OSHITUKULWA SHOKUKONAKONWA 23
EIMBILO 2 Jehova olo edina loye
Edina laJehova ola fimana ngahelipi kwoove?
“Omwene ta ti: ‘Onye eendombwedi dange.’” — JES. 43:10, KB-13.
ENENEDILADILO
Ohatu ka tala kutya oshike hatu dulu okuninga, opo tu ulike kutya Jehova omuyapuki nosho yo kutya Satana okwa popya oipupulu kombinga yaye.
1-2. Otu shi shii ngahelipi kutya edina laJehova ola fimana kuJesus?
EDINA laJehova ola fimanenena kuJesus. Jesus oye unene a shiivifila ovanhu edina laXe. Moshitukulwa sha tetekela, otwe lihonga kutya Jesus okwa li a halelela okufya, opo a ulike kutya Jehova omuyapuki nosho yo kutya keshe osho a ninga osha yuka. (Mark. 14:36; Heb. 10:7-9) Konima yOmido Eyovi dOkupangela kwaJesus, Jesus ota ka shunifa eenghonopangelo daye kuXe, molwaashi okwa hala Jehova oye a fimanekwe. (1 Kor. 15:26-28). Kape na omalimbililo kutya oinima aishe oyo Jesus a ningila Jehova, otai ulike kutya oku hole Jehova neenghono.
2 Jesus okwa li e uya kombada yedu medina laXe. (Joh. 5:43; 12:13) Okwa shiivifila ovashikuli vaye edina laXe. (Joh. 17:6, 26) Okwa honga medina laJehova nokwa longa oikumwifilonga medina olo. (Joh. 10:25) Jesus okwa li a pula Jehova, opo a pashukile ovahongwa vaye ‘medina laYe.’ (Joh. 17:11) Onghee ngeenge edina laJehova ola li la fimana kuJesus, ongahelipi umwe ta dulu okupopya kutya oku li omushikuli waKristus, ndele ke shii edina laXe noihe li longifa?
3. Oshike hatu ka kundafana moshitukulwa eshi?
3 Tu li Ovakriste vashili, ohatu kendabala okushikula oshihopaenenwa shaJesus notwa fimaneka edina laXe. (1 Pet. 2:21) Moshitukulwa eshi, ohatu ka mona kutya omolwashike Jehova a lukila edina laye ovo hava udifa “onghundana ei iwa yOuhamba.” (Mat. 24:14) Ohatu ka kundafana yo nghee edina laJehova li na okukala la fimana kukeshe umwe womufye.
‘OVANHU OVO TAVA IFANWA NEDINA LAYE’
4. (a) Oshike osho Jesus a li a lombwela ovahongwa vaye, ofimbo ina shuna meulu? (b) Epulo lilipi hatu ka kundafana?
4 Ofimbo Jesus ina shuna meulu, okwa li a lombwela ovahongwa vaye a ti: “Otamu ka pewa eenghono ngeenge omwa tililwa omhepo iyapuki, opo nee otamu ka yandja oundombwedi kombinga yange muJerusalem, muJudea nomuSamaria ashishe nosho yo kombada yedu alishe.” (Oil. 1:8) Onghee onghundana iwa oya li tai ka udifilwa keshe pamwe, ndele hamuIsrael ashike. Ovanhu vomoiwana aishe ova li tava ka mona omhito yokuninga ovashikuli vaJesus. (Mat. 28:19, 20) Ashike Jesus okwa ti: “Otamu ka yandja oundombwedi kombinga yange.” Mbela ovahongwa ovo vape ova li va pumbwa okulihonga kombinga yedina laJehova, ile ova li ashike tava ka ninga eendombwedi daJesus? Oiningwanima oyo ya popiwa mOilonga etukulwa 15 otai ke tu kwafela tu mone enyamukulo kepulo olo.
5. Ovayapostoli nosho yo ovakulunhu muJerusalem ova li va ulika ngahelipi kutya ovanhu aveshe ova pumbwa okushiiva edina laJehova? (Tala yo efano.)
5 Mo 49 O.P., ovayapostoli nosho yo ovakulunhu muJerusalem ova li va ongala, opo va kundafane kutya ovanhu vomoiwana imwe, ovo inava pita etanda, ova pumbwa okuninga shike, opo va tambulwe ko ve li Ovakriste. Pexulilo leenghundafana odo, Jakob, omumwaina waJesus, okwa ti: “[Petrus] okwa hepaulula nghee Kalunga a dimbuluka ovanhu vomoiwana imwe nanghee a hovela okuhoolola mokati kavo ovo tava ka ifanwa nedina laye.” Jakob okwa li a yukifa kedina lalyelye? Okwa tofa meendjovo domuprofeti Amos, a ti: “Opo ovo va xupa po nosho yo ovanhu vomoiwana aishe, ovo hava ifanwa nedina lange va konge Jehova va mana mo. Jehova osho ta ti.” (Oil. 15:14-18) Ovahongwa ovo vape kava li ashike tave ke lihonga kombinga yaJehova, ndele ova li yo tava ka ‘ifanwa nedina laye.’ Osho osha hala kutya ova li tava ka udifa kombinga yedina laKalunga nova li tava ka didilikwa mo nedina olo.
Pokwoongala kOlutuwiliki oko kwa li kwa ningwa pefimbo lovayapostoli, ovalumenhu ovo ovadiinini ova li va mona kutya Ovakriste ove na okwiifanwa nedina laKalunga (Tala okatendo 5)
6-7. (a) Omolwashike Jesus e uyile kombada yedu? (b) Oshinima shimwe shilipi vali sha fimanenena sha li sha kwatelwa mo?
6 Edina laJesus otali ti: “Jehova Omuxupifi,” na Jehova okwa longifa Jesus, opo a xupife ovanhu aveshe ovo ve na eitavelo muYe nosho mOmona waye. Jesus okwe uyile kombada yedu, opo a yandjele ovanhu omwenyo waye. (Mat. 20:28) Eshi a yandja ekulilo okwe shi ningifa tashi shiiva, opo ovanhu va dule okuxupifwa nova ka mone omwenyo waalushe. — Joh. 3:16.
7 Ndele mbela omolwashike ovanhu va li va pumbwa okuxupifwa? Omolwoshiningwanima osho sha ningwa moshikunino shaEden. Ngaashi twa kundafana moshitukulwa sha tetekela, ovadali vetu votete, Adam naEva, ova li va tukululila Jehova oshibofa, nokudja opo ova kanifa eteelelo lokukala nomwenyo fiyo alushe. (Gen. 3:6, 24) Ashike nonande ongaho, Jesus okwa li e uya kombada yedu, opo a ninge oshinima shimwe osho sha li sha fimanenena shi dulife okuxupifa ovanhu. Edina laJehova ola li la nyatekwa. (Gen. 3:4, 5) Onghee ovanhu ova li ve na okushiiva kutya Jehova ke na eshi a ninga sha puka nosho yo kutya edina laye oliyapuki. Molwaashi Jesus okwa li e lile po Jehova, nokwa shiivifila ovanhu edina laYe okwa dana onghandangala ya fimana mokuyapulifa edina laYe.
Ongahelipi omunhu ta dulu okupopya kutya oku li omushikuli waKristus, ndele ke shii edina laXe noihe li longifa?
8. Aveshe ovo va itavela muJesus ova pumbwa okushiiva shike?
8 Aveshe ovo tava ka kala ve na eitavelo muJesus, Ovajuda nosho yo ovanhu vomoiwana imwe ovo va pita etanda, ova li va pumbwa okukala ve shii odjo yexupifo lavo, sha hala okutya Xe yaJesus, Jehova Kalunga. (Joh. 17:3) Shikwao vali, ngaashi Jesus, ova li tava ka ifanwa nedina laJehova. Ova li yo va pumbwa okukala ve shii kutya osha fimana shi fike peni okuyapulifa edina olo. Exupifo lavo ola li le likolelela kwaasho. (Oil. 2:21, 22) Onghee ovashikuli aveshe vaJesus ovadiinini ova li va pumbwa okulihonga kombinga yaJehova nosho yo yaJesus. Nomolwaasho Jesus a manifa eilikano laye olo li li muJohannes etukulwa 17 neendjovo tadi ti: “Onde va shiivifila edina loye nohandi ke li shiivifa natango opo u kale u va hole ngaashi u hole nge, nondi kale nekwatafano navo.” — Joh. 17:26.
“ONYE EENDOMBWEDI DANGE”
9. Ongahelipi hatu dulu okuulika kutya otwa fimaneka edina laJehova?
9 Okutala kwaasho twa kundafana, otwa mona kutya, opo tu shikule Jesus otwa pumbwa okuyapulifa edina laJehova. (Mat. 6:9, 10) Otwa pumbwa okukala twa fimaneka edina laJehova notwa pumbwa oku shi ulika meenghatu detu. Ndele mbela oshike twa pumbwa okuninga, opo tu yapulife edina laJehova nokuulika kutya osho Satana a popya kombinga yaJehova kashi fi shoshili?
10. Oshike hatu lihongo muJesaja etukulwa 42 fiyo 44? (Jesaja 43:9; 44:7-9) (Tala yo efano.)
10 MuJesaja etukulwa 42 fiyo 44 ohatu lihongo mo kombinga yaasho hatu dulu okuninga, opo tu yapulife edina laJehova. Momatukulwa oo, Jehova okwa li a pula ovanhu ovo va li ihave mu longele, opo va yandje oumbangi ngeenge oikalunga yavo oyoshili ngoo. Ngaashi hashi ningwa momhangu, okwa li yo a pula eendombwedi, opo di yandje oumbangi kutya oikalunga oyo oyoshili ngoo. Ashike kape na nande ondombwedi imwe ya ulika kutya oyoshili! — Lesha Jesaja 43:9; 44:7-9.
Ohatu ulike meenghedi dihapu kutya fye otu li Eendombwedi daJehova (Tala okatendo 10-11)
11. Jehova okwa lombwela oshiwana shaye shike, ngaashi sha popiwa muJesaja 43:10-12?
11 Lesha Jesaja 43:10-12. Jehova okwa lombwela ovapiya vaye a ti: “Onye eendombwedi dange, . . . ndele aame Kalunga.” Jehova okwa li te va pula va nyamukule epulo tali ti: ‘Ope na tuu Kalunga kamwe ehe fi ame?’ (Jes. 44:8, KB-13) Onghee hano, otu na oufembanghenda wokunyamukula epulo olo. Okupitila meendjovo nomeenghatu detu ohatu ulike kutya Jehova oye ashike Kalunga kashili. Edina laye oli dule kokule omadina aeshe. Ohatu ulike okupitila monghalamwenyo yetu kutya otu hole shili Jehova notwa hala okukala ovadiinini kuye, kashi na nee mbudi kutya Satana ote shi ningifa shidjuu shi fike peni. Kungaho, otu na omhito yokukwafela mokuyapulifa edina laye.
12. Exunganeko olo tali hangwa muJesaja 40:3, 5 ola li la wanifwa po ngahelipi?
12 Ngeenge hatu yambidida edina laJehova, kungaho ohatu hopaenene Jesus Kristus. Jesaja naye okwa xunganeka kutya ope na umwe oo ta ka ‘longekidila Omwene ondjila.’ (Jes. 40:3, KB-13) Osho osha li sha wanifwa po ngahelipi? Johannes Omuninginifi okwa li a longekidila Jesus ondjila, oo a li e uya medina laJehova nokwa popya medina laYe. (Mat. 3:3; Mark. 1:2-4; Luk. 3:3-6) Exunganeko olo tuu olo, ola ti: “Ndele oshinge shOmwene otashi ke liholola.” (Jes. 40:5, KB-13) Osho osha li tashi ka ningwa ngahelipi? Eshi Jesus a li kombada yedu okwa li a kalela po filufilu Jehova, na Jehova okwa fa oye mwene a li kombada yedu. — Joh. 12:45.
13. Ongahelipi hatu dulu okuhopaenena Jesus?
13 Ngaashi Jesus, nafye otu li eendombwedi daJehova. Ohatu udifa kombinga yedina laJehova nokulombwela keshe umwe oo hatu shakeneke kombinga yoinenelonga yaye. Opo tu pondole moshinima sha tya ngaho, otu na yo okulombwela ovanhu onghandangala oyo Jesus a dana mokuyapulifa edina laJehova. (Oil. 1:8) Kape na oo a udifa kombinga yaJehova e dulife Jesus, nohatu shikula oshihopaenenwa shaye. (Eh. 1:5) Ndele mbela edina laJehova otali ti shike kukeshe umwe womufye?
OSHO EDINA LAJEHOVA TALI TI KUFYE
14. Ngaashi sha popiwa mEpsalme 105:3, otu uditile ngahelipi edina laJehova?
14 Otu uditile edina laJehova etumba. (Lesha Epsalme 105:3.) Jehova oha kala a hafa neenghono, ngeenge hatu litangele edina laye. (Jer. 9:23, 24; 1 Kor. 1:31; 2 Kor. 10:17) ‘Okulitangela Jehova’ osha hala okutya okukala tu uditile Jehova etumba e li Kalunga ketu. Otwe shi tala ko shi li oufembanghenda okulombwela vamwe kutya Jehova omuyapuki nosho yo kutya keshe osho ta ningi osha yuka. Inatu kala twa fya ohoni okulombwela ovanailonga vakwetu, ovanafikola vakwetu, ovashiinda shetu nosho yo vamwe kutya fye Eendombwedi daJehova! Ondiaboli oya hala tu efe po okukala hatu lombwele vamwe edina laJehova. (Jer. 11:21; Eh. 12:17) Satana nosho yo ovaprofeti vaye ovanaipupulu ova hala va ningife ovanhu va dimbwe edina laJehova. (Jer. 23:26, 27) Ashike molwaashi otu hole edina laJehova, otwa hala oku mu hafifa “efimbo alishe.” — Eps. 5:11; 89:16.
15. Osha hala okutya shike okwiifana edina laJehova?
15 Ohatu twikile okwiifana edina laJehova. (Joel 2:32; Rom. 10:13, 14) Okwiifana edina laJehova osha kwatela mo shihapu shihe fi ashike okushiiva nokulongifa edina laye. Ohatu mu shiiva nawanawa, hatu mu lineekele, nohatu kongo ekwafo newiliko kuye. (Eps. 20:7; 99:6; 116:4; 145:18) Ohatu lombwele yo vamwe edina laye nosho yo omaukwatya aye, noku va lombwela ve lidilulule nokukatuka eenghatu, opo va kale va hokiwa kuJehova. — Jes. 12:4; Oil. 2:21, 38.
16. Ongahelipi hatu dulu okuulika kutya Satana omunaipupulu?
16 Otwa halelela okumona oixuna omolwedina laJehova. (Jak. 5:10, 11) Ngeenge otwa kala ovadiinini kuJehova eshi tu li momaupyakadi, ohatu ka ulika kutya Satana omunaipupulu. Pefimbo laJob, Satana okwa li a popya oipupulu kombinga yaavo hava longele Jehova, a ti: “Omunhu ota yandje po ashishe osho e na omolwomwenyo waye.” (Job 2:4) Satana okwa li a popya kutya ovanhu otava ka longela ashike Jehova, ngeenge vehe li moupyakadi. Ashike ngeenge ova kala momaupyakadi otava ka fiya po Jehova. Job oo a li omudiinini okwa li a ulika kutya osho kashi fi shoshili. Nafye otu na oufembanghenda wokuulika kutya, kashi na nee mbudi kutya Satana ote tu etelele omaupyakadi a tya ngahelipi, itatu ka fiya po Jehova. Ohatu dulu okukala tu na elineekelo kutya Jehova ota ka twikila oku tu fila oshisho omolwedina laye. — Joh. 17:11.
17. Omonghedi imwe ilipi hatu dulu okufimaneka edina laJehova, ngaashi sha popiwa mu 1 Petrus 2:12?
17 Ohatu ulike kutya otwa fimaneka edina laJehova. (Omayel. 30:9; Jer. 7:8-11) Molwaashi otu lile po Jehova nohatu udifa kombinga yedina laye, osho hatu ningi otashi dulu okufimanekifa edina laye, ile okuhe li fimanekifa. (Lesha 1 Petrus 2:12.) Onghee hano, otwa hala okuninga ngaashi hatu dulu, opo tu fimanekife Jehova okupitila mwaasho hatu popi nomelihumbato letu. Ngeenge otwa ningi ngaho, nokuli nonande inatu wanenena, ohatu ka fimaneka edina laJehova.
18. Omonghedi vali imwe ilipi hatu dulu okuulika kutya edina laJehova ola fimana kufye? (Tala yo eshangelo lopedu.)
18 Otu udite kutya edina laJehova ola fimanenena kufye shi dulife osho ovanhu hava diladila kombinga yetu. (Eps. 138:2) Omolwashike osho sha fimana neenghono? Omolwaashi ngeenge ohatu ningi oinima oyo tai hafifa Jehova, luhapu ovanhu otashi dulika vaha kale ve i hole, ile ve tu popile mowii.a Jesus okwa li a halelela okufya efyo linyanyalifi a talika ko e li omukolokoshi, opo a fimanekife edina laJehova. Ka li ‘e na ko nasha nomasheko,’ sha hala okutya ka li te lipula unene kutya ovanhu ove mu tala ko ngahelipi. (Heb. 12:2-4) Okwa li ta yandje elitulemo kokulonga ehalo laKalunga. — Mat. 26:39.
19. Otu uditile ngahelipi edina laJehova, nomolwashike?
19 Otu uditile edina laJehova etumba noshi li oufembanghenda okwiifanwa Eendombwedi daJehova. Molwaashi edina laJehova ola fimanenena kufye, ohatu ka twikila oku mu longela, nokuli nonande ovanhu otave tu sheke. Edina laJehova ola fimanenena kufye shi dulife osho ovanhu hava diladila kombinga yetu. Onghee natu kale twa tokola toko okufimanekifa edina laJehova, kashi na nee mbudi kutya Satana ota kendabala oku tu teya omukumo. Kungaho, ohatu ka ulika kutya edina laJehova ola fimanenena kufye, ngaashi ashike la fimana kuJesus Kristus.
EIMBILO 10 Jehova Kalunga na fimanekwe!
a Nokuli nomulumenhu omudiinini Job, okwa li a hovela okukala ta diladila unene kombinga yanghee ovanhu ve mu tala ko, eshi ovalumenhu vatatu va popya kutya otashi dulika a ninga sha shapuka. Eshi Job a kanifa ovana vaye nosho yo omaliko aye, ‘ka li a nyona, ile a vele Kalunga ombedi omolwoshinima keshe shii.’ (Job 1:22; 2:10) Ashike eshi Job a li a lundilwa kutya okwa longa sha shapuka, okwa li a hovela okulipopila nokupopya “eendjovo dongaho.” Okwa li a yandja elitulemo kokupopila edina laye, ponhele yokuyapulifa edina laKalunga. — Job 6:3; 13:4, 5; 32:2; 34:5.