KHANI YOFUNJEDA 49
Kodi Yehova Unosomeda Mapempelwanga?
“Munoza muitane wa miyo koma teto munoza mupempele wa miyo ndipo miyo ndinoza ndiuvuruwaneni.” — YER. 29:12.
NYIMBO 41 Mulungu Imvani Pemphero Langa
VYEVYO NINAFUNJEDE IYOa
1-2. Chin’ni inanipangi-e ganiza ira Yehova kanasomeda mapempelwi-u?
“SANGALALA mwa Yehova teto unoza auva-e vyokumbwa vya murimao.” (Sal. 37:4) Leli tilonjezo losangalasa vinjinji! Koma kodi ninaembekezela ira Yehova unokoza niva-a thawi ineyo vyevyo ninamuvepa iyo? Chifukwa n’ni ninavifuka fuso leli? Kaganizelani visazo vi. Murongola unavepa ira avolowe Sukulu ya Akiristu Olaleela vya Umwene. Koma chaka dinakeda vira ndipo kanaitaniwa. M’bali waizombwe unavepa Yehova ira amuchili-e marendae alukulu ira atumikelenga pamapama mupingo, koma kanachila. Makolo kanapempelela mwaniwa ira apitilize kala mu choonadi koma mwanoyo unasakula iya tumikela Yehova.
2 Mwina teto nyo moovepa Yehova vimo-i viwa vyene koma kamusomediwe mpakana vano. Vyevi kaviupangi-eni ganiza ira Yehova unosomeda mapempelo a athu amo-iwa ookala enyu. Mwina munokoza ganizanga ira mulakwi-a vimo-i viwa vyene. Murongola m’mo-iwa zina lae Janiceb oovwavo eno. Liye na mamunae kapempela ira kaze kadowe wu Beteli. Janice aongile ira: “Ndoororomela ira ninoitaniwa wu Beteli va-anavire thawi indendai.” Koma banjali kaliitaniwe ndipo chaka dakeda vira. Murongolola aongile ira: “Ndookumudwa vinjinji ndipo ndoosokonezeya. Ndavifuka ira kodi ndimulakwele n’ni Yehova? Ndikala ndipempelanga wathawi indendai ira ndidowe wu Beteli. Ndiye chifukwa n’ni kanasomeda pempelo langa?”
3. Kodi ninakambilana n’ni mukhanila?
3 Thawi dimo-i ninokoza kaikelanga ngati Yehova unavuruwana mapempelwi-u. Athu amo-iwa ororomeleya awale kaganiza teto eno. (Yob. 30:20; Sal. 22:2; Hab. 1:2) Chin’ni inaukami-eni ira kamukaikelenga ira Yehova unoza asomede mapampelwinyu? (Sal. 65:2) Ira nisomede fusoli yowambeela tiyemoni nikambilane makundo o-arelala: (1) Kodi ninaembekezela ira Yehova unapanga vyoi avi? (2) Kodi Yehova unaembekezela ira nipange n’ni? (3) Chifukwa n’ni ninafuneya chenja vyongo vyevyo ninavepa iyo?
KODI NIEMBEKEZELENGA IRA YEHOVA UNAPANGA VYOI AVI?
4. Mogwilizana na Yeremiya 29:12, kodi Yehova unalonjeza ira unaza apanga n’ni?
4 Yehova oolonjeza ira unerenga someda mapempelwi-u. (Welengani Yeremiya 29:12.) Mulungwi-u unokonda atumikae ororomeleya. eno kananyalanyaze mapempelwiwa. (Sal. 10:17; 37:28) Koma vi kavinatanthauza ira unerenga niva-a iliyetene ineyo ninamuvepe iyo. Ninafuneya dedi-edela mpakana muilambo isha ira nize niwachele vyongo vimo-i vyevyo ninavepa iyo.
5. Kodi Yehova unaganizela vya n’ni vosomeda mapempelwi-u? Fotokozani.
5 Yehova unosomeda mapempelo a athu mogwilizana na yolinga yae. (Yes. 55:8, 9) Mbali imo-i ya yolinga yae choi vailambo yavati vakale athu osangalala, ogwilizana koma teto ovwela ulamulilwae. Koma Satana unaonga ira athu kanokoza sangalalanga ngati kanavilamulela ekiwa. (Gen. 3:1-5) Vofuna tonyi-eda ira vyevyo Satana unaonga liye pivyonama, Yehova oolola ira athu kavilamulelenga. Koma ulamulilo wa athu uwambeeli-a mavuto anjinji anayo ninagumanana iyo malambwano. (Nam. 8:9) Ninoiziwa teto ira Yehova kanamali-e mavuto etene vathawiila. Apanga vyevi, athu amo-iwa kanokoza onganga ira ulamulilo wa athu ngokami-a ndipo unokoza mali-a mavuto a athu.
6. Chifukwa n’ni kaninafuneya kaikela ira thawi detene Yehova unoza apange vyongo mwachikondi koma teto mwachilungamo?
6 Mapempelo kanokoza kala ofwanafwana koma Yehova unokoza asomeda mundila do-iyana. Mwaisazo, Mwene Hezekiya angabulele vinjinji oovepa Yehova ira amuchili-e ndipo Yehova oomuchili-a. (2 Mam. 20:1-6) Koma mtumwi Paulo oovepa Yehova ira amuchosele minga muthuthu, ineyo mwina yali irenda imo-iwene. Koma Yehova kaachosile vuto laelo. (2 Akor. 12:7-9) Isazo imo-iwa cha mtumwi Petulo na Yakobo. Etene anala kaembekezela phiwa na Mwene Herode. Mpingo oopempelela Petulo ndipo mwina koopempelela teto Yakobo. Koma Yakobo oophiwa pomwe Petulo oomasuliwa mundila yodabwi-a. (Vyo. 12:1-11) Ndiye ninokoza dabwanga ira, ‘Chifukwa n’ni Yehova avulumuchile Petulo koma Yakobo mu-iya ira aphiwe?’ Baibulo kalinafotokoza chifukwa iwa.c Koma ineyo ninaiziwa iyo choi thawi detene Yehova unopanga vyongo mwachilungamo. (Doto. 32:4) Koma teto ninoiziwa ira liye oosangalala na etene ambin’li. (Chiv. 21:14) Thawi dimo-i vyongo vyevyo kaninaviembekezela pivyevyo vinaireecha. Koma voi ninororomela ira thawi detene Yehova unosomeda mapempelo a athu mwachikondi koma teto mwachilungamo, kaninakaikela ndila dedo unasakula liye vosomeda mapempelwi-u. — Yob. 33:13.
7. Kodi ninafuneya pewa n’ni, nanga chifukwa n’ni?
7 Ninafuneya pewa viyelekezela na athu amo-i. Mwaisazo, ninokoza vepa Yehova ira anikami-e va vyongo vimo-i koma vyongovyo o-oireya. Vanduli viwa ninokoza vwa ira muthu m’mo-iwa uvepa teto vyevyo ndipo vinaoneya ira Yehova umusomeda. Vyoi enivi vyooireelavo murongola m’mo-iwa zina lae Anna. Mamunae zina lae Matthew, oobulela khansa ndipo liye oopempela ira achile. Vathawi ineyo vookala teto arongola ambin’li achikulile anayo kabulela khansa. Anna oopempelela vinjinji mamunae koma teto arongola ambin’lala. Arongolala koochila koma Matthew ootatiya. Vowambeela Anna aganiza ira Yehova akami-ile arongola ambin’lala ira kachile. Ngati vili eno, chifukwa n’ni Mulungu kaasomedile mapempelwae oyi mamunae achile? Kaninaonge ineyo yakami-ile arongola ambin’lala ira kachile. Koma ineyo ninaiziwa iyo choi Yehova ukoza ndila yoi aze amali-e mavuto etene a athu ndipo unofunechecha venyi-a afwae anayo katatiile. — Yob. 14:15.
8. (a) Mogwilizana na Yesaya 43:2, kodi Yehova unanikami-a avi? (b) Kodi pempela unanikami-e avi nagumana na mavuto alukulu? (Onelani vidiyo yoi Pemphero Limatithandiza Kupirira.)
8 Yehova unoza apitilize nithandiza thawi detene. Liye ngu Babi-u wachikondi ndipo kanasangalala aniona nivuteyanga. (Yes. 63:9) Komave liye kananiteteza wu mavuto etene anayo ninagumanena iyo, anayo kali ngati mi-inje kapena lumi la mulo. (Welengani Yesaya 43:2.) Ngakale vili eno, liye unonilonjeza ira unoza anikami-e ‘vira,’ kapena ira vilela vyongo ngati vyevi. Liye kanaza alola ira mavuto kanilepeli-e kalave ororomeleya wa liye. Yehova unoniva-a teto zimwae owela unoyo ngu kopolo ira unikami-e vilela. (Luka 11:13; Afil. 4:13) Eno kaninakaikela ira ninoza nikale na vyetene vyevyo ninafuneya iyo ira nivilele koma teto nikalave ororomeleya wa liye.d
KODI YEHOVA UNAEMBEKEZELA IRA NIPANGENGA N’NI?
9. Mogwilizana na Yakobo 1:6, 7, chifukwa n’ni ninafuneya roromela ira Yehova unoza anikami-e?
9 Yehova unoembekezela ira nimuroromelenga. (Aheb. 11:6) Thawi dimo-i mavutwi-u kanokoza oneya alukulu moi kaninawande avilela. Mwina teto ninokoza kaikelanga ngati Yehova unanikami-e. Koma Baibulo linonisimikizela ira na kopolo da Mulungu ninokoza ‘gwela khoma.’ (Sal. 18:29) Eno m’malo mokaikela, ninafuneya pempela na iroromelo yetene ira asomede mapempelwi-u. — Welengani Yakobo 1:6, 7.
10. Pelekani isazo yotonyi-eda mwemo ninapangele iyo vyongo mogwilizana na mapempelwi-u.
10 Yehova unoembekezela ira nipangenga vyongo mogwilizana na mapempelwi-u. Mwaisazo, m’bali unokoza vepa Yehova ira amukami-e vevo unavepa liye abwanae ira afwanyeye usonkano wachigawo. Kodi Yehova unasomede avi pempelo leli? Liye unokoza mukami-a m’baliyo ira alimbe murima dowa onga na abwanae. Koma m’baliyo unafuneya panga vyongo mogwilizana na pempelolo vodowa wa abwanayo dowa vepa. Mwina teto unofuneya vepa abwanayayo moweli-edaweli-eda. Unokoza teto vepa fwae uchitowo ira kachenjane thawi yo-indela chitweyo. Thawi dimo-i unokoza teto vepa ira kava-iwe ndalama dambo lelo aa-indile liye chito.
11. Chifukwa n’ni ninafuneya pempela moweli-edaweli-eda vya vuto limo-iliwa lene?
11 Yehova unoembekezela ira nipempelenga moweli-edaweli-eda nagumana na mavuto. (1 Ates. 5:17) Vyevyo Yesu aongile liye vinotonyi-eda ira thawi dimo-i kaninava-iwe thawi ineyo vyevyo nivepile iyo. (Luka 11:9) Eno kamutatile murima. Mupempelengave kumela vati va murima koma teto moweli-edaweli-eda. (Luka 18:1-7) Napempelanga moweli-edaweli-eda ninomutonyi-eda Yehova ira khaniyo chofuneya vinjinji wa iyo. Ninomutonyi-eda ira ninomuroromela vinjinji ira unonikami-eda.
CHIFUKWA N’NI NINAFUNEYA CHENJA VYONGO VIMO-I VYEVYO NINAVEPA IYO?
12. (a) Kodi tifuso liivi lelo ninafuneya iyo vifuka vakhani ya vyevyo ninavepa iyo, nanga chifukwa n’ni? (b) Kodi mapempelwi-u kanatonyi-ede avi ira ninolemekeza Yehova? (Onani bokosi loi, “Kodi Vyevyo Ndinavepa Miyo Vinotonyi-eda Ira Ndinolemekeza Yehova?”)
12 Ngati vyevyo ninavepa iyo kavinaireya ninafuneya vifuka mafuso aralu. Fuso lowambeela ti loi, ‘kodi vyevi ndinavepa miyovi pivyofwanelela?’ Thawi dinjinji athu kanaganiza ira ninavepa iyo pivyofwanelela wa iyo koma vyevyo vinavepa iyo vinokoza kala vyo-okami-a kwenikweni. Napempelelanga vuto limo-iliwalene, vinokoza kala ndila imo-i yapama yomali-edela vutolo iyana na mwemo ninavepela iyo. Ndipo vyongo vimo-i vyevyo vinavepe iyo vinokoza kala vyo-ongwilizana na vyevyo Yehova unafuna liye. (1 Yoh. 5:14) Mwaisazo, kaganizelani vya makolo anayo niaromolile iyo owambeela ule. Aliwa koovepa Yehova ira mwaniwa apitilizeve kala mu choonadi. Vyeyvo kanavepaathuvi vinokoza oneya ngati vyofwanelela. Koma Yehova kanakanyi-eda muthu uliwetene ira amutumikelenga. Unafuna ira uliwetene asakulenga mutumikela, ngakale teto a-ima. (Doto. 10:12, 13; 30:19, 20) M’malo mwiwa makolwayo kanokoza vepa Yehova ira aakami-e ira kafiyenga vamurima mwanioyo na yolinga yoi akondenga Yehova koma teto kalanae vausamwali. — Miya. 22:6; Aife. 6:4.
13. Mogwilizana na Aheberi 4:16, kodi piva thawi iivi vevo Yehova unanikami-e liye? Fotokozani.
13 Funso lanambili lelo ninavifuke iyo ti loi, ‘Kodi ila chithawi yoi Yehova andiva-e vyevyo ndimuvepile miyo?’ Mwina ninokoza funa ira Yehova anisomede mapempelwi-u muthawi ineyo. Koma vyoona pivyoi Yehova unoiziwa thawi yapama yoi anikami-e. (Welengani Aheberi 4:16.) Ngati kaniva-iwe thawi ineyo vyevyo nivepile iyo, mwina ninokoza onanga ira Yehova ukowonda vyevyo nimuvepile iyovyo. Koma mwina vinokoza kala ira liye usomeda ira, ‘Dedi-ani kaye.’ Isazo ngu m’bali waizombwe unoyo nimuromolile iyo, unoyo avepile ira achili-iwe ngati Yehova amuchili-e mudabwi-a Satana unokoza onga ira m’baliyo unapitiliza tumikela Yehova chifukwa yoi umuchili-a. (Yob. 1:9-11; 2:4) Enjedela vevo Yehova ookoza wale thawi yoi aze amali-e marenda etene. (Yes. 33:24; Chiv. 21:3, 4) Eno kaninaembekezela ira Yehova unochili-a athu modabwi-a malambwano. Ndiye m’baliyo unokoza vepa ira Yehova amuva-e kopolo koma teto murendele wa murima ira avilele marendayo koma teto apitilize mutumikela mororomeleya. — Sal. 29:11.
14. Kodi ninafunjedavo n’ni va vyevyo vyamuireele Janice?
14 Kaganizelani vya Janice unoyo apempelile ira adowe atumikele wu Beteli. Vavirile chaka 5 ira azindikile mwemo Yehova mwasomedele liye pempelo lae. Liye aongile ira: “Yehova oo-indi-eda chito thawi inela vondifunji-a ira ndikale muthu wapama. Ndafuneya ira ndimuroromelenga vinjinji. Ndafuneya chenja mwemo ndafunjedela miyo vameka. Koma teto ndafuneya ira ndisangalalenga vo-olandela mwemo vyongo vililiathu vamoywanga.” Vangavirile thawi, Janice na mamunae koova-iwa utumiki oing’anela dera. Voganizela vyevyo vyapange-ile, liye aongile ira: “Yehova usomeda mapempelwanga mundila yoi kandaiembekezela. Voolanda thawi ira ndizidikile ira liye unondisomeda pama ndipo ndinosangalala ira ndiona umboni oyi ngwa chikondi koma teto ooma murima.”
Ngati munaona ira Yehova kanasomeda mapempelwinyu, esani vepa vyongo vimo-i (Onani ndima 15)f
15. Chifukwa n’ni thawi dimo-i kaninafuneya romola mwachindunji vyevyo ninafuna iyo vopempela? (Onani ithuzithuzi.)
15 Funso la naralu lelo ninafuneya iyo vifuka ti loi, ‘Kodi mwina ndinafuneya chenja nowambeela pempelela vyongo vimo-i?’ Ngakale ira thawi dimo-i ninokoza romola mwachindunji vyongo vyevyo ninafuna iyo, thawi dimo-i kaninafuneya viromola mwachindunji vyevyo ninafuna iyo ira nione vyevyo Yehova unaniva-e liye. Kaganizelan isazo ya murongola waisikana unoyo apempela ira avolowe Sukulu ya Akhristu Olaleela vya Umwene. Liye afuna volowa sukulu inela na yolinga yoi alaleele wewo unafuneya olaleela anjinji. Eno vevo apempela liye ira avolowe musukulu inela, afuneya muvepa teto Yehova ira amukami-e iziwa mwai umo-i wa utumiki unoyo unapange liye. (Vyo. 16:9, 10) Ndiye oopanga vyongo mogwilizana na pempelo lae vofuka oing’anela dela ngati m’mipingo davakwikwi munafuneya apainiya anjinji. Mwina ookoza lembela kalata ofesi ya tambi ira aiziwe wewo unafuneya ofalisa anjinji.e
16. Kodi ninakale osimkizela vya n’ni?
16 Mukhanila nifunjeda vyoi ninokoza kala osimikiza ira Yehova unosomeda mapempelwi-u mwachikondi koma teto mwachilungamo. (Sal. 4:3; Yes. 30:18) Thawi dimo-i liye kanasomede mapempelwi-u mundila ineyo naiembekezela iyo. Koma Yehova kananyalanyaze mapempelwi-u. Liye unonikonda vinjinji ndipo kanani-iye. (Sal. 9:10) Eno “mumuroromelenga thawi detene,” vopempela wa liye mokumela vati va murima.— Sal. 62:8.
NYIMBO 43 Pemphero Loyamikira Mulungu
a Khanila inonikami-a ira niroromelenga ira thawi detene Yehova unosomeda mapempelwi-u mwachikondi koma teto mwachilungamo.
b Mazina amo-i kochenjiwa.
c Onani khani yoi “Kodi Mumakhulupirira Kuti Yehova Amachita Zinthu M’njira Yoyenera?” mu Sanja ya Olonda ya Febuluwale 2022, ndima 3-6.
d Yehova unonikami-a vilela maeselo. Ira muiziwe vinjinji, onelani va jw.org vidiyo yoi, Pemphero Limatithandiza Kupirira.
e Ngati munafune dowa tumikela muilambo imo-iwa, onani malangizo anayo kanaukami-eni mubuku la Gulu Lochita Chifuniro cha Yehova, muru 10, ndima 6-9.
f MAWU OFOTOKOZELA VITHUZITHUZI: Arongola ambin’li kanapempela ira kavolowe Sukulu ya Akiristu Olaleela vya Umwene. Murongola m’mo-i unoitaniwa usukulu ineyo koma m’mo-iweyo kaitaniwe. M’malo mokumudwa, murongola unoyo aaitaniweyo unavepa Yehova ira amukami-e zindikila mwai m’mo-i wautumiki. Vanduli viwa unanalembela kalata ofesi yatambi na yolinga yoi aiziwe wewo unafuneya olaleela anjinji.