Eleko ya Ekaniseli ezali ntango ya kosakola lisusu mingi!

1. Bantina nini tozali na yango ya kosakola lisusu mingi na sanza ya Marsi, Aprili mpe Mai?

¹ Okoki kosakola lisusu mingi na eleko ya Ekaniseli oyo ezali koya? Na bisika mosusu moi eumelaka mingi koleka butu. Basakoli mosusu bakozala na konje na mosala to na eteyelo mpe yango ekoki kosalisa bango básakola mingi. Kobanda na mokolo ya 2 Aprili, tokosala kampanye monene mpo na kobenga bato oyo basepelaka na nsango malamu báya koyangana na biso na Ekaniseli na mokolo ya 17 Aprili. Nsima ya Ekaniseli, tokosala makasi mpo na kolandela mposa ya bato oyo bayanganaki na Ekaniseli mpe tokobenga bango lisusu mpo bálanda diskur ya ntina mingi oyo ekosalema na pɔsɔ ya 25 Aprili. Ya solo, tozali na bantina mingi ya kosakola lisusu mingi na sanza ya Marsi, Aprili mpe Mai.

2. Wapi lolenge moko ya malamu mpenza ya kosakola lisusu mingi?

² Mosala ya mobongisi-nzela mosungi: Lolenge moko ya malamu mpenza ya kosakola lisusu mingi ezali ya kosala mosala ya mobongisi-nzela mosungi. Lokola biso nyonso tozalaka na makambo mingi ya kosala, mpo na kosala mosala yango, mbala mingi esɛngaka komibongisa liboso mpe kobongola makambo mosusu na programɛ na biso. (Mas. 21:5) Ntango mosusu ekoki kosɛnga ozongisa nsima makambo mosusu oyo ezali na ntina mingi te oyo omeseni kosala mokolo na mokolo. (Flp. 1:9-11) Mpo na nini te koyebisa bandeko mosusu ya lisangá ete olingi kosɛnga mosala ya mobongisi-nzela? Ntango mosusu yango ekoki kolendisa bango mpe básɛnga mosala yango.

3. Ndenge nini mabota ekoki koyokana mpo na kosakola lisusu mingi?

³ Na Losambo na bino ya libota ya mbala ezali koya, ekozala malamu bólobela mikano oyo bomityeli. (Mas. 15:22) Soki boyokani malamu, bato mosusu ya libota bakoki kosɛnga mosala ya mobongisi-nzela mosungi sanza moko to basanza mingi. Kasi bokosala nini soki bomoni ete bokokoka te kosɛnga mosala ya mobongisi-nzela? Bokoki kaka koyokana mpo na kobimaka na mosala ya kosakola mikolo mosusu na mpokwa to kosakola bangonga mingi na mikolo ya pɔsɔ mpe ya lomingo.

4. Mapamboli nini tokozwa soki tosakoli lisusu mingi na eleko ya Ekaniseli?

⁴ Yehova amonaka nyonso oyo tosalaka mpo na kosalela ye mpe asepelaka na mosala na biso. (Ebr. 6:10) Soki tozali kopesa Yehova mpe basusu, tokoyoka esengo mingi. (1 Nta. 29:9; Mis. 20:35) Okoki kosakola lisusu mingi na eleko ya Ekaniseli mpo ozwa esengo mingi mpe mapamboli mingi?