Sida na Afrika—Elikya nini bato bazali na yango mpo na mbula nkóto ya sika?
EUTI NA MOKOMANI NA BISO NA ZAMBIE
NA SANZA ya Sɛtɛmbɛ ya mobu moleki, batindami bautaki na bamboka mingi ya Afrika mpe bayanganaki na Lusaka, na ekólo Zambie, mpo na Likita ya mbala ya 11 oyo esangisaka bikólo mingi mpo na kolobela likambo ya sida mpe maladi oyo ezwamaka na kosangisa nzoto, na Afrika. Ntina ya likita yango ezalaki ya kolendisa boyokani makasi kati na bikólo mpo na koluka koyeba nini basengeli kosala mpo na kobundisa kopalangana ya sida na Afrika?
Profesɛrɛ Nkandu Luo, oyo azalaki ntango wana ministrɛ ya makambo ya kolɔngɔnɔ ya nzoto na Zambie, alobaki ete na Afrika mpe na mikili mosusu ya bobola, likambo yango ezali mpenza “likama monene,” mpe abakisaki ete ezali “kozongisa nsima mpe ata kobebisa milende oyo esalemi na makambo ya bokolɔngɔnɔ ya nzoto mpe na makambo mosusu ya bato mpe ya nkita.”
Na masukulu oyo elandanaki, balobi bamonisaki ete bato bazwaka sida mpe na kozongisa makila. Monganga moko, oyo atindamaki na lisangá moko (Équipe Sécurité transfusionnelle OMS) alobaki ete, atako kosangisa nzoto na moto oyo azali na sida epesaka ntango nyonso sida te, kasi moto oyo bazongisi ye makila oyo ezali na sida, akozanga te kozwa sida! Mpe Monganga yango asukisaki ete, “kozongisa makila oyo ezali na likama te ezali oyo bakɔtisi moto makila na nzoto te.”
Likita yango emonisaki ete lokola komisalisa na sida esɛngaka mbongo mingi, yango wana bato mingi oyo bazali na sida bakokaka komisalisa te. Tózwa ndakisa ya moto ya ekólo Ouganda oyo afandi na engumba, azwaka soki dolare 200 na sanza, kasi mpo na komisalisa na sida, ekoki kosɛnga soki dolare 1 000 na sanza!
Likita ya Lusaka emonisaki ete ebandeli ya bambula nkoto oyo ya sika ekosukisa kopalangana ya sida te. Kasi, bayekoli ya Biblia bayebi ete Mozalisi, Yehova Nzambe nde moto akosilisa maladi nyonso, mpamba te alaki ete na mokili ya sika, “mofandi moko te akoloba ete: ‘Nazali na maladi.’”—Yisaya 33:24, NW.
[Karte/Elilingi na lokasa 31]
Profesɛrɛ Nkandu Luo
[Eutelo ya bafɔtɔ]
Fɔtɔ na ndingisa ya E. Mwanaleza, Times of Zambia