთ გამოსასყიდს?
6 მოდი, რაც უფრო ახლოვდება იესოს სიკვდილის გახსენების საღამო, მით უფრო მეტი გულმოდგინებით მოვემზადოთ ამ მნიშვნელოვანი მოვლენის აღსანიშნავად და სხვებსაც დავეხმაროთ, ასე მოიქცნენ. თუ გვემახსოვრება გამოსასყიდი და დავაფასებთ მას, ეს იეჰოვასთან და მის ძესთან ურთიერთობას უფრო განგვიმტკიცებს (2 კორ. 5:14, 15). გარდა ამისა, ეს აღგვძრავს, მივბაძოთ მათ და თავგანწირული სიყვარული გამოვავლინოთ სხვების მიმართ (1 იოან. 4:11).