Matthaia Ziak

6 “In thil ṭha tihte chu mite hriattîr lo tûrin fîmkhur rawh u; chuti lo chuan, in Pa vâna mi hnênah lâwmman in nei lo vang. 2 Chuvângin, mi retheite thil ṭha in tihsak hunah,* mi vervêkte’n mite chawimawi hlawh an duh avânga inkhâwmna inahte leh kawtthlêrahte an tih ṭhin angin, in hmaah tawtawrâwt hamtîr suh u.* Tih tak meuhvin ka hrilh a che u, an lâwmman chu an dawng kim tawh a ni. 3 Nangni erawh chuan mi retheite thil ṭha in tihsak hunah, in kut ding lamin a tih chu in kut vei lamin hre suh se. 4 Chutiang chuan, in thil ṭha tih chu a rûkin a awm thei ang a, engkim hmutu in Pa chuan a rûl ang che u.

5 “Chu bâkah, mi vervêkte angin ṭawngṭai suh u, anni chuan mite’n an hmuh theihna tûrin inkhâwmna inahte leh kawng pêng ṭhuamahte ṭawngṭai an duh ṭhîn. Tih tak meuhvin ka hrilh a che u, an lâwmman chu an dawng kim tawh a ni. 6 Nangni erawh chu in ṭawngtai hunah in pindanah lût ula, kawngkâ in khâr hnuah hmuh theih loh in Pa hnênah chuan ṭawngṭai rawh u. Tichuan, engkim hmutu in Pa chuan a rûl ang che u. 7 In ṭawngṭai hunah hnam dangte angin in sawi ngai sawi nawn sawi nawn suh u, thu tam tak an sawi avângin ngaihthlâk nih an inring a ni. 8 Chuvângin, anmahni ang chu ni suh u, in Pa chuan in dîl hma pawhin in mamawhte chu a hre reng si a.

9 “Nangni erawh chu hetiang hian in ṭawngṭai tûr a ni:

“‘Kan Pa, vâna mi, i hming tih thianghlim ni rawh se.* 10 I Ram lo thleng rawh se. I duh zâwng vâna tih a nih angin, leiah pawh tih ni rawh se. 11 Vawiinah hian kan ei khawpin chaw min pe ang che. 12 Kan bâte* min ngaidam ang che, keini pawhin kan leibatute* kan ngaihdam ang hian. 13 Thlêmnaah min hruai lût suh la, mi sual lakah chuan min vênghim zâwk ang che,’ tiin.

14 “Mite bawhchhiatna in ngaihdam chuan, in Pa vâna mi pawhin a ngaidam ve ang che u. 15 Amaherawhchu, mite bawhchhiatna in ngaihdam loh chuan, in Pa vâna mi pawhin a ngaidam bîk lo vang che u.

16 “Chaw in ngheiin mi vervêkte angin ngui hmêl pu suh u, mite’n chaw an nghei tih an hriat theih nân an hmêlah an lantîr ṭhîn.* Tih tak meuhvin ka hrilh a che u, an lâwmman chu an dawng kim tawh a ni. 17 Nangni erawh chuan chaw in ngheiin in lûah sahriak thih ula, in hmai phih ang che u. 18 Chutiang chuan, mihring hmaah chaw nghei angin in lang lo vang a, hmuh theih loh in Pa chauhvin chaw in nghei tih a hria ang. Tichuan, engkim hmutu in Pa chuan mal a sâwm ang che u.

19 “Rannung leh tuiêkin a ei chhiat theihna hmun, rûkrute an luha an rûk theihna hmun leiah hian in tân rote khâwl khâwm tawh suh u. 20 Chu aiin, rannung leh tuiêkin a ei chhiat theih lohna, rûkrute an luha an rûk theih lohna hmun vânah in tân rote khâwl khâwm zâwk rawh u. 21 In ro awmna hmunah in rilru* pawh a awm dâwn si a.

22 “Taksa khâwnvâr chu mit a ni. Chuvângin, in mit a fiah chuan in taksa pum a êng chhuak ang a. 23 In mit a fiah loh erawh chuan in taksa pum a thim ang. Nangmahnia awm êng chu a thim si chuan, in taksa chu a va thim nasa dâwn êm!

24 “Tu man hotu pahnih rawng an bâwl kawp thei lo; pakhat huain pakhat a hmangaih ang, a nih loh leh pakhat pawmin pakhat a hnâwl ang. Pathian leh Sum rawng in bâwl kawp thei lo ve.

25 “Chuvâng chuan ka hrilh a che u: ‘Eng nge kan ei ang a, eng nge kan in ang?’ tiin in nunna chungchângah leh, ‘Eng nge kan hâk ang?’ tiin in taksa chungchângah lungkham tawh suh u. Ei tûr aiin nunna a pawimawh zâwk ang hian, thawmhnaw aiin taksa pawh a pawimawh zâwk lo vem ni? 26 Chunglêng savate hi ngun takin en rawh u, buh an tuh lo va, an ât lo va, buh inahte an seng lût hek lo; nimahsela, in Pa vâna mi chuan a châwm si a. Anni ai chuan in hlu zâwk daih lo vem ni? 27 In zînga tuin nge a lungkham avânga a nunna rei lo te chhûng lek pawh pawt sei thei awm? 28 Chu bâkah, engvângin nge thawmhnaw chungchângah in lungkham? Ram tûktinpârte ṭhan dân aṭang hian inzir rawh u; hna an thawk lo va, la an kai hek lo. 29 Nimahsela, ka hrilh a che u, Solomona meuh pawh a ropuina zawng zawnga thuam a nih khân, hêng tûktinpâr pakhat tluk pawh hian thuamin a awm lo asin. 30 Ram hnim vawiina nung, a tûka thuka hâl ral leh mai tûr mah Pathianin chuti khawpa a thuam a nih chuan, nangni rinna nei tlêmte u, thawmhnaw a pe zâwk dâwn lo che u em ni? 31 Chuvângin, ‘Eng nge kan ei ang?’ emaw, ‘Eng nge kan in ang?’ emaw, ‘Eng nge kan hâk ang?’ emaw tih lungkham ngai suh u. 32 Chûng zawng zawng chu hnam dangte’n nasa takin an zawng ṭhîn. Chûngte chu in mamawh tih in Pa vâna miin a hria a ni.

33 “Pathian Ram leh a felna chu zawng hmasa zêl ula; tichuan, chûng zawng zawng chu pêk belh in ni ang. 34 Chuvângin, a tûk atân lungkham ngai suh u, a tûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni.