ບົດຄວາມສຶກສາທີ 41
ສັດຊື່ຕໍ່ໆໄປໃນໄລຍະ “ຄວາມທຸກຍາກລຳບາກຄັ້ງໃຫຍ່”
“ຄົນບໍລິສຸດທັງປວງຂອງພະເຢໂຫວາຈົ່ງຮັກພະເຢໂຫວາເຖີ້ນ ພະເຢໂຫວາປົກປ້ອງກັ້ນຮັກສາຄົນສັດຊື່ທັງຫຼາຍ.”—ເພງ. 31:23
ເພງ 129 ເຮົາຈະອົດທົນຕໍ່ໄປ
ໃຈຄວາມສຳຄັນa
1-2. (ກ) ອີກບໍ່ດົນພວກຜູ້ນຳຂອງໂລກຈະປະກາດຫຍັງ? (ຂ) ເຮົາຕ້ອງຮູ້ຄຳຕອບຂອງຄຳຖາມຫຍັງ?
ລອງນຶກພາບວ່າພວກຜູ້ນຳຂອງໂລກຫາກໍປະກາດວ່າ: “ສະຫງົບສຸກແລະປອດໄພແລ້ວ!” ເຊິ່ງເປັນເຫດການທີ່ຄຳພີໄບເບິນບອກລ່ວງໜ້າວ່າຈະເກີດຂຶ້ນ. ພວກເຂົາອາດໂອ້ອວດວ່າ ໂລກປອດໄພແທ້ໆເຊິ່ງບໍ່ເຄີຍປອດໄພແບບນີ້ມາກ່ອນ. ພວກຜູ້ນຳຂອງໂລກຢາກໃຫ້ເຮົາຄິດວ່າພວກເຂົາສາມາດຄວບຄຸມສະຖານະການແລະແກ້ໄຂບັນຫາຕ່າງໆຂອງໂລກໄດ້ແລ້ວ. ແຕ່ພວກເຂົາບໍ່ສາມາດຄວບຄຸມສິ່ງທີ່ຈະເກີດຂຶ້ນຕໍ່ຈາກນັ້ນໄດ້! ເປັນຫຍັງ? ເພາະຄຳພີໄບເບິນບອກວ່າ: ໃນຕອນນັ້ນ “ຄວາມພິນາດຈະເກີດກັບພວກເຂົາທັນທີ . . . ແລະພວກເຂົາຈະບໍ່ມີທາງໜີພົ້ນໄດ້ເລີຍ.”—1 ເທ. 5:3, ລ.ມ.
2 ມີຄຳຖາມສຳຄັນທີ່ເຮົາຕ້ອງຮູ້ຄຳຕອບຄື: ຈະເກີດຫຍັງຂຶ້ນໃນໄລຍະ “ຄວາມທຸກຍາກລຳບາກຄັ້ງໃຫຍ່”? ພະເຢໂຫວາຢາກໃຫ້ເຮົາເຮັດຫຍັງໃນຕອນນັ້ນ? ແລະເຮົາຈະກຽມຕົວເອງໃຫ້ພ້ອມໃນຕອນນີ້ໄດ້ແນວໃດເພື່ອຈະຮັກສາຄວາມສັດຊື່ສະເໝີໃນໄລຍະຄວາມທຸກຍາກລຳບາກຄັ້ງໃຫຍ່?—ມັດ. 24:21, ລ.ມ.
ຈະເກີດຫຍັງຂຶ້ນໃນໄລຍະ “ຄວາມທຸກຍາກລຳບາກຄັ້ງໃຫຍ່”?
3. ຕາມຄຳປາກົດ 17:5, 15-18 ພະເຈົ້າຈະທຳລາຍ “ບາບີໂລນໃຫຍ່” ແນວໃດ?
3 ອ່ານຄຳປາກົດ 17:5, 15-18. “ບາບີໂລນໃຫຍ່” ຈະຖືກທຳລາຍ! ດັ່ງທີ່ໄດ້ເວົ້າຂ້າງເທິງ ພວກຜູ້ນຳຂອງໂລກຈະບໍ່ສາມາດຄວບຄຸມສິ່ງທີ່ຈະເກີດຂຶ້ນໃນເວລານັ້ນໄດ້. ເປັນຫຍັງ? ເພາະ “ພະເຈົ້າ [ຈະ] ໄດ້ໂຜດໃຫ້ເຂົາກະທຳຕາມນ້ຳໃຈ [“ຄວາມຄິດ,” ລ.ມ.] ຂອງພະອົງ.” ຄວາມຄິດນີ້ແມ່ນຫຍັງ? ແມ່ນການທຳລາຍກຸ່ມສາສະໜາປອມທັງໝົດເຊິ່ງລວມເຖິງຄລິດສາສະໜາຈັກ.b ພະເຈົ້າຈະເອົາຄວາມຄິດຂອງພະອົງໃສ່ໃຫ້ “ເຂົາ 10 ອັນ” ຂອງ “ສັດຮ້າຍຕົວໜຶ່ງສີແດງຈັດ.” ເຂົາ 10 ອັນແມ່ນອຳນາດທາງການເມືອງທັງໝົດທີ່ສະໜັບສະໜູນ “ສັດຮ້າຍ” ເຊິ່ງສັດຮ້າຍແມ່ນອົງການສະຫະປະຊາຊາດ. (ຄຳປ. 17:3, 11-13; 18:8) ເມື່ອອຳນາດທາງການເມືອງເຫຼົ່ານັ້ນໂຈມຕີສາສະໜາປອມ ນັ້ນກໍຈະເປັນສັນຍານບອກວ່າຄວາມທຸກຍາກລຳບາກຄັ້ງໃຫຍ່ໄດ້ເລີ່ມຂຶ້ນແລ້ວ. ເຫດການນີ້ຈະເກີດຂຶ້ນຢ່າງກະທັນຫັນແລະເປັນຕາຢ້ານຫຼາຍເຊິ່ງຈະສົ່ງຜົນກະທົບຕໍ່ທຸກຄົນເທິງໂລກ.
4. (ກ) ຊາດຕ່າງໆອາດຈະໃຊ້ເຫດຜົນຫຍັງໃນການໂຈມຕີສາສະໜາປອມ? (ຂ) ຄົນທີ່ເຄີຍເປັນສະມາຊິກຂອງສາສະໜາອາດຈະເຮັດຫຍັງ?
4 ເຮົາບໍ່ຮູ້ວ່າຊາດຕ່າງໆອາດຈະໃຊ້ເຫດຜົນຫຍັງໃນການໂຈມຕີບາບີໂລນໃຫຍ່. ພວກເຂົາອາດບອກວ່າ ສາສະໜາຂອງໂລກເປັນອຸປະສັກຂັດຂວາງສັນຕິພາບແລະພະຍາຍາມມີອິດທິພົນຕໍ່ສິ່ງທີ່ລັດຖະບານເຮັດ ຫຼືພວກເຂົາອາດບອກວ່າ ອົງການສາສະໜາເຫຼົ່ານັ້ນຮັ່ງມີແລະມີຊັບສົມບັດຫຼາຍເກີນໄປ. (ຄຳປ. 18:3, 7) ຕອນທີ່ພວກເຂົາໂຈມຕີສາສະໜາປອມ ພວກເຂົາອາດບໍ່ໄດ້ທຳລາຍສະມາຊິກ ຂອງສາສະໜາທຸກຄົນ. ແຕ່ເບິ່ງຄືວ່າໃນການໂຈມຕີນັ້ນ ພວກເຂົາຈະທຳລາຍອົງການສາສະໜາ. ຕອນນັ້ນ ຄົນທີ່ເຄີຍເປັນສະມາຊິກຂອງສາສະໜາກໍຈະຮູ້ວ່າຜູ້ນຳສາສະໜາບໍ່ໄດ້ເຮັດຕາມສິ່ງທີ່ໄດ້ສັນຍາໄວ້ ດັ່ງນັ້ນ ພວກເຂົາອາດບອກວ່າຕົວເອງບໍ່ໄດ້ກ່ຽວຂ້ອງຫຍັງກັບສາສະໜາເຫຼົ່ານັ້ນ.
5. ພະເຢໂຫວາສັນຍາຫຍັງກ່ຽວກັບຄວາມທຸກຍາກລຳບາກຄັ້ງໃຫຍ່ ແລະຍ້ອນຫຍັງ?
5 ຄຳພີໄບເບິນບໍ່ໄດ້ບອກວ່າການທຳລາຍບາບີໂລນໃຫຍ່ຈະໃຊ້ເວລາດົນສ່ຳໃດ ແຕ່ເຮົາຮູ້ວ່າຈະເກີດຂຶ້ນໃນເວລາສັ້ນໆ. (ຄຳປ. 18:10, 21) ພະເຢໂຫວາສັນຍາວ່າພະອົງຈະ “ຕັດວັນທັງຫຼາຍນັ້ນໃຫ້ສັ້ນເຂົ້າ” ເພື່ອ “ຄົນທັງຫຼາຍທີ່ເລືອກໄວ້” ແລະສາສະໜາແທ້ຈະລອດຜ່ານຄວາມທຸກຍາກລຳບາກຄັ້ງໃຫຍ່. (ມໂກ. 13:19, 20) ແຕ່ພະເຢໂຫວາຢາກໃຫ້ເຮົາເຮັດຫຍັງໃນໄລຍະຄວາມທຸກຍາກລຳບາກຄັ້ງໃຫຍ່ຈົນຮອດສົງຄາມອະລະມະເຄໂດນ?
ສົ່ງເສີມການນະມັດສະການແທ້ຕໍ່ໆໄປ
6. ເປັນຫຍັງການແຍກອອກຈາກສາສະໜາປອມຍັງບໍ່ພຽງພໍ?
6 ດັ່ງທີ່ໄດ້ພິຈາລະນາໃນບົດຄວາມກ່ອນ ພະເຢໂຫວາຢາກໃຫ້ຜູ້ນະມັດສະການພະອົງແຍກຕົວອອກຈາກສາສະໜາປອມ. ແຕ່ເທົ່ານັ້ນຍັງບໍ່ພຽງພໍ ເຮົາຕ້ອງຕັ້ງໃຈສົ່ງເສີມສາສະໜາແທ້ ເຊິ່ງກໍຄືການນະມັດສະການບໍລິສຸດຂອງພະເຢໂຫວາ. ຂໍໃຫ້ເຮົາມາເບິ່ງ 2 ວິທີທີ່ເຮົາເຮັດໄດ້.
ຂໍໃຫ້ເຮົາຢ່າຂາດການປະຊຸມເຖິງວ່າຈະມີຄວາມຫຍຸ້ງຍາກລຳບາກ (ເບິ່ງຂໍ້ 7)g
7. (ກ) ເຮົາຈະເຮັດຕາມມາດຕະຖານດ້ານສິນລະທຳຂອງພະເຢໂຫວາໄດ້ແນວໃດ? (ຂ) ເປັນຫຍັງເຫບເລີ 10:24, 25 ບອກວ່າເຮົາຕ້ອງປະຊຸມກັນ ແລະເປັນຫຍັງຈຶ່ງສຳຄັນໂດຍສະເພາະຕອນນີ້?
7 ວິທີທຳອິດຄື ເຮົາຕ້ອງເຮັດຕາມມາດຕະຖານດ້ານສິນລະທຳຂອງພະເຢໂຫວາຕໍ່ໄປ. ເຮົາບໍ່ຍອມຮັບຄ່ານິຍົມແລະມາດຕະຖານຂອງໂລກນີ້. ຕົວຢ່າງ: ເຮົາຈະບໍ່ຍອມຮັບການເຮັດຜິດສິນລະທຳທາງເພດທຸກຮູບແບບ ເຊິ່ງລວມເຖິງການແຕ່ງດອງລະຫວ່າງເພດດຽວກັນ ແລະການໃຊ້ຊີວິດແບບຮັກຮ່ວມເພດ. (ມັດ. 19:4, 5; ໂລມ 1:26, 27) ວິທີທີສອງຄື ເຮົາຕ້ອງນະມັດສະການພະເຢໂຫວາຮ່ວມກັບພີ່ນ້ອງຄລິດສະຕຽນຕໍ່ໄປ. ບໍ່ວ່າເຮົາຈະຢູ່ໃສ ເຮົາຈະນະມັດສະການພະເຢໂຫວາຢູ່ຫໍປະຊຸມ ເມື່ອຈຳເປັນກໍປະຊຸມຢູ່ເຮືອນສ່ວນຕົວ ຫຼືຢູ່ບ່ອນລັບໆ. ບໍ່ວ່າຈະເກີດຫຍັງຂຶ້ນ ເຮົາກໍຈະບໍ່ເຊົາໄປປະຊຸມ. ທີ່ຈິງ ເຮົາຕ້ອງປະຊຸມຮ່ວມກັນໃຫ້ “ມາກກວ່ານັ້ນອີກເພາະ [ເຮົາ] ເຫັນວ່າວັນນັ້ນພວມຫຍັບເຂົ້າມາ.”—ອ່ານເຫບເລີ 10:24, 25
8. ຂ່າວສານທີ່ເຮົາປະກາດອາດຈະປ່ຽນໄປແນວໃດໃນອະນາຄົດ?
8 ໃນໄລຍະຄວາມທຸກຍາກລຳບາກຄັ້ງໃຫຍ່ ຂ່າວສານທີ່ເຮົາປະກາດອາດຈະປ່ຽນໄປ. ຕອນນີ້ເຮົາປະກາດຂ່າວດີແລະພະຍາຍາມໄປສອນຄົນໃຫ້ເປັນລູກສິດ. ແຕ່ໃນຕອນນັ້ນ ເຮົາອາດຕ້ອງປະກາດຂ່າວສານແບບກົງໆແລະຮຸນແຮງປານໝາກເຫັບຕົກຫ່າໃຫຍ່. (ຄຳປ. 16:21) ເຮົາອາດຕ້ອງປະກາດວ່າ ອີກບໍ່ດົນໂລກຂອງຊາຕານຈະຖືກທຳລາຍ. ເມື່ອເຖິງເວລາເຮົາກໍຈະຮູ້ວ່າຈະປະກາດຂ່າວສານຫຍັງແລະໃຊ້ວິທີໃດ. ເຮົາຈະໃຊ້ວິທີເກົ່າທີ່ເຮັດມາຫຼາຍກວ່າຮ້ອຍປີບໍ່ ຫຼືຈະປ່ຽນເປັນວິທີອື່ນ? ເຮົາຕ້ອງຖ້າເບິ່ງຕໍ່ໄປ. ບໍ່ວ່າຈະເປັນແນວໃດ ກໍເບິ່ງຄືວ່າເຮົາໄດ້ຮັບສິດທິພິເສດທີ່ຈະປະກາດຄຳພິພາກສາຂອງພະເຢໂຫວາຢ່າງກ້າຫານ.—ເອເຊກ. 2:3-5
9. ຊາດຕ່າງໆອາດພະຍາຍາມເຮັດຫຍັງຕໍ່ກັບຂ່າວສານທີ່ເຮົາປະກາດ ແຕ່ເຮົາສາມາດໝັ້ນໃຈຫຍັງໄດ້?
9 ມີຄວາມເປັນໄປໄດ້ຫຼາຍທີ່ສຸດວ່າ ຂ່າວສານທີ່ເຮົາປະກາດຈະຍົວະໃຫ້ຊາດຕ່າງໆພະຍາຍາມເຮັດໃຫ້ເຮົາເຊົາປະກາດເລີຍ. ຄືກັບຕອນນີ້ທີ່ເຮົາເພິ່ງພະເຢໂຫວາໃຫ້ພະອົງຊ່ວຍໃນເຮັດວຽກຮັບໃຊ້ ໃນຕອນນັ້ນເຮົາກໍຕ້ອງເພິ່ງພະອົງຄືກັນ. ເຮົາສາມາດໝັ້ນໃຈໄດ້ວ່າພະເຢໂຫວາຈະໃຫ້ກຳລັງກັບເຮົາເພື່ອຈະເຮັດຕາມຄວາມປະສົງຂອງພະອົງໄດ້ສຳເລັດ.—ມີເກ 3:8
ກຽມພ້ອມສະເໝີສຳລັບການຖືກໂຈມຕີ
10. ຕາມທີ່ບອກໄວ້ໃນລືກາ 21:25-28 ສິ່ງທີ່ເກີດຂຶ້ນໃນໄລຍະຄວາມທຸກຍາກລຳບາກຄັ້ງໃຫຍ່ຈະເຮັດໃຫ້ຜູ້ຄົນສ່ວນຫຼາຍຮູ້ສຶກແນວໃດ?
10 ອ່ານລືກາ 21:25-28. ໃນໄລຍະຄວາມທຸກຍາກລຳບາກຄັ້ງໃຫຍ່ ຜູ້ຄົນຈະຕົກໃຈແຮງເມື່ອເຫັນວ່າທຸກສິ່ງທີ່ພວກເຂົາເຄີຍຄິດວ່າຈະເພິ່ງພາໄດ້ຕະຫຼອດໄປກຳລັງຖືກທຳລາຍ. ພວກເຂົາຈະມີ “ຄວາມທຸກເດືອດຮ້ອນ” ແລະຢ້ານວ່າຕົວເອງຈະຕາຍໃນໄລຍະທີ່ໂຫດຮ້າຍທີ່ສຸດຂອງປະຫວັດສາດມະນຸດ. (ຊໂຟ. 1:14, 15, ລ.ມ.) ໃນຕອນນັ້ນ ແມ່ນແຕ່ປະຊາຊົນຂອງພະເຢໂຫວາກໍຈະມີຊີວິດທີ່ຍາກລຳບາກຂຶ້ນ. ເນື່ອງຈາກເຮົາບໍ່ໄດ້ເປັນຄົນຂອງໂລກ ເຮົາອາດຕ້ອງປະສົບບັນຫາທີ່ຫຍຸ້ງຍາກຫຼາຍຢ່າງ ແລະເຮົາອາດຈະຂາດບາງສິ່ງທີ່ຈຳເປັນ.
11. (ກ) ເປັນຫຍັງພະຍານພະເຢໂຫວາຈຶ່ງຕົກເປັນເປົ້າໝາຍຂອງຊາດຕ່າງໆ? (ຂ) ເປັນຫຍັງເຮົາບໍ່ຕ້ອງຢ້ານຄວາມທຸກຍາກລຳບາກຄັ້ງໃຫຍ່?
11 ໃນຕອນນັ້ນ ຄົນຂອງສາສະໜາທີ່ຖືກທຳລາຍອາດໃຈຮ້າຍຫຼາຍທີ່ພະຍານພະເຢໂຫວາບໍ່ໄດ້ຖືກທຳລາຍນຳ. ພວກເຂົາຈະສະແດງໃຫ້ເຫັນຢ່າງຊັດເຈນວ່າບໍ່ພໍໃຈແຮງ ບາງທີອາດຈະສະແດງຜ່ານທາງອິນເຕີເນັດ. ຊາດຕ່າງໆແລະຜູ້ນຳຂອງພວກເຂົາຄືຊາຕານຈະກຽດຊັງເຮົາຫຼາຍ ເພາະເຮົາເປັນສາສະໜາດຽວທີ່ຍັງເຫຼືອຢູ່. ພວກເຂົາບໍ່ສາມາດທຳລາຍທຸກສາສະໜາໃຫ້ໝົດໄປຈາກໂລກໄດ້. ດັ່ງນັ້ນ ເຮົາຈຶ່ງຕົກເປັນເປົ້າໝາຍຂອງພວກເຂົາ. ຕອນນັ້ນ ຊາດຕ່າງໆຈະກາຍເປັນໂຄກແຫ່ງມາໂຄກ.c ພວກເຂົາຈະຮ່ວມມືກັນໂຈມຕີປະຊາຊົນຂອງພະເຢໂຫວາຢ່າງສຸດກຳລັງ. (ເອເຊກ. 38:2, 14-16) ເນື່ອງຈາກເຮົາບໍ່ຮູ້ລາຍລະອຽດທັງໝົດ ເຮົາຈຶ່ງອາດກັງວົນວ່າຈະມີຫຍັງເກີດຂຶ້ນແດ່ໃນໄລຍະຄວາມທຸກຍາກລຳບາກຄັ້ງໃຫຍ່. ແຕ່ມີສິ່ງໜຶ່ງທີ່ເຮົາສາມາດໝັ້ນໃຈໄດ້ຄື: ເຮົາບໍ່ຕ້ອງຢ້ານຄວາມທຸກຍາກລຳບາກຄັ້ງໃຫຍ່ ເພາະພະເຢໂຫວາຈະບອກວິທີທີ່ຈະຊ່ວຍເຮົາໃຫ້ລອດຊີວິດ. (ເພງ. 34:19) ເຮົາຈະສາມາດ “ເບິ່ງທາງເທິງ [“ຢືນໂຕຊື່,” ລ.ມ.] ແລະເງີຍຫົວຂຶ້ນ” ເພາະເຮົາຮູ້ວ່າ ‘ຄວາມພົ້ນຂອງເຮົາກໍມາໃກ້ແລ້ວ.’d
12. “ທາດທີ່ສັດຊື່ແລະສຸຂຸມ” ໄດ້ກຽມເຮົາໃຫ້ພ້ອມແນວໃດສຳລັບສິ່ງທີ່ຈະເກີດຂຶ້ນໃນອະນາຄົດ?
12 “ທາດທີ່ສັດຊື່ແລະສຸຂຸມ” ໄດ້ກຽມເຮົາໃຫ້ພ້ອມທີ່ຈະຮັກສາຄວາມສັດຊື່ໃນໄລຍະຄວາມທຸກຍາກລຳບາກຄັ້ງໃຫຍ່. (ມັດ. 24:45, ລ.ມ.) ພວກເຂົາໄດ້ເຮັດໄປແລ້ວຫຼາຍວິທີ. ຕົວຢ່າງໜຶ່ງຄື: ການປະຊຸມພາກປີ 2016-2018 ໄດ້ຊ່ວຍເຮົາໃຫ້ມີຄຸນລັກສະນະທີ່ເຮົາຈຳເປັນຕ້ອງມີໃຫ້ຫຼາຍຂຶ້ນເມື່ອວັນຂອງພະເຢໂຫວາໃກ້ເຂົ້າມາ. ໃຫ້ເຮົາມາທວນຄືນຄຸນລັກສະນະເຫຼົ່ານີ້ນຳກັນສັ້ນໆ.
ເສີມສ້າງຄວາມພັກດີ ຄວາມອົດທົນແລະຄວາມກ້າຫານຂອງເຈົ້າຢູ່ເລື້ອຍໆ
ກຽມຕົວຕັ້ງແຕ່ຕອນນີ້ເພື່ອຈະລອດຊີວິດຜ່ານ “ຄວາມທຸກຍາກລຳບາກຄັ້ງໃຫຍ່” (ເບິ່ງຂໍ້ 13-16)h
13. ເຮົາຈະພັກດີຕໍ່ພະເຢໂຫວາຫຼາຍຂຶ້ນໄດ້ແນວໃດ ແລະເປັນຫຍັງເຮົາຕ້ອງເຮັດຕັ້ງແຕ່ດຽວນີ້?
13 ຄວາມພັກດີ: ຫົວຂໍ້ການປະຊຸມພາກປີ 2016 ຄື “ພັກດີຕໍ່ພະເຢໂຫວາສະເໝີ!” ການປະຊຸມນີ້ສອນເຮົາວ່າ ຖ້າເຮົາມີສາຍສຳພັນທີ່ໃກ້ຊິດກັບພະເຢໂຫວາ ເຮົາກໍຈະພັກດີຕໍ່ພະອົງ. ເຮົາໄດ້ຮັບການເຕືອນຈາກການປະຊຸມນີ້ວ່າ ເຮົາຈະມີສາຍສຳພັນທີ່ໃກ້ຊິດກັບພະອົງໄດ້ໂດຍອະທິດຖານຈາກຫົວໃຈແລະດຸໝັ່ນສຶກສາຄຳພີໄບເບິນ. ການເຮັດແບບນີ້ຈະຊ່ວຍເຮົາໃຫ້ມີພະລັງທີ່ຈະເອົາຊະນະໄດ້ເຖິງວ່າຈະຖືກການທົດສອບທີ່ຍາກທີ່ສຸດ. ແຮ່ງໂລກຂອງຊາຕານໃກ້ຈະຖືກທຳລາຍ ເຮົາກໍແຮ່ງຄາດໝາຍໄດ້ເລີຍວ່າຄວາມພັກດີທີ່ເຮົາມີຕໍ່ພະເຈົ້າແລະຕໍ່ການປົກຄອງຂອງພະອົງຈະຖືກທົດສອບຫຼາຍຂຶ້ນ ແລະຜູ້ຄົນກໍຈະເວົ້າໃສ່ເຮົາບໍ່ເຊົາ. (2 ເປ. 3:3, 4) ສິ່ງນີ້ອາດເກີດຂຶ້ນໂດຍສະເພາະເມື່ອເຮົາຮັກສາຄວາມເປັນກາງທາງການເມືອງ ເຮົາຕ້ອງເສີມສ້າງຄວາມພັກດີໃຫ້ຫຼາຍຂຶ້ນໃນຕອນນີ້ເພື່ອເຮົາຈະພັກດີຕໍ່ພະເຢໂຫວາໃນໄລຍະຄວາມທຸກຍາກລຳບາກຄັ້ງໃຫຍ່.
14. (ກ) ຈະມີການປ່ຽນແປງຫຍັງກ່ຽວກັບພີ່ນ້ອງຊາຍທີ່ນຳໜ້າເທິງໂລກ? (ຂ) ເປັນຫຍັງເຮົາຕ້ອງພັກດີໃນຕອນນັ້ນ?
14 ໃນໄລຍະຄວາມທຸກຍາກລຳບາກຄັ້ງໃຫຍ່ຈະມີການປ່ຽນແປງກ່ຽວກັບພີ່ນ້ອງຊາຍທີ່ນຳໜ້າເທິງໂລກ. ໃນຕອນນັ້ນ ຜູ້ຖືກເຈີມທີ່ຍັງເຫຼືອທຸກຄົນຈະຖືກຮັບໄປສະຫວັນເພື່ອຮ່ວມເຮັດສົງຄາມອະລະມະເຄໂດນ. (ມັດ. 24:31; ຄຳປ. 2:26, 27) ນີ້ໝາຍຄວາມວ່າຄະນະກຳມະການປົກຄອງຈະບໍ່ຢູ່ໂລກກັບເຮົາແລ້ວ. ແຕ່ຊົນຝູງໃຫຍ່ຈະຍັງໄດ້ຮັບການຈັດລະບຽບ. ພີ່ນ້ອງທີ່ເປັນແກະອື່ນເຊິ່ງມີຄຸນສົມບັດທີ່ເໝາະສົມຈະນຳໜ້າພວກເຮົາ. ໃນຕອນນັ້ນເຮົາຈະຕ້ອງສະແດງຄວາມພັກດີໂດຍສະໜັບສະໜູນພີ່ນ້ອງທີ່ນຳໜ້າເຫຼົ່ານັ້ນ ແລະເຮັດຕາມການຊີ້ນຳທີ່ພວກເຂົາໄດ້ຮັບຈາກພະເຈົ້າ. ຖ້າເຮົາຢາກລອດ ເຮົາກໍຕ້ອງເຮັດ!
15. ເຮົາຈະມີຄວາມອົດທົນຫຼາຍຂຶ້ນໄດ້ແນວໃດ ແລະເປັນຫຍັງຈຶ່ງສຳຄັນທີ່ເຮົາຕ້ອງເຮັດຕັ້ງແຕ່ດຽວນີ້?
15 ຄວາມອົດທົນ: ຫົວຂໍ້ການປະຊຸມພາກປີ 2017 ຄື: “ຢ່າຍອມແພ້!” ການປະຊຸມນີ້ຊ່ວຍເຮົາໃຫ້ອົດທົນກັບການທົດສອບໄດ້ຫຼາຍຂຶ້ນ. ເຮົາໄດ້ຮຽນຮູ້ວ່າຄວາມອົດທົນຂອງເຮົາຂຶ້ນຢູ່ກັບການທີ່ເຮົາໄວ້ວາງໃຈໃນພະເຢໂຫວາ ບໍ່ໄດ້ຂຶ້ນຢູ່ກັບສະຖານະການ. (ໂລມ 12:12) ຂໍໃຫ້ເຮົາຢ່າລືມຄຳສັນຍາຂອງພະເຍຊູທີ່ວ່າ: “ຜູ້ໃດທີ່ຈະອົດທົນເຖິງທີ່ສຸດຜູ້ນັ້ນຈະພົ້ນ.” (ມັດ. 24:13) ຄຳສັນຍານີ້ໝາຍຄວາມວ່າ ເຮົາຕ້ອງຮັກສາຄວາມສັດຊື່ບໍ່ວ່າເຮົາຈະປະສົບບັນຫາແບບໃດກໍຕາມ. ຖ້າເຮົາອົດທົນກັບການທົດສອບທຸກຢ່າງຕັ້ງແຕ່ຕອນນີ້ ຄວາມເຊື່ອຂອງເຮົາກໍຈະເຂັ້ມແຂງຂຶ້ນກ່ອນທີ່ຄວາມທຸກຍາກລຳບາກຄັ້ງໃຫຍ່ຈະເລີ່ມຕົ້ນຂຶ້ນ.
16. ຄວາມກ້າຫານມາຈາກໃສ ແລະເຮົາຈະກ້າຫານຫຼາຍຂຶ້ນຕັ້ງແຕ່ຕອນນີ້ໄດ້ແນວໃດ?
16 ຄວາມກ້າຫານ: ຫົວຂໍ້ການປະຊຸມພາກປີ 2018 ຄື “ຂໍໃຫ້ກ້າຫານ!” ການປະຊຸມນີ້ຊ່ວຍເຮົາໃຫ້ຈື່ສະເໝີວ່າຄວາມກ້າຫານບໍ່ໄດ້ເກີດຈາກຄວາມສາມາດຂອງເຮົາເອງ. ຄືກັບຄວາມອົດທົນ ຄວາມກ້າຫານທີ່ແທ້ຈິງກໍເກີດຈາກການທີ່ເຮົາໄວ້ວາງໃຈພະເຢໂຫວາ. ເຮົາຈະໄວ້ວາງໃຈພະເຢໂຫວາໃຫ້ຫຼາຍຂຶ້ນໄດ້ແນວໃດ? ໂດຍການອ່ານຄຳພີໄບເບິນທຸກມື້ ແລະຄິດຕຶກຕອງວ່າພະເຢໂຫວາປົກປ້ອງປະຊາຊົນຂອງພະອົງແນວໃດໃນອະດີດ. (ເພງ. 68:20; 2 ເປ. 2:9) ເມື່ອຊາດຕ່າງໆໂຈມຕີເຮົາໃນໄລຍະຄວາມທຸກຍາກລຳບາກຄັ້ງໃຫຍ່ ເຮົາຈະຕ້ອງກ້າຫານແລະໄວ້ວາງໃຈພະເຢໂຫວາໃຫ້ຫຼາຍກວ່າແຕ່ກ່ອນ. (ເພງ. 112:7, 8; ເຫບ. 13:6) ຖ້າເຮົາໄວ້ວາງໃຈພະເຢໂຫວາຕັ້ງແຕ່ຕອນນີ້ ເຮົາກໍຈະມີຄວາມກ້າຫານທີ່ຈຳເປັນຕອນທີ່ໂຄກມາໂຈມຕີ.e
ຄອຍຖ້າຄວາມຫວັງທີ່ຈະໄດ້ຮັບຄວາມລອດ
ອີກບໍ່ດົນພະເຍຊູແລະກອງທັບຂອງເພິ່ນທີ່ຢູ່ໃນສະຫວັນຈະມາທຳລາຍສັດຕູຂອງພະເຈົ້າໃນສົງຄາມອະລະມະເຄໂດນ! (ເບິ່ງຂໍ້ 17)
17. ເປັນຫຍັງເຮົາບໍ່ຄວນຢ້ານສົງຄາມອະລະມະເຄໂດນ? (ເບິ່ງຮູບໜ້າປົກ)
17 ດັ່ງທີ່ບອກໄວ້ໃນບົດຄວາມກ່ອນ ພວກເຮົາສ່ວນຫຼາຍມີຊີວິດຢູ່ໃນສະໄໝສຸດທ້າຍ. ແຕ່ເຮົາຍັງຫວັງວ່າຈະລອດຜ່ານຄວາມທຸກຍາກລຳບາກຄັ້ງໃຫຍ່. ສົງຄາມອະລະມະເຄໂດນຈະທຳລາຍໂລກຊົ່ວໃຫ້ໝົດສ້ຽງ ແຕ່ເຮົາບໍ່ຕ້ອງຢ້ານ. ຍ້ອນຫຍັງ? ກໍຍ້ອນວ່ານີ້ແມ່ນສົງຄາມຂອງພະເຢໂຫວາ. (ສຸພາ. 1:33; ເອເຊກ. 38:18-20; ຊກາ. 14:3) ເມື່ອພະເຢໂຫວາອອກຄຳສັ່ງ ພະເຍຊູກໍຈະນຳກອງທັບຂອງພະເຈົ້າອອກໄປຕໍ່ສູ້. ພະເຍຊູກັບຜູ້ຖືກເຈີມແລະທູດສະຫວັນຈຳນວນມະຫາສານຈະຄຽງບ່າຄຽງໄຫຼ່ກັນໄປຕໍ່ສູ້ກັບຊາຕານ ພວກຜີປີສາດ ແລະກອງທັບຂອງມັນທີ່ຢູ່ເທິງໂລກ.—ດາ. 12:1; ຄຳປ. 6:2; 17:14
18. (ກ) ພະເຢໂຫວາຮັບຮອງຫຍັງກັບເຮົາ? (ຂ) ຄຳປາກົດ 7:9, 13-17 ຊ່ວຍເຮົາໃຫ້ໝັ້ນໃຈຫຍັງກ່ຽວກັບອະນາຄົດ?
18 ພະເຢໂຫວາຮັບຮອງກັບເຮົາວ່າ: “ບໍ່ມີອາວຸດອັນໃດທີ່ສ້າງຂຶ້ນມາຕໍ່ສູ້ເຈົ້າຈະທຳຮ້າຍເຈົ້າໄດ້.” (ເອຊາ. 54:17, ລ.ມ.) “ຝູງຄົນເປັນອັນມາກ” ຫຼືຊົນຝູງໃຫຍ່ເຊິ່ງເປັນຜູ້ນະມັດສະການທີ່ສັດຊື່ຂອງພະເຢໂຫວາຈະລອດຊີວິດ “ຈາກຄວາມທຸກທໍລະມານມາກຫຼາຍ [ຫຼື “ຄວາມທຸກຍາກລຳບາກຄັ້ງໃຫຍ່,” ລ.ມ.]” ຫຼັງຈາກນັ້ນ ພວກເຂົາກໍຈະຮັບໃຊ້ພະອົງຕໍ່ໆໄປ. (ອ່ານຄຳປາກົດ 7:9, 13-17) ຄຳພີໄບເບິນມີເຫດຜົນຫຼາຍຢ່າງທີ່ຊ່ວຍເຮົາໃຫ້ໝັ້ນໃຈກ່ຽວກັບອະນາຄົດ! ເຮົາຮູ້ວ່າ “ພະເຢໂຫວາປົກປ້ອງກັ້ນຮັກສາຄົນສັດຊື່ທັງຫຼາຍ.” (ເພງ. 31:23) ທຸກຄົນທີ່ຮັກແລະຍົກຍ້ອງສັນລະເສີນພະເຢໂຫວາຈະມີຄວາມສຸກທີ່ໄດ້ເຫັນພະອົງພິສູດວ່າຊື່ຂອງພະອົງເປັນທີ່ນັບຖືອັນບໍລິສຸດ.—ເອເຊກ. 38:23
19. ສິ່ງທີ່ດີເລີດອັນໃດທີ່ລໍຖ້າເຮົາຢູ່ໃນອະນາຄົດອັນໃກ້ນີ້?
19 ລອງຄິດເບິ່ງວ່າຂໍ້ຄວາມໃນ 2 ຕີໂມເຕ 3:2-5 ຈະຂຽນແນວໃດກ່ຽວກັບຜູ້ຄົນໃນໂລກໃໝ່ທີ່ບໍ່ໄດ້ຮັບອິດທິພົນຂອງຊາຕານ. (ເບິ່ງຂອບ “ຜູ້ຄົນໃນສະໄໝນັ້ນເປັນແນວໃດ?”) ພີ່ນ້ອງ ຈອດສ໌ ແກນກັດສ໌f ເຊິ່ງເປັນສະມາຊິກຄະນະກຳມະການປົກຄອງບອກວ່າ: “ໂລກນີ້ຄືຊິເປັນຕາຢູ່ຫຼາຍແທ້ໆ ເພາະທຸກຄົນນະມັດສະການພະເຢໂຫວາ! ອີກບໍ່ດົນເຈົ້າກໍຈະມີສິດທິພິເສດຢູ່ໃນໂລກໃໝ່ ເຈົ້າຈະມີຊີວິດຍືນຍາວເທົ່າທີ່ພະເຢໂຫວາມີຊີວິດຢູ່. ເຮົາຈະມີຊີວິດຕະຫຼອດໄປ.” ນີ້ເປັນຄວາມຫວັງທີ່ດີເລີດແທ້ໆ!
ເພງ 122 ຂໍໃຫ້ຢືນຢັດໝັ້ນຄົງ!
a ເຮົາຮູ້ວ່າອີກບໍ່ດົນທຸກຄົນຈະຕ້ອງປະສົບກັບ “ຄວາມທຸກຍາກລຳບາກຄັ້ງໃຫຍ່.” ໃນຕອນນັ້ນຈະເກີດຫຍັງຂຶ້ນກັບຜູ້ຮັບໃຊ້ຂອງພະເຢໂຫວາ? ພະເຢໂຫວາຢາກໃຫ້ເຮົາເຮັດຫຍັງ? ແລະເຮົາຕ້ອງມີຄຸນລັກສະນະຫຍັງແດ່ໃຫ້ຫຼາຍຂຶ້ນ ເພື່ອຈະຮັກສາຄວາມສັດຊື່ໃນໄລຍະຄວາມທຸກຍາກລຳບາກຄັ້ງໃຫຍ່ໄດ້?
b ການອະທິບາຍສຳນວນ: ຄລິດສາສະໜາຈັກຄື ສາສະໜາທີ່ອ້າງວ່າເປັນຄລິດສະຕຽນ ແຕ່ບໍ່ໄດ້ສອນຜູ້ຄົນໃຫ້ນະມັດສະການພະເຢໂຫວາຕາມມາດຕະຖານຂອງພະອົງ.
c ການອະທິບາຍສຳນວນ: ໂຄກແຫ່ງມາໂຄກ (ເອີ້ນສັ້ນໆວ່າ ໂຄກ) ໝາຍເຖິງກຸ່ມຊາດຕ່າງໆທີ່ລວມຕົວກັນມາໂຈມຕີຜູ້ນະມັດສະການພະເຢໂຫວາໃນໄລຍະຄວາມທຸກຍາກລຳບາກຄັ້ງໃຫຍ່.
d ສຳລັບລາຍລະອຽດເພີ່ມເຕີມກ່ຽວກັບເຫດການຕ່າງໆທີ່ຈະເກີດຂຶ້ນກ່ອນສົງຄາມອະລະມະເຄໂດນ ເບິ່ງປຶ້ມລາຊະອານາຈັກຂອງພະເຈົ້າປົກຄອງແລ້ວ! ບົດທີ 21. ສຳລັບລາຍລະອຽດເພີ່ມເຕີມກ່ຽວກັບການໂຈມຕີຂອງໂຄກແຫ່ງມາໂຄກແລະວິທີທີ່ພະເຢໂຫວາປົກປ້ອງປະຊາຊົນຂອງພະອົງໃນສົງຄາມອະລະມະເຄໂດນ ເບິ່ງຫໍສັງເກດການ 15 ກໍລະກົດ 2015 ໜ້າ 9-15.
e ການປະຊຸມພາກປີ 2019 ມີຫົວຂໍ້ຊື່ວ່າ “ຄວາມຮັກຈະຄົງຢູ່ຕະຫຼອດໄປ” ເຮັດໃຫ້ເຮົາໝັ້ນໃຈວ່າເຮົາຈະລອດໄດ້ຢ່າງປອດໄພພາຍໃຕ້ການປົກປ້ອງດ້ວຍຄວາມຮັກຂອງພະເຢໂຫວາ.—1 ໂກ. 13:8
f ເບິ່ງບົດຄວາມ “ຜົນແຫ່ງກິດຈະການທີ່ເຂົາໄດ້ກະທຳຈະຕິດຕາມເຂົາໄປ” ໃນຫໍສັງເກດການ 1 ທັນວາ 1994 (ພາສາໄທ).
g ຄຳອະທິບາຍຮູບພາບ: ໃນໄລຍະຄວາມທຸກຍາກລຳບາກຄັ້ງໃຫຍ່ ພະຍານພະເຢໂຫວາກຸ່ມນ້ອຍໆປະຊຸມຢ່າງກ້າຫານຢູ່ໃນປ່າ.
h ຄຳອະທິບາຍຮູບພາບ: ຊົນຝູງໃຫຍ່ເຊິ່ງເປັນຜູ້ນະມັດສະການທີ່ສັດຊື່ຂອງພະເຢໂຫວາຈະລອດຜ່ານຄວາມທຸກຍາກລຳບາກຄັ້ງໃຫຍ່ຢ່າງມີຄວາມສຸກ!