Agosto

Iyo Isaalimwiiyo inawuuluma ipontu piili cofayita: (1) Atthu aneettela isariya anawaakhumelela masakha. (2) Yehova naanoopola mmasakhani wihu. Masi manannani Yehova cinnoopolaawe? Inanna imoca Yehova cinnoopolaawe ukhanle unikavihera uwehera ratta ukumi nirineehu nhina ila ituninyeela. Yehova naanikhuluveliha wiira ninaahala utteeliya nrima nanswalelaka. Unookhalaru commo, uyo khenre wiira hiivano khanhala unikhumelela masakha. (Isai. 66:14) Yehova naanikurumica wuupuwela cinene ukumi womaana unhaleehu ukhalana wahoolo, ukati unhaleehu ukhalana ukumi unnipheelelaawe ukhuma nenne nokhalayi: ukumi wootteeliya ni woohimala. (2 Akor. 4:16-18) Niwehereraka uphiya uyo ukatyuuyo, Yehova khanhala uhiya unikavihera unswalela khula nihuku, hataa yanikhumelelaka masakha. (Ucuk. 3:22-24) Isiyani inniitthucihaaya matakihero aaswali a Yehova okhalayi ni o mahukwaala? Wiira otheene cihu pooti ukhitiri uvilela yanikhumelelaka masakha yahaaweherereehu muukumini wihu. Masi nankhuluvelaka Yehova, uyo khanahala uhiya unikavihera. —Isaa. 55:22. w23.04 ipaag. 14-15 iparaag. 3-4

Hiiva pooti waneetthucereehu ntakihero na Yusufu ni Maria, yaari owiitthenkaceene wiira awiiwelele ahooleli ookuvernu, hataa ukhala wiira waanaarikela. (Luka 2:​1-6) Moone mananna caattehiyaaya wiiwelela waya ikuvernu ukati Maria waaryaawe niirukulu. Nhooleli nkhulupale Augusto ahovaha nlamulo neera wiira atthu otheene yahaana uturuwela ilapo iyariyaaya wiira yeecantikhihe. Yusufu ni Maria, yahaana arwaaka u Belém, ikwaha yaahala weettiya ikilometuru 150 mmittalani cottuttu. Iyo ikwaheeyo yaahala ukhala yoorika, venci-venci yanhala unrikela Maria aari niirukulu yo mweeri 9. Unari wiira yahomphwanya yooyara mphironi? Ayo yahokhala niiwasiwaasi nuukumi wa Maria ni wa mwaana, aahala ukhala Mesiya wahoolo. Anatthunacile, iyo yaahala ukhala itthu yowotheriha wiira ahiiwelele ikuvernu.Yusufu ni Maria khayaahiile wiira iwasiwaasi caya ciwiirihe uhiiwelela ikuvernu. Ni Yehova ahaacaaliha nlattu wowiiwelela waya. Maria ahophiya saana u Belém, ahonnyara mwaana nkumi ni ahokavihera wiirannya inatiri yo mbiiblyani! —Mik. 5:2. w23.10 ipaag 8 iparaag 9; ipaag. 9 iparaag. 11-12

Vano wakhalaka wiira nyuuva nnawoova ukomentari umikutthanooni, isiyani inlamuliyeenyu upanka. Nyuuva pooti wiitthenkaca ratta. (Miru. 21:5) Mwacuwelaka saana mwaha unoolumiyooyo, khunhala wuurikani uvaha ikomentaariyu. Itthu ikhwaawe inlamuliyeenyu upanka ukhanle uvaha ikomentaariyu cankaani. (Miru. 15:23; 17:27) Mwavahaka ikomentaariyu yankaani, nyuuva nnaahala uthoonyera wiira nheetthenkaca ratta ni nheeweeha ratta uyo mwahooyo. Vano wakhalaka wiira nyuuva nhomananiha weettela citthu cihimiye nhina nnyo myahannyo ni hataa mwiikurumicaka, nanlelo nnawoova ukomentari, isiyani-tho inlamuliyeenyu upanka? Pooti wankupaliinyu wiira Yehova naavaha ifayita cinene wiikurumica winyu wiira mpanke inkhitiriinyu. (Luka 21:1-4) Wiikurumica khunakhala utotha upanka citthu cihinkhitiriinyu. (Afili. 4:5) Phimaana, mwiihelele mpika unhaleenyu ukhitiri wiirannyeeha ni munlompe Yehova wiira oovaheni nrima woomaala. Wiipaceroni, nyuuva pooti ulakela uvaha ikomentaariyu cakaani. w23.04 ipaag. 21 iparaag. 6-8

Paulu honilattaanihera anatoropa oohiitthaala ni owiitthenkaceene wiira yaane ikhotto. Natoropa ahaana akhalaka owiitthenkaceene wiira aane ikhotto ukati wotheene waahalaaya ukhumelela ikhotto. Inkhumelela itthu imocaaru ni hiiva. Wiira nikhale owiitthenkaceene wiira navilele nihuku na Yehova, nihaana ukhala oowaraceene waamini ni ufenta, toko natoropa cinwaraawe iyuuma inkhikicera ikhakaaca ni nihaana nikhalanaka niwehereroIyuuma inkhikicera ikhakaaca yankhikicera nrima wa natoropa. Waamini ni nifento ninaakhikicera nrimeehu. Ayo makhalelwaayo anaahala unikavihera urwaanela uhoolo unvarela wihu nteko Nluku ni untthara wihu Yesu. Waamini unaaniiriha ukupali wiira Yehova naahala waatthuvela atthu otheene ammwaavya ninrimaaya wotheene. (Mabere. 11:6) Waamini ciicammo unaanikurunica urwaanela uhoolo ukhuluvelya wihu wamiithoni wa nhooleliihu, Yesu, hataa naananaka marikariko. Wiira nilipihace waamini wihu ni uvilela wihu, pooti waneetthucereehu matakihero o mayamunneehu aneekurumica urwaanela uhoolo ukhuluvelya waya, hataa yalupatthiyaka ni yaananaka marikariko oohikhalana nsurukhu. Iyo itthwiiyo pooti unikavihera unyema ukhala atthu oonicivela ukhalana citthu cinci, naatakihaka mayamunneehu ahinaavya ukhalana citthu cinci muukumini waya ni aneesa nipuro noopacera Umwene wa Nluku. w23.06 ipaag. 10 iparaag. 8-9

Nlompe nlepelaka wiivaraca. Wiivaraca ukhanle ntthuuyo ucuwela weettihera citthu cinoopuwelaawe ni cimpankaawe. Ikwaha cinci unkhala ukhitiri wiihiiha citthu coohiloka. Masi hiiva ciicammo ninaapheela wiivaraca wiira nikhitiri ukhalana ikuru yoopheela upanka itthu yomaana, venci-venci yakhalaka itthu yoorika awula itthu yooninyoonya. Nhiliyale: wiivaraca unaapanka mphantte nhina nhokorokho wo nnepa wowaarya. Phimaana, munlepele Yehova nnepaawe wowaarya wiira ookavihereni ukhalana iyo ikhalelo yofayiteeyo. (Luka 11:13; Akalas. 5:22, 23) Nhiweherere ukati womaana. Ituninya ninkhaleehwiila khunreera uweherera wiira citthu cotheene cikhale comaana. Nakhalaka niwehereraka iyo, atthunaka hiiva khaninhala ukhitiri wiirannyeeha mipika cihu co mminepani. Pooti ukhalaka wiira nyuuva khiivo itthu yowuukurumicani, kontha mpika wiihelenleenyu unkhala toko woorika wiirannyeeha. Wakhalaka commo, nnoonela cani upacera wiirannyeeha vakaani-vakaani? Wakhalaka wiira nyuuva nnopheela woonihera ikhalelo imoca, nnoonela cani woonihera iyo ikhalelweeyo nhina wo citthu cankaani cimpankeenyu khula nihuku? Wakhala wiira mpika wiihelenleenyu ukhanle usoma Ibiiblya yotheene, nnoonela cani upacera usoma iminutu vakaani paasi khula nihuku? w23.05 ipaag. 29 iparaag. 11-13

Nlattu wa Yehova ni mphwinkwaawe woothotokanihiya, khinnithwa iyoolya yo mminepani ala mahuku ookhiceraala. Iyo iyoolya yo mminepaniiyo inaanikavihera otheene cihu weetta “Iphiro Yowaarya.” (Isai. 35:8; 48:17; 60:17) Pooti waneereehu wiira khula ikwaha ntthu nokupalyaawe usomihiya Ibiiblya, uyo haana iparakha yo weetta “Iphiro Yowaarya.” Atthu akiina khampica uhiya weettela iyo iphirweeyo. Atthu akiina anaalakela uhihiya weetta iyo iphirweeyo mpaka wanhalaaya uphiya nipuro nimmalelaaya. Masi nipuroni nenno? Ale arina niweherero noorwaa ukhala wiirimu, iyo iphirweeyo immalela wiirimu “upeephoni ya Nluku.” (Apoka. 2:7) Vano ale arina niweherero noorwaa ukhala va watuninyani va, iyo iphirweeyo immalela wiimaleloni ukati wo myaakha 1.000 unhalaawe ulamulela Kristu, ukati hiiva otheene ninhaleehu ukhala atthu oohipahuwa. Wakhala wiira nyuuva munneetta “Iphiro Yowaarya,” nhiwehe uttuli ni nhihapuwe iyo iphirweeyo mpaka wanhaleenyu uphiya nipuro nimmalelaaya, upeephoni! w23.05 ipaag. 17 iparaag. 15; ipaag. 19 iparaag. 16-18

Nlattu wo wuupuwela citthu cotheene Yehova cuupankenlyaaweni, nyuuva nnaasukhurweela ni ciicammo nnaapheela wiivaherera wa Yehova. (Isaa. 116:12-14) Ibiiblya ineera wiira Yehova phinvaha “Itthuvo yomaana yotheene ni yoovahiya yoohipahuwa.” (Tiya. 1:17) Itthuvo yuulupale cine­ne ukhanle unvaherera mwanawe Yesu wiira anoopole. Muupuwele co: Woopoliya wihu uhokhitiriha wiira nikhalane upatthani woolipa ni Yehova. Uhiya commo, nihaana iparakha yookhalana ukumi woohimala upeephoni. (1 Jo. 4:9, 10) Wiiva­herera wa Yehova ikhanle itthu yofayita inoonihera wiira ninaasukhurweela nifento ninoonihenryaawe ni ciicammo itthuvo cinivahilyaawe. —Deut. 16:17; 2 Akor. 5:15. w24.03 ipaag. 5 iparaag. 8

Hiiva noonaka makhalelo oohinamaana ilelo, nineecoona khampa Ló. Uyo ansanka nlattu wo “citthu cootakhala yaapankaaya atthu o ule ukatyuule.” Uyo ancuwela wiira ale meettelwaale khayaacivela Apaapeehu o wiirimu. (2 Pet. 2:7, 8) Umoova ni unfenta wawe Yehova wahonkavihera Ló unyema meettelo oohiloka iriyaryaawe. Hiiva ciicammo, niri iriyari yaatthu ahinhisima ikettelo ca Yehova. Uhiya commo, hiiva pooti ukhalana meettelo omaana narwaanelaka uhoolo unfenta wihu Nluku ni wiitthuca umoova niinanna yomaana . Wiira nikhitiri upanka iyo, Yehova naanikavihera. Uyo naavarela nteko ilivuru yo Miruku wiira aniitthucihe. Makristau otheene, alopwana ni athiyana, amirawo ni owuuluvala pooti waakavihera venci yasomaka ilivuru yo Miruku. Namoovaka Yehova, hi khaninaavyaavya isariya yoopheela ukhalana meettelo oohiloka. w23.06 ipaag. 20 iparaag. 1-2; ipaag. 21 iparaag. 5

Nyuuva atthunaka nhopaca ulupatthiya naamuciinyu, awula nhooleva citthu cikhwaawe khampa mihakhu wiira nhoolelihere Umwene wa Nluku khampa itthu yoopacera muukumini winyu. (Mat. 6:33) Wakhala wiira nhopanka commo pooti wankupaliinyu wiira Yehova hoona citthu comaana mpankileenyu. (Mabere. 6:10) Pooti ukhalaka wiira nyuuva nhoona wiira moolumo a Yesu akhanle eekhweeli, ukati wenryaawe co: “Khaavo hiile inupaawe, asunnawe, anumwaane, athumwaane, asaanaawe awula imatta cawe, nlattu wawaka ni nlattu wohapari comaana, hinhala waakhela imaara cene 100 nenna va alupatthiyakoono​—inupa, asunnawe, anumwaane, athumwaane, asaanaawe ni imatta cawe​—ni uhoolo ukumi woohimala.” (Mark. 10:​29, 30) Iparakha nyuuva caakhenleenyu khweeliini cikhanle cinci uvikana citthu cotheene caalevileenyu. —Isaa. 37:4. w24.03 ipaag. 9 iparaag. 5

Ukati makristau o Judeia waaphwanyilyaaya itala. Nloko no Antiyokiya Ayo yaholakela khula ntthu “yaalakelaawe wanrimani waavelelihera itthu mayamunna yaakhala u Judeia.” (Mite. 11:27-30) Unookhalaru wiira mayamunna yaaphwanyile itala yaakhala uttayi cinene, makristau o Antiyokiya yaholakela waakavihera. (1 Jo. 3:17, 18) Mahukwaala, hiiva ciicammo pooti woonihera uthunku nacuwelaka wiira mayamunneehu ihaakhumelela ihasara. Hi khaninpica upanka itthu. Hi pooti uwuulumana mahumu wiira naakavihera ale yaakhumelenle ihasara, pooti wanvaheehu micanko ni waalompela mayamunna yaakhumelenle ihasara. pooti upheela ukaviheriya wiira akhitiri uphwanya citthu cooyevaca cinhalaaya, upheela toko iyoolya. Uwakati Mweneehu Yesu unhalaawe uwa wiira aahukhumu atthu, hiiva nimpheela wiira anoone wiira naatthu ninoonihera uthunku ni anilattule wiira nikele ‘muumweneni wawe.’ —Mat. 25:34-40. w23.07 ipaag. 4 iparaag. 9-10; ipaag. 6 iparaag. 12

Yesu ahontakiha Yehova ni ahoonihera ukhala ntthu oohilipalipa, awula oohikhanyerera itthu. Uyo aaveleeliyiye watuninyani wiira aalalyeere paahi atthu yaari “ikhontwaa coorimela co nloko no Isarayeli”. Masi uyo ahoonihera uhilipalipa ni ahaalalyeera atthu akiina yahaari asarayeli. Wootakihera, ukwaha imoca, athiyana yahaari asarayeli yahonlepela Yesu wiira anvonihe mwanaya mwanthiyana ‘aarina ciini anhuviha cinene.’ Nlattu woothunku, Yesu ahopanka itthu yanlepenlyaaya ale athiyanaale ni ahonvoniha mwanaya. (Mat. 15:21-28) Moone ntakihero nikiina. Wiipaceroni ntekwaawe woolalyeera, Yesu aheera: “Ule nokikhotta . . . , ni mi ciicammo kinaahala unkhotta.” (Mat. 10:33) Masi Yesu khankhottile Peturu, hataa ukhalaka wiira Peturu ahonkhotta Yesu ikwaha tthaaru. Uyo ancuwela wiira Peturu ahottharuwa ni aari nlopwana ookhuluvelya. Wunwelelihiya wawe, Yesu ahomphwanya Peturu ni unawoonannya wiira ahomwiirela wiira aananfenta ni wiira ahonlevelela. (Luka 24:33, 34) Yehova Nluku ni Yesu kristu akhanle ohilipalipa.Vano nyuuva? Yehova ciicammo noherera wiira nikhale atthu ohilipalipa. w23.07 ipaag. 21 iparaag 6-7

Nhina ula mwahoola, nihoona citthu cinci cinhala uniiriha ukupali wiira ituninya inaahala ukhala ipeephoni. Vano, ninhala waakavihera cani akhunanihu ukupali wiira itthu ikhuluvelihilyaawe Yehova inaahala wiirannya? Yoopacera: Yehova mwaneene phikhuluvelihile. Ilivuru yo Apokalipise ineera co: “Ule onkomile wahiceni heera: ‘Woone! Kinaakhaliha conaanaano citthu cotheene.’ “ Yehova haana ucuwelaca ni ikuru wiira apanke itthu ikhuluvelihilyaawe. Yonayeeli: itthu Yehova ikhuluvelihilyaawe inkhala khampa iheerannya. Phimaana, uyo heera co: “Ala moolumwaala akhanle ookhuluvelya ni okhweeli.  . . Ala moolumwaala aheerannya!” Yoneeraru: khiivo itthu inhala unhiiha Yehova umalihaca itthu ipacenryaawe. Phimaana, uyo heera co: “Mi kikhanle Alfa ni Oomeka.” (Apoka. 21:6) Wiimaleloni, unaahala woonannya wiira Sotwani phiri owootha, kahi Yehova. “Iyo itthwiiyo ihotepa ukhala yooreera cinene. Akinaamini wiira inaahala wiirannya!” Munsomele ni muntaphulele iveerusu Apoka. 21:5 ni 6. Ni munhimerye ntthuuyo wiira nhina nnyo iveerusunnyo unkhala khampa Yehova naasinari ideclaração inoonihera wiira naahala upanka itthu yuulumilyaawe. —Isai. 65:16. w23.11 ipaag. 7 iparaag. 18-19

Jehovah made that promise Ukati waarinaawe myaakha 75 ni aaryaawe hinakhalana asaana (Upha. 12:1-4) Niireke wiira Aparahaamu ahoona itthu yaakhuluvelihiyaawe yiirannyaaka? Pooti waneereehu iyee, ahoona. Ulapuwa wawe mooloko Eufrates cinavinreene myaakha 25 awehereraka, ahoyariya mwanawe eehaniya Isaaki. Uyo waari mwiiriirya muulupale. Ni wahoolo waya, cinavinreene myaakha coopwaha 60, ahoona uyariya waasiculawe, Esawu ni Yakopi. (Mabere. 6:15) Masi Aparahaamu khoonile ucuulwaawe wencivaka ni wakelaka ilapo yaakhuluvelihiyaaya. Waahokhalaru commo, uyo nlopwana ookhuluvelyooyo ahaana upatthani woolipa ni Yehova. (Tiya. 2:23) Masi ukati unhalaawe wunwelelihiya, Aparahaamu unaahala untteela nrima nlattu woocuwela wiira, nlattu wo waamini wawe ni uvilela wawe, atthu otheene watuninyani ahocaalihiya! (Upha. 22:18) Nineetthuca isiyani? Atthunaka hiiva khaninhala woona ciirannyaaka citthu cotheene Yehova khuluvelihilyaawe. Masi navilelaka khampa Aparahaamu, pooti wankupaliihu wiira Yehova naahala unicaaliha nenna co ni wahoolo, upephooni. —Mark. 10:29, 30. w23.08 ipaag. 24 iparaag. 14

Usiya ukati waaryaawe mmirawo, uyo aari ntthu owiiyeviha. Uyo aheetthuca “umoova Nluku eekhweeli.” Usiya aakhwile narina myaakha 68 ni ikwaha cinci, Yehova ahoncaaliha. (2 Ikor. 26:1) Usiya ahaatthema awanannyaawe enci ni ahokhaliha isittatti yo Yerusalemu nipuro nookhikicerya. (2 Ikor. 26:6-15) Khweeliini, Usiya waanantteela nrima nlattu wo citthu cotheene caakhitinryaawe upanka akaviheriyaka ni Yehova. (Ekles. 3:12, 13) Mwene Usiya aholamalela waaruma atthu ni waahimerya itthu yaalamuliyaaya upanka awula yahaalamuliyaaya. Niireke wiira iyo itthwiiyo yahomwiiriha wuupuwela wiira pooti waapankaawe khula itthu yaapheelaawe? Nihuku nimoca, Usiya ahokela ntempuluni ya Yehova ni aapheela upaha ilumpani wakhilompini. Iyo yaari itthu mamwene yahaalamuliyaaya upanka. (2 Ikor. 26:16-18) Nankuttho Azariya ahomananiha unhiiha, masi Usiya ahoviruwa. Wooriipiha nrima, Usiya ahohiya unvaresesa Yehova ni ahottarusiya nimakuttula. (2 Ikor. 26:19-21) Yeeriyaka wiira Usiya khaahiile unvaresesa Yehova ni ukhala ntthu owiiyeviha, atthunaka khayaahala ukhumelela iyo itthwiiyo! w23.09 ipaag. 10 iparaag. 9-10

Hataa naryeene Nkristau oothanliya, Peturu ahaana aananaka moopuwelelwaawe oohiloka. Mwaakha wo 36 nawile Kristu, Peturu ahorumiya ni Nluku urwaa wa Cornélio ahaari nyuuta. Vano Cornélio ahothanliya ninnepa wowaarya. Uyo ukatyuuyo wahoonannya wiira “Nluku khaavo nonthanlaawe” ni atthu yahaari ayuuta pooti waapankaaya mphantte nloko neekristau. (Mite. 10:34, 44, 45) Wahoolo waya, Peturu ahopacera waalyaana ayo atthwaayo, itthu yaaryaawe hinapanka iyareelwaawe. Masi ayuuta akhwaawe yaari ahinahiya moopuwelelo oohaalyaana ale yahaari ayuuta. Ni ukati waawilyaaya makristau o Antioquia yaarina ayo moopuwelelwaayo, Peturu ahohiya waalyaana mayamunnaawe, atthunaka anawoova wathweela inaasi makristau ayuuta. Apostolu Paulu ahoona wiira Peturu kheettela ikhweeli ni ahonvaha ikano iriyari waatthu enci. (Akalas. 2:13, 14) Wahookhalaru commo, Peturu khaahiyerenre wiikurumica uhituruwela upanka citthu cavonnyanihacaawe. w23.09 ipaag. 22 iparaag. 8

Mahumu, nholakela wiira nwacere ikhontwaa ca Yehova ninrimeenyu wotheene? Atthunaka nyuuva nhoona wiira nhaana mpankaka saana itthu yahaapankeenyu saana, masi nhikhale nimasukhuli. “Apwiiya akhanle owoonihera unamaana” ni ayo anaahala wuukaviherani nyuuva upanka marukunuso nnopheeleenyu. (1 Pet. 2:3) Apostolu Peturu honikhuluveliha: “Nluku . . . naahala umalihera ufunttiya winyu. Uyo naahala wuulipihani, uyo naahala wuuvahani ikuru 1 Pet. 5:10. Wiipaceroni, Peturu ooniha toko khawamphwanela ukhala nkhayi ni Yesu. (Luka 5:8) Masi akaviheriyaka ni Yehova ni Yesu, Peturu ahovilela ni khaahile ukhala ntthari a Kristu. Nlattu wo iyo itthwiiyo, Yehova hontthunihera Peturu “ukela muumweneni woohimala wa apwiiya ni Moopoli Yesu Kristu.” (2 Pet. 1:11) Iyo ikhanle itthuvo yootepa ureera! Wakhala wiira nyuuva khampa Peturu nnaavilela ni nnaatthuna ufunttiya ni Yehova, nyuuva ciicammo nnaahala waakhela iparakha yookumi woohimala. Naayo manannaayo, nnaahala wiirannyeeha ‘mpikeenyu: woopoliya.’ —1 Pet. 1:9. w23.09 ipaag. 31 iparaag. 16-17

Mananna ayuuta caaswalyaaya. Itabernaakulu yahaana ipuwa yootekeliya iluwani ni nhina iyo ipuweeyo, ananteko phaavaraaya ntekwaaya. Ikhilompi yokoopere waavahereriyaaya itthuvo coopahiya yaakhala nhina iyo ipuweeyo ni yahaavo ciicammo ipasiya yokoopere yaaheliya maaci wiira anankutthu anyawe ni yiivululace mmettoni ahinaaya wancera uvara miteko caya. (Nkw. 30:17-20; 40:6-8) Ilelo makristau oothanliya ananswalela Yehova watuninyani. Va watuninyani va phikhanle ipuwa yo nhina yo ntempuluni yo mminepani. Ipasiya yuulupale yo maaci iri nhina iyo ipuweeyo ikhanle nthoonyero wiira makristau oothanliya ni makristau akhwaawe otheene anawuupuseriya wiira ahaana yiirattelaka mwiirutthuni waya ni nhina mminepani. Vano ale akhanle “ikhurupu yuulupale”, anonswalela Yehova nipuroni? Apostolu Joau ahoona mphwinko muulupale wa atthu aneemenle uhoolo wohice. Nhina itempulu yokhalayi, nno nipuro neemenlyaayanno yaari ipuwa yo vate, ‘wanswalelaaya [Nluku] uthana ni uhiyu.’ (Apoka. 7:9, 13-15) Hi ninawoona ukhalana ifayita cinene iparakha Yehova inivahilyaawe yonswalela nimananna owaarya ntempuluni wawe yo mminepani! w23.10 ipaag. 28 iparaag. 15-16

Yehova ilelo naavarela nteko mahumu wiira anivahe ikuru. (Isai. 32:1, 2) ­Phimaana, mwakhalaka niiwasiwaasi, mwaahimerye mahumu itthu inoohela iwasiwaasi. Nhuupuwele ikwaha piili, ntthune ukaviheriya ni mahumu yoolipihakani. Aavarelaka nteko mahumu, Yehova naahala wuulipihaniNiweherero Ibiibiliya ninnivahaaya pooti univaha ikuru. Niweherero nihu ninaanikavihera uvilela marikariko, ulalyeera ihapari comaana ni uvara miteko cotheene ninvahaceriyeehu wanlokoni. (1 Atesal. 1:3) Nno niwehereronno phanlipihile apostolu Paulu. Uyo “ahosuphiya” ni “ahoova”, “aholupatthiya” ni aheecoona “utthemiya”. (2 Akor. 4:8-10) Ni ikwaha cinci uyo aahaleela vakaani ukhwa. (2 Akor. 4:16-18) Paulu ahoweheeha iparakha yaarinaawe yoohala ukhala mpaka wiirimu. Paulu anoopuwela iparakha yaarinaawe, nlattu wo iyo itthwiiyo uyo ankhala saana.” w23.10 ipaag. 15-​16 iparaag. 14-17

Kiireke wiira ula ukhanle ukati womaana wiira Yehova akivahe itthu inlepenlyaaka?’ Atthunaka nyuuva nnopheela wiira Yehova awaakhuleni woohipicapica. Masi, Yehova phincuwela ukati wooreera unaakhula. (Mabere. 4:16) Noonaka wiira ulompa wihu khawaakhuliye ukati waapheeleehu, hiiva atthunaka ninoopuwela wiira Yehova niirenle “mena.” Masi khweeliini, pooti ukhalaka wiira uyo niirenle “uweherere.” Wootakihera, mmuupuwele mmirawo aalompile anlepelaka Yehova wiira anvonihe. Unari wiira Yehova ahonvoniha, Sotwani aahala umwiirela Yehova wiira uyo munnooyo nonswalela Yehova nlattu woovonihiya. (Jó 1:9-11; 2:4) Ciicammo, nihiliyale wiira Yehova honikhuluveliha wiira wahoolo naahala umaliha iretta cotheene. (Isai. 33:24; Apoka. 21:3, 4) Niwehereraka uphiya uyo ukatyuuyo, hi khaninlamuliya uwehera wiira Yehova naahala univoniha nawerennyaka. Phimaana, ule munnoole aalamuliya unlepela Yehova ikuru ni nnema wiira hihiye uvilela ni unswalela Nluku, hataa awerennyaka. w23.11 ipaag. 24 iparaag. 13

Sansau ahovara itthu yootakhala cinene, masi uyo khaahiyerenre unkhuluvela Yehova ni unswalela. Uyo ahoweherera ukati womaana wiira apanke itthu yaapheelaawe Yehova, awula, uwaanana mafilisteu. (Masuw. 16:⁠28-​30) Sansau ahonlepela Yehova, “nkihiye kaalivyaanihere mafilisteu”. Yehova ahaakhula itthu yaalepenlyaawe Sansau ni ahonvaha ikuru cinci ni comiiriirya. Naayo manannaayo, Sansau ahowiiva mafilisteu enci wonkwaha mmoca upwaha awiivilyaawe muukumini wawe motheene.Sansau ahaana aananaka masakha nlattu wo citthu cootakhala caapankilyaawe, masi uyo khaahiile umananiha upanka citthu cinoncivela Yehova. Iyo itthwiiyo inaanikhumelela hiiva ciicammo. Navaraka matampi ni nalakiyaka awula nahaleelaka mirintti cihu cowanlokoni, khaninlamuliya uhiya unswalela Yehova. Nhiliyale Yehova khannihiya. (Isaa. 103:​8-9) Hataa ukhala wiira nihovara itampi, Yehova pooti univarela nteko khampa anvarenlyaawe nteko Sansau. w23.09 ipaag. 6 iparaag. 15-16

Yehova naawoonani ukhala ntthu omaana. Masi khunakhala wiira uyo unantteela nrima nlattu woowoonani nhuvaka. Yehova unantteela nrima nlattu nyuuva woovilela, kahi nlattu woohuva winyu. Uvilela winyu unaawiirihani ukupaliya ni Nluku. Iyo khweeliini ikhanle iparakha yuulupale(Isaa. 5:12) Muupuwele wiira Aparahaamu ahovilela hataa yankhumelelaka masakha menci ni Yehova wahontteela nrima cinene nlattu wo iyo itthwiiyo. Yehova aamoona ukhala mpatthannyaawe ni ahomoona ukhala nasariya. (Upha. 15:6; Aroo. 4:13, 22) Iyo itthwiiyo pooti uniirannyeela. Ukupaliya wihu ni Yehova khunakhala nlattu woovara cinene ntekhwawe, ni khunakhala nlattu woovahaceriya mirintti cinci wanlokoni. Masi Yehova nonikupali nlattu woovilela ni waamini wihu. Ni hataa nikhalaka owuuluvala, amirawo ni hataa yanikhumelelaka isiyani, otheene cihu ninaahala ukhitiri uvilela. Ahaavo masakha anookhumelelani nenna co ni anvileleenyu? Wakhala commo, nhiliyale wiira Yehova unantteela nrima cinene nlattu woowoonani nvilelaka. Noonaka wiira Yehova naanikupali, niweherero nirinehu wiira naahala wiirannyeeha citthu cikhuluvelihilyaawe ninaatepa ukhala noolipa. w23.12 ipaag. 11 iparaag. 13-14

Nkristau haana eetthucaka ­uwuulumana ratta akhwaawe. Nlopwana nocuwela uwu­ulumana saana akhunanawe nawaaviriyana ni naakhitiri ucuwelela itthu inoopuwe­laaya ni inwiira. (Miru. 20:5) Ukati woomuulumana ntthu, uyo ciicammo naakhitiri ucuwelela itthu inthoonyeraaya ncu nawe ntthuuyo, ikhovyaawe ni mananna cineenyeenyihaawe irutthwaawe. Weeva khunhala ukhitiri wiitthuca citthu cotheenennyo waahiviriheke ukati wuulumaka naatthu akiina. Wakhalaka wiira ukati wotheene unkhala umpottolacaka telefooni ni uwuulumanaka atthu uvarelaka nteko e-mail awula imensagem, khunhala wiitthuca uwuulumana atthu co ni co. Phimaana, wiikurumice uviriha ukati unari naatthu ni uwuulumane co ni co. (2 Jo. 12) Nkristau ookhomaala haana acuwelaka wiiwacera mwaaneennyaawe ni waawacera amucyaawe. (1 Tim. 5:8) Unaareera wiitthuca uvara itthu inhala wuukavihera uphwanya nteko. (Mite. 18:2, 3; 20:34; Efesu 4:28) Wiikurumice wooniya wiira ukhanle ntthu oohinyoonyaciya ni unaakhitiri umalihaca miteko cimpaceraa. Wapankaka commo, khunhala wuurika uphwanya nteko ni ulokela ukati mwinci nipuro ninhalaa wancera uvara nteko. w23.12 ipaag. 27 iparaag. 12-13

“Nihuku na Yehova” mbiiblyani, ninaaciya nihuku Yehova naahukhumwaawe amwiinannyaawe ni uwoopola apoovwaawe. Iyo ihokhumelela ikwaha cinci khalayi. (Isai. 13:1, 6; Ezek. 13:5; Sof. 1:8) Mahukweehwaala, nihuku na Yehova ninhala upacera ukati ahooleli isiyaasa unhalaaya utuphela Ibabilooniya Yuulupale ukhottoni yo Harmacetom. Wiira noopwe nno nihukunno, nihaana wiitthenkaca nenna co. Yesu heetthuciha wiira nihaana nikhalaka owiitthenkaceene wiira nakhitiri uvilela nihuku no masakha moolupale. Iyo inoonihera wiira nihaana wiitthenkaca khula nihuku. (Mat. 24:21; Luka 12:40) Nhina iwarakha yoopacera Paulu yaakaviheriyaawe ninnepa wowaarya wiira awantikhele atesalonika, ahovarela nteko malattanihero menci wiira aakurumice makristau ukhala owiitthenkaceene wiira yavilele nihuku nohukhumu na Yehova. Paulu ancuwela wiira nihuku na Yehova khanaahala uwa ule ukatyuule. (2 Atesal. 2:1-3) Waahookhalaru commo, uyo ahaakurumica mayamunnaawe ukhala owiitthenkaceene, khampa nno nihukunno niri wakhiviru. Hiiva ciicammo pooti weettela iyo ikanweeyo. w23.06 ipaag. 8 iparaag. 1-2

Wimaleloni mwaakha wo 1970, yahopaceriya utekiya ipereetiyu yo 60 andare isitta­tti yo Tóquio, u Japão. Atthu yoona, yantikhinaca ni yaaneekoha wakhala wiira yanhala ulipa wawaaka uttettemela wotthaya unweesa ile isittattiile. Wakhitiryeele cani? Anamatekateka yaapankile iyo ipereetiywiiyo wiira ikhale yoolipa, ni yookhitiri uhittikhinyaa ukati unttettemelaaya itthaya. Makristau akhanle khampa iyo ipereetiyu yoorekameeyo. Manannani? Nkristau haana akhitiriki uvirikaniha ulipa ni uhilipalipa. Ukhala ntthu oolipa maanaaya wiira nkristau haana alipihacaka wiiwelela malamulo ni ikano ca Yehova. Ciicammo, maanaaya wiira nkristau haana akhalaka ‘owaakuva wiiwelela’ ikano ni uhihiyerera hataa itthu imwiirihaka urukunusa itthu ilakenlyaawe. Vano uhilipalipa, maanaaya wiira nkristau haana akhalaka “ooreera nrima” awula oohikhanyerera itthu ni haana atthunaka urukunusa moopuwelelwaawe wakhalaka wiira khaalokile. (Tiya. 3:17) Nkristau neetthuca uvirikaniha ayo makhalelo meelyaayo, khanhala ukhala ntthu okhanyerera itthu ni ciicammo ootthuna citthu cotheene. w23.07 ipaag. 14 ipara­ag. 1-2

Yesu ahonkhottela Sotwani, kontha khaapheela uhiya umwiiwelela Yehova Nluku. (Mat. 4:1-11) Sotwani aholakela unvariha matampi Yesu wiira hinoopole. Ukati Yesu waalalyeeraawe va watuninyani va, uyo yahonkhumelela marikariko menci. Awaanannyaawe yaanonlupattha ni yaholakela umwiiva. (Luka 4:28, 29; 13:31) Uhiya commo, uyo ahaana avilelaka upahuwa waattharyaawe. (Mark. 9:33, 34) Ukati Yesu waahukhumwiyaawe, uyo ahottarusiya ni ahopankiya citthu cohaaya. Wiimaleloni, uyo aheeviya nimananna oohiloka ni oowereeha nrima. (Mabere. 12:1-3) Uyo ahaana waanana veekha citthu cankhumelela wiimaleloni ukumyaawe, woohikhikiceriya ni Nluku. (Mat. 27:46) Khweeliini, Yesu yahonkhumelela masakha menci wiira avahe ukumyaawe wiira anoopole. Hiiva noopuwelaka citthu cotheene coorika Yesu pankilyaawe wiira anoopole, unfenta wihu unaatepa wuunuwa. w24.01 ipaag. 10-11 iparaa. 7-9

Uvilela unaanikavihera ukhalana upatthani womaana naakhwiihu. Ni ciicammo unaanikavihera waaviriyana ratta akhwiihu wakhalaka wiira ihaavo inoolumaaya. (Tiya. 1:19) Uhiya commo, uvilela unaanikavihera ukhalana nnema naakhwiihu. Nakhalaka atthu oovilela, khaninhala wuuluma itthu woohuupuwela ni khaninhala wuuluma itthu inhala unriipiha nrima nkhwiihu; ciicammo, khaninhala unviruwela ntthu aninyoonyihakavale. Uhiya unhokolosera, hi ninaahala wiitthuca “uvilelana ni ulevelelana niiraatti.” (Akolo. 3: 12, 13) Uvilela ciicammo pooti unikavihera napheelaka ulakela upanka itthu. Uhiya upanka citthunnyo naakuvyaacaka, ninaahala ukumiha ukati wiira nuupuwele sana-saana manannani oopanka ni uthanla ratta itthu yoohala upanka. Wootakihera, pooti ukhalaka wiira hiiva ninaavya nteko. Naahikhaleke atthu oovilela, pooti upheelaka utthuna nteko woopacera unhaleehu uphwanya. Masi nakhalaka atthu oovilela, ninaahala weemela ni wuupuwela ratta ntekoni unhaleehu uthanla, ninaahala wuupuwela wakhala wiira uyo ntekooyo khunhala waawaanela marikariko amuciihu ni ukukuryeeha upatthaniihu ni Yehova. Nakhalaka atthu oovilela, ninaahala uthanla upanka citthu comaana muukumini wihu. w23.08 ipaag. 22 iparaag. 8-9

Nyuuva atthunaka unaawuripani nrima nlattu woowuriikani unyema citthu cootakhala atthunaka cuucivenleeni upanka. Masi wuupuwela itthu ikhuluvelihileenyu ukati mwiivaherereenyu ukumiinyu wa Yehova unaahala ulipihaca itthu nkhuluvelihileenyu ni unyema upanka citthu cootakhalaManannani? Nyuuva mweevahereraka wa Yehova, nnaawiira wiikhotta mwaaneeneenyu. Nwo wiikhottannwo maanaaya wiira nhaana nkhottaka citthu cinoocivelani mwaaneeneenyu cincuweleenyu wiira cinanrusa Yehova. (Mat. 16:24) Phimaana, yookhumelelakani masakha, nyuuva khannohala urihakaca ukati mmananihaka wuupuwela itthu yoohala upanka ni nyuuva nnaahala ukhotta upanka citthu cotheene cootakhala ni nnohala utthuna upanka itthu imoca paahi umwiiwelela Yehova. Nyuuva nnaahala ulipihaca ulakela winyu upanka citthu cinoncivela Yehova. Mwapankaka commo nyuuva nnohala ukhala khampa Jó. Unookhalaru wiira uyo yahonkhumelela masakha menci oorika cinene, uyo aheera co: “Akinhala uhiya woonihera imaani!” —Jó 27:5. w24.03 ipaag. 9 iparaag. 6-7

—Citthu ciwiirannyenle mayamunna ni mayanuunu cuulumileehu nhina ula mwahoola cinthoonyera wiira Yehova, “Nluku oofenta” ri nihiiva! (2 Akor. 13:11) Uyo naaniwacera otheene cihu ni pooti wankupaliihu wiira ‘naanoonihera nifento nawe nookhuluvelya.’ (Isaa. 32:10) Noopuwelaka mananna Yehova cinifentilyaawe, ninaahala utepa umpatthanana ni ninaahala umoona wiira khweeliini haavo ni ri nihiiva. Hi pooti wanonlompeehu Yehova khula ukati ni unhimerya wiira ninaapheela cinene nifento nawe. Ciicammo, hi pooti uhimerya citthu cotheene cinnihela isukhuli ni ukhuluvela wiira uyo naacuwela itthu inniira ni naapheela unikavihera. (Isaa. 145:19) Hi unaanicivela woottha mooro waniririyaka. Inanna imocaaru, hi nimpheela umwaattamela Yehova wiira anoonihere nifento nawe. Uhookhalaru wiira Yehova haana ikuru cinene, uyo khanoopiha ni naanimaaliha. Phimaana, munhimerye yotheene irineenyu wanrimaninyu ni munhiye wiira awoonihereni nifento nawe. Noonaka wiira naanifenta, hi ninaahala wiira: “Mi kinanfenta Yehova”! —Isaa. 116:1. w24.01 ipaag. 31 iparaag. 19-20

Yesu khenre paahi waahimerya atthwaayo wiira Yehova nikhanle ncina na Nluku. Ayuuta Yesu yaawuulumanaawe yancuwela wiira Yehova nikhanle ncina na Nluku, masi Yesu ahoonihera makhalelo a Yehova. (Joau 1:17, 18) Wootakihera, Cowantikhiya Niiluuka Iheperewu cinaahimya wiira Yehova khanle nakiriri ni nawoonihera uthunku. (Ikw. 34:5-7) Yesu ahoonihera sana-saana mananna Yehova cinooniheraawe ikiriri ni uthunku ukati waamuulumilyaawe mwaana aalakenle uthama wapuwani waathumwaane. Noonakavale wiira athumwaane uyo mwaanooyo yahomoona nari uttayi, yahontthawelela ni yahonlevelela niiraati, hi ninaakhitiri wooneeha mananna Yehova nooniheraawe uthunku ni ikiriri. (Luka 15:11-32) Yesu hoonihera mananna Athumwaane ciryaaya. w24.02 ipaag. 10 iparaag. 8-9

Yehova naanimaaliha ni naaniphwanyiha ikuru yanikhumelelaka masakha Ninhala untakiha cani Yehova wiira niwoonele uthunku akhunanihu ni naamaalihe? Inanna imoca yontakiha ukhanle wiitthuca woonihera ikhalelo cinnikavihera waamaaliha akhunanihu. Ikhaleloni cennyo?Isiyani inhala unikavihera ‘Uhihiya umaalihana’? (1 Atesal. 4:18) Nihaana niitthucaka woonihera ikhalelo toko woona ikiriri, ufenta ni woonihera unamaana. (Akol. 3:12; 1 Pet. 3:8) Ayo makhalelwaayo anhala unikavihera cani? Nawoonelaka ikiriri mayamunnee. (1 Atesal. 4:18) Hi ninaahala upheela waamaaliha yaakhumelelaka masakha. Yesu aheera: “Malaku anooluma citthu cincanre ntthu wanrimani.” (Mat. 12:34, 35) Waamaaliha mayamunneehu ni mayanuunwiihu anaakhumelela masakha akhanle mananna o waathoonyihera wiira ninawaafenta. w23.11 ipaag. 10 iparaag. 10-11

Napheelaka wiiweeha inatiri co mbiiblyani, nihaana nikaviheriyaka nintthu. Muupuwele ila itthwiila: Nyuuva nnopheela urwaa nipuro nhinatokweenyu uphiya, masi nyuuva nri nimpatthaniinyu nocuwela saana nno nipuronno. Uyo naacuwela nipuro nriceenyu ni nipuroni ninkhumelelaaya khula iphiro. Khweeliini, ukhalana mpatthani commo wanhala wuutteelihani nrima. Woolikanaca, Yehova nokhala khampa uyo mpatthannyuuyo. Yehova naacuwela sana-saana ukati uriihu ni itthu inhala ukhumelela wahoolo. Phimaana, napheelaka wiiweeha inatiri co mbiiblyani, nihaana wiiyeviha ni unlepela Yehova wiira anikavihere. (Dan. 2:28; 2 Pet. 1:19, 20) Khampa ayari ampheelaaya wiira asaanaaya akhale saana, Yehova ciicammo nopheela wiira asaanaawe akhalane niweherero nomaana. (Jer. 29:11) Masi, woovirikana naayari apinaatamu, Yehova naacuwela itthu inhala wiirannya wahoolo, ni uyo khanootha. Phimaana, Yehova horuma wantikhiya inatiri mbiibiliyani. Commo, hiiva pooti ucuwela citthu cofayita cinhala wiirannya wahoolo. —Isai. 46:10. w23.08 ipaag 8 iparaag. 3-4.