Julho

Citthu cotheene Yesu cenryaawe ni caapankilyaawe, nihelaka nhina miiriirya​—uyo ahotakiha sana-saana mananna owuupuwela omaana aathumwaane. (Joau 14:9) Moone citthu cinhala unikavihera wiitthucera miiriirya ca Yesu? Yesu ni Yehova anaanifenta venci. Uwakati Yesu waaryaawe watuninyani, uyo ahoonihera mananna caafentaawe atthu uwakati waapankaawe miiriirya wiira amalihe uhuva waya. Ikwaha imoca alopwana eeli oohoona, yahonlepela Yesu wiira aakavihere. (Mat. 20:30-34) Yesu “ahowoonela uthunku” ayo alopwanaayo ni ahaavoniha. Nhina iyo iveeruswiiyo nuulumo nitaphuleliya niiluuka ikereku ni“ahowoonela uthunku” ninthoonyera wiira anwoona ikiriri cinene. Uthunku Yesu woonnyaawe waathoonyera nifento nawe. Ni nno nifento nno, nahomwiiriha Yesu waavaha iyoolya atthu yaari niitala ni unvoniha namakuttula. (Mat. 15:32; Mark. 1:41) Pooti wankupaliihu wiira Yehova, Nluku oomwinciva ikiriri, ni mwan­awe Yesu anaanifenta venci ni ciicammo anaahuva yanoonaka hiiva nihuvaka. (Luka 1:78; 1 Pet. 5:7) Ninaakupali wiira Yehova ni Yesu anaapheela cinene umaliha masakha otheene anaahuviha apinaatamu! w23.04 ipaag. 3 iparaag. 4-5

Nihaana upanka yotheene inkhitiriihu wiira ninyeme moopuwelelo oohiloka o ntuninyani ya Sotwani. Nasomaka ni noopuwelaka itthu insomeehu, ninaacariha mmuru wihu moopuwelelo omaana ni ooreera weettela. Urwaa umikutthaanoni ni wuulalyeerani unaahala ukhikicera moopuwelelweehu. Vano Yehova naahala upanka itthu ikhuluvelihilyaawe yoohinihiya naananaka masakha ahinkhitiriihu. (1 Akor. 10:12, 13) Otheene cihu nihaana nihihiyaka ulompa wiira nihihiye unvaresesa Yehova ala mahuku oorika ni ookhiceraala Yehova nopheela wiira ninlompe ni ninhimerye inniira wanrimani wihu. (Isaa. 62:8) Munsukhuru Yehova ni munttottopele nlattu wo citthu cotheene uyo cimpankaawe, munlepele wuukaviherani wiira nkhalane oolipa nrima wuulalyeerani. Nhihiyerere ulompa wiira nkhitiri waanana marikariko arineenyu ni wiira nkhitiri uvilela mwattehattehiyaka. Nhinhiye hataa ntthu oohiihakani nyuuva unlompa Yehova. w23.05 ipaag. 7 iparaag. 17-18

Nlattuni ninrweehu umikutthaanoni? Itthu yuulupale inniiriha urwaa umikutthaanoni ukhanle unttottopela Yehova. (Isaa. 26:12; 111:1) Itthu ikhwaawe ukhanle ulipihana ula ukati wo masakha unkhaleehuula. (1 Atesal. 5:11) Nonvusaka ntata ni navahaka ikomentaariyu, ninaapanka nnyo citthu piilinnyo. Masi atthunaka ninaakhalana marikariko, toko woova ukomentari awula upheela ukomentari ikwaha cinci, masi uhiihaniya wiira nikomentari. Ninhala ukhitiri cani waanana ayo marikariko meelyaayo? apostoluPaulu aheera wiira ayo yahaana yakurumicanaka Phimaana, noonaka wiira mayamunna akhwaawe anaahala ukhala ookurumiciya nlattu wokomentaariyu yankaani inhaleehu uvaha, hiiva ninaahala upheela uvaha ikomentaariyu. Ni hataa ukhalaka wiira hiiva khanineehaniya wiira nikomentari ikwaha cinci toko caapheeleehu, ninaakhala ootteeliya nlattu woowiiwa mayamunna akhwaawe yakomentariki. — 1 Pet. 3:8. w23.04 ipaag. 20 iparaag. 1-3

Mwene ahohimya! Ayuuta yaatthukeliye myaakha 70 u Babilooniya, pooti waaturuwelaaya uwannyaya, ilapo yo Isarayeli. (Estra 1:2-4) Woohaakanyaca, Yehova phaahoolela iyo itthwiiyo.Kontha ababilooniya khayaatthukula atthu yaatthukelaaya. (Isai. 14:4, 17) Ni nhooleli onaanaano o Babilooniya ahaaleva ayuuta wiira pooti waakhumaaya u Babilooniya. Phimaana, ayuuta otheene, yahaana yalakelaka ukhuma u Babilooniya awula uhikhuma. Ulakela iyo itthwiiyo wahorikaAyuuta enci yahooluvala, phimaana waanaahala waarikela uturuwela ilapo yo Isarayeli. Ayuuta enci yaayaryenle u Babilooniya ni iyo phi ilapo yaacuwelaaya ukhala uwannyaya. U Isarayeli yoona ukhala ilapo yaasithumwanaya awula yaasitaataaya ni yaasipiipyaaya. Ayuuta akiina atthunaka yahaana mihakhu cinci u Babilooniya. Phimaana, ayo yoona ukhala itthu yoorika uhiya inupa caya ni anakoswaaya wiira arwee nipuro nahaacuwelaaya ni wiira yapacere-tho upanka nnyo citthunnyo. w23.05 ipaag. 14 iparaag. 1-2

Nuulumo na Nluku ninaanikurumica wiira nihihiye woonihera uvilela, uthunku ni nifento. Luka 21:19 ineera: “Nlattu woovilela winyu nnaahala woopola ukumiinyu.” Akolosu 3:​12 ineera: “Nthoonyere. . uthunku.” Ni 1 Atesalonika 4:9, 10 ineera: “Nyuuva nneera mwaafentaka mayamunneenyu otheene .  . . Masi, nimpheela wuukurumicani mayamunna wiira nhihiye uvira ntepaka upanka iyo.” Ala moolumwaala yantikheliye atthari yoonihera uvilela, uthunku ni nifento. Waanookhalaru commo, ayo yahaana yahihiyereraka woonihera ayo makhalelwaayo. Hi nihaana naatakihaka. Wiira anikavihere, ninaahala woona mananna makristau oopacera yoonihenryaaya ayo makhalelwaayo. Ni ciicammo, ninaahala woona manannani ninlamuliyeehu waatakiha ayo attharyaayo ni naayo manannaayo woonihera wiira niheetthenkaca wiira navilele masakha moolupale. Ukati uhalaaya wancera masakha moolupale nyuva nnahala ukhitiri uvilela ni kannohala uhiyerera. w23.07 ipaag. 3 iparaag. 4, 8

Hataa nikhalaka nhina ikhurupu yo makristau oothanliya awula nhina ikhurupu yo “ikhontwaa cikiina,” otheene cihu nihaana neettelaka “Iphiro Yowaarya.” Upanka commo unaahala unikavihera uhihiya unswalela Yehova nenna co ni ciicammo wahoolo, ukati unhaleehu waakhela iparakha co Umwene wa Nluku. (Joau 10:16) Ukhuma mwaakha wo 1919, alopwana, athiyana ni asaana imiliyau cene aneera yakhumaka Ibabilooniya Yuulupale, awula ittiini cowootha, ni anaapacera upanka ikwaha yuulupale yeettaka mparapaarani yowaarya. Atthunaka nyuuva nri nhina ikhurupu yo ayo atthwaayo. Mwaakha wo 1919 phipaceriyaaya weettiya nhina iyo iphirweeyo, masi wahaana uvariyaka nteko mwinci uhinaphiya uyo mwaakhooyo. Yehova ahokhuluveliha wiira citthu cotheene caahala uwiiriha ayuuta uhikhuma u Babilooniya canhala umalamalihiya. (Isai 57:14) Niireke mahukwaala ihokhumelela itthu yoolattanaca ni “Iphiro Yowaarya”? Iyee. Myaakha cinci uhinaphiya mwaakha wo 1919, Yehova ahaavarela nteko alopwana ookhuluvelya wiira ukhitirye atthu akiina ukhuma Ibabilooniya Yuulupale. (Nwehe ciicammo Isaiya 40:3.) Ayo alopwanaayo yahotthenkaca iphiro wiira atthu ooreera nrima akhume ittiini cowootha ni answalele Yehova nkhayi naapoovwaawe. w23.05 ipaag. 15-16 iparaag. 8-9

Yehova khampheela wiira nipanke itthu nlattu wookhanyererihiya, masi nopheela wiira nipanke unitteelaka nrima. (2 Akor. 9:7) Vano wakhalaka wiira nyuuva uhaavo mpika unoonyoonyani wiirannyeeha, niireke wiira nhaana mwiikurumicaka utotha wiirannyeeha uyo mpikooyo? Muupuwele ntakihero na apostolu Paulu, uyo heera co: “Kinaattarusa irutthwaaka ni kinaweettihera khampa iphottha.” (1 Akor. 9:25-27) Paulu aanawiikhanyereriha upa­nka citthu comaana hataa ukhalaka wiira uyo khaapheela upanka nnyo citthunnyo. Ni Yehova aawehera cani citthu caapankaawe Paulu? Uyo waanantteela nrima nlattu wo woona nteko Paulu wanvarelaawe ni ahoncaaliha nlattu wo wiikurumica wawe. (2 Tim. 4:7, 8) Inanna imocaaru, Yehova naakhala ootteeliya nrima cinene anoonaka niikurumicaka wiirannyeeha mipika hataa nihikhalanaka ikuru yo wiirannyeeha nnyo mipikannyo. Uyo unantteela nrima kontha naacuwela wiira niniikurumica kahi nlattu woonicivela mpikooyo, masi nlattu wonfenta uyova. Khampa Yehova cancaalihilyaawe Paulu, uyo naahala ucaaliha wiikurumica wihu. (Isaa. 126:5) Ni noonaka wiira Yehova naanicaaliha, ninaatepa ukhalana ikuru. w23.05 ipaag. 29 iparaag. 9-​10

Paulu nawaalattanihera atthu anhala uhoopwa nihuku na Yehova naatthu anrupa. Ayo khancuwelela ukati unvira ni itthu ineerannya iriyaryaaya. Phimaana, ayo khancuwelela itthu yofayita inkhumelela ni khiivo impankaaya. Atthu enci ilelo anaarupa nhina mminepani. (Aroo. 11:8) Ayo khankupali wiira hiiva ninkhala mahuku ookhicera ni wiira masakha moolupale anaahala ukhumelela woohipica (2 Pet. 3:3, 4) Masi hi ninaacuwela wiira nihaana uhiitthaala khula nihuku wiira nihirupe. Wiira nihiikelakelihe citthu cosiyaasa awula citthu co ntuninyani. Ukati untepaaya waattamela nihuku na Yehova, ninaahala utepa wiicoona ukhanyererihiya ukelakela nnyo myahannyo. Masi, khaninlamuliya utepa ukhala niiwasiwaasi nlattu wo nnyo citthunnyo. Nnepa wowaarya wa Yehova unaahala unikavihera ukhala oomaala ni ulakela upanka citthu comaana. —Luka 12:11, 12. w23.06 ipaag. 10 iparaag. 6-7

Nyuuva nnoopuwelaka isiyani mweewaka ncina Sansau? Atthunaka, nyuuva nnoopuwela wiira, uyo aari nlopwana nakuru cinene. Iyo ikhanle ikhweeli. Masi uyo aholakela citthu coohinamaana ni cahonkhumelela citthu cootakhala nlattu wo iyo itthwiiyo. Masi uhookhalaru commo, Yehova aaweheeha citthu comaana paahi Sansau caapankilyaawe. Phimaana Yehova hohiya mbiiblyani ntakihero na Sansau wiira hiiva niitthucere. Yehova ahonvarela nteko Sansau wiira apanke citthu cootikhiniha ni ciicammo uwoopola asarayeli. Uvira waya myaakha cinci Sansau nakwileene, Yehova ahonvarela nteko apostolu Paulu wiira antikhe ncina na Sansau nipuro nantikhiye macina aatthu yoonihenre waamini venci. (Mabere. 11:32-34) Ntakihero na Sansau pooti unilipiha. Uyo ahonkhuluvela Yehova hataa akhalaka ukati woorika cinene ntakihero na Sansau ninhalaaya unikavihera ni manannani hiiva ninhaleehu umwiitthucera. w23.09 ipaag. 2 paraag. 1-2

Ciicammo, hiiva ninhala ulipihaca uvilela wihu naahihiyeke unlompa Yehova ni unhimerya citthu cotheene cinnihela isukhuli. (1 Atesal. 5:17) Pooti ukhalaka wiira nyuuva khanookhumelelani masakha moolupale nna co. Masi niireke wiira munnonlompa Yehova khula ikwaha munkhaleenyu oorusiya awula oonyoonyiya nhicuwelaka itthu yoohala uvara? Mweelamalelihaka unlepela Yehova wiira ookavihereni uvilela masakha mankaani anookhumelelani khula nihuku, nyuuva khweeliini nnaahala ukhitiri upanka iyo itthwiiyo yookhumelelakani masakha moolupale wahoolo. Nyuuva nnaahala ukhuluvela wiira Yehova naacuwela manannani ni ukatini wowuukaviherani. (Isaa. 27:1, 3) Navilelaka masakha annikhumelela nna co, khunhala utepa unirika uvilela marikariko anhala uniphwanya ukati wo masakha moolupale. (Aroo. 5:3) Nincuwela cani iyo itthwiiyo? Mayamunneehu enci ahoonenela wiira khula ikwaha marikariko anttehaaya waamini waya, ayo anaatepa wiicoona ulipa yaakhumelelaka marikariko makhwaawe. Ayo mayamunnaayo yaakhumelelaka masakha ni yavilelaka, waamini waya wiira Yehova naahala waakavihera unaatepa ulipa. Nwo waamininwo unawaakavihera utepa ulipa wiira avilele marikariko anaakhumelela wahoolo. —Tiya. 1:2-4. w23.07 ipaag. 3 iparaag. 7-8

Wiiyeviha ni uthunku wa Yehova unaamwiiriha ukhala oohilipalipa. Wootakihera, wiiyeviha wa Yehova woonannyeele ukati waapheelaawe umalamaliha isittatti yo Sotoma. Yehova ahoruma malayikha urwaa umwiirela Loti wiira atthawele ncoko wo mmyaakoni. Masi Loti ahoova ni khaatthunne urwaa uyo ncokooyo. Vano uyo naamucyaawe aholepela wiira atthawele ncoko weehaniya Zoar, isittatti yankaani Yehova yaalakenlyaawe umalamaliha ciicammo. Unari wiira Yehova khanle oolipalipa, uyo aahala umwiirela Loti wiira eettele itthu yeereliyaawe. Masi uhiya commo, Yehova ahotthuna itthu Loti yaalepenlyaawe ni ahorukunusa itthu yaalakenlyaawe; uyo aheera wiira khaahala umalamalihe ile isittattiile. (Upha. 19:18-22) Unavinreene ukati mwinci, Yehova ahowoonela uthunku atthu yaakhala u Niinive. Uyo ahonruma porofeeta Jonas urwaa uhimya wiira iyo isittattiiyo ni atthu otheene yaakhala nhina waya yanhala umalamalihiya. Masi ukati atthu o Niinive waattharuwilyaaya, uyo ahowoonela uthunku ni khaatankanyale iyo isittattiiyo. —Jonas 3:1, 10; 4:10, 11. w23.07 ipaag. 21 iparaag. 5

Ntakihero na Yehoyasi ninniitthuciha isiyani? Mwiri uhirina mitithari cookhomaala uhaana utthukeleliyaka nipuro wiira weemele saana. Waahitthukeleliyeke, uyo pooti umorela vathi nlattu wophyoo. Yehoyasi aanaakaviheriya ni Yehoyata. Masi Yehoyata waakhwilyaawe, vano Yehoyasi anceraka waakhalakhalana atthu oohinamaana, khaakhitinri ulipa mminepani ni ahohiya umwiiwelela Yehova. Iyo itthwiiyo inoonihera wiira hiiva khaninlamuliya umwiiwelela Yehova nlattu wo wiireliya naamuciihu awula naatthu akiina o wanlokoni. Napheelaka ukhalana upatthani woolipa ni Yehova, nihaana nilipihacaka unfenta wihu ni umoova wihu, nisomaka Ibiiblya, nuupuwelaka insomeehu ni nilompaka. (Jer. 17:7, 8; Akol. 2:6, 7) Khweeliini, itthu Yehova innilepelaawe wiira nipanke khinakhala yuulupale. Itthu innilepelaawe ihohimiya nhina Eklesyaste 12:13, ineera: “Umoove Nluku ni wiiwelele malamulwaawe, kontha ila phi itthu inlamuliyaawe upanka khula pinaatamu.” Namoovaka Yehova, hi ninaahala ukhitiri uvilela khula itthu ni khula marikariko anhala uniphwanya wahoolo. Khiivo itthu yoohinamaana inhala ukhitiri uhonona upatthaniihu ni Yehova. w23.06 ipaag. 19 iparaag. 17-19

Wuupaceroni iveerusu 5 wiiriye co: “Ule onkomile wahiceni heera.” (Apoka. 21:5a) Ala moolumwaala amphwanyannya paahi mapuro mararu Yehova anoolumaawe nlivuruni yo Apokalipise. Khanaari nlayikha noolumacile ni khaari Yesu, masi Yehova mwaneene phoolumile! Iyo itthwiiyo inaaniiriha ukhuluvela moolumo otheene amphwanyannya nhina iveerusu 5. Kontha isiyani? Kontha Yehova “khanootha.” (Titu 1:2) Phimaana, nihaana nikhuluvelaka moolumo amphwanyannya nhina Apokalipise 21:5, 6. Yehova nuulumilyaawe nikhanle “Woone!” Nuulumo “woone!” nitaphuleliya niiluka ikereeku ninaaromoliya mapuro menci nlivuruni yo Apokalipise. Isiyani Nluku ihimilyaawe nhina iyo iveeruswiiyo? Uyo heera: “Kinaakhaliha conaanaano citthu cotheene.” Yehova naarwaa upanka ayo marukunuswaayo wahoolo. Uyo naakupaleela wiira naahala wiirannyeeha itthu ikhuluvelihilyaawe. Uyo nooluma khampa wiira aheerannya ayo marukunuswaayo. —Isai. 46:10. w23.11 ipaag. 3-4 iparaag. 7-8

Uhookhalaru wiira Peturu ahoona ni aheewa citthu cinci comaana nari ni Yesu, uyo nanlelo ahaana moopuwelelwaawe oohiloka. Moone ala matakiherwaala. Ukati Yesu wenryaawe wiira ahaana ahuvaka ni ukhwa wiira ciirannye inatiri co mbiiblyani, Peturu ahomwiirela wiira iyo khayaahala unkhumelela. (Mark. 8:31-33) Ni ikwaha cinci, Peturu ni maapostolu akiina yannyakulihana wiira acuwele tipani khanle muulupale iriyaryaaya. (Mark. 9:33, 34) Uhiyu waya nihuku Yesu naavariyaawe, Peturu ahopanka itthu woowuupuwela. Uyo ahothikila nnyaru na ntthu. (Joau 18:10) Ni uhiyu yooyo, Peturu ahoova cinene mpaka ahokhotta ikwaha tthaaru wiira aari mpatthani a Yesu. (Mark. 14:66-72) Iyo itthwiiyo yahomwiiriha Peturu wunla venci.Peturu wahonriipa nrima nlattu wo citthu caavonyanihacilyaawe. Waahookhalaru commo, Yesu khanhiile. Yesu wunwelelihiya wawe, ahonvaha ukati Peturu wiira oonihere unfenta wawe. Yesu ahonvaha nteko Peturu: ukhala makampuci owiiyeviha ni uwacera ikhontwaa cawe. (Joau 21:15-17) Peturu ahopanka itthu yaalepeliyaawe ni Yesu. Peturu aari u Yerusalemu nihuku no Pentekositi ni uyo aari nhina waatthu yaapaceriye uthanliya ninnepa wowaarya. w23.09 ipaag. 22 iparaag. 6-7

Peturu howiirela mahumu co: “Nwacere ikhontwaa ca Nluku”. (1 Pet. 5:1-4) Wakhala wiira nyuuva nkhale humu, hi ninaacuwela wiira nyuuva nnawaafenta mayamunneenyu ni nnaapheela waawacera saana. Masi ikwaha cikhwaawe, nyuuva pooti uhikhalanaka ukati awula utoomwa cinene wahinkhitiriinyu uvara nteko nvahaceriyeenyu. Wakhalaka commo nyuuva nnolamuliya upanka isiyani? Munhimerye Yehova mananna cineecooneenyu. Peturu hantikha: “Wakhala wiira ntthu nanvarela nteko Nluku apanke niikuru cinvahiyaawe ni Nluku.” (1 Pet. 4:11) Mayamunna anawaanana marikariko anhala uhikhitiryaa umalamaliha nikhalaka ila ituninya yoohilokeela. Masi nhiliyale “makampuci muulupale” Yesu Kristu, pooti waakavihera venci uvikana nyuuva. Uyo pooti waakavihera ilelo ni ciicammo upephooni. Itthu Yehova nopheelaawe wiira mahumu apanke ukhanle wiira yaafente mayamunna, yaawacere ni “akhale ntakihero nuulupale.” w23.09 ipaag. 29-30 iparaag. 13-14

We must avoid resorting to using human moopuwelelo ahineewelela malamulo a Yehova. Noopuwela khampa atthu ahineettela malamulo a Yehova, hiiva pooti ukhala khampa ayo atthwaayo. (1 Akorintu 3:19) “Ucuwelaca wo ntuninyani” ikwaha cinci unaawiiriha atthu uhimwiiwelela Nluku. Makristau akiina o Pérgamo ni o Tiatira yahosoverihiya upanka citthu coohiloka naale yaakhala iriyaryaaya yaarupihana woohiloka ni yaaswalela attontto. Yesu ahovaha ikano nno nlokonno kontha yaanaahiyerera ukhalaka urupihaniya woohiloka. (Apoka. 2:14, 20) Ilelo, unaavira utepaka ukhanyererihiya wihu wiira naamini ukhalana mawehero ontuninyani. Atthunaka amuciihu awula ninaacuwelaneehu, anaamananiha uniiriha wuupuwela wiira ninaatepiha ni khunnanara uhiiwelela nlamulo nimoca paahi na Yehova. Ayo pooti wiira khunnanara uciveliha irutthwiihu ni ikettelo co mbiiblyani khacinafayita-tho. Ikwaha cikiina, pooti waneereehu wiira ikano Yehova nonivahaawe khacincuwannyaaca saana. Atthunaka ninawiicoona uttehattehiya upanka ‘itthu inaateelihiya mbiiblyani.’ —1 Cor. 4:6. w23.07 ipaag. 16 iparaag. 10-11

Maria anumwaane Yesu,yaanaapheela ikuru. Ayo yaari ahinatheliya, masi yanhala urupala irukulu. Ayo yaari ahinatoko waakhalana asaana, masi yahaana anwacera mwanhima aahala ukhala Mesiya wahoolo. Ukhala wiira ayo yaari mwaaruusi, isiyani yaahalaaya unhimerya Yusufu ampakanenle? Luka 1:26-33 Manannani ayo yakhenlyaaya ikuru? Ayo yahaavya ukaviheriya naatthu akiina. Wootakihera, ayo yaholepela nlayikha Gabriel wiira nahimerye citthu cikiina nhina nrintti waakhenlyaaya. (Luka 1:34) Woohipica wahoolo waya, ayo yahopanka ikwaha mpaka “ncoko caari myaako cinci” u Yuuta wiira yanthotole Elisapete aari nlokwaawe. Elisapete ahonttottopela Maria ni ahovareliya nteko wiira ampankele inatiri mwaana aahalaawe unyara Maria. (Luka 1:39-45) Maria aheera wiira Yehova “ahoonihera ikuru cawe anvarelaka nteko.” (Luka 1:46-51) Yehova ahovarela nteko nlayikha Gabriel ni Elisapete wiira anlipihe Maria. w23.10 ipaag. 14-15 iparaag. 10-12

Mananna makristau cinswalyaaya. Makristau vakaani paahi phinthanliya ninnepa wowaarya wa Nluku. Ni nlattu woothanliya, ayo anaakhalana upatthani muulupale ni Yehova. Ayo makristawaayo ari 144.000 ni anhala ukhala anankuttho wiirimu nkhayi ni Yesu Kristu. (Apoka. 14:1) Nipuro Nowaarya naari ntabernaakuluni nintaphulela iparakha irinaaya ayo asaana a Nlukwaayo yakhalakoono va watuninyani va ahinarwaa wiirimu. (Aroo. 8:15-17) Vano Nipuro Nootepa Waarya no ntabernaakuluni nintaphulela irimu, nipuro ninkhalaawe Yehova. “Ikortiina” yaakawaniha Nipuro Nowaarya ni Nipuro Nootepa Waarya intaphulela irutthu ya Yesu. Ukati Yesu waaryaawe watuninyani ni waarinaawe irutthu yeepinaatamu, uyo khaalamuliya urwaa wiirimu wiira akhale Nankuttho Muulupale ntempuluni yo mminepani. Ukati uvahilyaawe irutthwaawe wiira awoopole apinaatamu, Yesu haahulela iphiro makristau oothanliya wiira naayo arwee yakhale wiirimu. Khampa Yesu, makristau oothanliya ciicammo ahaana yahiyaka irutthwaaya yeepinaatamu wiira yaakhele iparakha yoorwaa ukhala wiirimu — Mabere. 10:19, 20; 1 Akor. 15:50 w23.10 ipaag. 28 iparaag. 13

Gideau ukati woolumiyaawe pusya naalopwana o Efraim khaaviruwile. (Masuw. 8:1-3) Uyo ahoonihera wiira ahaana wiiyeviha wo mmoopuweleloni wawe, awiiwelelaka citthu cotheene coolumaaya ayo alopwanaayo. Nlattu woopanka iyo, ahaamaalihaca. Unaareera mahumu untakiha Gideau yoolumiyaaka pusya, yiiwelelaka saana citthu cinhimiya ni umaala. (Tiya. 3:13) Nyuuva mwapankaka commo, nnaakavihera ukhala nnema wanlokoni.Ukati waattottopeliyaawe nlattu woowoopola apoovu a Nluku mmatatani wa apoovu o Midiã, Gideau anvahale Yehova uttitthimihiya wotheene. (Masuw. 8:22, 23) Manannani mahumu anlamuliyaaya untakiha Gideau? Ayo pooti unvaha Yehova uttitthimihiya wotheene wo citthu ankhitiryaaya upanka. (1 Akor. 4:6, 7) Wootakihera, humu mmoca attottopeliyaka nlattu wootaphulela saana myaha cawe, uyo pooti waneeraawe wiira khitinri utaphulela ratta kontha citthu cuulumilyaawe kumihile nnuulumoni na Nluku, Ibiiblya; awula nlattu wootaphulela attharaka malakihero anvahiyeehu mumphwinkoni wa Yehova. Ikwaha cikhwaawe, humu pooti weemela ni wuupuwela wakhala wiira khaneettitthimiha mwaneennyaawe. w23.06 ipaag. 4 iparaag. 7-8

Wakhalaka wiira itthu inonlepeleehu Yehova khineerannya, nihaana niikohaka nnya citthu tthaarunnya. Yoopacera: ‘Kiireke wiira itthu inlepelaaka ikhanle yomaana?’ Ukati nkhwaawe, hi ninoopuwelaka wiira ninaacuwela itthu impheeleehu. Masi atthunaka, ninlepela itthu ihinhala uniphwanyiha ifayita wahoolo. Nalepelaka wiira masakheehu amalihiye, pooti ukhalaka wiira ahaavo mananna makhwaawe owaanana ayo masakhaayo. Ni citthu cikhwaawe cinonlepeleehu Yehova atthunaka cinaavirikaniha ile impheelaawe. (1 Jo. 5:14) Nwuupuwele ayari aromoliye wipaceroni. Ayo yahonlepela Yehova wiira mwanaya hihiye weettela ikhweeli. Unkhala toko wiira itthu ilepenlyaaya khinakhala yoonanara. Masi muupuwele: Yehova khanhala unkhanyereriha ntthu unswalela. Uyo nopheela wiira otheene cihu, hataa ciicammo asaaniihu, athanle unswalela. (Deut. 10:12, 13; 30:19, 20) Phimaana, uhiya unlepela Yehova wiira amwiirihe mwaninyu uhihiya weettela ikhweeli, nyuuva ayari nnolamuliya unlepela Yehova wiira ookavihereni unvara nrima mwaninyu ni unkurumica wiira mwaneennyaawe alakele unfenta Yehova ni ukhala mpatthannyaawe. —Miru. 22:6; Efesu 6:4. w23.11 ipaag. 21 iparaag. 5; ipaag. 23 iparaag. 12

Nlattuni ikhanlyaaya itthu yofayita cinene waamaaliha mayamunneehu ni mayanuunwiihu? Ilivuru imoca intaphulela moolumo o mbiiblyani ihohimya wiira nuulumo “umaalihana” nantikhilyaawe Paulu maanaaya wiira “urwaa mpaka nipuro niryaawe ntthu amphwanyile masakha ni ukhala nkhayi nuuyo wiira ninlipihe.” Naamaalihaka mayamunneehu, hi ninawaavara moono wiira naakavihere uvilela masakha ni arwee uhoolo munttalani weekumi. Khula ikwaha inkhaleehu nkhayi ni munneehu awula nuunwiihu ukati unonlaawe nlattu wo masakha ankhumelenle, hi ninaamoonihera wiira ninanfenta. (2 Akor. 7:6, 7, 13) Ntthu amoonelaka uthunku nkhunanawe, naahala upheela ummaaliha ni upanka itthu wiira ankavihere. Maanaaya wiira woopacera, hiiva ninawoona uthunku, vano phinommaaliheehu ntthuuyo. Nttwee noone mananna apostolu Paulu coonihenryaawe mananna Yehova cinnoonelaawe uthunku ni cinnimaalihaawe. Paulu heera wiira Yehova khanle “Apaapeehu oowinciva uthunku ni Nluku rina mamaalihero otheene.” —2Ako. 1:3. w23.11 ipaag. 9-10 iparaag. 8-10

Atthari otheene a Yesu ahaana yawehereraka wiira anaahala waakhumelela masakha. Moone ntakihero na Paulu. Uyo ahowiirela makristau o Tesalonika co: “Uwakati naariihu ninyuuvaca, hi nahoohimeryani wiira yanhala unikhumelela masakha ni iyo phi itthu ineerannyaaka.” (1 Atesal. 3:4) Ni Paulu ahowantikhela akorintu co: “Khanimpheela wiira nyuuva mayamunna nkhale woohicuwela masakha anikhumelenle .  . . mpaka khanaacuwela wakhala wiira nanhala ukhala akumi awula mena. (2 Akor. 1:8; 11:23-27) Mahukwaala, hi ciicammo pooti wanweherereehu unikhumelela masakha oohirikarika. (2 Tim. 3:12) Nlattu woomwaamini Yesu, atthunaka apatthaniinyu ni amuciinyu khanootafitini saana. Awula nyuuva anawuukhumelelani masakha untekoni winyu nlattu wookhotta wootha awula winnya. (Mabere. 13:18) Pooti ukhalaka wiira nyuuva nhopaca ulupatthiya niikuvernu nlattu woolalya ihapari comaana. Masi hataa yuuphwanyakani masakhani, Paulu enre wiira hi ninaakhala ootteeliya. w23.12 ipaag. 10-11 iparaag. 9-10

Yakopi yahonkhumelela masakha. Watthokoni wawe, yahaavo atthu enci. Masi asaanaawe khayeewanana, mpaka wahophiya ukati wantumihilyaaya mwanhimaaya, Yusufu, wiira akhalihiye ipottha. Asaana eeli a Yakopi, Simeyau ni Levi yahonanari­ha kahi paahi ncina naamucyaaya, masi ciicammo ncina na Yehova nlattu wo itthu yoohinamaana yaapankilyaaya. Ciicammo, amwaara a Yakopi yaafentaawe cinene yeehaniya Rakeeli yahokhwa ukati wannyaraaya mwanaya onayeeli. Ni nlattu woovola itala cinene ncoko waakhalaawe, Yakopi ahaana athamelaka Wiciipitu, hataa ukhalaka wiira ahooluvala. (Upha. 34:30; 35:16-19; 37:28; 45:9-​11, 28) Hataa cinkhumelelaka citthu cotheenennyo, Yakopi khaahiile umwaamini Yehova ni waamini inatiri cawe. Yehova ahomoonihera sana-saana Yakopi wiira anciveliya nuuyo. Wootakihera, hataa ukhalaka wiira, Yehova khaahiile uncaaliha ni winciviha mihakhu caarinaawe. Ni Yakopi ahonsukhuru Yehova venci uwakati waaturuwenlyaawe umoona mwanawe anfentaawe cinene, Yusufu. Uyova oopuwela wiira mwanawe ahokhwa myaakha cinci uttuli. Upatthani woolipa Yakopi waarinaawe ni Yehova phankavihenre uvilela masakha otheene ayo. (Upha. 30:43; 32:9, 10; 46:28-30) Naahihiyerereke ukhalana upatthani woolipa ni Yehova, hiiva ciicammo ninaahala ukhitiri uvilela masakha annikhumelela ukati wahaaweherereehu. w23.04 ipaag. 15 iparaag. 6-7

Nhina Isaalimu 23, Davidi nawoonihera ukhuluvela wawe wiira Yehova aananfenta ni aananwacera. Uyo naattonkaca upatthani woolipa waarinaawe ni Yehova ni ahomwiihana ukhala Makampucyaawe. Davidi aanawiicoona ukhikiceriya ni aananhiya Yehova anhoolelaka ni aanankhuluvela venci. Davidi ancuwela wiira Yehova anhala umoonihera nifento khula nihuku. Nlattuni Davidi waakhuluvelaawe commo? Khula ukati, Davidi aanawoona wiira aanawaceriya sana-saana ni Yehova. Uyo ahaana yotheene yaapheelaawe ni khiivo yanthwa. Ciicammo, Davidi ancuwela wiira Yehova aari mpatthannyaawe ni aanaamoona ukhala ntthu omaana. Phimaana, Davidi ancuwela wiira, hataa yiirannyaaka isiyani wahoolo, Yehova anhala unwacera. Davidi ankhuluvela cinene wiira anfentiya ni Yehova. Nwo ukhuluvelanwo waanaavikana khula masakha yaakhalanaawe ni phaamwiiriha ukhala untteelaka nrima. —Isaa. 16:11. w24.01 ipaag. 29 iparaag. 12-13

Apoovu a Yehova ilapo cinci anaakhitiri uvara nteko woolalyeera woohilupatthiya venci. Khweeliini, nteko woolalyeera ntuninyani motheene unvira utepaka urwaa uhoolo. Ilelo, mayamunna o Mphwinko wo Mahumu Unhoolela khunhiya utthara malakihero a Yesu. Nlattu wootthara malakiherwaawe, ayo anawiikurumica wiira citthu cotheene cinlakelaaya cihivirikane niitthu impheelaawe Yesu. Ciicammo, mamootoli osirikwiitu ni mahumu anaarumiya wiira yaavahe malakihero mayamunna mmalokoni. Mahumu akhanle makristau oothanliya ari wantatani no nlopwana na Yesu. (Apoka. 2:1) Khweeliini mahumu otheene akhanle oopahuwa ni anaavonya. Moceesi ni Josuwe ciicammo cihaavo citthu caavonyihalyaaya. (Manu. 20:12; Jos. 9:14, 15; Aroo. 3:23) Unookhalaru commo, hiiva ninawoona wiira Yehova naahoolela ipottha yookhuluvelya ni nawaahoolela mahumu. Ni uyo khanhala uhiya waakavihera ayo Phimaana, otheene cihu nihaana nikhuluvelaka malakihero anvahiyeehu ni Yesu naaruma ayo alopwana ookhuluvelyaayo wiira anivahe malakihero. w24.02 ipaag. 23-24 iparaag. 13-14

Hiiva ciicammo pooti unttottopela Yehova namuulumaka saana, ninsukhuruku ni ninfentaka. Ukati unlalyeereehu pooti wanoopuwelehu wiira itthu yuulupale cinene ukhanle waakavihera atthwaayo umwaattamela Yehova ni umoona wiira uyo akhanle Apaapeehu oofenta. (Tiya. 4:8) Hi unaanicivela uwoonihera ayo atthwaayo mbiiblyani wiira Yehova khanle Nluku oofenta, nasariya, oocuwelaca, nakuru ni wiira uyo haana makhalelo makhwaawe omaana. Inanna ikhwaawe yonttottopela Yehova ukhanle unswalela ni upanka yotheene inkhitiriihu wiira nintakihe. (Efesu 5:1) Upanka commo pooti uwiiriha atthu akhwaawe woona wiira hiiva ninaavirikana naatthu akhwaawe. (Mat. 5:14-16) Naakumananaka ayo atthwaayo, hi pooti waahimerya nlattuni ninvirikaneehu naatthu enci. Upanka commo pooti uwiiriha atthu akiina upheela wiitthuca-tho wiira ancuwele Nlukwiihu. Nanttottopelaka Yehova naayo manannaayo, uyo naakhala ootteeliya venci. —1 Tim. 2:3, 4. w24.02 ipaag. 10 iparaag. 7

Wiira ukhale nkristau ookhomaala, uhaana wiitthucaka citthu cinhala wuukavihera uwacera miteko co wanlokoni ni uphwanya nteko wiira wiilihere weeva ni amucyaa. Ciicammo, uhaana wiitthucaka citthu cinhala wuukavihera waatanaca naakhwaa.Ibiiblya ineera wiira usoma Nuulumo na Nluku mahuku otheene ni wuupuwela inhimyaaya unankavihera ntthu ukhala ootteeliya ni cinamweettela saana citthu cotheene cimpankaawe. (Isaa. 1:1-3) Usoma Ibiiblya khula nihuku unaahala wuukavihera ucuwela saana mananna Yehova cinoopuwelaawe ni weeva unaahala wiitthuca wuupuwela saana ni weettela ikano co mbiiblyani. (Miru. 1:3, 4) Wanlokoni anaapheeliya mayamunna ancuwela usomiha ratta wiira yiitthucihe malakihero ni ikano co mbiiblyani. Weeva wacuwelaka usoma, unaahala ukhitiri utaphulela myaha saana ni uvaha ikomentaariyu cinhala waalipiha mayamunna. Citthu cinhalaa wantikha cinaahala ulipihaca waamini waa ni weeva pooti uvarela nteko wiira waalipihe akhwaa. w23.12 ipaag. 26-27 iparaag. 9-11

Wakhalaka wiira nnawoova, muupuwele itthu Yehova inhalaawe upanka wahoolo. Muupuwele mananna cinhaleenyu ukhala amalamalihiyaka Sotwani, atthu oohinamaana, yahalaka paahi atthu ooreera nrima ni narwaaka ukhala atthu oohipahuwa. Nthoonyero nimoca no wakonkereesuni yo 2014 nahoonihera mananna ninlamuliyeehu wuupuwela niweherero nihu. Nhina nno nthoonyeronno, amuci yaanawuupuwela mananna cinhalaaya ukhala upeephoni. Ayo yahoopuwela mananna makhalelo oopeephoni cinhalaaya uvirikana niitthu inhimyaaya 2 Timotiyu 3:1-5. Yaacaka ipeephoni, nnyo iveerusunnyo caahala wiira co: “Masi ucuwele wiira upeephoni unhala ukhala ukati atthu otheene unhalaaya utteeliya nrima cinene. Kontha apinaatamu anhala ukhala oofentana, owaacivela citthu ca Nluku, oohiicuunuwiha, owiiyeviha, onttitthimiha Nluku, oowiiwelela asithumwanaya, oosukhuru, ookhuluvelya, owaafenta amucyaaya, owiiwanannya, oowuuluma saana akhunanaya, owiivaraca, owaataana, owaacivela citthu comaana, ooreera nrima, owiiwa uhimeriya, oohiithenca, oohoolelihera unfenta Nluku, kahi citthu caya. Ala atthwaala nwaatana­ne.” Nyuuva nnawoopaka mwaha nkhayi naamuciinyu, nimayamunna ni wuuluma mananna ukumiihu cinhalaaya ukhala upeephoni? w24.01 ipaag. 6 iparaag. 13-14

Isaalimu 149:4 inaanimaaliha: “Yehova naaciveliya naapoovwaawe.” Masi ukati nkiina, atthu akhwaawe anaakhala nimasukhuli venci ni wancera wuupuwela co: Kiireke miiva Yehova naakoona ukhalana ifayita?’ Hataa aswali ookhuluvelya a Yehova okhalayi wahaavo ukati weeconnyaaya commo. (1 Sam. 1:6-10; Jó 29:2, 4; Isaa. 51:11) Ibiibiliya inawoonihera sana-saana wiira apinaatamu oopahuwa pooti ukhitiri untteeliha nrima Yehova ni wooniya ukhala atthu omaana nuuyova. Manannani? Nihaana nooniheraka umwaamini Yesu ni nihaana nipattisiyaka. (Joau 3:​16) Napankaka commo, ninawoonihera wiira nihottharuwa itampi cihu ni nihonkhuluveliha Yehova wiira ninaahala upanka ile impheelaawe. (Mite. 2:38; 3:19) Yehova unantteela nrima cinene napankaka commo wiira nimwaatanane. Neekurumicaka upanka itthu inkhuluvelihileehu, Yehova naahala unoona ukhala atthu omaana ni asipatthannyaawe. —Isaa. 25:14. w24.03 ipaag. 26 iparaag. 1-2

Wakhalaka wiira ahooleli ookuvernu anaanaateeliha ulalya ihapari comaana, hi pooti waatakiha maapostolu. Hi khaninhiya ulalya hataa yanihiihaka. Hiiva ciicammo pooti wankupaliihu wiira Yehova naahala unikavihera ulipa nrima ni ulalyeera Hiiva otheene cihu ninawaanana masakha oorika, kahi paahi o mwiirutthuni wihu, masi ciicammo o mmupuweleloni wihu. Atthu akiina ahookhweliya, akiina anawaanana masakha watthokoni, akiina anaalupatthiya awula ahaana masakha makhwaawe oorika. Ni wiira watepe, citthu toko iretta coomwaryeela ni ikhotto cinaatepa uniwaanela masakha. Phimaana munhulele nrimeenyu Yehova ni munhimerye citthu cotheene cinoovirani, khampa nnomuulumana mpatthaniinyu. Munkhuluvele Yehova, uyo naahala wuukaviherani. (Isaa. 37:3, 5) Itthu inhala unikavihera ‘uhihiya uvilela ukati wo masakha’ ukhanle uhihiyerera ulompa. (Aroo. 12:12) Yehova naacuwela itthu inaavira aswalyaawe ookhuluvelya. Uyo “nawiiwa ulepela waya ukaviheriya.” —Isaa. 145:18, 19. w23.05 ipaag. 5-6 iparaag. 12-15

Napheelaka ulakela itthu yuulupale, nihaana nitothaka ucuwela ‘isiyani impheelaawe Yehova,’ vano ulakela upanka itthu impheelaawe. (Efesu 5:10, 17) Naphwanyaka ikano co mbiibiliyani cinnoonihera itthu yoohala upanka, unkhala khampa Yehova naanoonihera itthu uyova inoopuwelaawe nhina uyo mwahooyo. Vano, neettelaka ikano ca Yehova, ninaakhitiri ulakela upanka citthu comaana. Ntakhali’ noolumiya nhina nnyo iveerusunnyo khanle Sotwani. Uyo nopheela wiira niwacere citthu co ila ituninyeela mpaka wahinkhalaneehu ukati wonswalela Yehova. (1 Jo. 5:19) Woohicuwelela, nkristau atthunaka nawancera utotha cinene nsurukhu, usoma ni nteko, uhiya waavya mananna oovara cinene miteko ca Yehova. Iyo itthwiiyo yeerannyaaka, inthoonyera wiira uyo hancera wuupuwela khampa atthu o ntuninyani. Ninaacuwela wiira nsurukhu, usoma ni mihakhu khacinakhala citthu cootakhala. w24.03 ipaag. 24 iparaag. 16-17