Isaia
5 Hanao hira ho an’ny malalako aho, dia hira momba an’ilay malalako sy ny tanimboalobony.+ Nanana tanimboaloboka teo amin’ny tehezan-kavoana iray mahavokatra ny malalako. 2 Nasainy ny tany, nesoriny ny vato, ary voaloboka mena karazany tsara no namboleny teo. Nanorina tilikambo teo afovoany+ koa izy, ary nihady lavaka famiazam-boaloboka.+ Nanantena foana izy fa hamoa voaloboka+ tsara ilay tany, kanjo namoa voalobokadia.+
3 “Koa ankehitriny, mba tsarao aho sy ny tanimboaloboko,+ ry mponin’i Jerosalema sy mponin’i Joda! 4 Inona no mbola tokony ho natao tamin’ny tanimboaloboko ka tsy efa nataoko?+ Mba nantenaiko hamoa voaloboka tsara izy, nefa nahoana no namoa voalobokadia? 5 Koa hampahafantariko anareo izay hataoko amin’ny tanimboaloboko: Hesorina ny fefiny,+ hodorana izy,+ harodana ny tamboho vatony, ary hohitsakitsahina izy.+ 6 Hatokako ho toy ny zavatra efa potika izy,+ ka tsy hisy handrantsana na hiava azy.+ Dia tsilo sy ahidratsy no hiara-maniry aminy,+ ary tsy avelako handatsaka orana eo aminy ny rahona.+ 7 Fa ny taranak’Israely no tanimboalobok’i+ Jehovah Tompon’ny tafika, ary ny mponin’i Joda no tanimboly tena tiany.+ Nanantena foana izy fa hisy fitsarana ara-drariny,+ kanjo fandikan-dalàna no hitany! Fahamarinana no nantenainy, kanjo fitarainana no hitany!”+
8 Lozan’izay tsy mitsahatra mampitombo ny isan’ny tranony+ sy manangona saha maro be, hany ka tsy misy toerana malalaka intsony,+ fa ianareo irery sisa no monina eo amin’ilay tany! 9 Reko i Jehovah Tompon’ny tafika nianiana fa hisy trano maro hanjary higagan’ny olona sy tsy hisy mponina,+ na dia lehibe sy tsara aza. 10 Na tanimboaloboka efatra hektara+ aza tsy hamokatra afa-tsy iray bata,*+ ary vokatra eran’ny efaha* monja no ho azo avy amin’ny voa afafy iray homera.*+
11 Lozan’izay mifoha maraina mba hitady toaka,+ sady misotro foana mandra-pahamaizin’ny andro mba ho mamon-divay!+ 12 Ary misy harpa sy lokanga sy ampongatapaka sy sodina ary divay ao amin’ny fanasan’izy ireo,+ kanefa tsy ahoany ny zavatra ataon’i Jehovah, ary tsy hitan’izy ireo ny asan’ny tanany.+
13 Koa hatao sesitany ny oloko noho ny tsy fahalalany ahy.+ Ho fatin’ny mosary ireo olona be voninahitra eo aminy,+ ary ho fatin’ny hetaheta ny sarambaben’olona.+ 14 Koa nohalalahin’ny Fasana* ny toerany, ary nataony mitanatana izaitsizy ny vavany.+ Dia hivarina any+ izay mirenty ao an-tanàna sy ny vahoakany sy ny tabataban’ny olona ary izay mifaly. 15 Ho lasa ambany ny olona, eny, hietry izy, ary haetry ny fiandranandran’ny mason’ny olona ambony.+ 16 Hisandratra kosa i Jehovah Tompon’ny tafika noho ny fampiharany didim-pitsarana.+ Ary hanamasina ny tenany noho ny fanaovany ny rariny+ ilay tena Andriamanitra, eny, Ilay Masina.+ 17 Dia hiraoka ahitra toy ny eny an-kijana ny ondrilahy kely. Ary ny mpivahiny dia hihinana eny amin’ny toerana aolo izay nitoeran’ny biby nohatavezina fahiny.+
18 Lozan’ireo mitaritarika fahadisoana amin’ny tadin’ny tsy fahamarinana, sy mitaritarika fahotana toy ny amin’ny tadin-tsarety,+ 19 dia ireo miteny hoe: “Aleo hataony haingana ny asany. Aleo ho tonga haingana izany, mba ho hitanay. Aleo ho tanteraka ny fikasan’Ilay Masin’ny Israely, mba ho fantatray!”+
20 Lozan’izay milaza ny tsara hoe ratsy sy milaza ny ratsy hoe tsara!+ Lozan’izay manolo ny maizina amin’ny mazava sy manolo ny mazava amin’ny maizina! Lozan’izay manolo ny mangidy amin’ny mamy sy manolo ny mamy amin’ny mangidy!+
21 Lozan’izay mihevi-tena ho hendry sy mihevi-tena ho malina!+
22 Lozan’izay fatra-pisotro divay, sy izay mahery raha hampifangaro toaka,+ 23 ary izay manamarina ny ratsy fanahy mba hahazoana kolikoly,+ sady manaisotra amin’ny olo-marina ny fahamarinany!+
24 Toy ny vodivary levon’ny lelafo+ sy ny ahitra maina izay kilan’ny afo, dia toy izany koa fa ho toy ny fofona maimbo lo ny fakan’izy ireo sy ny fotony,+ ary ho toy ny vovoka ny felany. Nanda ny lalàn’i Jehovah Tompon’ny tafika mantsy izy ireo,+ sady tsy niraharaha ny tenin’Ilay Masin’ny Israely.+ 25 Koa tezitra be amin’ny olony i Jehovah, ka haninjitra ny tanany hamely azy.+ Hihorohoro ny tendrombohitra,+ ary ho toy ny fako eny afovoan-dalana ny fatin’izy ireo.+
Noho izany faharatsiana rehetra izany, dia tsy mitony mihitsy ny fahatezerany, fa mbola maninjitra ny tanany ihany izy. 26 Ary nanangana tsato-kazo famantarana ho an’ny firenena lehibe iray any lavitra+ izy, ka nisioka an’ilay mipetraka any amin’ny faran’ny tany.+ Koa ho avy faingana tokoa izy io.+ 27 Tsy misy reraka eo aminy, na tafintohina, na rendremana, na matory. Tsy hivaha ny fehikibo eo amin’ny andilany, ary tsy ho tapaka ny tadin-kapany. 28 Fa voaranitra ny zana-tsipìkany, ary efa voaisy tady ny tsipìkany rehetra.+ Ho mafy toy ny vatoafo ny kitron-tsoavaliny,+ ary hiriotra toy ny tafio-drivotra ny kodiaran-kalesiny.+ 29 Toy ny fieron’ny liona ny fierony, eny, toy ny fieron’ny liona tanora.+ Hierona izy, ary hosamboriny ny rembiny ka hoentiny soa aman-tsara, nefa tsy hisy mpamonjy.+ 30 Hierona amin’ilay rembiny izy amin’izany andro izany, ka ho toy ny firohondrohon’ny ranomasina ny fierony.+ Ary hitazana an’ilay tany ny olona ka hahita haizina mampitebiteby.+ Hihamaizina ny hazavana, noho ny orana milatsaka eo amin’ilay tany.