XNAQʼTZBʼIL 15
¿Alkye Jesús?
A Jesús jun kyxol qe xjal mas ojtzqiʼn kyuʼn kykyaqil. Noqtzun tuʼnj, ateʼ nim xjal oʼkx ojtzqiʼn tbʼi Jesús kyuʼn ex nya bʼiʼn kyuʼn alkyexix, ax ikx ateʼ txqantl xjal at junxichaq kyximbʼetz tiʼj Jesús. ¿Tiʼ in tzaj t-xnaqʼtzaʼn Tyol Dios tiʼj Jesús?
1. ¿Alkye Jesús?
Jun anjel te Jesús ex in nanqʼin toj kyaʼj. Kubʼ tbʼinchaʼn Jehová tej naʼmxtoq tbʼant tkyaqil tuʼn. Tuʼntzunju in nok qʼoʼn tbʼi te tnejel tbʼinchbʼen Dios (Colosenses 1:15). Ex in tzaj tqʼamaʼn Biblia qa «oʼkxku jun Tkʼwaʼl» Dios, tuʼnju oʼkx te Jesús kubʼ bʼinchaʼn tuʼn Jehová (Juan 3:16). Aqʼunan Jesús junx tukʼil Jehová tuʼn tbʼant tkyaqilju at twitz kyaʼj ex twitz Txʼotxʼ (uʼjinktza Proverbios 8:30). Ex at jun tbʼanel tamiwbʼil Jesús tukʼil Jehová. Ax ikx, in nok qʼoʼn tbʼi Jesús te «Yol», tuʼnju a in xi qʼamante qe tqanil in tzaj tqʼamaʼn Dios kye xjal (Juan 1:14).
2. ¿Tiquʼn ul Jesús tzalu twitz Txʼotxʼ?
Ma tzikʼ mas te 2 mil abʼqʼi tej tbʼant jun milagr tuʼn Jehová. Ajbʼen xewbʼaj xjan tuʼn tuʼn ttzaj tqʼoʼn tchwinqlal Jesús, jun anjel nimxix tipumal, toj talbʼil jun txin María tbʼi. Iktzun tten ul itzʼj Jesús ik tzeʼn jun xjal (uʼjinktza Lucas 1:34, 35). Ul Jesús tzalu twitz Txʼotxʼ tuʼn tok te Cristo moqa Mesías ex tuʼn kyklet xjal tuʼn.a Kykyaqil qe profecía e kyaj qʼamaʼn tiʼj Mesías, japun twiʼ tiʼj Jesús. Onin jlu kyiʼj xjal tuʼn tel kynikʼ tiʼj qa a Jesús ok te Cristo, aju «Tkʼwaʼl Dios itzʼ» (Mateo 16:16).
3. ¿Jatumel taʼ Jesús toj ambʼil jaʼlo?
Tej tkyim Jesús tzalu twitz Txʼotxʼ, jaw anqʼin ik tzeʼn jun xewbʼaj ex meltzʼaj toj kyaʼj. Yajxitl «jaw nimsaʼn tuʼn Dios tibʼaj tkyaqil» (Filipenses 2:9). Toj ambʼil jaʼlo at nim toklen Jesús, noqtzun tuʼnj, mas nim toklen Jehová at twitz.
QO JYON MAS TQANIL
Qo xnaqʼtzan kyiʼj junjuntl xnaqʼtzbʼil tuʼntzun tel qnikʼ tiʼj alkyexix Jesús ex tiquʼn nim toklen tuʼn tok qojtzqiʼn.
4. Nya a Jesús in nok te Dios at Nimxix Tipumal
In tzaj tqʼamaʼn Tyol Dios qa at nim tipumal Jesús, noqtzun tuʼnj, in nimen te Jehová, aju Tdios ex Ttat. ¿Tiquʼn in xi qqʼamaʼn jlu? Kyqʼonke kywitze tiʼj VIDEO tuʼntzun tel kynikʼe tiʼj tiʼ in tzaj t-xnaqʼtzaʼn Biblia tiʼj toklen Jesús at tukʼil Jehová.
Aʼyeju texto che ul qʼamaʼn che onil qiʼj tuʼn tel qnikʼ tiʼj qa junxitl toklen Jesús at twitz Jehová. Kyuʼjinktze qe taqikʼ Tyol Dios ex che yoline kyiʼj xjel lu:
Kyuʼjinktze Lucas 1:30 a 32.
Ik tzeʼn tqʼama anjel, ¿tiʼ toklen Jesús at tukʼil Jehová?
Kyuʼjinktze Mateo 3:16 ex 17.
Tej tbautisarin Jesús, ¿tiʼ tzaj qʼamaʼn te tzmax toj kyaʼj?
¿Alkyetzun tzaj yolin toj kyaʼj?
Kyuʼjinktze Juan 14:28.
¿Alkye at mas nim toklen, ape tatbʼaj moqa a kʼwalbʼaj?
¿Tiʼ tqʼama Jesús tej t-xi tqʼamaʼn «Tat» te Jehová?
Kyuʼjinktze Juan 12:49.
¿Tzajpe tqʼamaʼn Jesús qa ax in nok te Mambʼaj? ¿Tiʼ teya t-ximbʼetz tiʼj jlu?
5. A Jesús ok te Mesías
Kyaj tzʼibʼin nim profecía toj Tyol Dios aʼyeju e onin kyiʼj xjal tuʼn tel kynikʼ tiʼj alkye Mesías, toj juntl yol, aju jaw tskʼoʼn Dios tuʼn kyklet xjal tuʼn. Kyqʼonke kywitze tiʼj VIDEO tuʼntzun tok kyojtzqiʼne junjun profecía japun tiʼj Jesús tej tten tzalu twitz Txʼotxʼ.
Kyuʼjinktze junjun profecía toj Tyol Dios ex che yoline kyiʼj xjel lu:
Kyuʼjinktze Miqueas 5:2 tuʼn tel kynikʼe tiʼj jatumeltoq tuʼn tul itzʼj Mesías.b
¿Japunpe twi profecía lu tej tul itzʼj Jesús? (Mateo 2:1).
Tuʼn tok kyojtzqiʼne junjun tiʼchaq kyaj qʼamaʼn tuʼn tbʼaj tiʼj Mesías ajtoq tkyim, kyuʼjinktze Salmo 34:20 ex Zacarías 12:10.
¿Japunpe kywi profecía lu? (Juan 19:33-37).
¿In kubʼpe t-ximana qa kubʼ tchʼexpuʼn Jesús junjun tiʼ tuʼntzun tjapun kywi profecía lu tiʼj?
¿Tiʼ in tzaj t-xnaqʼtzaʼn tkyaqil jlu teya tiʼj Jesús?
6. Tbʼanel qa ma tzʼok qojtzqiʼn Jesús
In tzaj tqʼamaʼn Tyol Dios qa nim toklen tuʼn tok qojtzqiʼn Jesús ex aju toklen o txi tqʼoʼn Dios. Kyuʼjinktze Juan 14:6 ex 17:3, ex che yoline tiʼj xjel lu:
¿Tiquʼn nim toklen tuʼn tok qojtzqiʼn Jesús?
Jaqet jun bʼe tuʼn Jesús tuʼn qok te tamiw Dios ex xi t-xnaqʼtzaʼn axix tok tiʼj Jehová. Ax ikx, noq tuʼn Jesús jaku ten qchwinqlal te jumajx.
AJU IN TZAJ KYQʼAMAʼN JUNJUN XJAL: «Mintiʼ in nok qeʼ kykʼuʼj testigos de Jehová tiʼj Jesús».
¿Tiʼ teya jaku txi ttzaqʼweʼn?
TOJ CHʼIN YOL
Jun anjel te Jesús aju at nim tipumal, Tkʼwal Dios te ex a in nok te Mesías.
Aju ma qo yolin tiʼj
¿Tiquʼn in xi qqʼamaʼn qa a Jesús tnejel tbʼinchbʼen Dios?
¿Tiʼ bʼant tuʼn Jesús tej naʼmxtoq tul tzalu twitz Txʼotxʼ?
¿Tiquʼn in xi qqʼamaʼn qa a Jesús in nok te Mesías?
OJTZQINKA CHʼINTL
Ojtzqinka junjuntl profecía aju in tzaj tyekʼin qa a Jesús in nok te Mesías.
«¿In tzajpe kyyekʼin profecía tkuʼx toj Tyol Dios qa a Jesús ok te Mesías?» (Xnaqʼtzbʼil toj jw.org)
In tzaj tqʼamaʼn Biblia qa in nok Jesús te «Tkʼwaʼl Dios», ¿pero in tzajpe tqʼamaʼn qa in che ul itzʼj tkʼwal Jehová ik tzeʼn kye xjal?
«¿Tiquʼn in nok qʼoʼn Jesús te Tkʼwal Dios?» (Xnaqʼtzbʼil toj jw.org)
Ojtzqinka tiquʼn in xi qqʼamaʼne qa nya atz in jatz xnaqʼtzbʼil tiʼj trinidad toj Tyol Dios.
«¿Axpe Jesús in nok te Dios?» (Aju Xqʼuqil, 1 te abril te 2009)
Ojtzqinka tzeʼn chʼexpaj tanqʼibʼil jun xuʼj tej tel tnikʼ tiʼjju in tzaj t-xnaqʼtzaʼn Tyol Dios tiʼj Jesús.
«In tzaj tqʼamaʼn jun xuʼj judiy tiquʼn kubʼ tchʼexpuʼn tokslabʼil» (¡Weʼktza!, mayo te 2013)
a Toj xnaqʼtzbʼil 26 ex 27 in tzaj chikʼbʼaʼn tiquʼn il tiʼj tuʼn kyklet xjal ex tzeʼn in qo klet tuʼn Jesús.