რატომ ვაკითხავთ დაინტერესებულებს ისევ და ისევ?
1 დაგისვია თუ არა ეს შეკითხვა შენი თავისთვის ოდესმე, თუნდაც სამქადაგებლო მსახურებისთვის მომზადებისას? ზოგ ტერიტორიაზე, რომლებიც ხშირად მუშავდება, მობინადრეები შეიძლება უკვე გვცნობენ ვინ ვართ და მაშინვე უარს გვეუბნებიან. მხოლოდ რამდენიმე გვეხმაურება დადებითად. მაგრამ მრავალი საფუძვლიანი მიზეზი გვაქვს, რატომ ვაკითხავთ დაინტერესებულებს ისევ და ისევ.
2 პირველ ყოვლისა, ჩვენთვის მითითებულია, განუწყვეტლივ ვიქადაგოთ ცნობა სამეფოს შესახებ, სანამ აღსასრული დადგება (მათ. 24:14; 28:19, 20). ესაია წინასწარმეტყველს აინტერესებდა, რამდენ ხანს უნდა გაეგრძელებინა სამქადაგებლო საქმიანობა. პასუხი, რომელიც მან მიიღო, ჩაწერილია ესაიას 6:11-ში. ყველაფერი ნათელია — მისთვის ნათქვამი იყო, რომ ისევ და ისევ უნდა მისულიყო ადამიანებთან ღვთის ცნობით. მსგავსად, მიუხედავად იმისა, რომ ისინი უარით გვისტუმრებენ, იეჰოვა მოელის ჩვენგან, რომ განუწყვეტლივ მივაკითხოთ ჩვენს უბანზე მცხოვრებთ (ეზკ. 3:10, 11). ეს არის წმინდა პასუხისმგებლობა, რომელიც მონდობილი გვაქვს ჩვენ (1 კორ. 9:17).
3 სხვა მიზეზი, თუ რატომ მივდივართ კვლავ და კვლავ, ის არის, რომ ეს გვაძლევს საშუალებას, იეჰოვასადმი თავდადების სიღრმე გამოვავლინოთ (1 იოან. 5:3). გარდა ამისა, როცა ვფიქრობთ, თუ რას უმზადებს კაცობრიობას ახლო მომავალი, როგორ შევძლებთ, თავი შევიკავოთ იმისგან, რომ სიყვარულით აღძრულებმა არ გავაფრთხილოთ ჩვენი მოყვასი? (2 ტიმ. 4:2; იაკ. 2:8). თუ ერთგულები ვიქნებით ჩვენი დავალების შესრულებაში, ეს მათ განმეორებით შესაძლებლობებს სთავაზობს, გამოეხმაურონ ღვთის ცნობას გადარჩენაზე, ასე რომ, ისინი ვერ იტყვიან, რომ არ იყვნენ გაფრთხილებულები (ეზკ. 5:13).
4 ამასთანავე, არ ვიცით, როდის მოხდება ვინმეს გულში ცვლილება. ეს შეიძლება დააჩქაროს მათი პირადი ვითარებების ცვლილებამ, ოჯახში ტრაგედიამ ან ქვეყნის პირობებმა, რაც მათ სერიოზულად დააფიქრებს თავიანთ მომავალზე. სხვა მხრივ, მათ კართან ჩვენს მიერ ნათქვამმა რამე სიტყვამ შეიძლება კეთილგანწყობილი გამოხმაურება გამოიწვიოს მათგან (ეკლ. 9:11; 1 კორ. 7:31). ადამიანები აგრეთვე საცხოვრებელ ადგილს იცვლიან. შეიძლება ახალი მოსახლეები ვიპოვოთ ჩვენს უბანზე, რომლებიც გამოეხმაურებიან კეთილ ცნობას — შესაძლოა ახალგაზრდები არიან, რომლებმაც ცალკე დაიწყეს ცხოვრება და სერიოზულად ფიქრობენ სიცოცხლის აზრზე.
5 მივაკითხავთ დაინტერესებულებს ისევ და ისევ? დიახ! ბიბლია საკმარისად აღგვძრავს, ისევ და ისევ მივაკითხოთ ადამიანებს. დასასრულს, როცა სამქადაგებლო მსახურება დამთავრდება, იეჰოვა გვაკურთხებს მსახურებაში ჩვენი უწყვეტი ძალისხმევისთვის და აკურთხებს მათ, რომლებიც მადლიერად გამოეხმაურნენ კეთილ ცნობას სამეფოს შესახებ (1 ტიმ. 4:16).