რა შემთხვევაში მოემსახურება გაცნობის პერიოდი თავის მიზანს?

1, 2. როგორ იხსენებს ზოგი გაცნობის პერიოდს?

ᲮᲨᲘᲠ შემთხვევაში წყვილებისთვის გაცნობის პროცესი ძალიან სასიამოვნოა. თუ თქვენც ხვდებით ვინმეს, ალბათ, გინდათ, რომ ეს პერიოდი კარგად გაგახსენდეთ. ერთი ეთიოპიელი და სიანიa ამბობს: „მე და ჩემი მეუღლე გაცნობის პერიოდში დროს სასიამოვნოდაც ვატარებდით და სერიოზულ საკითხებზეც ვსაუბრობდით. ძალიან ბედნიერი ვიყავი, როცა მივხვდი, რომ საყვარელი ადამიანი ვიპოვე. ეს დრო ტკბილად მახსენდება“.

² ერთი დაქორწინებული ძმა, ალეშო, რომელიც ნიდერლანდებში ცხოვრობს, ასეთ რამეს აღნიშნავს: „შეყვარებულობის პერიოდში გარკვეულმა სირთულეებმაც იჩინა თავი, თუმცა მთლიანობაში ეს დრო ძალიან სასიამოვნოდ დაგვამახსოვრდა“. ამ სტატიაში სამ მხარეზე ვისაუბრებთ: სირთულეებზე, რომელსაც შეიძლება წყვილი გაცნობის პერიოდში შეხვდეს, ბიბლიურ პრინციპებზე, რომლებიც მათ სწორი გადაწყვეტილების მიღებაში დაეხმარება, და იმაზე, თუ რისი გაკეთება შეუძლიათ მათთვის კრებაში და-ძმებს.

ᲠᲐ ᲛᲘᲖᲐᲜᲘ ᲐᲥᲕᲡ ᲒᲐᲪᲜᲝᲑᲘᲡ ᲞᲔᲠᲘᲝᲓᲡ

3. რა მიზანი აქვს გაცნობის პერიოდს? (იგავები 20:25).

³ გაცნობა ძალიან მნიშვნელოვანი ეტაპია წყვილის ცხოვრებაში, რადგან ამ დროს ისეთი გადაწყვეტილება უნდა მიიღონ, რომელზეც მათი მომავალია დამოკიდებული. თუ ისინი დაქორწინებას გადაწყვეტენ, იეჰოვას აღთქმა უნდა დაუდონ, რომ სიცოცხლის ბოლომდე ეყვარებათ ერთმანეთი და პატივს სცემენ. რაკი ბიბლიიდან ვიგებთ, რომ აღთქმის დადება სერიოზული საკითხია, ამ შემთხვევაშიც ნაჩქარევად არ უნდა გადავდგათ ნაბიჯი (წაიკითხეთ იგავების 20:25). თუმცა, თუ წყვილი ურთიერთობის შეწყვეტას გადაწყვეტს, მაინც შეიძლება იმის თქმა, რომ გაცნობის პერიოდი თავის მიზანს მოემსახურა — მათ ხომ ისეთი გადაწყვეტილება მიიღეს, რაც მათ შემთხვევაში სწორი იყო.

4. რა უნდა გვესმოდეს ყველას კარგად და რატომ არის ეს მნიშვნელოვანი?

⁴ დაუქორწინებლებს კარგად უნდა ესმოდეთ, რომ გაცნობის მიზანია, გაარკვიონ, რამდენად შეეფერებიან ერთმანეთს. მათ ისიც უნდა ჰქონდეთ გააზრებული, რომ ასეთი ურთიერთობა არ უნდა დაიწყონ, თუ საერთოდ არ ფიქრობენ დაქორწინებაზე. თუმცა გაცნობის მიზანი მხოლოდ მათ კი არა, ყველას სწორად უნდა გვესმოდეს. წინააღმდეგ შემთხვევაში შეიძლება წყვილს ისე ვაგრძნობინოთ თავი, თითქოს ვალდებულები არიან, დაქორწინდნენ. რატომ არის ეს ძალიან საფრთხილო? აი რას ამბობს ერთი დაუქორწინებელი და, მელისა, რომელიც შეერთებულ შტატებში ცხოვრობს: „ხშირად და-ძმები შეყვარებულებისგან მოელიან, რომ აუცილებლად დაქორწინდებიან, რაც ძალიან დიდი წნეხია მათთვის. ამის გამო ზოგი იმ შემთხვევაშიც კი არ ამთავრებს ურთიერთობას, როცა აშკარად ხედავს, რომ ვერ ეწყობიან ერთმანეთს, ზოგიც საერთოდ უარს ამბობს ვინმესთან ურთიერთობის დაწყებაზე“.

ᲐᲮᲚᲝᲡ ᲒᲐᲘᲪᲐᲜᲘᲗ ᲔᲠᲗᲛᲐᲜᲔᲗᲘ

5, 6. რას მოიცავს ერთმანეთის ახლოს გაცნობა? (1 პეტრე 3:4).

⁵ დაკვირვების ეტაპზე, ალბათ, ბევრს გაიგებდით ერთმანეთის შესახებ. მაგრამ იმისთვის, რომ გადაწყვიტოთ, რამდენად შეგეფერებათ ადამიანი, საჭიროა, უფრო ახლოს გაიცნოთ. ეს იმას ნიშნავს, რომ გაიგოთ, როგორია მისი „შინაგანი პიროვნება“, მაგალითად, როგორი ხასიათი აქვს, როგორ აზროვნებს და როგორი ურთიერთობა აქვს იეჰოვასთან (წაიკითხეთ 1 პეტრეს 3:4). ამგვარად შეძლებთ დროთა განმავლობაში უპასუხოთ ისეთ კითხვებს, როგორებიცაა: რამდენად შემეფერება ეს ადამიანი? (იგავ. 31:26, 27, 30; ეფეს. 5:33; 1 ტიმ. 5:8); შევძლებთ ერთმანეთის ემოციურ მხარდაჭერას? ხომ არ გაგვიჭირდება ერთმანეთის ნაკლოვანებებზე თვალის დახუჭვა?b (რომ. 3:23). თუმცა ერთიცაა: მთავარი ის კი არ არის, რამდენად ჰგავხართ ერთმანეთს, არამედ ის, თუ რამდენად შეგიძლიათ ერთმანეთისთვის ანგარიშის გაწევა.

⁶ კიდევ რისი გაგებაა აუცილებელი, სანამ გრძნობები გაგიჩნდებათ? მაგალითად, უნდა გაიგოთ, რა მიზნები აქვს, როგორია მისი ფინანსური თუ ჯანმრთელობის მდგომარეობა და აქვს თუ არა მიღებული რაიმე ფსიქოლოგიური ტრავმა. ცხადია, აუცილებელი არ არის, რომ ურთიერთობის დასაწყისშივე ისაუბროთ ყველა ასეთ თემაზე (შეადარეთ იოანეს 16:12). ამიტომ თუ ზოგიერთ საკითხზე სასაუბროდ მზად არ ხართ, ნუ მოგერიდებათ ამის თქმის. თუმცა ისიც უნდა გესმოდეთ, რომ რაღაც ეტაპზე აუცილებლად მოგიწევთ გულღიად საუბარი, რათა მეორე მხარემ შეძლოს სწორი გადაწყვეტილების მიღება.

7. როგორ შეუძლია წყვილს ერთმანეთის ახლოს გაცნობა? (იხილეთ აგრეთვე სურათები და ჩარჩო „როცა ერთმანეთისგან შორს ცხოვრობთ“).

⁷ კონკრეტულად რისი გაკეთება შეგიძლიათ ადამიანის უკეთ გასაცნობად? ამისთვის საჭიროა გულახდილი საუბრები, კითხვების დასმა და ყურადღებით მოსმენა (იგავ. 20:5; იაკ. 1:19). ასეთი საუბრები შეიძლება გაგიადვილდეთ, თუ ერთად ისადილებთ, წახვალთ სასეირნოდ ხალხმრავალ ადგილებში და ერთად იმსახურებთ. ერთმანეთის უკეთ გასაცნობად კარგი იქნება, თუ დროს მეგობრებთან და ოჯახის წევრებთანაც გაატარებთ. შეგიძლიათ სხვადასხვა რამის ერთად კეთებაც დაგეგმოთ, რათა განსხვავებულ სიტუაციებში და სხვადასხვა ადამიანის გარემოცვაში დააკვირდეთ ერთმანეთს. აი როგორ იქცეოდა წინა სტატიაში მოხსენიებული ეშვინი: „მე და ალიშა ვცდილობდით, ერთად დაგვეგეგმა რაღაცების კეთება, იქნებოდა ეს სახლის საქმეები თუ საჭმლის მომზადება. ამ დროს ერთმანეთის პლუსებსაც ვხედავდით და მინუსებსაც“.

8. რატომ უნდა განიხილოს წყვილმა ერთად სულიერი საკითხები?

⁸ უკეთ რომ გაიცნოთ ერთმანეთი, მნიშვნელოვანია, რეგულარულად გამოუყოთ დრო სულიერი საკითხების ერთად განხილვასაც. მართალია, ჯერ დაქორწინებულები არ ხართ და ძმა ვერ მოირგებს ოჯახისთავის როლს, მაგრამ ბიბლიის ერთობლივი შესწავლა დაგეხმარებათ, გაიგოთ, ვის როგორი ურთიერთობა გაქვთ იეჰოვასთან. თანაც ეს ჩვევა მომავალშიც გამოგადგებათ. თუ დაქორწინებას გადაწყვეტთ, თქვენს ოჯახში ხომ იეჰოვამ უნდა დაიკავოს მთავარი ადგილი (ეკლ. 4:12). კიდევ ერთ მხარეზე ამახვილებს ყურადღებას შეერთებულ შტატებში მცხოვრები ერთი ძმა, მაქსი: „ახალი დაწყებული გვქონდა ურთიერთობა, როცა მე და ლაიზამ გადავწყვიტეთ, ჩვენს პუბლიკაციებში ერთად მოგვეძებნა ინფორმაცია გაცნობის, ქორწინებისა და ოჯახური ცხოვრების შესახებ. ასე ბევრი ისეთი თემის განხილვა შევძელით, რომლებზეც სხვა შემთხვევაში გაგვიჭირდებოდა საუბრის დაწყება“.

ᲙᲘᲓᲔᲕ ᲠᲐᲖᲔ ᲣᲜᲓᲐ ᲓᲐᲤᲘᲥᲠᲓᲔᲗ

9. როგორ უნდა განსაზღვროთ, ვის ეტყვით თქვენი ურთიერთობის შესახებ?

⁹ ვის ეტყვით. რა თქმა უნდა, ეს მხოლოდ თქვენი გადასაწყვეტია. პირველ ეტაპზე შეიძლება გადაწყვიტოთ, რომ ყველას არ უთხრათ ამის შესახებ (იგავ. 17:27). ასე ზედმეტ კითხვებსაც აირიდებთ თავიდან და იმის ალბათობაც ნაკლები იქნება, რომ ვინმეს გავლენით მიიღებთ ნაჩქარევ გადაწყვეტილებას. მეორე მხრივ, თუ არავის ეტყვით, დიდი იქნება იმის ალბათობა, რომ განმარტოვდეთ და გაგიჭირდეთ სიწმინდის შენარჩუნება. ასე რომ, ზოგი მაინც ჩააყენეთ საქმის კურსში, მაგალითად, ისეთი ოჯახის წევრები, მეგობრები ან უხუცესები, რომლებიც კარგ რჩევას მოგცემენ და მხარშიც ამოგიდგებიან (იგავ. 15:22).

10. რა დაეხმარება წყვილს, ზნეობრივი სიწმინდე შეინარჩუნოს გაცნობის პერიოდში? (იგავები 22:3).

¹⁰ როგორ უნდა შეინარჩუნოთ ზნეობრივი სიწმინდე? დროთა განმავლობაში ბუნებრივია, თუ ერთმანეთთან სიახლოვის მეტი მოთხოვნილება გაგიჩნდებათ. მაგრამ როგორ უნდა მოიქცეთ, რომ ღვთის თვალში ზნეობრივად სუფთები დარჩეთ? (1 კორ. 6:18). მოერიდეთ ყველაფერს, რამაც შეიძლება ვნება აღგიძრათ და გაგირთულოთ თავშეკავების გამოვლენა, მაგალითად, უზნეო საუბრებს, განმარტოებას და ალკოჰოლის ზედმეტად მიღებას (ეფეს. 5:3). ნამდვილად ღირს დროდადრო იმაზე საუბარი, კონკრეტულად რას გააკეთებთ ზნეობრივი სიწმინდის შესანარჩუნებლად (წაიკითხეთ იგავების 22:3). დავითი და ალმაზი, რომლებიც ეთიოპიაში ცხოვრობენ, აღნიშნავენ, თუ რა დაეხმარა მათ: „ისეთ სიტუაციებში რომ არ აღმოვჩენილიყავით, სადაც ცდუნება დიდი იქნებოდა, ყველანაირად ვერიდებოდით განმარტოებას, იქნებოდა ეს სახლში თუ მანქანაში, და ყოველთვის ისეთ გარემოში ვტრიალებდით, სადაც სხვებიც იყვნენ“.

11. კიდევ რაზე უნდა დაფიქრდეს წყვილი?

¹¹ დროთა განმავლობაში შეიძლება გადაწყვიტოთ, რომ ზომიერების ფარგლებში ერთმანეთის მიმართ სითბო გამოხატოთ. თუმცა თუ ლტოლვა გაგიჩნდათ, შეიძლება გაგიჭირდეთ გონივრული საზღვრების დადგენა (ქებ. 1:2; 2:6). თანაც იმის ალბათობაც არსებობს, რომ სითბოს გამოხატვის დროს ადვილად გადახვიდეთ ზღვარს (იგავ. 6:27). ამიტომ მნიშვნელოვანია, საწყის ეტაპზევე ისაუბროთ, რა საზღვრებს დაადგენთ, რომ იეჰოვას თვალში სიწმინდე შეინარჩუნოთ (1 თეს. 4:3—7).c ამაში შემდეგ კითხვებზე დაფიქრებაც დაგეხმარებათ: „როგორ შეიძლება აღიქვან გარშემომყოფებმა ჩვენი საქციელი? ხომ არ შეიძლება ისე მოხდეს, რომ რომელიმე ჩვენგანს გაუჭირდეს თავშეკავების გამოვლენა?“.

12. რაზე უნდა დაფიქრდეს წყვილი, თუ მათ ურთიერთობაში პრობლემები იჩენს თავს?

¹² როგორ უნდა მოაგვაროთ ურთიერთობაში წამოჭრილი პრობლემები? თუ დროდადრო უთანხმოება მოგდით, ნიშნავს ეს იმას, რომ არ შეეფერებით? მაინცდამაინც არა, რადგან არ არსებობს ისეთი წყვილი, ყოველთვის ყველაფერში რომ ეთანხმებოდეს ერთმანეთს. თუმცა ეს იმას არ ნიშნავს, რომ ისინი ბედნიერები არ არიან, რადგან იციან, როგორ მოაგვარონ პრობლემები. ამიტომ ღირს, ორივე დაფიქრდეთ: „როცა უთანხმოება იჩენს თავს, ვინარჩუნებთ სიმშვიდეს და პატივისცემით ვესაუბრებით ერთმანეთს? ვაღიარებთ ჩვენს შეცდომებს და ვცდილობთ გამოსწორებას? ვართ დამთმობები და გვიადვილდება მობოდიშება და პატიება?“ (ეფეს. 4:31, 32). თუ ამ კითხვებზე პასუხები დადებითია, დიდი ალბათობით, თქვენ შეძლებთ მტკიცე ოჯახის შექმნას. მაგრამ თუ ხედავთ, რომ გამუდმებით კამათობთ, ნაკლებად სავარაუდოა, რომ ქორწინების შემდეგ რაიმე შეიცვლება. ასეთ შემთხვევაში ორივესთვის აჯობებს, თუ დაასრულებთ ურთიერთობას.d

13. რამდენ ხანს უნდა გაგრძელდეს გაცნობის პერიოდი?

¹³ რამდენ ხანს უნდა გაგრძელდეს გაცნობის პერიოდი? ფაქტია, აჩქარება არ ივარგებს, რადგან შეიძლება ისეთი გადაწყვეტილება მიიღოთ, რომელიც სანანებელი გაგიხდებათ (იგავ. 21:5). თუმცა არც უნდა გააჭიანუროთ, რადგან „ხანგრძლივი მოლოდინი გულს ასნეულებს“ (იგავ. 13:12). თანაც დროთა განმავლობაში შეიძლება კიდევ უფრო გაგიჭირდეთ თავშეკავების გამოვლენა (1 კორ. 7:9). ასე რომ, განმსაზღვრელი დრო კი არა, ის უნდა იყოს, იცით თუ არა ერთმანეთზე ყველაფერი, რაც გადაწყვეტილების მისაღებად გჭირდებათ.

ᲠᲘᲡᲘ ᲒᲐᲙᲔᲗᲔᲑᲐ ᲨᲔᲣᲫᲚᲘᲐᲗ ᲗᲐᲜᲐᲥᲠᲘᲡᲢᲘᲐᲜᲔᲑᲡ?

14. რა დახმარების გაწევა შეუძლიათ თანაქრისტიანებს? (იხილეთ აგრეთვე სურათი).

¹⁴ თუ თქვენს სანაცნობოშიც არიან ისეთი წყვილები, რომლებიც ერთმანეთს ხვდებიან, კარგი იქნება, დაფიქრდეთ, რისი გაკეთება შეგიძლიათ მათ დასახმარებლად. მაგალითად, ხომ არ შეგიძლიათ ოჯახურ თაყვანისცემაზე დაპატიჟოთ, ერთად ისადილოთ ან სადმე გაერთოთ? (რომ. 12:13). ასე ხელს შეუწყობთ მათ, რომ სხვადასხვა სიტუაციაში გაეცნონ ერთმანეთს. იქნებ მანქანით სჭირდებათ სადმე წაყვანა, უნდათ გვერდით ჰყავდეთ ვინმე ან მშვიდი ადგილი სჭირდებათ დასალაპარაკებლად? წყვილისთვის ასეთი დახმარების აღმოჩენაც თქვენი მხრიდან ნამდვილად ღირსეული საქციელი იქნება (გალ. 6:10). თუმცა ეს პასუხისმგებლობასაც გაკისრებთ, რადგან ასეთ დროს მნიშვნელოვანია, მარტოც არ დატოვოთ წყვილი და თან განმარტოებით საუბრის შესაძლებლობაც მისცეთ (ფილ. 2:4). აი რას იხსენებს ზემოთ მოხსენიებული ალიშა: „ზოგი თანაქრისტიანი გვეუბნებოდა, რომ მათი სახლის კარი ყოველთვის ღია იყო ჩვენთვის. ეს საშუალებას გვაძლევდა, სადმე განმარტოებით გველაპარაკა, მაგრამ თან მარტოებიც არ ვყოფილიყავით. ამისთვის ძალიან მადლიერები ვიყავით“.

15. საიდან გამოჩნდება, რომ წყვილის გრძნობებს უფრთხილდებით? (იგავები 12:18).

¹⁵ თუ გვინდა, წყვილის გრძნობებს გავუფრთხილდეთ, უნდა გავაკონტროლოთ, რას ვამბობთ (წაიკითხეთ იგავების 12:18). ეს იმას ნიშნავს, რომ წინ არ გავუსწროთ მოვლენებს და მათ მივცეთ იმის შესაძლებლობა, მაშინ უთხრან სხვებს თავიანთი ურთიერთობის შესახებ, როცა თავად მოისურვებენ. ჩვენ არც იმის უფლებას მივცემთ საკუთარ თავს, რომ მათზე უარყოფითად და კრიტიკულად ვისაუბროთ (იგავ. 20:19; რომ. 14:10; 1 თეს. 4:11). ამასთანავე, თუ თავად წყვილს არ გადაუწყვეტია დაქორწინება, ჩვენ არ წამოვიწყებთ მათი ქორწინების თემაზე საუბარს და ზედმეტ კითხვებსა და კომენტარებს მოვერიდებით. ერთი ცოლ-ქმარი იხსენებს: „ძალიან უხერხულ მდგომარეობაში ვვარდებოდით, როცა ქორწილის გეგმებზე გვეკითხებოდნენ, მაშინ როცა არაფერი გვქონდა გადაწყვეტილი“.

16. როგორ უნდა მოვიქცეთ, თუ წყვილი ურთიერთობის შეწყვეტას გადაწყვეტს?

¹⁶ თუ წყვილი ურთიერთობის შეწყვეტას გადაწყვეტს, ყველანაირად უნდა მოვერიდოთ პირადი კითხვების დასმას და რომელიმე მხარის დაკავებას (1 პეტ. 4:15). აი რას ამბობს ერთი და ლეა: „ძალიან მტკენდა გულს იმის გაგება, რომ სხვები ჭორაობდნენ იმაზე, თუ რატომ დავშორდით“. კიდევ ერთი, რის გაკეთებასაც უნდა ვეცადოთ, მათ გვერდში დგომაა. ფაქტია, თუ წყვილი დაშორდა, ეს იმას არ ნიშნავს, რომ მათ არასწორი ნაბიჯი გადადგეს. პირიქით, როგორც ზემოთ აღვნიშნეთ, ეს იმაზე მიანიშნებს, რომ გაცნობა თავის მიზანს მოემსახურა. თუმცა დაშორება შეიძლება მაინც მტკივნეული ნაბიჯი იყოს და ამის შემდეგ ადამიანს მარტოობის გრძნობა დაეუფლოს. ამიტომ ყველანაირად უნდა ვეცადოთ, მხარში ამოვუდგეთ მას (იგავ. 17:17).

17. რის გასაკეთებლად უნდა იყოს წყვილი მზად?

¹⁷ როგორც დავინახეთ, გაცნობის ეტაპი შეიძლება წყვილისთვის სასიამოვნო იყოს, თუმცა გარკვეული სირთულეები ახლდეს თან. ერთი და ჯესიკა იხსენებს: „ერთმანეთი უკეთ რომ გაგვეცნო, ამან საკმაო დროც წაიღო და ენერგიაც, მაგრამ შედეგი ნამდვილად გვიღირდა ამად“. ასე რომ, კვლავაც მოახმარეთ ძალისხმევა ერთმანეთის უკეთ გაცნობას. ამ შემთხვევაში გაცნობის პერიოდი თავის მიზანს მოემსახურება და სწორ გადაწყვეტილებასაც მიიღებთ.