Tuei Tiindaŋ Hui Num te wo Yeela

1. Le yɛɛ Ebilaham ndoo nɔ yɛ mbo hiou lachi a tiindaŋndo nɔɔ maa o cho poo violɔɔ?

MI CHƐHOWA chuel Ebilaham buŋgɛi maa, sanaa o ndu niŋ o cho kaalaŋ kpou o chieeŋndo choo salaa dɔwɔɔ. (Chɛ. 15:5; 22:18) Le mɛɛ Ebilaham ndoo nɔ tiindaŋ yiŋgoloŋndo o Mɛlɛka niŋ yɛ, ndoo sina kɛsɛ maa diomnde Mɛlɛka chuel ndu leŋ le cho peelɔŋ. Mi che bɛɛ o wa niŋ wɔsilaŋ kɛmɛ, nduyɛ laa ndɔ wa niŋ wɔsila 90, kɛ ndaa vilu wɔ chua le. (Chɛ. 21:​1-7) A koŋ kpou, mi Baabuiyo dimi maa, sanaa a tiindaŋndo, Ebilaham “ndoo laalaŋ maa o cho hunɔɔ simnuŋ finyaa le kaala bɔɔbɔɔ.” (Luomaŋ. 4:18) Ŋ sina maa mi nyɛ Ebilaham ndoo nɔ tiindaŋndo le ndu wo peeluŋ. Mbo simnuŋ finyaa le po o wa niŋ chumndo le teleŋ vilɛiyo. Ndu cho yɛ Aase ni. Le yɛɛ Ebilaham ndoo nɔ yɛ tiindaŋndo maa diomnde Chɛhowa chuel ndu leŋ le cho peelɔŋ?

2. Le yɛɛ Ebilaham ndoo nɔ yɛ tiindaŋndo maa diomnde Chɛhowa mel ndu leŋ le cho peelɔŋ?

² Le mɛɛ Ebilaham ndoo nɔ chaŋyɛi kpɛɛluŋnde a Chɛhowa yɛ, “ndoo nɔ tiindaŋndo kɛsɛ maa Mɛlɛka nɔla mbo tosa nyɛ o mɛi lediom le tosaa wo.” (Luomaŋ. 4:21) Chɛhowa ndoo hini kɔl a Ebilaham, nduyɛ mbo chua ndu maa wana sakpoo o wa ni kanifuule, ndoo nɔ laalaŋndo o ndu niŋ. (Chemi. 2:23) A mɛɛ Luomaŋnda 4:18 dimi yɛ, Ebilaham ndoo nɔ laalaŋndo a tiindaŋndo. Ŋ pɛɛkuŋndɔ niko nyɛ Kiilanɔɔ Pɔɔl dimi a tiindaŋndo okɔɔ o Luomaŋnda bolle 5 niŋndo.

3. Yɛɛ Pɔɔl tɛɛsiaa yɛ a tiindaŋndo okɔɔ?

³ Mi Pɔɔl tɛɛsiaa le sabu naŋ nɔ miŋ laalaŋ kɛsɛ maa, “tiindaŋ naa hui naa le” wo. (Luomaŋ. 5:5) Mbo mala naa vɛlɛ le miŋ bii bila mɛɛ tiindaŋ naa nɔla mbo wa o kala poŋ yɛ. Te ŋ wa pɛ sɔɔŋ Pɔɔl poonyiaa o Luomaŋnda 5:​1-5 niŋndoŋ yaasiaa, yiyaŋ a yoomu numndo okɔɔ. Te a tosa hei pɛ, naapum a cho chɔ maa tiindaŋ numndo cho hiouwɔɔ lachi a kaloo poŋ. Sɔɔŋ naŋ cho yaasiaa woŋ cho num mala, ma che nyɛ ŋ nɔ ma tosa le mi tiindaŋ numndo hiou lachi a kaloo poŋ ndo, mbo hiou mɛɛ o cho suŋ suŋ yɛ. Le kandɔɔ, ŋ pɛɛkuŋndɔ a tiindaŋ sɔvɛ sɔvɛ Pɔɔl soo a ndu okɔɔ maa o hui naa le wo.

TIINDAŊ SƆVƐ SƆVƐ NAŊ NƆ WO

4. A sɔɔŋ kuɛɛ okɔɔ Pɔɔl poonyiaa yɛ o Luomaŋnda 5:​1, 2 niŋ?

⁴ Nuawɔ Luomaŋnda 5:​1, 2. O kundaa Luom ndo Pɔɔl ndoo poonyiaa diomndaŋ ndaŋ ni. Mi puaapiliaa a ndepiliaa haa pɛɛku a Chɛhowa nda Chiisu okɔɔ, ma duau laalaŋndo, nduyɛ ma simnuŋ Kilisiɔŋnda. Le hei, mi Mɛlɛka chua nda maa “wanaa sakpuaa le laalaŋ [ndaa,]” okoŋ mbo pɔya nda a nyina ndɔ diandaa. A tonya, mi Kilisiɔŋnda haa sɔla tiindaŋ sɔvɛ sɔviɔɔ. Nduyɛ kposoŋ bɛɛ tiindaŋ ndaa hoo hui niŋnda le.

5. Tiindaŋ yɛɛ Kilisiɔŋaa pɔyaŋnda nɔ yɛ?

⁵ Okoŋ kɔɔli, mi Pɔɔl poonyial vɛlɛ Kilisiɔŋaa pɔyaŋaa wa o Ɛfisɔɔ niŋnda a tiindaŋ nda sɔla veeloo wo okɔɔ. Tiindaŋ koŋ wa le nyɛm kɛndɛŋ “o chuel wanaa laalaŋnda buŋgɛi yoŋ” sɔlaa ni. (Ɛfi. 1:18) Mbo chɔm nda vɛlɛ naa nda wa fanda ndaa sɔla wa. Mbo dimul nda a ‘tiindaŋ nda nɔ le nyɛ Mɛlɛka kɛsul nda o choo choo niŋndo’ okɔɔ. (Kolo. 1:​4, 5) Mɛɛ tiindaŋ Kilisiɔŋaa pɔyaŋnda nɔ wo cho ni maa, a cho miiŋgu yoomu ma kɔ wa o choo choo niŋ, o Masaleŋ choo a Chiisu latulu.—1 Tɛsa. 4:​13-17; Sɔɔŋ. 20:6.

6. Yɛɛ puaapilɛnɔ pɔyaŋ pilɛ dimi yɛ a tiindaŋ ndɔɔ okɔɔ?

⁶ Kilisiɔŋaa pɔyaŋnda cho bɔɔ a kɔl kɛndɛ le tiindaŋ sɔvɛ nda nɔ hoo wo. Mi Kilisiɔŋnɔ pɔyaŋndo opilɛ diolaŋ Ŋgɔɔ Fɛdiliki Filaŋsi dimi a kɔl ndɔɔ kpou aa: “Tiindaŋ naa cho nyɛ kpeekpei, nyɛ o nyɛ lo niŋ kɔɔli le. Hali Kilisiɔŋnɔ Mɛlɛka mɛɛlu pɔya le mbo wa o ŋwaŋ 144,000 choo wo bɛɛ, tiindaŋ ndɔɔ cho peelɔŋ. Nduyɛ o cho peelɔŋ mbo hiou mɛɛ naŋ nɔ o kɔllɛ.” Mi Ŋgɔɔ Filaŋsi piɛi Chɛhowa o laalaŋndo choo le wɔsiŋ bɔɔbɔɔ. Nduyɛ a wɔsi 1991, mbo dimi a kɔllo kpou aa: “Tiindaŋ naa cho wɔ o sɔvɛ tau naa o hɔl. Mɛɛ naŋ hiau lachi fau a chumndo, lende koni naŋ chɔɔlu balika melaa nɔ le ndu ni. I cho bɔɔ suɛi sɔvɛ le miŋ hiou lachi a chumndo, o yɔŋ bɛɛ mbo chua wɔsilaŋ o miiliɔŋndaŋ niŋ. Suŋ suŋ, i che tiindaŋ naŋ nɔ wo o sɔvɛ mbo hiau pɛŋ maa paandu.”

7-8. Tiindaŋ kuɛɛ wanaa bɔɔbɔɔ nɔ yɛ? (Luomaŋnda 8:​20, 21)

⁷ Wanaa bɔɔbɔɔ cho hau Chɛhowa piɛiyo wa nɔ tiindaŋ cheleŋ. Tiindaŋ pilɛ koŋ kpe Ebilaham ndoo nɔ ni. Ndu cho le yoomu fafɛɛŋndo sɔlaa o lɛŋndeŋ choo o Masale Mɛlɛkaleŋ niŋ ni. (Hibu. 11:​8-10, 13) Mi Pɔɔl poonyiaa a salala wanaa nɔ tiindaŋndo hoo wa sɔla niŋndaŋ okɔɔ. (Nuawɔ Luomaŋnda 8:​20, 21.) Teleŋ tase ŋ pɛɛku a diomnde mɛyaale cho o Baabuiyo niŋ a chilaŋ okɔɔ leŋ, yɛɛ ndoo hɛnaŋ yɛ num? Baa ma handu pa kɔllo maa a cho hunɔɔ wa walaŋ nduyɛ ma fula o chɛle hakioo bɛŋgu? Ɔɔ a wa pa a kɔl kɛndɛ mɛɛ ŋ pɛɛku maa wanaa num aa kaalaa vi wa miiŋgu niŋ yoomu o kpele hɛnɛkiɔɔ niŋ o lɛŋndeŋ choo? A tonya, le mɛɛ Mɛlɛka ke naa ‘tiindaŋndo’ yɛ, ŋ cho lehɔl o nɛi le sɔɔŋ kɛndɛŋ bɔɔbɔɔ yɔŋnuŋ niŋ o chilaŋ niŋndoŋ.

⁸ O yɔŋ bɛɛ miŋ nɔ tiindaŋndo le waa yoomu lefafɛɛŋ o choo choo niŋ ɔɔ o lɛŋndeŋ choo, ŋ nɔ miŋ wa a kɔl kɛndɛ kanifuule tiindaŋ sɔvɛ sɔviɔɔ naŋ nɔ koŋ ni. Tiindaŋ naa hoo tiuba mbo chɔɔlu kalu poŋ. Nyɛ cheleŋ Pɔɔl tɛɛsiaa okoŋ kɔɔli wo chɔm mɛɛ hei yɔŋnuŋ yɛ. Ŋ pɛɛkuŋndɔ niko a nyɛ o poonyiaa a tiindaŋ naa okɔɔ wo. Hei tosaa cho naa mala miŋ chɔɔlu laalaŋ kɛsɛ maa, tiindaŋ naa cho hiouwɔɔ lachi a hindɔɔ nduyɛ o hui naa le.

TIINDAŊ NAŊ NƆ WO TIUBA MBO HINDU

9-10. A mɛɛ tamasi Pɔɔl wo chɔm yɛ, yɛɛ Kilisiɔŋnda nɔ yɛ ma wa kɔl? (Luomaŋnda 5:3) (Tofa vɛlɛ fotueilaŋ.)

⁹ Nuawɔ Luomaŋnda 5:3. Mi Pɔɔl dimi maa te tɔɔndaŋndaŋ la komal naa pɛ, mi keŋ tosa mi tiindaŋ naa chɔɔlu kalu poŋ. Naapum mi kɔndɔfillo bii naa. Kɛ o kpeekpei niŋ, ŋ nɔ miŋ kɛsiŋ o kɔl maa buɛiyaa Kilitiaa kpou, tɔɔndaŋndaŋ la cho naa komal. Ŋ tofaŋndɔ tamasi Pɔɔl wo. Mbo dimul Tɛsaloniaŋnda aa: “Teleŋ naŋ wa naa nyaa wo, mi naŋ dimul nya maa nyɛpalaa nɔ le naa komallo. Nduyɛ a mɛɛ nya sina yɛ, ndi yɔŋnuŋ hei ni.” (1 Tɛsa. 3:4) Nduyɛ mbo poonyial Tɛsaloniaŋnda aa: “Nyɛ kindilaa nda handu naa choo wo . . . ŋ ve kɔl maa ŋ cho chinda le.”—2 Kɔliŋ. 1:8; 11:​23-27.

¹⁰ Kilisiɔŋnda hau bɛɛ nɔ ma wa tɔɔndaŋndaŋ kɔl o nɛilaŋ lapum choo. (2 Timo. 3:12) Kɛ num yɛ? Baa a tusi num niŋ pa nyɛpalaa choo, le mɛɛ ŋ dɔu laalaŋndo o Chiisu niŋ ma wa ndu tolɔɔ kɔɔli yɛ? Naapum chaŋyaŋ numndoŋ, vɛlɛ a wanayaŋ numndoŋ cho num mamɔɔ le laalaŋnda numndaŋ. Kɛlɛŋgaa ma bii num biyɔɔ wɔɔŋndo. Baa a cho pa bahawɛilaŋ sɔlaa o fondaŋ num wallo, le mɛɛ ŋ kɛɛsiaŋ o kɔl le sandei chɔmndo o nyɛ o nyɛ niŋ yɛ? (Hibu. 13:18) Baa masaleŋ le cho num pa nyɛpalaa tusioo choo le mɛɛ ŋ cho acheleŋnda dimullo a tiindaŋ numndo okɔɔ yɛ? Mɛɛ mɛɛ tɔɔndaŋndaŋ la komal naa, Pɔɔl dimi maa ŋ nɔ miŋ dɔɔnuŋ nyaale. Le yɛɛ?

11. Le yɛɛ naŋ nɔ yɛ miŋ kɛɛsiaŋ o kɔl le tɔɔndaŋndo biuwɔŋndo?

¹¹ Ŋ nɔ miŋ wa a kɔl kɛndɛ te tɔɔndaŋndo komal naa pɛ kanifuule, keŋ mala naa miŋ nɔ suliŋ sɔvɛ sɔvɛ cheleŋ. Luomaŋnda 5:3 dimi aa: “Nyɛpalaa mala naa miŋ biunuŋ.” Kilisiɔŋnɔ kɛ kɛ nɔ mbo nɔ kaa biuwaŋndo kanifuule, naa kpou mi nyɛkindilaa komal naa. Ŋ nɔ miŋ kɛɛsiaŋ o kɔl le miŋ biunuŋ tɔɔndaŋ kɛ kɛ komal naa pɛ. Hei tosaa cho naa mala ni miŋ huŋ sɔla fanda cho naa lachi wo. Kposoŋ bɛɛ ŋ nɔ miŋ wa maa wanaa Chiisu soo a nda okɔɔ wa le. Mbo dimi maa waŋnda haa cho maa kuluŋ del o lɛŋnde bandilaleŋ choo wo. Mi waŋnda haa chɛl yooŋgu kɛndɔɔ a kɔl kɛndɛ, kɛ te “nyɛpalaa ɔɔ tɔɔndaŋndo” komal nda pɛ, ma vi ŋdial. (Maa. 13:​5, 6, 20, 21) I cho tonya maa, i ve bɛɛŋ bɛɛŋ le tɔɔndaŋndo ɔɔ nyɛpalaa biuwɔŋndo le, kɛ te ŋ biunuŋ ndaŋ pɛ, miŋ sɔla fulamakɔɔlila kɛndɛlaŋ tau. O nɛi kuɛɛ choo?

12. Tɔnɔla kuɛɛ naŋ sɔla yɛ, te ŋ biunuŋ pɛ tɔɔndaŋndaŋ?

¹² Mi Chemisi kindila tɔnɔla naŋ sɔla laŋ, te ŋ biunuŋ pɛ tɔɔndaŋndaŋ. Mbo poonyiaa aa: “Te la hiou pɛ lachi a biuwɔŋndo, la cho nyapila kindi poŋ. Hei cho tosa mi la bɛnda o nyɛ o nyɛ niŋ, nduyɛ tɔɔyaŋ o tɔɔyaŋ ve nya choo le.” (Chemi. 1:​2-4) Mi Chemisi tɛɛsiaa maa biuwɔŋ naa nɔ wallo tau le tosaa. O mala naa miŋ nɔ suliŋnda kɛndɛla cheleŋ, mɛɛ laalaŋndo, a tiindaŋndo dɔwɔɔ o Mɛlɛka niŋ cho nuaa yɛ. Miŋ sɔla vɛlɛ tɔnɔ sɔvɛ cheleŋ te ŋ biunuŋ pɛ tɔɔndaŋndaŋ.

13-14. Yɛɛ tɔɔndaŋndaŋ biuwɔŋndo tosallɛ naa, nduyɛ vɛɛ keŋ chiɛɛliaŋ yɛ a tiindaŋ naŋ nɔ wo? (Luomaŋnda 5:4)

¹³ Nuawɔ Luomaŋnda 5:4. Mi Pɔɔl dimi maa, biuwɔŋndo tosa mi Mɛlɛka hini kɔl a naa. Hei sim maa te ŋ biunuŋ pɛ tɔɔndaŋndaŋ, mi keŋ tosa mi Chɛhowa “hini kɔl” a naa. Kɛ i sim nuaa maa te tɔɔndaŋndaŋ ɔɔ bahawɛilaŋ la komal naa pɛ mi Chɛhowa naŋ kɔl te. I cho suɛi kɔl dɛɛniaa le sinaa maa, mi Mɛlɛka hini kɔl a naa te ŋ biunuŋ pɛ tɔɔndaŋndaŋ.—Sam 5:12.

¹⁴ Loonuŋ maa mi Ebilaham biunuŋ tɔɔndaŋnda komal ndu laŋ, nduyɛ mi keŋ tosa mi Chɛhowa hini kɔl a ndu. Mbo cha ndu maa chaaŋ ndɔ o cho ni vɛlɛ maa o cho sakpo. (Chɛ. 15:6; Luomaŋ. 4:​13, 22) Nyɛ pilɛ koŋ kpe nɔla mbo yɔŋnuŋ a naa. Mɛlɛka hini kɔl a naa le mɛɛ naŋ tosa niŋ tau o ndu piɛiyo niŋ yɛ, ɔɔ le dilakeŋnaŋnda naŋ cho tueiyɔɔ yeela laŋ te. Mbo hini kɔl a naa, te ŋ biunuŋ pɛ tɔɔndaŋnda komal naalaŋ. Naa kpou tiuba miŋ biunuŋ, mɛɛ mɛɛ naŋ nɔ wɔsilaŋ, bahawɛilaŋ, ɔɔ taasioo le sɔɔŋ tosaa. Baa tɔɔndaŋndo cho num pa choo suŋ suŋ ma wa ndu biuwɔŋndo? Te lende i cho ni, mɛɛ sina maa Mɛlɛka hini kɔl a num. Hei sinaa tiuba mi i piiliaŋ naa tau. I nɔla mi i chɔɔlu tiindaŋ naa kindi poŋ.

Ŋ NƆ MIŊ NƆ TIINDAŊ KALA KALAA

15. Yɛɛ cheleŋ Pɔɔl ndoo dimi yɛ, nduyɛ le yɛɛ kɔndɔfillo bii yɛ waŋnda apum?

¹⁵ A mɛɛ Pɔɔl tɛɛsiaa yɛ, mi Chɛhowa hini kɔl a naa te ŋ biunuŋ pɛ tɔɔndaŋnda komal naalaŋ. Tofawɔ mɛɛ o hiou lachi a tɛɛsiaa yɛ. Mbo dimi aa: “Te Mɛlɛka hini pɛ kɔl a naa, koŋ ke naa tiindaŋndo. Nduyɛ tiindaŋ naa hui naa le.” (Luomaŋ. 5:​4, 5) Naapum mi kɔndɔfillo bii waŋnda apum le hei. Le yɛɛ? Kanifuule o tasela ndɔ, mi Pɔɔl tɛɛsiaa o Luomaŋnda 5:2 niŋ maa, Kilisiɔŋnda o Luom niŋ ndaa nɔ “tiindaŋndo maa Mɛlɛka cho [nda] ke foofo filioŋndo.” A koŋ kpou, naapum mi waŋndo nyuna aa, ‘Te Kilisiɔŋaa kaŋ ndaa nɔ niŋ pɛ tiindaŋndo, mɛɛ le yɛɛ Pɔɔl soo yɛ vɛlɛ a ndu okɔɔ?’

16. Vɛɛ tiindaŋ waŋndo chɔɔlu yɛ kalu poŋ? (Tofa vɛlɛ fotueilaŋ.)

¹⁶ Ŋ tiuba miŋ bii nyɛ Pɔɔl ndoo yiyaŋndo bila, te ŋ kɛsiŋ pɛ o kɔl maa mi tiindaŋ naa chɔɔlu kalu poŋ. Le tamaseliiyo, a loonuŋ teleŋ tase ŋ tuei a tiindaŋ sɔvɛ cho o Diom Mɛlɛkaa niŋndo okɔɔ? Naapum ma yiyaŋ dɔɔ maa suɛi kɛndɛi pila i cho ni le waa yoomu lefafɛɛŋ o kpele hɛnɛkiɔɔ niŋ, kɛ kposoŋ bɛɛ keŋ tiuba mi i yɔŋnuŋ te. Kɛ mɛɛ ŋ chɔɔlu pɛɛku a Chɛhowa vɛlɛ a diomnda ndɔla mɛyaala cho o Baabuiyo niŋndaŋ okɔɔ, ma chɔɔlu tiindaŋndo nɔ kɛsɛ maa, sɔɔŋ o dimi woŋ cho peelɔŋ kpeekpei.

17. Mɛɛ ŋ yɔŋguŋ o Chɛhowa lo, vɛɛ tiindaŋ numndo hiou yɛ lachi a hindɔɔ?

¹⁷ O yɔŋ bɛɛ ma yɔŋguŋ o Chɛhowa lo nduyɛ ma sɔla yiŋɔɔ, mɛɛ ŋ hiau lachi fau a pɛɛkoo a ndu okɔɔ, lende koni ŋ simnuŋ kaasoŋnɔɔ o ndu piɛiyo niŋ ni, nduyɛ mi keŋ tosa mi tiindaŋ numndo chɔɔlu hindɔɔ. (Hibu. 5:13–6:1) Naapum nyɛ dimiŋ o Luomaŋnda 5:​2-4 niŋndo komal num niŋ. Tɔɔndaŋnda yɛ yɛlaŋ la komal num niŋ, kɛ mɛɛ ŋ biunuŋ ndaŋ, ma cha maa Mɛlɛka hini kɔl a num. Nduyɛ le mɛɛ ŋ sina maa Mɛlɛka hini kɔl a num yɛ, mi keŋ ke num tiindaŋndo maa, a cho nyɛm o chuel num buŋgɛi yoŋ sɔla. Tiindaŋ numndo cho niŋ o kala poŋ mbo hiau maa paandu. A nɔ niŋ tiindaŋndo maa sɔɔŋ Mɛlɛka mel num lediomndoŋ cho peelɔŋ kpeekpei. Sɔɔŋ o mei muŋ lediomndoŋ piliaŋ num niŋ tau. Le tamaseliiyo, ŋ piiliaŋ niŋ mɛɛ ŋ bii yoomu numndo a yuŋgu numndo yɛ, nduyɛ ŋ piiliaŋ niŋ kɛɛsiaala numndaŋ, vɛlɛ a mɛɛ ŋ cho teleŋ numndo soliŋndo kpeku yɛ.

18. Diomnda kuɛɛ Chɛhowa ke yɛ Pɔɔl nyina ndɔ diandaa le mbo poonyiaa?

¹⁸ Mi kiilanɔɔ Pɔɔl dimi vɛlɛ suɛi sɔvɛ sɔvɛi a tiindaŋ naa okɔɔ te Mɛlɛka hini kɔl a naa pɛ. Mbo dimi maa sɔɔŋ naŋ nɔ tiindaŋndo le muŋ ndoŋ cho peelɔŋ. Le yɛɛ naŋ nɔ yɛ miŋ laalaŋ maa sɔɔŋ muŋ cho peelɔŋ? Kanifuule, mi Chɛhowa ke Pɔɔl nyina ndɔ diandaa le Kilisiɔŋnda diomnda ke nda tiindaŋndo laŋ dimullo aa: “Tiindaŋ naa hui naa le. Kanifuule, nyina diandaa Mɛlɛka ke naa wo tosa ni mi kaala naŋ nɔ le Mɛlɛka wo pia naa o lakɔl cha.” (Luomaŋ. 5:5) A tonya, pesiŋ bɛɛ ŋ nɔ kiisaŋ kɛ kɛ a tiindaŋ naa hoo okɔɔ le.

19. Tiindaŋ yɛɛ naŋ nɔ yɛ miŋ nɔ?

¹⁹ Yiyaŋndɔ a diomnde mɛyaale Chɛhowa ndoo chuel Ebilaham ndeŋ, vɛlɛ a mɛɛ ndoo hini kɔl a ndu, nduyɛ mbo chua ndu maa chaaŋ ndɔ yɛ okɔɔ. Tiindaŋ Ebilaham ndoo nɔ wo hui ndu le. Baabuiyo dimi aa: “Mi Ebilaham hiau lachi a biuwɔŋndo, okoŋ mbo sɔla nyɛ Mɛlɛka chuel ndu buŋgɛiyo.” (Hibu. 6:15; 11:​9, 18; Luomaŋ. 4:​20-22) A tonya, mi sɔɔŋ Ebilaham ndoo nɔ tiindaŋndo le muŋ ndoŋ peeluŋ. Num bɛɛ tiuba ma nɔ laalaŋndo kɛsɛ maa, te a lo pɛ o laalaŋ numndo choo, sɔɔŋ ŋ nɔ tiindaŋndo le muŋ ndoŋ cho peelɔŋ. A nɔ sabulaŋ tau le ma dɔɔnuŋ nyaale le tiindaŋ numndo kanifuule, a sina maa sɔɔŋ ŋ nɔ tiindaŋndo le muŋ ndoŋ cho peelɔŋ, nduyɛ kposoŋ bɛɛ tiindaŋ numndo hui num niŋ te. (Luomaŋ. 12:12) Mi Pɔɔl poonyiaa aa: “Maa Mɛlɛka yɔŋgu tiindaŋndo wo tosa mi la wa a nyaale, nduyɛ mi la wa a kɔl nyulu le mɛɛ nya tiindaŋ ndu yɛ. Maa nyina diandaa tosa mi tiindaŋ nyaa chɔɔlu kalu fɔ!”—Luomaŋ. 15:13.