Mwambĩlĩĩlyo
3 Na ĩndĩ nzoka yeethĩawa yĩtũĩĩe* vyũ katĩ wa nyamũ syonthe sya kĩthekanĩ ila Yeova Ngai woombĩte. Kwoou yakũlya mũndũ mũka: “Nĩ wʼo kana Ngai aisye mũikaaye nongi ũsyao wa kĩla mũtĩ wĩ mũũndanĩ?” 2 Nake mũndũ mũka eea nzoka atĩĩ: “No tũye ũsyao wa mĩtĩ ĩla yĩ mũũndanĩ. 3 Ĩndĩ Ngai aisye ũũ ĩũlũ wa ũsyao wa mũtĩ ũla wĩ mũũndanĩ katĩkatĩ: ‘Mũikaaye nongi ũsyao wawʼo, o na mũikaaũkiite; nũndũ mweeka ũu, mũkakwʼa.’” 4 Ĩndĩ nzoka yeea mũndũ mũka: “Aiee, mũikakwʼa. 5 Nũndũ Ngai nĩwĩsĩ kana mũthenya ũla mũkaya ũsyao wawʼo, metho menyu makasalukwʼa, na mũkeethĩwa mũilye ta Ngai; mũkamanya ũseo na ũthũku.”
6 Nũndũ wa ũu, mũndũ mũka nĩwoonie kana mũtĩ ũsu waĩ mũseo kwondũ wa kũĩwa, na waĩ wa kwendeesya methonĩ, ĩĩ, waĩ mũseo kwa kũsiwʼa. Kwoou ambĩĩa kũtwʼa katĩ wa matunda maw’o na aya. Na ĩtina yĩla waĩ na mũũme, amũnenga, nake ambĩĩa kũya. 7 Nĩvo ĩndĩ masalukilw’e metho, na mamanya kana maĩ athei. Na kwoou moovany’a matũ ma mũkũyũ, na meeseũvĩsya iseko sya kwĩvwʼĩka inyunyunĩ.
8 Ĩtina, mũndũ ũsu na mũka nĩmeewie wasya wa Yeova Ngai atembeelete mũũndanĩ masaanĩ ala kweethĩawa na kĩseve kĩuĩtye,* na mũndũ ũsu na mũka wake maĩ mĩtĩnĩ ĩla yaĩ mũũndanĩ mevithĩte ũthyũ wa Yeova Ngai. 9 Na Yeova Ngai eeta mũndũ ũsu ĩngĩ na ĩngĩ, aimwĩa: “Wĩ va?” 10 Mũthya, mũndũ ũsu esa kwasya: “Nĩnĩwie wasya waku mũũndanĩ ĩndĩ nalikwa nĩ wia, nĩkwĩthĩwa nĩĩ mũthei. Na nũndũ wa ũu, neevitha.” 11 Nake Ngai amũkũlya: “Nũũ ũkwĩie wĩ mũthei? Ko ũĩe ũsyao ũla nakwĩaĩe ndũkaye?” 12 Na mũndũ ũsu asya: “Mũndũ mũka ũla ũnanengie nĩwe ũnengie ĩtunda ya mũtĩ ũsu, na kwoou naya.” 13 Na ĩndĩ Yeova Ngai amwĩa mũndũ mũka: “Yu wĩkie ata!” Nake mũndũ mũka amũsũngĩa: “Nzoka nĩyo ĩngengie, na kwoou naya.”
14 Nĩvo ĩndĩ Yeova Ngai weeie nzoka: “Nũndũ nĩwĩkie ũu, wĩ mũumanĩe katĩ wa nyamũ syonthe sya mũsyĩ na nyamũ syonthe sya kĩthekanĩ. Ũkaendaa na ĩvu yaku, na ũkaĩsaa kĩtoo mĩthenya yonthe ya thayũ waku. 15 Na ngeekĩa ũmaitha* katĩ waku na mũndũ mũka na katĩ wa ũsyao waku* na ũsyao wake.* Akatumba* mũtwe waku, naku ũkaũmĩsya* kĩtiinyo kyake.”
16 Na eea mũndũ mũka: “Ngaingĩvya mũno woo waku yĩla wĩ mũito; ũkeethĩawa na woo yĩla ũũsyaa, na ũkeethĩawa na mea maingĩ kwondũ wa mũemeu, nake akaũsumbĩka.”
17 Na amwĩa Atamu* atĩĩ: “Nũndũ nĩwĩthukĩĩisye wasya wa mũka waku, na waya ũsyao wa mũtĩ ũla nakwĩaĩe ngĩkwĩa, ‘Ndũkaaye nongi ũsyao wawʼo,’ mũthanga nĩwaumanĩwa nũndũ waku. Mĩthenya yonthe ya thayũ waku ũkaĩsaa ũsyao wawʼo na woo. 18 Nawʼo ũkameasya mĩwʼa na thangila kwondũ waku. Naku no nginya ũĩsae kuma mĩmeanĩ ĩla yĩ ĩũlũ wa nthĩ. 19 Nĩ kana ũye lĩu,* ũketaa yuutĩa na ũthyũ waku nginya yĩla wĩsyoka mũthanganĩ, nũndũ nĩ vo waumie. Nĩkwĩthĩwa wĩ kĩtoo, na ũkasyoka kĩtoonĩ.”
20 Ĩtina wa ũu, Atamu eeta mũka wake Awa,* nũndũ nĩwe waĩ atwʼĩke inyia wa onthe ala me thayũ. 21 Na Yeova Ngai atũmĩa mbũa* sya nyamũ kũseũvĩsya Atamu na mũka wake ngũa ndaasa nĩ kana mekĩe. 22 Na ĩndĩ Yeova Ngai asya: “Yu mũndũ nĩwekala ta ũmwe witũ kwa kũmanya ũseo na ũthũku. Kwoou nĩ kana ndakatambũũkye kwʼoko kwake, na aitwʼa ĩtunda kuma mũtĩnĩ wa thayũ na aiya na ayĩkala tene na tene,—” 23 Ĩtina wa ũu, Yeova Ngai nĩwamũlũngilye mũũndanĩ wa Eteni nĩ kana aĩmae mũthanganĩ vala waumiwʼe. 24 Kwoou alũngya mũndũ kuma vo, na aia ngalĩko ya wumĩlonĩ wa sua ya mũũnda wa Eteni akelũvi na ũvyũ wakanĩte mwaki weethyũũaa kĩla ngalĩko. Ũu waĩ kwondũ wa kũsiĩĩa nzĩa ya kũthi mũtĩnĩ wa thayũ.