Salamo

145 Hanandratra anao aho, ry Andriamanitro Mpanjaka+ ô,

Ary hidera ny anaranao mandritra ny fotoana tsy voafetra, eny, mandrakizay.+

 2 Hidera anao tontolo andro aho,+

Ary hankalaza ny anaranao mandritra ny fotoana tsy voafetra, eny, mandrakizay.+

 3 Lehibe i Jehovah, ka tena mendrika hoderaina tokoa.+

Tsy takatry ny saina ny fahalehibeazany.+

 4 Hidera ny asanao ny taranaka fara mandimby.+

Ary ny asanao lehibe no hambaran’izy ireo.+

 5 Ny famirapiratan’ny haja amam-boninahitrao+

Sy ny asanao mahatalanjona no hosaintsainiko.+

 6 Hiresaka momba ny hery nampiasainao tamin’ireo zava-mampahatahotra nataonao izy ireo,+

Fa ny fahalehibeazanao kosa no hambarako.+

 7 Ny vavan’izy ireo hiboiboika teny manambara ny hatsaran-toetranao.+

Hihoby izy ireo, noho ny fahamarinanao.+

 8 Tsara fanahy sy mamindra fo i Jehovah,+

Ary tsy mora tezitra sady be hatsaram-panahy feno fitiavana.+

 9 Tsara fanahy amin’ny rehetra i Jehovah,+

Ary hita eo amin’ny asany rehetra fa mamindra fo izy.+

10 Hidera anao ny asanao rehetra, Jehovah ô!+

Ary hankalaza anao ireo tsy mivadika aminao.+

11 Ny voninahitry ny fanjakanao no horesahin’izy ireo,+

Ary ny herinao no holazainy,+

12 Mba hampahafantarana amin’ny zanak’olombelona ny asanao lehibe+

Sy ny famirapiratan’ny voninahitry ny fanjakanao.+

13 Ny fanjakanao dia fanjakana maharitra mandritra ny fotoana tsy voafetra,+

Ary ny fitondranao maharitra hatramin’ny taranaka rehetra mifandimby.+

14 Manohana an’izay rehetra lavo i Jehovah,+

Ary mampitraka an’izay rehetra mitanondrika.+

15 Ianao no andrandrain’ny mason’ny rehetra.+

Ianao koa no manome azy ny haniny amin’ny fotoanany.+

16 Manokatra ny tananao ianao,+

Ka manome fahafaham-po ny fanirian’ny zavamananaina rehetra.+

17 Manao ny rariny i Jehovah amin’ny lalany rehetra.+

Tsy mivadika koa izy, amin’izay rehetra ataony.+

18 Akaikin’izay rehetra miantso azy i Jehovah,+

Dia izay rehetra miantso azy araka ny fahamarinana.+

19 Hotanterahiny ny fanirian’izay matahotra azy.+

Hohenoiny izy ireo rehefa miantso vonjy, ka hovonjeny.+

20 Miaro an’izay rehetra tia azy i Jehovah.+

Fa ny ratsy fanahy rehetra kosa haringany.+

21 Ny fiderana an’i Jehovah no holazain’ny vavako.+

Aoka hidera ny anarany masina ny nofo rehetra mandritra ny fotoana tsy voafetra, eny, mandrakizay.+