Mituna ya batángi

Batatoli ya Yehova bazali lingomba moko ya Protesta?

Batatoli ya Yehova bamonaka te ete bazali lingomba moko ya Protesta. Mpo na nini?

Lingomba ya Protesta ebandaki na Mpoto na ekeke ya 16, ntango bato balukaki kobongola Lingomba ya Katolike. Nkombo “Protesta” ebimaki na likita oyo esalemaki na engumba Spire na 1529; bapesaki yango bato oyo bazalaki na ngámbo ya Martin Luther. Kobanda wana, bakómá kosalela nkombo yango mpo na kolobela bato nyonso oyo bazali kolanda mateya mpe makanisi oyo etɛmɛlaka Lingomba ya Katolike. Na yango, diksionɛrɛ moko (Merriam-Webster’s Collegiate Dictionary, ebimeli ya 11) elobi ete Protesta “ezali mondimi ya lingomba nyonso oyo eboyaka kondima bokonzi ya pápa, mpe endimaka mateya oyo etɛmɛlaki Lingomba ya Katolike, ete moto akobika kaka na kondima, bandimi nyonso bazali banganga-nzambe, mpe ete solo eutaka kaka na Biblia.”

Atako Batatoli ya Yehova bandimaka bokonzi ya pápa te, mpe bandimaka na motema moko ete Biblia nde elobaka solo, bakeseni na mangomba ya Protesta na makambo mingi ya minene. Kutu, buku moko (The Encyclopedia of Religion) elobi ete Batatoli ya Yehova bazali “ndenge mosusu.” Tótalela makambo misato oyo ekesenisi bango na mangomba ya Protesta.

Ya liboso, atako mangomba ya Protesta eteyaka te makambo mosusu ya Lingomba ya Katolike, bato oyo babandisaki yango batikalaki na bindimeli mosusu ya Katolike, na ndakisa Bosato, lifelo, mpe liteya oyo elobaka ete moto azali na molimo oyo ekufaka te. Nzokande, Batatoli ya Yehova bamonaka ete mateya wana eyokani na Biblia te mpe elobaka solo te na ntina na Nzambe.​—Talá nkasa 4-7.

Ya mibale, Batatoli ya Yehova bazali te lingomba oyo elukaka kotɛmɛla mateya ya lingomba moko boye, kasi oyo eteyaka bato solo ya Biblia. Bazwaka na lisɛki te toli oyo ya Biblia: “Mosali ya Nkolo akoki koswana té, kasi esengeli ázala moto ya malamu epai ya bato nyonso, áyeba koteya na ndenge ekoki, pe kokanga motema. Bato oyo batiaka tembe ná ye asengeli koteya bango na boboto penza.” (2 Timote 2:24, 25, Bible na lingala ya lelo oyo) Ya solo, Batatoli ya Yehova bamonisaka bokeseni oyo ezali kati na makambo oyo Biblia elobi ná makambo oyo mangomba mingi eteyaka. Atako bongo, mokano na bango ezalaka te ya kokɔtisa mbongwana na mangomba mosusu. Mokano na bango ezalaka nde ya kosalisa bato ya mitema sembo bázwa boyebi ya solosolo ya Nzambe mpe ya Liloba na ye, Biblia. (Bakolose 1:9, 10) Ntango bato oyo bazali na bindimeli mosusu bazali kokoba kotya ntembe, Batatoli ya Yehova baboyaka kotyana bantembe oyo ezangi ntina.​—2 Timote 2:23.

Ya misato, na bokeseni na Lingomba ya Protesta oyo ekabwani mpe ebimisi ebele ya mangomba, Batatoli ya Yehova ya mokili mobimba bazali na bomoko. Na oyo etali mateya ya Biblia, Batatoli ya Yehova na mikili koleka 230 balandaka toli ya ntoma Paulo ya ‘koloba na boyokani.’ Bokabwani ezali te kati na bango. Kasi, bazali nde “liboke moko mpenza na makanisi kaka moko mpe na motindo ya kokanisa kaka moko.” (1 Bakorinti 1:10) Bango nyonso basalaka makasi “mpo na kobatela bomoko ya elimo na ekanganeli ya kimya oyo esangisaka.”​—Baefese 4:3.