ყურადღებით მოისმინე წმინდა სიტყვები

¹ ადამიანის მიერ წარმოთქმულიდან ყველაფერი არ იმსახურებს განსაკუთრებულ ყურადღებას. მაგრამ, როცა ღმერთი ლაპარაკობს, მის მოსასმენად საფუძვლიანი მიზეზი არსებობს (რჯლ. 28:1, 2). საბედნიეროდ, მწერლებმა ღვთის შთაგონებით ჩვენ სასარგებლოდ ჩაიწერეს ‘ღვთის წმინდა სიტყვები’ (რომ. 3:2). მომავალი საოლქო კონგრესი შესანიშნავ შესაძლებლობას მოგვცემს, რომ მოვისმინოთ ეს სიტყვები, როცა მათ წაიკითხავენ და გაარჩევენ. როგორ შეგიძლია განსაკუთრებით ყურადღებიანი იყო?

² ყოველდღე დილით ადრე მიდი. წარმოიდგინე, როგორ ღელავდნენ ისრაელები, როცა მათ უთხრეს, რომ სინაის მთასთან იეჰოვას უნდა შეხვედროდნენ, რათა მისი რჯული მოესმინათ! (გამ. 19:10, 11, 16—19). თუ შენც მსგავსი განწყობილება გაქვს საოლქო კონგრესზე იეჰოვას დარიგებების მიღებასთან დაკავშირებით, ყოველდღე ადრე მისვლას დაგეგმავ. ჩვენ ვერ მოვისმენთ მთლიან პროგრამას, თუ გვიან მივალთ და სხვებს ხელს შევუშლით ადგილების ძებნის დროს. კონგრესის ჩასატარებელ ადგილზე შესვლა დილის 8 საათიდან შეიძლება, თვით პროგრამა კი ყოველდღე 9.30-ზე იწყება.

³ ისინიც კი, ვინც ადრე მიდიან, არ სხედან თავიანთ ადგილებზე პროგრამის დაწყების დროს. რატომ? ელოდებიან, როდის გამოაცხადებს პროგრამის თავმჯდომარე პირველ სიმღერას, და ამის შემდეგ წყვეტენ მეგობრებთან საუბარს და თავიანთი ადგილებისკენ მიდიან. ჩვენ ყურადღება უნდა მივაქციოთ იმას, რომ ყოველი ნაწილის პირველ სიმღერამდე, რამდენიმე წუთის განმავლობაში, სანამ ჩართულია სამეფო მელოდიები, სცენაზე თავმჯდომარე იმყოფება. ეს იმის ნიშანია, რომ ჩვენს ადგილებზე დავსხდეთ! როცა პირველი სიმღერა გამოცხადდება, ჩვენ მზად ვიქნებით იეჰოვას განსადიდებლად სხვებთან ერთად მღერით.

⁴ მთელი ოჯახით უსმინეთ. როცა შეკრებილ ისრაელებს წმინდა სიტყვებს უკითხავდნენ, ოჯახებს, „ბავშვების“ ჩათვლით, უნდა ესმინათ და ესწავლათ (რჯლ. 31:12). დაუშვებელია ჩვენს კონგრესებზე ბავშვების თავის ნებაზე ‘მიშვება’ (იგავ. 29:15). მშობლებო, შეეცადეთ მთელი ოჯახით დასხდეთ; მოზარდი შვილებიც თქვენთან ერთად ისხდნენ. ზოგ მშობელს პატარები პირველი სიმღერის დროს ტუალეტში მიჰყავს. მაგრამ ამით ბავშვები ვერ ისწავლიან, რომ სიმღერები და ლოცვები ძალიან მნიშვნელოვანია ჩვენს თაყვანისმცემლობაში. რამდენად უკეთესია, რომ ტუალეტში წასვლა, თუ შესაძლებელია, პროგრამის დაწყებამდე მოხერხდეს!

⁵ კარგად რომ მოვისმინოთ, უნდა გამოვიძინოთ და მოვერიდოთ ბევრის ჭამას დღის განმავლობაში. ყურადღება გაამახვილე, რას ამბობს მომხსენებელი. ფიქრებს ნუ გადაიტან სხვა რამეზე. მოძებნე ბიბლიაში მუხლები, რომლებიც მოხსენიებული იყო. გააკეთე მოკლე ჩანაწერები. მოხსენების დროს იფიქრე, რა თქვა მომხსენებელმა და როგორ შეგიძლია ამ მასალის გამოყენება. დღის ბოლოს ოჯახთან ერთად განიხილე პროგრამა. რომელი აზრები მოგეწონათ? როგორ შეუძლია შენს ოჯახს ამ ინფორმაციის საუკეთესოდ გამოყენება?

⁶ გამოავლინე პატივისცემა ღვთის სიტყვისადმი. კონგრესები ჩვენს მეგობრებთან საუბრისა და აღმშენებლობითი ურთიერთობით გახარების შესანიშნავ შესაძლებლობას გვაძლევს. თუ ადრე მივალთ, პროგრამის დაწყებამდე სასაუბრო დრო გვექნება. მაგრამ ზოგი პროგრამის დროსაც ლაპარაკობს და ჰგონია, რომ დიდ აუდიტორიაში ეს არავის შეუშლის ხელს. ისევე როგორც სამეფო დარბაზში შეხვედრებზე დასწრება, ეს დიდი შეხვედრებიც მოსმენის დროს წარმოადგენს. მობილური ტელეფონების, პეიჯერების, ვიდეოკამერებისა და ფოტოაპარატების გამოყენება პროგრამის დროს აკრძალულია, თუ ეს სხვებს შეუშლის ხელს.

⁷ როცა მოსე რჯულს იღებდა იეჰოვასგან, მას „პური არ უჭამია და წყალი არ შეუსვამს“ (გამ. 34:28). ამის მსგავსად, უადგილო იქნებოდა რაღაცის ჭამა ან დალევა პროგრამის მსვლელობისას. თუ ჯანმრთელობასთან დაკავშირებული სერიოზული პრობლემა არ გაწუხებს, დაელოდე, სანამ ჭამის „დრო“ მოვა (ეკლ. 3:1).

⁸ ზოგ კონგრესზე კვლავ არსებობს იმის პრობლემა, რომ მრავალი და-ძმა, აგრეთვე პატარა ბავშვები, პროგრამის დროს აქეთ-იქით დაიარებიან. მომსახურეებს დაარიგებენ, რომ სთხოვონ ასეთებს, დაუბრუნდნენ თავიანთ ადგილებს. მოხალისეები, რომლებიც სხვადასხვა განყოფილებაში მუშაობენ, უნდა დასხდნენ თავიანთ ადგილებზე სამუშაოს დამთავრებისთანავე. თუ მათ აუცილებელი სამუშაო არ დაევალებათ, ისინი თავიანთ ადგილებზე უნდა ისხდნენ და პროგრამას უსმინონ. ისინი არ უნდა შეყოვნდნენ განყოფილებებში და პროგრამის მსვლელობისას ერთმანეთს არ უნდა მიაკითხონ.

⁹ ჩვენ არასოდეს მოვისურვებთ ღვთის სიტყვის მოსმენისას „ყურმძიმე“ ადამიანებად გახდომას (ებრ. 5:11). მოდი იმით გამოვავლინოთ საკადრისი პატივისცემა, რომ ყურადღებით მოვისმენთ იეჰოვასგან მომდინარე წმინდა სიტყვებს, რომლებიც მომავალ საოლქო კონგრესზე წარმოითქმება.